दानिए़ल 8 - लिम्बुदानिए़लरे़ सुफोओ निसुबा थुःम्बा नु मे़ःन्दबका 1 तगिबा सुफोन् आङ्गाॽओ ओसेःन्धाङ् पोःक्खे़आङ् एगाङ्, हाङ् बेलसजररे़ हाङ्युक् चोगुबा सुम्सिगेक्पा तङ्बेओ, आङ्गाॽ दानिए़लरे़ लत्छा वेॽ सुफोधिक् निसुङ्॥ 2 आङ्गाॽ आसुफोओ आङ्गाॽ आप्फेक् एलाम ते़ङ्गप्पोबा सुसन हाङ्यक्को वयाङ्बा निसुङ्, सुफोओ आङ्गाॽ उलै वालाम्मिल्ले़ कुबेसाङ् वयाङ्॥ 3 आङ्गाॽ थो ओमयाङ्, हे़क्क्याङ् आङ्गाॽ आदगि खावाःल्ले़ कुबेसाङ् केःम्ब केःम्बा कुदाङ् ने़त्छि के़युङ्बा थुःम्बा थिक् ये़बे़बा निसुङ्॥ खे़न् कुदाङ्हाॽओ याङ्सि के़लिङ्बे़न् वेॽइन्नुःल्ले़ केःम्बा चोगे़॥ 4 खे़न् थुःम्बाःल्ले़ नाम्धा नु थाङ्गे़त् हे़क्क्याङ् लाङ्गे़त् पिसाङ् थोःक्खुर यागे़बा आङ्गाॽ ओमे़त्तुङ्॥ खे़ल्ले़ कुदक्ले़ङ्वाओ हाःत्ताङ् ये़प्मा मे़सुक्ते़न् हे़क्क्याङ् खे़ल्ले़ कुमुक्साम्लाम् आत्तिन्नाङ् से़ःप्सिङ्मा मे़सुक्ते़न्॥ खे़ल्ले़ थे चोःक्मा निङ्वाॽ इःत्तु, हाबा खे़न्ने चोगुआङ् पयम् यम्बा पोःक्खे़॥ 5 आङ्गाॽ कल्ले़ कुयाःम्बेओ निङ्वाॽ इःत्छिङ्ङार वयाङ्ङिल्ले़, चघप् मिक्हाॽरे़ कुलुम्मो लत्छा मिक्के़दोःक्पा कुदाङ् के़युङ्बा मे़ःन्दबका थिक् खाम्बाङ्ङिन् मे़न्छुए इक्सादिङ् खाम्बेःक्मे़न् काःक्तुर नाम्धा पिसाङ्लाम् फे़रे़॥ 6 वहःङ्ङिल्ले़ कुयाओ के़ये़प्पा कुदाङ् ने़त्छि के़युङ्बा आङ्गाॽ निसुङ्बा मे़ल्लुक् ले़प्माङ् खे़न् फे़रे़ हे़क्क्याङ् साॽरिक् साःम्सिङ्ङाङ् खे़न् थोःक्खु॥ 7 साॽरिक् कुसाक्के़न् पोगे़आङ् खे़ल्ले़ मे़ल्लुक्के़न् चिधोःङ् चिधोःङ् थोःक्खु हे़क्क्याङ् कुदाङ्हाॽ ने़प्माङ् ए़क्खु पिरुबा आङ्गाॽ निसुङ्॥ खे़ल्ले़ कुदक्ले़ङ्वाओ ये़प्मारे़ लागि खे़न् मे़ल्लुक्के़न् मे़न्धुम्मनाबा पोःक्खे़॥ खे़न् मे़ःन्दबकाःल्ले़ खाम्बाङ्ङो खे़न् थाप्सुआङ् चिराक् चिराक् लाःक्तु, हे़क्क्याङ् खे़ल्ले़ कुमुक्साम्लाम् मे़ल्लुक्के़न् से़म्मा हाःत्ले़आङ् मे़सुक्तुन्॥ 8 खे़न् मे़ःन्दबकान् साॽरिक् यम्बा पोःक्खे़, कर कुमुक्साम्मिल्ले़ वे़न्दुबा ये़म्मो खे़ल्ले़ साॽरिक् के़धुम्बा कुदाङ्ङिन् फल्लक् ए़गे़, हे़क्क्याङ् खे़ल्ले़ कुले़क्वाओ ताङ्साङ्बो के़रे़क् पिसाङ् के़हिसिङ्बा एःक्समा परिक्पा मिक्के़दोःक्पा लिसि कुदाङ्हाॽ लिङे़॥ 9 लिसि कुदाङ्हाॽओबा थिक्लाम् वेॽ कुदाङ् थिक् लिङ्से़ थाङे़, खे़न् चुक्सा लिङ्मा हेःक्ते़ कर लाङ्गे़त् पिसाङ् नु नाङ्गे़न् पिसाङ् हे़क्क्याङ् नुबा लाजेन् ले़प्माङ् के़धुम्बा पोःक्खे़र पोरे़र पे॥ 10 साङ्ग्राम्पेदाङ्बा थक्सुबाहाॽओ मे़ङ्गे़त्ते थारिक् खे़न् पोरे़र पे, हे़क्क्याङ् खे़ल्ले़ खेःम्सिक्पा लुप्हाॽ फत्तुसिआङ् यो इक्सादिङ् खाम्बेःक्को मक्थासुसि हे़क्क्याङ् लाङ्ङिल्ले़ चिदोॽ चिदोॽ तोॽरुसि॥ 11 खे़न् आप्फेक् साङ्ग्राम्पेदाङ्बा थक्सुबाहाॽरे़ खुन्छिॽ थक्मोबा यारिक् यम्बा चोःक्सिङ्॥ खे़ल्ले़ यहवे दाङ्बे़ल्ले़ थिक्याःन्धक्पा कुसिदुङ्जभाःन् नाप्तु, हे़क्क्याङ् खुने़ॽ कुसेसेदे़न्निन् यो मक्थासु॥ 12 पिफ्युङ्ङिल्ले़ चोगुल्ले़, यहवे दाङ्बे़ल्ले़ कुमनाहाॽ नु थिक्याःन्धक्पा सिदुङ्जभान् खे़न् हुक्मे़सुप्तुआङ् वये़॥ खे़ल्ले़ से़क्खान् खाम्बाङ्ङो लाप्फुसु हे़क्क्याङ् खे़ल्ले़ चोगुबा के़रे़क् याःम्बक्को खे़न् कुलिङ्दो के़गे़प्पा पोःक्खे़॥ 13 खे़न् एगाङ् आङ्गाॽ सेसे माङ्लाइङ्बा ने़त्छि पारे़सिबा खे़प्सुङ्, थिक्पारे़ वेॽ सेसे माङ्लाइङ्बे़न् अक्खे मे़त्तु, “थिक्याःन्धक्पा सिदुङ्जभा, खाप्पुथ्यःङ् के़जोःक्पा पिफ्युङ्ङिल्ले़ कुयाःम्बेओ, हे़क्क्याङ् सेसेदे़न् नु थक्सुबाहाॽ लाङ्ङिल्ले़ मे़दोॽरुसिबा सुफोन् के़प्मारे़ लागि आक्खे़न् ये़म् थरुबे?” 14 खुने़ॽ आङ्गाॽ मे़त्ताङ्, “२,३०० युःन्धो हे़क्क्याङ् तानाम् थारिक् थरुॽ, खे़ब्याङ् सेसेदे़न्निन् याम्मो मे़दोन्दुरो॥” गब्रिएल माङ्लाइङ्बे़ल्ले़ सुफोःल्ले़ कुबे हन्दु 15 आल्ल आङ्गाॽ, दानिए़लरे़ सुफोन् ओमे़त्तुङ्ल पत्छाङ् हे़क्क्याङ् कुसिङ् निःप्मा निङ्वाॽ चोगुङ्ल पत्छाङ्ङिल्ले़ मना हे़क्तङ्बा निगे़दे़प्पा थिक् आङ्गाॽ आदगि ये़म्सिङ्॥ 16 हे़क्क्याङ् उलै वालाम् अक्खेलॽरिक् इङ् के़भोबा मनाःल्ले़ कुइक्लाधिक् आङ्गाॽ खे़प्सुङ्, “गब्रिएलए, कन् मनान् सुफोःल्ले़ कुबेन् चे़क्ते़ॽ॥” 17 आल्ल खे़न् आङ्गाॽ ये़बाङ्बादे़न् निःत्ताङ् फे़रे़ल्ले़, आङ्गाॽ साॽरिक् किसाङ्ङाङ् खाम्बाङ्ङो सम्बे़त् ने़स्साङ्॥ खुने़ॽ आङ्गाॽ मे़त्ताङ्, “नासिङ्गे़न् थक्ला के़गप्पा मे़न्छाम् याप्मिए, कन् सुफोःल्ले़ इक्सादिङ् खाम्बेःक्माल्ले़ कुनुप्मा ये़म्मिन् ओसेःन्धाङ् चोगुॽ फाॽआङ् खे़ने़ॽ कुसिङ्निःत्ते़ॽ॥” 18 खुने़ॽ आङ्गाॽनु पारे़र पत्छे़ल्ले़, आङ्गाॽ आनारान् खाम्बाङ्ङो हिसुङ्ङाङ् मुरुक्खुरुक् इप्साङ्ङाङ् पत्छाङ्॥ खे़ब्याङ् खुने़ॽ आङ्गाॽ सुसाङ्ङाङ् ये़प्साङ्॥ 19 खुने़ॽ आङ्गाॽ मे़त्ताङ्, “निङ्वाॽफुमाङ्ङिल्ले़ कुसिक् पोःक्मा ये़म्मो थे पोङ्ॽ, खे़न् आङ्गाॽ खे़ने़ॽ चे़क्ने़र पत्ने़, थेआङ्भे़ल्ले़ सुफोःल्ले़ निःन्धो के़बोङ्बा कुनुप्मा ये़म्मिन् पाःत्तुॽ॥ 20 खे़ने़ॽ के़निसुबा खे़न् ने़त्छि कुदाङ् के़युङ्बा मे़ल्लुक्किल्ले़ मादि नु फारसबा हाङ्जुम्हाॽ ओसेःन्धाङ् चोगुॽ॥ 21 खे़न् कुम्ब्रिक्किल्ले़ के़दे़प्पा मे़ःन्दबकाःङ्ग ग्रिसबा हाङ्जुम्मिन्लो, हे़क्क्याङ् खे़ल्ले़ कुमिक्किल्ले़ कुलुम्मो के़युङ्बा यम्बा कुदाङ्ङिन् खे़ल्ले़ थिक्सिगेक्पा कुहाङ्लो॥ 22 खे़न् के़ए़क्पा कुदाङ्ङिल्ले़ कुले़क्वा के़लिङ्बा लिसि कुदाङ्हाॽग खे़प्मोलाम्मे के़लःम्बा लिसि हाङ्जुम्हाॽरो, कर थिक्सिगेक्पा हाङ्जुम्मिन् कुइसिक् खे़ङ्हाॽ मुक्के़गुबा मे़म्बोङ्ने़न्॥ 23 “खे़न् हाजुम्हाॽरे़ खुन्छिॽ हाङ्युक् चोःक्मा ये़म्मोबा याङ्सिबा ये़न्हाॽओ आल्ल पिफ्युङ्बाहाॽरे़ खुन्छिॽ फे़न्याःम्बक्किन् साॽरिक्के मे़न्वाॽमनाबा पोङ्ॽ, खे़ब्याङ् लत्छा किप्मा के़घुबा, इङ्ले़क् के़जोःक्पा हाङ्धिक् पोक्॥ 24 खे़न् साॽरिक् के़धुम्बा पोङ्ॽ, कर खे़न् आप्फेक् कुमुक्साम्मिल्ले़ग मेःन्॥ खे़ल्ले़ निङ्वाॽ के़माबा मे़क्मासिमे़न् तारुॽ हे़क्क्याङ् खुने़ॽ चोगुबा थे़मा याःम्बक्कोसाङ् कुसाङ् के़लबा पोङ्ॽ॥ खे़ल्ले़ मुक्साम्साबा मनाहाॽ नु सेसे मनाहाॽ मे़क्खुसि॥ 25 खे़ल्ले़ इङ्ले़क्किन् कुलिङ्दो के़त्ल याःन्दुॽ हे़क्क्याङ् खुने़ॽ आप्फेक् यम्बा लेःत्छिङ्ॽ॥ आल्ल खे़ङ्हाॽरे़ कम्ब्राङ्ङो मे़वाॽबा निङ्वाॽ मे़इःत्तुल्ले़ खे़ल्ले़ यरिक् मे़क्खुसिॽ हे़क्क्याङ् के़रे़क् हाङ्हाॽनुःल्ले़ यम्बा हाङ्ङिल्ले़ कुदक्ले़ङ्वाओ खे़न् पोक्॥ हे़क्केसाङ् खे़न् मे़क्, कर आत्तिन् मनाःल्ले़ कुमुक्साम्लाम्माङ् मेःन्॥ 26 “खे़ने़ॽओ ओसेःन्धाङ् के़बोङ्बा तानाम् नु युःन्छिक्पा सिदुङ्जभाःल्ले़ कुयाःम्बेओबा सुफोन् से़क्खाबा चोक्, कर खे़न् सुफोन् स्वाःत् कत्ते़ॽ, थेआङ्भे़ल्ले़ कन् यरिक् एगाङ् ताःन्दि के़त्॥” 27 आङ्गाॽ, दानिए़ले़न्, साॽरिक् पना नासाङ् हे़क्क्याङ् कुभा ये़न् थारिक् आयाम् तुगे़आङ् ने़स्साङ्॥ खे़ब्याङ् आङ्गाॽ पोगाङ्ङाङ् हाङ्ङिल्ले़ कुयाःम्बक् चोःक्मा हेःक्तुङ्॥ सुफोःल्ले़ चोगुल्ले़ आङ्गाॽ निङ्वाॽ तुक्खे चामो थ्याङ्, कन् कुसिङ् निःप्मा सुक्मे़न्दे़प्मनाबा पान् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.