दानिए़ल 6 - लिम्बुदानिए़ले़न् खिरिङ्बा खरओ 1 हाङ्जुम्मो के़रे़क् युक् चोःक्मारे़ लागि १२० मनाहाॽ हाङ्जुम्मोबा यम्बा सुहाङ्गे़म्बाहाॽ हाङ्ङिल्ले़ युक्तिङ् चोगुसि॥ 2 दाराःल्ले़ खे़ङ्हाॽरे़ खुन्छिॽ सम्धाङ् सुम्सि युक्साबाहाॽ युक्तिङ् चोगुसि, खे़ङ्हाॽओ लत्छा दानिए़ले़न् वये़॥ हाङ्ङिल्ले़ कुयाःम्बक्को हान्ति मे़बोङ्ने़न्ल फाॽआङ् खे़न् हाङ्जुम्मोबा यम्बा सुहाङ्गे़म्बाहाॽ खे़ङ्हाॽरे़ खुन्छिॽ सम्धाङ् लक्पे़न्साबा चोगुसि॥ 3 आल्ल दानिए़लरे़ निङ्वाॽ के़माबा सुत्नालाम् खुने़ॽ आप्फेक् खे़न् युक्साबाहाॽ नु हाङ्जुम्मोबा यम्बा सुहाङ्गे़म्बाहाॽरे़ खुन्छिॽ लुम्मो एःक् परिक्पा आल्लसाङ् नुबा ओसेःन्धाङ् चोःक्सिङ् हे़क्क्याङ् हाङ्ङिल्ले़ खुने़ॽ के़रे़क् हाङ्जुम्मोबा युक्साबा चोःक्मा निङ्वाॽ चोगु॥ 4 खे़ब्याङ् युक्साबाहाॽ नु हाङ्जुम्मोबा यम्बा सुहाङ्गे़म्बाहाॽरे़ दानिए़ले़न् आप्तिक् कुःप्मारे़ लागि हाङ्जुम्बा याःम्बक्हाॽओ खुने़ॽ फेःन्दुबा पाःन्हाॽ कोःप्मा मे़हेःक्तु, कर खे़ङ्हाॽरे़ हे़क्के चोःक्मा मे़न्छुक्तुन्॥ खे़ङ्हाॽरे़ खुने़ॽओ थे़माआङ् फे़न्याःम्बक् खोमा मे़न्छुक्तुन्, थेआङ्भे़ल्ले़ खुने़ॽ निङ्वाॽइरे़ खोःप्तुबा हे़क्क्याङ् कुदोःप्मा याःम्बक् के़जोःक्पा नु कुबाःप्पाःत् पे़र्गे़क् वर्गे़क्काङ् मे़न्जोःक्मनाबा वये़॥ 5 कुनुप्मो खे़न् मनाहाॽरे़ मे़बाःत्तु, “दानिए़लरे़ कुदक्ले़ङ्वाओ आनिॽ आप्तिक् कुःप्मारे़ लागि, खुने़ॽ कुनिङ्वाॽफुमाङ्ङिल्ले़ कुधिम्हाॽनुःल्ले़ वेॽ, आभे़ल्ले़आङ् थे़मा लाम्माङ् आप्तिक् कुःप्मा आन्छुक्तुम्मिन्॥” 6 कल्ले़चोगुल्ले़ युक्साबाहाॽ नु हाङ्जुम्मोबा यम्बा सुहाङ्गे़म्बाहाॽ कुलुप् थिक् मे़बोःक्खे़ हे़क्क्याङ् मे़बेआङ् हाङ्ङिन् मे़मे़त्तु, “पयम् दारा हाङ्ङे, के़धाःक् चाॽररो! 7 हाङ् युक्साबाहाॽ, थुम् युक्साबाहाॽ, हाङ्जुम्मोबा यम्बा सुहाङ्गे़म्बाहाॽ, सुजासाबाहाॽ, चुक्सा हाङ्हाॽ नु के़रे़क् कन् पाःन्नो मे़दे़न्दे़आङ् मे़वाॽ, हाङ्ङिल्ले़ लत्छा इङ्जाङ् के़लःत्तुर पोङ्ॽ हे़क्क्याङ् खे़न् इङ्जाङ्ङिन् के़रे़क्ले़ मे़नाःत्तु मे़इःत्तुर पोङ्ॽ, खे़न् कुइसिक् के़दाबा सुम्बोङ् ये़न् थारिक् आदाङ्बानुःल्ले़ वेॽ कुभा माङ् इग्र मनान् कुभारे़ पेलि फाक्तुने़भग्र, पयम् हाङ् हे़क्तङ्बा मनान् थे़रिङ्बे़ल्ले़ कुघरओ लाप्फुमा पोङ्लो॥ 8 आल्ल पयम् हाङ्ङे, कन् इङ्जाङ्ङिन् साप्मनाबाए लःत्ते़ॽओ, हे़क्क्याङ् कुसुम् मे़न्दम्मनाबा पोङ्मा मे़न्छुक्मनाबा मादि नु फारसिहाॽरे़ खुन्छिॽ खासे़न्थिम् कुइसिक् कन् ले़ङ्मा मे़सुक्ने़न्॥” 9 कल्ले़चोगुल्ले़ दारा हाङ्ङिल्ले़ कन् इङ्जाङ्ङिन् साप्मनाबाए लःत्तु॥ 10 आल्ल दानिए़लरे़ खे़न् इङ्जाङ्ङिन् लःन्दे़बा निङ्वाॽ खोसुआङ् खुने़ॽ कुहिम्मोबा थोसमा कुदाःत्लाओबा याक्फाङ्ङो पे, खे़प्मो पेधाःप्हाॽ यरुसले़म ले़प्माङ् हङ्बे़त् पत्छे़॥ तगि हे़क्केए खुने़ॽ थिक्याःन्ले़ सुम्ले़ङ् थुङ्बोॽहजॽ युङ्सिङ्ङाङ् निङ्वाॽफुमाङ्ङिन् नुगे़न् पिरुर पेलि फाक्तु॥ 11 खे़ब्याङ् सुहाङ्युक्पाहाॽ कुलुप् मे़जोःक्सिङ्ङाङ् मे़बे हे़क्क्याङ् कुभाॽरे़ लागि दानिए़लरे़ निङ्वाॽफुमाङ्ङिन् पेलि फाक्तुर यागे़बा खे़ङ्हाॽरे़ मे़दुमु॥ 12 कल्ले़चोगुल्ले़ खे़ङ्हाॽ हाङ्ङे़ओ मे़बेआङ् खुने़ॽ लःत्तुबा हाङ् इजाङ्ङिल्ले़ कुयाःम्बेओ मे़मे़त्तु, “पयम् हाङ्ङे, आदाङ्बारे़ के़दाबा सुम्बोङ् ये़न् थारिक् आदाङ्बान्नुःल्ले़ वेॽ आत्तिल्ले़ कुभा माङ् इग्र मनान् पेलि फाक्तुॽ, खिरिङ्बाल्ले़ कुघाओ खे़न् लाप्फुमा पोङ् फाॽआङ् आदाङ्बारे़ लत्छा इङ्जाङ् के़लःत्तुआङ् मे़वाॽने़म्बि?” हाङ्ङिल्ले़ खे़ङ्हाॽ मे़त्तुसि, “ओरो, मादिहाॽ नु फारसिहाॽरे़ खुन्छिॽ कुभाङ् कुइसिक्, कुसुम् मे़न्दम्मनाबा पोङ्मा मे़सुक्ने़न्, खे़न् इङ्जाङ्ङिन् ले़ङ्मा सुक्मे़न्दे़प्मनाबा चोक्लो॥” 13 खे़ब्याङ् खे़ङ्हाॽरे़ हाङ्ङिन् मे़मे़त्तु, “पयम् हाङ्ङे, यहुदा लाजेॽलाम् मे़लःत्तुसिबाहाॽओ लत्छा दानिए़लरे़ आदाङ्बा इग्र आदाङ्बारे़ के़लःत्तुबा साप्मनाबा इङ्जाङ्ङिन् मे़इःत्तुन् मे़नाःत्तुन्ॽ॥ खुने़ॽ आल्लसाङ् थिक्याःन्धक् सुम्ले़ङ् पेलिगे़न् तुवा चोक्॥” 14 आल्ल कन् पाःन्निन् हाङ्ङिल्ले़ खे़प्सुआङ् खुने़ॽ साॽरिक् कुनिङ्वाॽ तुगे़॥ खुने़ॽ दानिए़ले़न् से़म्मा निःन्धो चोगु हे़क्क्याङ् ताङ्से़ःप्मारे़ लागि नाम्ध्ये़र थारिक्के खुने़ॽ कुसुक्सुक् तम्सिङ् चोगु॥ 15 खे़न् एगाङ् खे़न् सुहाङ्युक्पाहाॽ कुलुप् मे़बोःक्खे़ हे़क्क्याङ् हाङ्ङे़ओ मे़बेआङ् खुने़ॽ मे़मे़त्तु, “पयम् हाङ्ङे, आदाङ्बारे़ कुसिङ्निःत्ते़ॽ मादि नु फारसिहाॽरे़ खुन्छिॽ खासे़न्थिम् कुइसिक् हाङ्ङिल्ले़ कुइङ्जाङ्ङिन् इग्र कुइङ्जाङ्ङिन्नाङ् ले़ङ्मा सुक्मे़दे़त्ने़न्॥” 16 कल्ले़चोगुल्ले़ हाङ्ङिल्ले़ खे़ङ्हाॽ इङ्जाङ् पिरुसि हे़क्क्याङ् खे़ङ्हाॽरे़ दानिए़ले़न् मे़दे़म्सुआङ् थे़रिङ्बे़ल्ले़ कुघरओ लाप्मे़भुसु मे़याक्तु॥ हाङ्ङिल्ले़ खुने़ॽ मे़त्तु, “खे़ने़ॽ चक्मे़ल्लॽए माङ्से़वा के़मे़त्तुबा के़निङ्वाॽफुमाङ्ङिल्ले़ खे़ने़ॽ ताङ्गे़से़ःप्लरो!” 17 खिरिङ्बा खाःल्ले़ कुलाम्मो यम्बा लुङ्धिक् मे़दारुआङ् मे़ये़प्सु, हे़क्क्याङ् दानिए़लरे़ कुयाक्नाम्मो थे़माआङ् पान् मे़ले़ङ्ने़न्ल फाॽआङ् हाङ्ङिल्ले़ कुस्वागेःप् एःप्साप्पिन् नु सुहाङ्युक्पाहाॽरे़ खुन्छिॽ स्वागेप् एःप्साप्पिन् खे़न् लुङ्ङो मे़युक्तु॥ 18 खे़ब्याङ् हाङ्ङिन् हाङ्हिम्मो नुःक्खे़ पेआङ् खुने़ॽ कुदगि मे़युक्खुबा कुजाहाॽ मे़जने़न् हे़क्क्याङ् थे़माआङ् निङ्वाॽ तामा याःम्बक् मे़न्जोःक्के से़न्दिक् नाम्दाःत्तात् युङे़॥ खुने़ॽ कुमिक्के मे़युसे़न्॥ 19 तानाम् खाओःत्ते़र पत्छे़ल्ले़सा हाङ्ङिन् पोगे़आङ् हारावरा थे़रिङ्बे़ल्ले़ कुघरओ ले़प्माङ् पे॥ 20 आल्ल खुने़ॽ थे़रिङ्बे़ल्ले़ कुघर निःत्ताङ् के़रे़आङ् कुयोम् पुॽरे़र खुने़ॽ दानिए़ले़न् मे़त्तु, “दानिए़लए, कुहिङ्वे़त् निङ्वाॽफुमाङ्ङिल्ले़ कुसे़वारोबे, थे खे़ने़ॽ चक्मे़ल्लॽए माङ्से़वा के़मे़त्तुबा के़निङ्वाॽफुमाङ्ङिल्ले़ खिरिङ्बाहाॽलाम् खे़ने़ॽ ताङ्गे़से़ःप्ते़बि?” 21 दानिए़लरे़ नुगप् पिरु, “पयम् हाङ्ङिन् के़धाःक् चाॽररो! 22 आङ्गाॽ आनिङ्वाॽफुमाङ्ङिल्ले़ कुमाङ्लाइङ्बान् पाङ्घुयुसु, हे़क्क्याङ् खे़ल्ले़ खिरिङ्बाहाॽरे़ खुन्छिॽ मुरान् हुॽरु पिरुसि॥ खे़ङ्हाॽरे़ आङ्गाॽ चबे़ःत्छिक्काङ् मे़घाःन्दाङ्बा होप्, थेआङ्भे़ल्ले़ खुने़ॽ कुनिमो आङ्गाॽ कुदोःप्मा चोगाङ्॥ पयम् हाङ्ङे, आदाङ्बारे़ के़दगिआङ् आङ्गाॽ थेआङ् फे़त्लाःन्दुङ्बा होप्॥” 23 हाङ्ङिन् साॽरिक् पसःत् सःत्ते़आङ् दानिए़ले़न् खिरिङ्बाल्ले़ कुघरओलाम् लाःक्कात् लःप्मा इङ्जाङ् पिरुसि॥ आल्ल दानिए़ले़न् खिरिङ्बाल्ले़ कुघाओलाम् मे़लःत्तुल्ले़ खुने़ॽओ थेआङ् काःन्दे़बा होःप्ते़ थेआङ्भे़ल्ले़ खुने़ॽ निङ्वाॽफुमाङ्ङो कुनिङ्वाॽ युक्खुआङ् वये़॥ 24 दानिए़लरे़ कुदक्ले़ङ्वाओ ताप्फे़ःम्बा निङ्वाःल्ले़ आप्तिक् के़गुःप्पा मनाहाॽ हाङ्ङिल्ले़ कुइङ्जाङ्ङो सिगाङ् मे़दारुसि, हे़क्क्याङ् खुन्छिॽ मेःत्हाॽ नु हिन्जाॽबित्छाॽहाॽ सोसोरिक् खिरिङ्बाल्ले़ कुघरओ लाप्मे़भुसु मे़याक्तुसि॥ हे़क्क्याङ् खे़ङ्हाॽ खिरिङ्बाल्ले़ कुघरओबा खाम्बाङ्ङो चुक्मानुःल्ले़ तगिए खिरिङ्बाहाॽरे़ खे़ङ्हाॽ मे़भत्तुसिआङ् खुन्छिॽ ये़प्पाहाॽनु सोसोरिक् युरुप् वरुप् मे़ये़ःक्खु मे़देसुसि॥ 25 खे़ब्याङ् दारा हाङ्ङिल्ले़ हाङ्जुम् के़रे़क्पा मे़न्छाम् याप्मिहाॽ, मे़न्छाम् सुवाङ्हाॽ हे़क्क्याङ् वेॽ वेॽ पाःन्दाङ् के़बाःप्पाहाॽ, अक्तङ्बा साप्तुआङ् हाक्तुसिरो— “खिनिॽ के़नुरि के़दासिररो! 26 “आङ्गाॽ आहाङ्जुम् के़रे़क्पा मनाहाॽरे़ दानिए़लरे़ कुनिङ्वाॽफुमाङ्ङिन् मे़गिरुर हे़क्क्याङ् मिङ्सो इङ्धाङ् मे़बिरुर फाॽआङ् आङ्गाॽ कन् इङ्जाङ्ङिन् उवा चोगुङ्लो॥ “थेआङ्भे़ल्ले़ खुने़ॽग कुहिङ्वे़त् निङ्वाॽफुमाङ्लो, हे़क्क्याङ् खुने़ॽ सदादिङ् आभे़ल्ले़साङ् वाॽरो॥ खुने़ॽ कुहाङ्जुम्मिन् मे़मे़क्ने़न्लो खुने़ॽ कुहाङ्युक्किन् आभे़ल्ले़आङ् मे़नुप्ने़न्लो॥ 27 खुने़ॽ कुमनाहाॽ ताङ्से़ःप्तुसिआङ् से़ःप्तुसिरो खुने़ॽ साङ्ग्राम्पेदाङ् नु इक्सादिङ् खाम्बेःक्को निङ्वाॽ के़माबा याःम्बक्हाॽ चोगुरो॥ खिरिङ्बाहाॽरे़ खुन्छिॽ मुक्साम्मोलाम् खुने़ॽ दानिए़ले़न् ताङ्से़ःप्तुआङ् वाॽरो॥” 28 कल्ले़चोगुल्ले़ दाराःल्ले़ कुहाङ्युक् नु फारसि कोरेसरे़ कुहाङ्युक्को दानिए़लरे़ कुनुॽमा कुदामा पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.