दानिए़ल 5 - लिम्बुलुङ्धाक्को मे़साप्तुआङ् के़बप्पा सक्सक्हाॽ 1 यरिक् तङ्बे एगाङ् बेलसजर हाङ्ङिल्ले़ १,००० कुसुहाङ्युक्पाहाॽ लत्छा यम्बा साभःङ्जा चाःत्तुसि हे़क्क्याङ् खुने़ॽ खे़ङ्हाॽनु सोरिक् चे़ल्ले़क्सेॽ थिन् थुङु॥ 2 बेलसजरे़ल्ले़ चे़ल्ले़क्सेॽ थिन् थुङुर युङे़ल्ले़ हाङ्ङिल्ले़ नु खुने़ॽ कुसुहाङ् युक्पाहाॽरे़, खुने़ॽ कुमेःत्हाॽरे़ हे़क्क्याङ् खुने़ॽ कुजक्मेःत्हाॽरे़ चे़ल्ले़क्सेॽ थिन् थुङ्मारे़लागि खुने़ॽ कुम्बा नबुकदनेसरे़ल्ले़ यरुसले़ःम्बा माङ्हिम्मोलाम् फे़त्तुबा साम्म्याङ् नु युप्पा चल्लाङ्ना खोर्याहाॽ खुने़ॽ खे़प्मो ताःप्मा इङ्जाङ् पिरुसि॥ 3 कल्ले़चोगुल्ले़ खे़ङ्हाॽरे़ साम्म्याङ् चल्लाङ्ना खोर्याहाॽ मे़दारु, खे़ङ्हाॽ यरुसले़ःम्मो के़युङ्बा माङ्हिम्, निङ्वाॽफुमाङ्ङिल्ले़ कुहिम्मोलाम् मे़भे़त्तुआङ् वये़, हे़क्क्याङ् हाङ्ङिल्ले़, खुने़ॽ कुसुहाङ्युक्पाहाॽरे़, खुने़ॽ कुमेःत्हाॽरे़ हे़क्क्याङ् खुने़ॽ कुजक्मेःत्हाॽरे़ खे़ङ्हाॽलाम् मे़धुङु॥ 4 आल्ल खे़ङ्हाॽ चे़ल्ले़क्सेॽ थि थुङ्नु मे़युङे़ल्ले़, खे़ङ्हाॽरे़ साम्म्याङ्, युप्पा, कासा, फे़न्जेॽ, सिङ् नु लुङ् माङ्हाॽ मिङ्सो इङ्धाङ् मे़बिरुसि॥ 5 चघप् हाङ्हिम्मो के़युङ्बा छक्कङ्ङिल्ले़ कुबेसाङ् लत्छा मे़न्छाम् याप्मि हुक्चोःक्हाॽ निधाबे़ हे़क्क्याङ् ले़ङ्मनाबा लुङ्धाक्को साप्मा हेःक्तु॥ खे़न् के़साप्पार के़बप्पा हुक्किन् हाङ्ङिल्ले़ निसु॥ 6 खुने़ॽ कुनारान् अम्दाङ्बा पोःक्खे़, हे़क्क्याङ् पगि किसे़आङ् थे़गक्कक्ना यक्खे़ल्ले़ खुने़ॽ कुधुङ्बोहाॽ थक्मा हेःक्ते़आङ् कुलाङ्हाॽ ले़ब्जुजुबा पोःक्खे़॥ 7 हाङ्ङिल्ले़ साम्माङ्च्याःङ् मुरा के़मे़प्पाहाॽ, खागे़इक्पाहाॽ नु थुम्म्या के़इबाहाॽ उःप्मा ताःप्मा पाङ्घुसि हे़क्क्याङ् बेबिलोनबा कन् सिक्कुम्साबा ये़म्बित्छाहाॽ मे़त्तुसि, “आत्तिल्ले़ कन् साप्मनाबान् निरुआङ् कल्ले़ कुबेन् आङ्गाॽ चे़क्का, खे़न् परान्ला हाङ्देत् चाक्मा पोङ्ॽ, खे़ल्ले़ कुनिःङ्मो साम्म्याङ् सिक्क्रिःन् वाःप्मा पोङ्ॽ खे़ब्याङ् कन् हाङ्जुम्बा सुम्सिगेक्पा ताक्फाओबा यम्बा युक्साबा चोःक्मा पोङ्ॽ॥” 8 खे़ब्याङ् हाङ्ङिल्ले़ कुगे़रे़क् सिक्कुम्साबा ये़म्बित्छाहाॽ मे़द्ये़, कर खे़ङ्हाॽरे़ कन् साप्ते़आङ् के़बप्पान् निःप्मा नु खे़ल्ले़ कुबेन् हाङ्ङिन् चे़क्मा मे़न्छुक्तुन्॥ 9 कल्ले़चोगुल्ले़ बेलसजर हाङ्ङिन् आल्लसाङ् साॽरिक् किसे़आङ् कुनारान् अम्गे़लॽबा पोःक्खे़र पे॥ खुने़ॽ कुसुहाङ्युक्पाहाॽ मे़नाक्ते़मे़बे॥ 10 हाङ्ङिन् नु खुने़ॽ कुसुहाङ्युक्पाहाॽरे़ खुन्छिॽ इक्लान् हाङ्ङिल्ले़ कुम्मारे़ खे़प्सुआङ् खुने़ॽ साभःङ्जा चामा याक्फाङ्ङो लासे़द्ये़ हे़क्क्याङ् खुने़ॽ हाङ्ङिन् मे़त्तु, “पयम् हाङ्ङे के़धाःक् चाॽररो! खे़ने़ॽ के़यङ्मा मे़गे़रे़न्ने़ॽ॥ कम्भलॽरिक् के़नारान् अम्गे़लॽबा मे़जोगे़न्ने़ॽ॥ 11 खे़ने़ॽ के़हाङ्जुम्मो मनाधिक् वाॽ, सेसे साम्माङ्हाॽरे़ खुन्छिॽ याम्साम्मिन् खे़ल्ले़ कत्तुॽ॥ खे़ने़ॽ के़म्बारे़ कुये़म्मो माङ्हाॽ कुइसिक् खुने़ॽओ इःत्छिङ्साम्, सिक्कुम् निङ्वाॽ नु ने़हिनिङ्वाॽ खोमनाआङ् वये़॥ के़म्बा हाङ् नबुकदनेसररे़ खुने़ॽ कित्चाक् के़जोःक्पाहाॽ, साम्माङ्च्याःङ् मुरा के़मे़प्पाहाॽ, खागे़इक्पाहाॽ नु थुम्म्या के़इबाहाॽरे़ खुन्छिॽ यम्बा मना युक्तिङ् चोगुआङ् वये़॥ 12 कन् दानिए़ल मिङ् के़वाःप्पा मनान् हाङ्ङिल्ले़ खुने़ॽ बेलतसजर मे़त्तु, कुनिङ्वा हागे़सुक्पा नु सिक्कुम्साबा हे़क्क्याङ् खासिङ्गे़निःप्पा चोगे़बा खोदे़त्ते़ हे़क्क्याङ् खे़न्नु सोसोरिक् खे़ल्ले़ से़प्माङ्ङिल्ले़ कुबे हम्मा, आप्तोहाॽ फाःङ्मा हे़क्क्याङ् के़साक्पा पाःन्हाॽ तङ्माआङ् सुक्तु॥ दानिए़ले़न् उःत्ते़ॽ, खे़ब्याङ् खुने़ॽ कन् साप्ते़आङ् के़बप्पे़ल्ले़ कुबेन् खे़ने़ॽ मे़प्मा के़सुक्लो॥” दानिए़लरे़ साप्मनाबे़ल्ले़ कुबेन् हन्दु 13 कल्ले़चोगुल्ले़ दानिए़ले़न् हाङ्ङिल्ले़ कुदगि मे़दारु हे़क्क्याङ् हाङ्ङिल्ले़ खुने़ॽ मे़त्तु, “आङ्गाॽ आम्बा हाङ्ङिल्ले़, यहुदा लाजेॽलाम् लःत्तु फे़त्तुसिआङ् मे़वये़बाहाॽओबा खे़ने़ॽ दानिए़ले़न् मेःम्बि? 14 खे़ने़ॽओ सेसे साम्माङ्हाॽरे़ खुन्छिॽ याम्साम्मिन् वाॽ के़लॽबा आङ्गाॽ खे़प्सुङ्, हे़क्क्याङ् खे़ने़ॽ इःत्छिङ्साम्, सिक्कुम्साबा नु ने़हिनिङ्वाॽ के़गप्पा मना के़जोःक्मु॥ 15 सिक्कुम्साबा ये़म्बित्छाहाॽ नु साम्माङ्च्याःङ् मुरा के़मे़प्पाहाॽ कन् साप्ते़आङ् के़बप्पे़न् निःप्मा हे़क्क्याङ् कल्ले़ कुबेन् आङ्गाॽ चे़क्मारे़ लागि आदगि मे़दारुसि॥ कर खे़ङ्हाॽरे़ कुबेन् हम्मा मे़न्छुक्तुन्॥ 16 आल्ल खे़ने़ॽ कुबे हम्मा नु के़साक्पा पाःन्हाॽ तङ्मा के़सुक्तुमु फाॽआङ् आङ्गाॽ खे़प्सुङ्ङाङ् वाॽ॥ खे़ने़ॽ कन् साप्ते़आङ् के़बप्पे़न् निःप्मा नु कल्ले़ कुबेन् हम्मा के़सुक्तुने़भग्र, खे़ने़ॽ परान्ला चाङ् के़म्जाक् हे़क्क्याङ् खे़ने़ॽ के़निःङ्मो साम्म्याङ् सिक्क्रि के़म्वात् खे़ब्याङ् लाजेॽओ खे़ने़ॽ सुम्सिगेक्पा ताक्फाओ यम्बा के़बोङ्ॽ॥” 17 खे़ब्याङ् दानिए़लरे़ हाङ्ङिन् नुगप् पिरु, “आदाङ्बारे़ के़मिक्तोक्हाॽ आदाङ्बारे़ आप्फेक् कत्ते़ॽ हे़क्क्याङ् आदाङ्बारे़ के़हाङ्से़म्हाॽ वेॽ मनाहाॽ पिरे़से़ॽ॥ हे़क्केसाङ् पयम् हाङ्ङिल्ले़ के़लागि कन् साप्ते़आङ् के़बप्पे़न् निरुङ् पिने़ हे़क्क्याङ् कल्ले़ कुबेन् हन्दुङ् पिने़रो॥ 18 “पयम् हाङ्ङे, के़रे़क्नुःल्ले़ यम्बा निङ्वाॽफुमाङ्ङिल्ले़ आदाङ्बारे़ के़म्बा नबुकदनेसरे़न् लत्छा हाङ्जुम्हाॽओ युक् नु पयम् यम्बा हे़क्क्याङ् मिमिदिङ् नु हाङ्वा माङ्वा पिरु॥ 19 खुने़ॽ खे़न् यम्बा ताक्फा पिरुबाल्ले़ चोगुल्ले़ मे़न्छाम् याप्मिहाॽ, मे़न्छाम् सुवाङ्हाॽ हे़क्क्याङ् वेॽ वेॽ पाःन्दाङ् के़बाःप्पाहाॽरे़ खुने़ॽ मे़गिरुआङ् मे़यक्खे़॥ हाङ्ङिल्ले़ आत्तिन् से़प्मा निङ्वाॽ चोगु, खे़न् से़रु हे़क्क्याङ् आत्तिन् ताङ्मा निङ्वाॽ चोगु, खे़न् ताङ्घु, आत्तिन् यम्बा चोःक्मा निङ्वाॽ चोगु, खे़न् यम्बा चोगु, खम्भ्याङ् आत्तिन् चुक्पा चोःक्मा निङ्वाॽ चोगु, खे़न् चुक्पा चोगु॥ 20 कर खुने़ॽ कुनिङ्वान् यम्बा हे़न्छिङ्मारे़ पाःन्मे़ङ्घे़म्मनाबा नु आङ्दिङ् के़लॽबा पोःक्खे़आङ् हाङ्युक्नाओलाम् खुने़ॽ मे़लःत्तु मे़देसु हे़क्क्याङ् कुमिमिदिङ्ङिन् खुने़ॽ मे़नाप्तु॥ 21 मनाहाॽरे़ खुन्छिॽ हाङ्जुम्मो के़रे़क्नुःल्ले़ यम्बा निङ्वाॽफुमाङ्ङिल्ले़ए काक् युक् कत्तुॽ हे़क्क्याङ् खुने़ॽ कुसिराॽ के़धाङ्बे़न् आत्तिन्छाङ् खे़न् हाङ्जुम्हाॽ पिरुॽ के़लॽबा पाःन्नो मे़न्दे़न्ने थारिक् खुने़ॽ मनाहाॽलाम् मे़नाःत्तु मे़देसुआङ् लत्छा थक्सा निङ्वाॽ मे़बिरु॥ खुने़ॽ ताम्भुङ्ङोबा अदङ्हाॽनु वये़ हे़क्क्याङ् पित्थक्सा इसिःक् याःन्सुङ्हाॽ चआङ् वये़, खम्भ्याङ् खुने़ॽ कुधक्किन् ताङ्साङ्बोबा सेःक्वाःल्ले़ वारक्ते़॥ 22 “कर खुने़ॽ कुस्सा, आदाङ्बा बेलसजररे़ कन् के़रे़क् पाःन्हाॽ कुसिङ् के़निःत्तुआङ् के़वये़साङ् आप्फेक् चुङ्जिगे़न् नःम्नःम्बा के़न्जोःक्सिङ्ङिन्॥ 23 खे़न्नुःल्ले़ग साङ्ग्राम्पेदाङ्बा यहवे दाङ्बे़ल्ले़ कुदक्ले़ङ्वाओ आप्फेक् के़बोगे़आङ् के़वाॽ॥ आदाङ्बारे़ खुने़ॽ कुहिम्मोबा चल्लाङ्ना खोर्याहाॽ खे़ने़ॽओ ताःप्मा के़बाङ्घुसि, हे़क्क्याङ् आदाङ्बा नु आदाङ्बारे़ के़सुहाङ्युक्पाहाॽ, आदाङ्बारे़ के़मेःत्हाॽ नु के़जक्मेःत्हाॽरे़ खे़न् सामाहाॽओ चे़ल्ले़क्सेॽ थि के़धुङुम्॥ खे़ब्याङ् मिक्मे़न्निमनाबा, नामे़ङ्घे़म्मनाबा नु खासिङ् मे़न्निःप्नाबा युप्पा, साम्म्याङ् कासा, फे़न्जेॽ, सिङ् नु लुङ् माङ्हाॽ मिङ्सो इङ्धाङ् के़बिरुम्सिम्॥ कर आदाङ्बारे़ के़हिङ्मन् नु आदाङ्बारे़ के़लाम्हाॽ हुक्को के़गप्पा कन् निङ्वाॽफुमाङ्ङिन् आदाङ्बारे़ मिङ्सो इङ्धाङ् के़म्बिरुन्॥ 24 कल्ले़चोगुल्ले़ खुने़ॽ कन् सुत्ला के़साप्पा हुक्किन् पाङ्घु युसुरो॥ 25 “साप्ते़आङ् के़बप्पा सुत्लान् अक्तङ्बा पत्लो—मेने, मेने, तेकेल, पर्सिन 26 कन् सुत्लाहाॽरे़ कुबेःङ्ग हाबा कन्लो— मेने निङ्वाॽफुमाङ्ङिल्ले़ आदाङ्बारे़ के़हाङ्युक् चोःक्मा ये़न्हाॽ निरुआङ् वाॽ, हे़क्क्याङ् खे़न् नुप्सुआङ् वाॽरो॥ 27 तेकेल आदाङ्बा पासाङ्गाओ के़म्धाङ्घे़आङ् वाॽ, हे़क्क्याङ् खे़ने़ॽ याङ्याङ्बा के़बोःक्खे़बा मे़निसुआङ् वाॽरो॥ 28 पेरेस आदाङ्बारे़ के़हाङ्जुम्मिन् पःक्खे़ हे़क्क्याङ् मादि नु फारसिहाॽ मे़बिरुसिआङ् ने़रो॥” 29 खे़न् एगाङ् बेलसजररे़ कुइङ्जाङ्ङो दानिए़ले़न् परान्ला चाङ् मे़जाक्तु॥ कुसित्लाओ मिङ्सो साम्म्याङ् सिक्क्रि मे़वाःत्तु, हे़क्क्याङ् खुने़ॽ हाङ्जुम्मोबा सुम्सिगेक्पा यम्बा ताक्फाओबा युक्साबा फाॽआङ् उवा मे़जोगु॥ 30 आम्भा खे़न् से़न्दिक्सा हाङ् बेलसजरे़न् मे़से़रु, 31 हे़क्क्याङ् मादि दारान् तुक्पोङ्ङाङ् तङ्बे ने़त्छि योरे़ल्ले़ खुने़ॽ खे़न् हाङ्जुम्मिन् मे़त्छिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.