दानिए़ल 4 - लिम्बुहाङ्ङिल्ले़ निसिगेक्पा कुसे़प्माङ् 1 आङ्गाॽ नबुकदनेसर हाङ्ङिल्ले़, काक् इक्सादिङ् खाम्बेःक्मो के़युङ्बा मे़न्छाम् याप्मिहाॽ, मे़न्छाम् सुवाङ्हाॽ हे़क्क्याङ् वेॽ वेॽ पाःन्दाङ् के़बाःप्पा मनाहाॽ अक्तङ्बा इङ्घङ् हाक्निङ्लो— खिनिॽ साॽरिक् के़नुरि के़दासिररो! 2 के़रे़क्नुःल्ले़ यम्बा निङ्वाॽफुमाङ्ङिल्ले़ आङ्गाॽ आलागि चोगुबा निङ्वाॽ के़माबा मिक्सेःन्हाॽ नु निङ्वाॽ ने़हिरे़ मे़न्धाप्मनाबा याःम्बक्हाॽरे़ कुयाःम्बेओ आङ्गाॽ खिनिॽ मे़प्मा खोनिङ्ङिल्ले़ आङ्गाॽ सःत्तारो॥ 3 खुने़ॽ कुमिक्सेःन्हाॽ साॽरिक् यम्बा चोक्लो, खुने़ॽ निङ्वाॽ के़माबा कुयाःम्बक्हाॽ चाॽरिक् मुक्साम्साबा चोक्लो! खुने़ॽ कुहाङ्जुम्मिङ्ग आभे़ल्ले़आङ् मे़न्नुप्मनाबा हाङ्जुम्लो, खुने़ॽ कुहाङ्युक्किन् थाःक्थाःक्को थारिक् हाबा वाॽरो॥ 4 आङ्गाॽ नबुकदनेसरे़न् आनिङ्वाॽ तामा नु आनुॽमा आदामाओ आङ्गाॽ आहाङ्हिम्मो युङाङ्ल वयाङ्॥ 5 आङ्गाॽ किमा यङ्माओ आधाधाबा से़प्माङ् थिक् माक्तुङ्॥ आङ्गाॽ इप्नाओ सोःन्छिङ्ङाआङ् ने़स्साङ्ङिल्ले़, आङ्गाॽ आनिङ्वाॽओ इःत्तुङ्बा पाःन्हाॽ नु सुफोहाॽरे़ चोगुल्ले़ आङ्गाॽ चिजिङ् यङ्मा स्ये़ॽआङ्॥ 6 कल्ले़चोगुल्ले़ खे़न् से़प्माङ्ङिल्ले़ कुबे हम्मारे़ लागि बेबिलोनबा के़रे़क् सिक्कुम्साबा ये़म्बित्छाहाॽ आङ्गाॽ आदगि ताःप्मासिरे़ लागि इङ्जाङ् पिरुङ्सिङ्॥ 7 आल्ल कित्चाक् के़जोःक्पाहाॽ, साम्माङ्च्याःङ् मुरा के़मे़प्पाहाॽ, खागे़इक्पाहाॽ नु थुम्या के़इबाहाॽ मे़द्ये़आङ् आङ्गाॽ आसे़प्माङ्ङिन् खे़ङ्हाॽ चे़क्तुङ्सिङ्, कर खे़ङ्हाॽरे़ आङ्गाॽ आसे़प्माङ्ङिल्ले़ कुबेन् चे़क्मा मे़न्छुक्ताङ्ङिन्॥ 8 कुनुप्मो दानिए़ले़न् आङ्गाॽओ त्ये़ हे़क्क्याङ् आङ्गाॽ आसे़प्माङ्ङिन् खुने़ॽ चे़क्तुङ्॥ (खुने़ॽ कुमिङ्ङिन् आङ्गाॽ आमाङ्ङिल्ले़ कुमिङ् कुइसिक् बेलतसजर वये़, सेसे साम्माङ्हाॽरे़ खुन्छिॽ याम्साम्मिन् खुने़ॽओ वाॽ॥) 9 आङ्गाॽ खुने़ॽ मे़त्तुङ्, “कित्चाक् के़जोःक्पाहाॽरे़ खुन्छिॽ यम्बा मना, बेलतसजरए, सेसे साम्माङ्हाॽरे़ खुन्छिॽ याम्साम्मिन् खे़ने़ॽओ वाॽ फाॽआङ् आङ्गाॽ निसुङ्ॽ, हे़क्क्याङ् खे़ने़ॽ के़लागि थे़मा सिबिॽ पाःन्निन्नाङ् के़साक्पा मे़जोक्ने़न्॥ आङ्गाॽ आसे़प्माङ्ङिन् अक्तङ्बा चोक्, कल्ले़ कुबेन् आङ्गाॽ हन्दाङ् पिराङ्ङे़ॽ॥ 10 इप्नाओ ने़स्साङ्गराङ्ङिल्ले़ आङ्गाॽ निसुङ्बा सुफोहाॽ हाबा कन्हाॽएरो—आङ्गाॽ अक्तङ्बा निसुङ्ॽ, आङ्गाॽ आदगि इक्सादिङ् खाम्बेःक्माल्ले़ कुलुम्मो यम्बा सिङ्बुङ्धिक् तक्पे़त् युङे़॥ खे़न् आत्तातान्ने केःम्बा चोगे़॥ 11 खे़न् सिङ्बुङ्ङिन् यम्बा नु के़धुम्बा पोःक्खे़र पे खम्भ्याङ् कुसम्मिल्ले़ ताङ्साङ्बे़न् सुसु, इक्सादिङ् खाम्बेःक्मे़ल्ले़ कुयाओ थारिक् आत्तिसाङ् खे़न् निदे़त्ते़॥ 12 खे़ल्ले़ कुभे़क्वाहाॽ नुबा नु खे़ल्ले़ कुजाॽहाॽ साॽरिक् यरिक् पत्छे़, हे़क्क्याङ् खे़प्मो के़रे़क्ले़ लागि कुजामा चाहाॽ पत्छे़॥ खे़ल्ले़ कुसिगाङ् ताम्भुङ् थक्साहाॽरे़ ने़त्नादे़न् मे़घोसुआङ् वये़, खे़ल्ले़ कुबोराक्हाॽओ पुहाॽ मे़युङे़, खे़प्मोलाम् के़रे़क् थक्सा पुसाहाॽरे़ चामा मे़घोसु॥ 13 “इप्नाओ सोःन्छिङ्ङाआङ् ने़स्साङ्ङिल्ले़ आङ्गाॽ सुफोओ आदगि साङ्ग्राम्पेदाङ्लाम् लत्छा माङ्लाइङ्बा इङ्घङ्साबा, सेसे मनाधिक् यो ये़र पत्छे़बा निसुङ्॥ 14 खे़न् यम्बा इक्लाओ अःक्ते़आङ् अक्खे पाःत्तुरो— “खे़न् सिङ्बुङ्ङिन् ताङे़म्मे़ॽआङ् सोःन्दे़म्मे़ॽओ, हे़क्क्याङ् कुबोराक्हाॽ खक्ते़म्देसे़म्मे़ॽओ, खे़ल्ले़ कुभे़क्वाहाॽ लुःक्से़म्देसे़म्मे़ॽओ हे़क्क्याङ् खे़ल्ले़ कुजाॽहाॽ हत्छे़ हत्छे़ से़से़म्देसे़म्मे़ॽओ॥ खे़ल्ले़ कुसिगाङ्लाम्बा थक्साहाॽ नु खे़ल्ले़ कुबोराक्हाॽओलाम् पुहाॽ मे़घे़त्छिङ्लरो॥ 15 कर फे़न्जेॽ नु कासाःल्ले़ खेःङ्मनाबा खे़ल्ले़ कुमुःत्ते़न् नु कुसाःप्हाॽ खाम्बाङ्ङो इक्ताप्पोबा यान् कुइसिक् युक्खे़म्मे़ॽओ॥ ताङ्साक्पोबा सेःक्वाःल्ले़ खे़न् वारक्खुररो, हे़क्क्याङ् थक्साहाॽनु सोरिक् इक्सादिङ् खाम्बेःक्मोबा सिङ्भे़क्वा याःन्हाॽरे़ कुलुम्मो युङ्याःक्लरो॥ 16 नुसिले़ङ् ये़म् कुगप् मे़ले़क्ने़ल्ल थारिक् खे़ल्ले़ कुनिङ्वान् मनालाम् मे़ले़क्खुररो हे़क्क्याङ् थक्सा निङ्वाॽ मे़बिरुररो॥ 17 इङ्घङ् के़साबाहाॽरे़ निःन्धो पाःन्निन् मे़मे़त्तुसिआङ् वाॽरो, सेसे मनाहाॽरे़ कुनुप्मा पाःन्निन् उवा मे़जोगुरो, हे़क्केलॽरिक् मनाहाॽरे़ खुन्छिॽ हाङ्जुम्हाॽओबा काक् युक्किन् के़रे़क्नुःल्ले़ यम्बा निङ्वाॽफुमाङ्ङिल्ले़ए कत्तु फाॽआङ् कुहिङ्वे़त्हाॽरे़ निङ्वाॽ मे़घोसुररो, हे़क्क्याङ् खुने़ॽ कुसिराॽ के़धाङ्बाहाॽ खे़न् हाङ्जुम्हाॽ पिरुसिरो मनाहाॽओ के़रे़क्नुःल्ले़ नःम्नःम्बाहाॽ खे़न् हाङ्जुम्हाॽओ फोःक्खुसिरो॥ 18 “आङ्गाॽ नबुकदनेसर हाङ्ङिल्ले़ माक्तुङ्बा से़प्माङ्ङिन् हाबा कन्लो॥ आल्ल बेलतसजरए, कल्ले़ कुबेन् आङ्गाॽ हन्दाङ् पिराङ्ङे़ॽ, थेआङ्भे़ल्ले़ आङ्गाॽ आहाङ्जुम्मो के़वाॽबा सिक्कुम्साबा ये़म्बित्छाहाॽओ आत्तिल्ले़आङ् कल्ले़ कुबेन् हम्मा मे़सुक्तुन्॥ कर खे़ने़ॽ के़सुक्तुॽ, थेआङ्भे़ल्ले़ सेसे साम्माङ्हाॽरे़ खुन्छिॽ याम्साम्मिन् खे़ने़ॽओ वाॽरो॥” दानिए़लरे़ से़प्माङ्ङिल्ले़ कुबेन् हन्दु 19 दानिए़ल (खुने़ॽ बेलतसजरआङ् मे़मे़त्तु) सप्फा थारिक्क खुने़ॽ साॽरिक् कुनिङ्वाॽ मये़, हे़क्क्याङ् खुने़ॽ इःत्तुबा पाःन्हाॽरे़ किमा यङ्माओ थासु॥ कल्ले़चोगुल्ले़ मे़त्तु, “बेलतसजरए, से़प्माङ्ङिन् नु खे़ल्ले़ कुबेःल्ले़ खे़ने़ॽ निङ्वाॽ तुक्खे चामो के़न्धाने़न्ल॥” बेलतसजरले़ नुगप् पिरु, “पयम् हाङ्ङे, कन् से़प्माङ्ङिन् आदाङ्बारे़ के़निङ्मिहाॽ नु कल्ले़ कुबेःल्ले़ आदाङ्बा के़अप्पाहाॽ याङ्घुसिल्ले़ग नुॽबा वये़मे़न्॥ 20 आदाङ्बारे़ के़निसुबा खे़न् सिङ्बुङ्ङिन् पोरे़आङ् साॽरिक् यम्बा नु के़धुम्बा पोःक्खे़, हे़क्क्याङ् काक् इक्सादिङ् खाम्बेःक्मोलाम् निदे़त्ते़र थारिक् खे़ल्ले़ कुसम्मिल्ले़ ताङ्साङ्बे़न् सुसु, 21 पनुनुबा कुभे़क्वाहाॽ नु यरिक् कुजाॽहाॽरे़ के़रे़क् चामा पिरुसि, ताम्भुङ् थक्साहाॽ नाम्इःक्खङ् पिरुसि, हे़क्क्याङ् खे़ल्ले़ कुबोराक्हाॽओ ताङ्साङ्बोबा पुहाॽरे़ खुन्छिॽ हाप्हाॽ युङे़, 22 पयम् हाङ्ङे, खे़न् सिङ्बुङ्ङिन्ग आदाङ्बा खे़ने़ॽएरो॥ आदाङ्बा पयम् यम्बा नु मुक्साम्साबा के़बोक्खे़आङ् के़वाॽ, आदाङ्बा पयम् यम्बा के़बोक्खे़बान् पोरे़आङ् ताङ्साक्पो थारिक्के के़गे़रे़आङ् वाॽ, खम्भ्याङ् आदाङ्बारे़ के़युक्किन् इक्सादिङ् खाम्बेःक्माल्ले़ नासमा कुयाओ थारिक्के वाॽ॥ 23 “पयम् हाङ्ङे, आदाङ्बारे़ लत्छा माङ्लाइङ्बा इङ्साबा, सेसे मनाधिक् साङ्ग्राम्पेदाङ्लाम् यो थासिङ्ङाङ् अक्खे पाःत्तुर पत्छे़बा के़निसु, ‘खे़न् सिङ्बुङ्ङिन् ताङे़म्मे़ॽआङ् खाप्पुथ्यःङ् चोगे़म्मे़ॽ, कर इक्ताप्पोबा याःन्सुङ्हाॽओ फे़न्जेॽ नु कासाःल्ले़ इघेःङ्मना युङ्मनाबा कुइसिक् खे़ल्ले़ कुमुःत्ते़न् ले़रे़म् युक्खे़म्मे़ॽ, खे़ल्ले़ कुसाःप्हाॽ खाम्बाङ्ङोए लाःत्ताङ् युङ्॥ ताङ्साक्पोबा सेःक्वाःल्ले़ खे़न् वाबिःन्ल, खे़ल्ले़ कुलागि कुगप् नुसि ये़म् मे़ल्ले़क्के थारिक् ताम्भुङ् थक्साहाॽ कुइसिक् पोङ्ङाङ् कुहिङ्वे़त् युङ्ल॥’ 24 “पयम् हाङ्ङे, खे़ल्ले़ कुबेःङ्ग हाबा कन्लो, हे़क्क्याङ् के़रे़क्नुःल्ले़ यम्बा निङ्वाॽफुमाङ्ङिल्ले़ आदाङ्बा पयम् हाङ्ङिल्ले़ के़दक्ले़ङ्वाओ के़बिरे़बा इङ्जाङ्ङिन् आम्भा कन्लो— 25 मनाहाॽलाम् आदाङ्बा के़म्लत् के़म्दे, हे़क्क्याङ् ताम्भुङ् थक्साहाॽनु के़वाॽ के़युङ्, पित्थक्साहाॽ कुइसिक् याःन्सुङ्हाॽ के़जरो, हे़क्क्याङ् ताङ्साङ्बोबा सेःक्वाःल्ले़ आदाङ्बा वागे़रक्॥ मनाहाॽरे़ खुन्छिॽ हाङ्जुम्मो के़रे़क्नुःल्ले़ यम्बा निङ्वाॽफुमाङ्ङिल्ले़ए काक् युक् कत्तुॽ हे़क्क्याङ् खुने़ॽ कुसिराॽ के़धाङ्बे़न् आत्तिन्छाङ् खे़न् हाङ्जुम्हाॽ पिरुॽ फाॽआङ् आदाङ्बारे़ निङ्वाॽ के़ङ्घोसुन्ल थारिक् आदाङ्बारे़ के़लागि कुगप् नुसि ये़म् ले़क्पेक्॥ 26 कुसाःप्हाॽनु सोरिक् कुमुःत्तिन् युङ्याःक्ल के़लॽबा इङ्जाङ्ङिल्ले़ कुबेन् हाबा कन्लो—आल्ल साङ्ग्राम्पेदाङ्बा निङ्वाॽफुमाङ्ङिल्ले़ युक् चोगुॽ के़लॽबा पाःन्नो आदाङ्बा के़दे़न्नाङ्लक् आदाङ्बारे़ के़हाङ्जुम्मिन् आदाङ्बा के़म्नुःक् के़म्बिरो॥ 27 कल्ले़चोगुल्ले़ पयम् हाङ्ङे, आङ्गाॽ पिने़बा सुजा पाःन्नो आदाङ्बा ते़न्दे़ॽ, कुदोःप्मा याःम्बक् चोगे़ॽआङ् लायो चोःक्मा ले़रे़ॽ हे़क्क्याङ् तुक्खे मे़जाःत्तुसिबाहाॽ लुङ्माॽ तुक्ते़से़ॽआङ् के़भे़न् याःम्बक्हाॽ ले़रे़ॽ॥ हे़क्के के़जोगुल्ले़ आदाङ्बारे़ के़नुॽमा के़दामा चक्मे़ल्लॽए पोङ्ल पेःक्लो॥” से़प्माङ्ङिन् के़रे़ 28 कन् के़रे़क् पाःन्हाॽ नबुकदनेसर हाङ्ङो के़रे़॥ 29 थिबोङ्ङाङ् ने़त्छि ला कुएगाङ् आल्ल बेबिलोन हाङ्हिम्मोबा कौसिओ हाङ्ङिन् नाना कत्ना यागे़गरे़ल्ले़, 30 खुने़ॽ अक्खे पाःत्तु, “आङ्गाॽ आमिङ्सो आधाङ्सोबा आहाङ्वा आमाङ्वारे़ लागि यम्बा आमुक्साम्लाम् आहाङ् युक्नादे़न्नो चोगुङ्ङाङ् ने़बा थे कन् पयम् यम्बा बेबिलोने़न् मेःम्बि?” 31 कन् पाःन्छेःक्वाहाॽ खुने़ॽ कुम्ब्राओलाम् लःम्माए मे़न्जुःत्ते साङ्ग्राम्पेदाङ्लाम्बा अक्तङ्बा इङ्घङ् ये़, “नबुकदनेसर हाङ्ङे, खे़ने़ॽ के़लागि कन् कुनुप्मा पाःन्निन् निःन्धो पोःक्खे़आङ् वाॽ—खे़ने़ॽ के़हाङ्युक्किन् खे़ने़ॽलाम् के़म्नाप्ते़आङ् वाॽ॥ 32 मनाहाॽलाम् खे़ने़ॽ के़म्नात् के़म्देरो हे़क्क्याङ् ताम्भुङ् थक्साहाॽनु के़वाॽ के़युङ्ॽ, पित्थक्साहाॽ कुइसिक् खे़ने़ॽ याःन्सुङ्हाॽ के़जरो॥ मनाहाॽरे़ खुन्छिॽ हाङ्जुम्मो के़रे़क्नुःल्ले़ यम्बा निङ्वाॽफुमाङ्ङिल्ले़ए काक् युक् कत्तुॽ हे़क्क्याङ् खुने़ॽ कुसिराॽ के़धाङ्बे़न् आत्तिन्छाङ् खे़न् हाङ्जुम्हाॽ पिरुॽ के़लॽबा पाःन्नो खे़ने़ॽ के़न्दे़न्ने़ल्ल थारिक् खे़ने़ॽ के़लागि कुगप् नुसि ये़म् ले़क्पेक्॥” 33 नबुकदनेसररे़ कुयाःम्बेओ मे़बाःत्तुआङ् वये़बा के़रे़क् पाःन्हाॽ खिमो के़रे़॥ मनाहाॽरे़ खुने़ॽ मे़नाःत्तु मे़देसु हे़क्क्याङ् खुने़ॽ पित्थक्साहाॽ कुइसिक् याःन्हाॽ चामा हेःक्तु॥ खुने़ॽ कुजुङ् मुरिक्हाॽ मयाःल्ले़ कुम्रिक् हे़क्तङ्बा नु कुसेःन्दुॽबान् पुःल्ले़ कुसेःन्दुॽबा कुइसिक् केःम्बा मे़म्बोङ्ङे थारिक् कुधक्किन् ताङ्साङ्बोबा सेःक्वाःल्ले़ वाबिःन्दे़रो॥ नबुकदनेसररे़ निङ्वाॽफुमाङ्ङिल्ले़ कुनारा फोसु 34 खे़न् ये़म्मिल्ले़ कुनुप्मो, आङ्गाॽ नबुकदनेसररे़ आमिक्किल्ले़ साङ्ग्राम्पेदाङ् ले़प्माङ् ओमे़त्तुङ्, हे़क्क्याङ् आनिङ्वाॽ सेरे़॥ खे़ब्याङ् आङ्गाॽ के़रे़क्नुःल्ले़ यम्बा निङ्वाॽफुमाङ्ङिल्ले़ कुनारा फोसुङ्, सदादिङ् आभे़ल्ले़साङ् कुहिङ्वे़त् के़वाॽबे़न् आङ्गाॽ मिङ्सो इङ्धाङ् नु मिमिदिङ् पिरुङ्लो॥ खुने़ॽ कुयुक्किङ्ग सदादिङ् के़वाॽबा युक्लो, खुने़ॽ कुहाङ्जुम्मिन् थाःक्थाःक्को थारिक् ने़रो॥ 35 इक्सादिङ् खाम्बेःक्कोबा के़रे़क् मनाहाॽ खुने़ॽ कुसुम् मे़न्दम्मना थेनाधेबा लेःत्तुसिरो॥ साङ्ग्राम्पेदाङ्बा मुक्साम्हाॽ नु खाम्बेःक्कोबा मनाहाॽ खुने़ॽ निङ्वाॽ इःत्तुबा कुइसिक् चोगुसिरो॥ आत्तिल्ले़आङ् खुने़ॽ कुहुक्किन् थेःक्मा मे़सुक्तुन्लो, इग्र हाःत्ले़आङ् खुने़ॽ अक्खेलॽरिक् सेःन्दोमा मे़सुक्तुन्लो, “खे़ने़ॽ थे़मा के़जोगुआङ् वाॽबे?” 36 आङ्गाॽ आनिङ्वाॽ सेरे़बा ये़म्मो, आहाङ्जुम्मोबा मिमिदिङ्ले़ आङ्गाॽ आमिङ्सो आधाःङ्सो नु आहाङ्वा आमाङ्वान् आङ्गाॽओ नुःक्खे़द्ये़॥ आङ्गाॽ आसुजादाङ्बाहाॽ नु आसुहाङ्युक्पाहाॽरे़ आङ्गाॽ कोःप्मा मे़हेःक्ताङ्, हे़क्क्याङ् आहाङ्युक्नाओ नुःक्खाङ्ङाङ् तगिनुःल्ले़आङ् पयम् यम्बा पोःक्खाङ्॥ 37 आल्ल आङ्गाॽ, नबुकदनेसररे़ साङ्ग्राम्पेदाङ्बा पयम् हाङ्ङिल्ले़ कुनारा, कुमिङ्सो कुधाःङ्सो फोसुङ्ॽ हे़क्क्याङ् मिमिदिङ् पिरुङ्ॽ, थेआङ्भे़ल्ले़ खुने़ॽ थे़मा चोगुसाङ् नुबा चोगुॽ, हे़क्क्याङ् कुयाःम्बक्हाॽ के़रे़क् कुदोःप्मा चोक्॥ हे़क्क्याङ् खुने़ॽ यम्बा के़हे़न्छिङ्बाहाॽ नःम्नःम्बा चोःक्मा सुक्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.