दानिए़ल 3 - लिम्बुसाम्म्याङ् नावाइत्ला नु मिराःक् 1 नबुकदनेसर हाङ्ङिल्ले़ तुक्पोङ् हुक्सिक् कुलिङ्गे़न् केःम्बा नु हुक्सिक् तुक्सि कुभे़रे़बा साम्म्याङ् नावाइत्ला थिक् चोगु हे़क्क्याङ् बेबिलोन ते़ङ्गप्पो के़ने़बा दुरा मे़प्मनाबा ने़ने़बादे़न्नो खे़न् ये़प्सु॥ 2 खे़न् एगाङ् खुने़ॽ खे़न् नावाइत्लान् तोःम्मारे़ लागि हाङ्जुम्मोबा यम्बा सुहाङ्गे़म्बाहाॽ, ते़ङ्गप्हाॽओबा युक्साबाहाॽ, थुम्हाॽओबा चुक्सा हाङ्हाॽ, सुजासाबाहाॽ, याङ्सुम्बाहाॽ, खासे़न्लोःम्बाहाॽ, योसमा खासे़न्हिम्मोबा खासे़न्लोःम्बाहाॽ नु के़रे़क् ते़ङ्गप्हाॽओबा सुहाङ्युक्पाहाॽ चुम्मारे़ लागि उःत्तुसि॥ 3 कल्ले़चोगुल्ले़ हाङ्जुम्मोबा यम्बा सुहाङ्गे़म्बाहाॽ, ते़ङ्गप्हाॽओबा युक्साबाहाॽ, थुम्हाॽओबा चुक्सा हाङ्हाॽ, सुजासाबाहाॽ, याङ्सुम्बाहाॽ, तुम् खासे़न्लोःम्बाहाॽ, योसमा खासे़न्हिम्मोबा खासे़न्लोःम्बाहाॽ नु ते़ङ्गप्पोबा के़रे़क् सुहाङ्युक्पाहाॽ खे़न् नावाइत्लान् तोःम्मारे़ लागि मे़जुप्से़आङ् खे़ल्ले़ कुदगि मे़ये़म्सिङ्॥ 4 खे़ब्याङ् कन् पाःन्निन् इङ्भन् के़जोक्पे़न् यम्बा इक्लाओ अःक्ते़आङ् पाःत्तु, “मे़न्छाम् याप्मिसे, मे़न्छाम् सुवाङ्से हे़क्क्याङ् वेॽ वेॽ पाःन्दाङ् के़बाःप्पासे, खिनिॽ लागि अक्तङ्बा इङ्जाङ् पोःक्खे़आङ् वाॽरो— 5 थुत्तुरिःप्पा, मुप्फ्रामा, तुःङ्गे, कङ्नि, अन्मे, ते़ःत्ते़ःप्पा नु के़रे़क् परिक्पा मुक्लाहाॽ मुक्पा खिनिॽ के़घे़प्सुम्नुमे़ःन्ने नबुकदनेसर हाङ्ङिल्ले़ ये़प्सुबा साम्म्याङ् नावाइत्लान् खिनिॽ साम्बोन् हबत् फन्नासिम्मे़ॽआङ् के़रे़क्ले़ से़वा के़मे़त्तुम्ल पोङ्ॽ॥ 6 साम्बोन् हबत् मे़म्बप्मनाआङ् से़वा मे़न्जोःक्मनाबा आत्तिन्छाङ् खिमो लुङ्धाक्किल्ले़ फाक्मनाबा मिधुङ्दिङ् मिराःक् के़दिःप्पो लाप्फुमा याक्मा पोङ्ॽ॥” 7 कल्ले़चोगुल्ले़ थुत्तुरिःप्पा, मुप्फ्रामा, तुःङ्गे, कङ्नि, अन्मे, ते़ःत्ते़ःप्पा नु के़रे़क् परिक्पा मुक्लाहाॽ मुक्ते़बा मे़घे़प्सुनुमे़ःन्ने मे़न्छाम् याप्मिहाॽ, मे़न्छाम् सुवाङ्हाॽ हे़क्क्याङ् वेॽ वेॽ पाःन्दाङ् के़बाःप्पाहाॽ के़रे़क् साम्बोन् हबत् मे़भन्छिङ्ङाङ् नबुकदनेसर हाङ्ङिल्ले़ ये़प्सुबा साम्म्याङ् नावाइत्लान् से़वा मे़मे़त्तुरो॥ सुम्सि यहुदि थाङ्बे़न्हाॽ पाःन्मे़धिक्तुसि 8 आम्भा कन् ये़म्मो खागे़इक्पाहाॽ मे़लःन्दे़ मे़द्ये़आङ् यहुदिहाॽ ताप्फे़ःम्बा निङ्वाःल्ले़ आप्तिक् मे़गुःत्तुसि॥ 9 खे़ङ्हाॽरे़ नबुकदनेसर हाङ्ङिन् मे़मे़त्तु, “पयम् हाङ्ङे, के़धाःक् चाॽररो! 10 आत्तिन्हाॽरे़ थुत्तुरिःप्पा, मुप्फ्रामा, तुःङ्गे, कङ्नि, अन्मे, ते़ःत्ते़ःप्पा नु के़रे़क् परिक्पा मुक्लाहाॽ मुक्पा मे़घे़प्सुॽ, खे़ङ्हाॽ के़रे़क्ले़ साम्बोन् पप्माआङ् साम्म्याङ् नावाइत्लान् से़वा मे़प्मा पोङ्ॽ फाॽआङ् आदाङ्बारे़ इङ्जाङ् के़जोगुआङ् वाॽ॥ 11 हे़क्क्याङ् आत्तिन् साम्बोन् मे़बत्ने़न्नाङ् से़वा मे़जोक्ने़न्, खुने़ॽ लुङ्धाक्किल्ले़ फाक्मनाबा मिधुङ्दिङ् मिराःक् के़दिःप्पो लाप्पुङ् पेक्॥ 12 कर बेबिलोनबा ते़ङ्गप्पो हाङ्युक् चोःक्मारे़ लागि आदाङ्बारे़ युक्तिङ् के़जोगुसिबा सद्रक, मेसक नु अबेद्नगो कुभा यहुदिहाॽ मे़वाॽ॥ पयम् हाङ्ङे, कन्हाॽरे़ आदाङ्बा खे़म्घे़म् के़मे़ल्लाप्ने़न्ॽ॥ कन्हाॽरे़ आदाङ्बारे़ के़माङ्हाॽआङ् से़वा मे़म्मे़त्तुसिन्ॽ, हे़क्क्याङ् आदाङ्बारे़ के़ये़प्सुबा साम्म्याङ् नावाइत्लान् साम्बोन् मे़भन्छिङ्ङाङ् से़वा मे़म्मे़त्तुन्ॽ॥” 13 हाङ्ङिन् कुसाक्के़न्निल्ले़ कुमिक्के़न् खाधाप्तुआङ् सद्रक, मेसक नु अबेद्नगोन् ताःप्मा इङ्जाङ् पिरुसि॥ कल्ले़चोगुल्ले़ कन् मनाहाॽ हाङ्ङिल्ले़ कुदगि मे़दारुसि, 14 हे़क्क्याङ् नबुकदनेसरे़ल्ले़ खे़ङ्हाॽ मे़त्तुसि, “सद्रक, मेसक नु अबेद्नगोए, खिनिॽ आङ्गाॽ आमाङ्हाॽ से़वा के़म्मे़त्तुम्सिम्मे़न् इग्र आङ्गाॽ ये़प्सुङ्बा साम्म्याङ् नावाइत्लाःन्नाङ् साम्बोन् के़भन्नासिआङ् से़वा के़म्मे़त्तुम्मिन्मु थे कन् पाःन्निन् से़क्खाबि? 15 आल्ल खिनिॽ थुत्तुरिःप्पा, मुप्फ्रामा, तुःङ्गे, कङ्नि, अन्मे, ते़ःत्ते़ःप्पा नु के़रे़क् परिक्पा मुक्लाहाॽ मुक्पा के़घे़प्सुम्नुमे़ःन्ने आङ्गाॽ चोगुङ्बा नावाइत्लान् साम्बोन् फन्छिङ्माआङ् से़वा मे़प्मारे़ लागि यारिप् के़बोक्खिने़भग्र नुबाए पोङ्ॽ॥ कर खिनिॽ कन् से़वा के़म्मे़त्तुम्मिन्ने़भग्र, खिमो लुङ्धाक्किल्ले़ फाक्मनाबा मिधुङ्दिङ् मिराःक् के़दिःप्पा मिओ लाप्के़म्भुसिॽ॥ खे़ब्याङ् आत्तिन् माङ्ङिल्ले़ आङ्गाॽ आहुक्कोलाम् खिनिॽ ताङ्से़ःप्मा के़सुक्तिबे?” 16 सद्रक, मेसक नु अबेद्नगोरे़ हाङ्ङिन् नुगप् मे़बिरु, “नबुकदनेसर हाङ्ङे, कल्ले़ कुयाःम्बेओ आदाङ्बारे़ के़दगि आनिगे ले़प्माङ् पाःप्मा के़बोङ्बा पान् थेआङ् होप्लो॥ 17 पयम् हाङ्ङे, लुङ्धाक्किल्ले़ फाक्मनाबा मिधुङ्दिङ् मिराःक् के़दिःप्मा मिओ आनिगे लाप्मे़भुसिगे़ने़भग्र, आनिगे माङ्से़वा मे़त्तुम्बे़बा निङ्वाॽफुमाङ्ङिल्ले़ आनिगे कन् लाम्बा से़ःप्मा सुक्तिगे़ॽ हे़क्क्याङ् आदाङ्बारे़ के़हुक्लाम् चोःक्युम्भो पिरिगे़॥ 18 कर आनिगे खुने़ॽ ताङ्मे़से़ःप्तिगे़न्छाङ्, पयम् हाङ्ङे, आदाङ्बारे़ के़माङ्हाॽ आनिगे से़वा मे़मे़त्तुम्सिम्बे़न्ॽ हे़क्क्याङ् आदाङ्बारे़ के़ये़प्सुबा साम्म्याङ् नावाइत्लाःन्नाङ् साम्बोन्नाङ् से़वा मे़मे़त्तुम्बे़न्ॽ के़लॽबा आदाङ्बारे़ निङ्वाॽ के़घोसुर फाॽआङ् आनिगे इःत्तुम्बे़रो॥” यहुदि थाङ्बे़न्हाॽ खुम्दिङ् मे़बिरुसि 19 खे़ब्याङ् सद्रक, मेसक नु अबेद्नगोन्नु नबुकदनेसरे़न् कुसाक्के़न्निल्ले़ कुमिक्के़न् खाधाप्तु, हे़क्क्याङ् कुनारान् मराःक् यारिक् मि हे़क्तङ्बा पोःक्खे़॥ खुने़ॽ खे़न् मिधुङ्दिङ् मिराःक्के़न् नुसिले़ङ् यारिक् पये़म् के़ये़म्बा चोःक्मा इङ्जाङ् पिरुसि, 20 हे़क्क्याङ् खुने़ॽ कुदुराबा के़रे़क्नुःल्ले़ के़धुम्बा कुभा थक्सुबाहाॽरे़ सद्रक, मेसक नु अबेद्नगोन् इघेःङ्मासिआङ् लुङ्धाक्किल्ले़ फाक्मनाबा मिधुङ्दिङ् मिराःक् के़दिःप्पा मिओ लाप्फुमासि इङ्जाङ् पिरुसि॥ 21 खे़ल्ले़चोगुल्ले़ कन् मनाहाॽ तेत्, सुःम्बा, पागरि हे़क्क्याङ् वेॽ चाङ्हाॽनु सोरिक् इमे़घेःक्खुसिआङ् लुङ्धाक्किल्ले़ फाक्मनाबा मिधुङ् मिराःक् के़दिःप्पा मिओ लाप्मे़भुसु मे़याक्तुसि॥ 22 हाङ्ङिल्ले़ के़आःप्पा कुइङ्जाङ्ङिन् मे़ङ्घे़म्मे मे़न्नुॽमनाबा वये़ हे़क्क्याङ् लुङ्धाक्किल्ले़ फाक्मनाबा मिधुङ्दिङ् मिराःक् के़दिःप्पा मिन् आत्तातान्ने साॽरिक् ये़म्दे़, मिधुङ्दिङ् मिराःक् के़दिःप्पा मिःल्ले़ सद्रक, मेसक नु अबेद्नगोन् मिओ के़देॽबा थक्सुबाहाॽ हदॽ मे़स्ये़॥ 23 हे़क्क्याङ् कन् सुम्सि मनाहाॽ चिगे़क् चिगे़क् मे़म्बाःङ्ङे इमे़घेःक्खुसिबाए लुङ्धाक्किल्ले़ फाक्मनाबा मिधुङ्दिङ् मिराःक् के़दिःप्पा मिओ मे़लासे़॥ 24 खे़न् एगाङ् नबुकदनेसर हाङ्ङिन् कुनिङ्वाॽ मये़आङ् पित्चाक् पित्चाक् पिन्दे़र खुने़ॽ कुसुजासाबाहाॽ सेःन्दोसुसि, “थे आनिॽ इआघेःक्खुम्सिम्माङ् मिधुङ्दिङ् मिराःक् के़दिःप्पा मिओ लाप्आभुसुम्सिम्बा मनाहाॽ सुम्भुसि मेःम्बि?” खे़ङ्हाॽरे़ नुगप् मे़बिरु, “से़क्खाएरो, पयम् हाङ्ङे॥” 25 खुने़ॽ पाःत्तु, “ओमे़त्ते़म्मे़ॽ, मिओ लिसि मनाहाॽ ना नु कत्ना लाङ्मे़घेःक्ल मे़याक्पा निसुङ्सिङ्ल पत्ता, खे़ङ्हाॽ इमे़ङ्घेःङ्सिङ्ङेबा नु आजे़ःत्छिक्काङ् मिमे़न्दिक्केबा निमे़दे़त्, हे़क्क्याङ् लिसिगेक्पा मनाःङ्ग माङ्सा हे़क्तङ्बा निधाःप्लो॥” यहुदि थाङ्बे़न्हाॽ थो यम्बा मे़बोःक्खे़ 26 खे़ब्याङ् नबुकदनेसरे़न् लुङ्धाक्किल्ले़ फाक्मनाबा मिधुङ्दिङ् मिराःक् के़दिःप्पा मिओ लाःप्मा लाम्मो निःत्ताङ् पेआङ् यम्बा इक्लाओ अःक्ते़, “सद्रक, मेसक नु अबेद्नगोसे, के़रे़क्नुःल्ले़ यम्बा निङ्वाॽफुमाङ्ङिल्ले़ कुसे़वारोबासे, लाःक्कात् लःन्दे़म् फे़रे़म्मे़ॽओ॥” खे़ब्याङ् सद्रक, मेसक नु अबेद्नगोन् मिओलाम् लाःक्कात् मे़लःन्दे़ मे़भे़रे़, 27 हे़क्क्याङ् हाङ्जुम्मोबा यम्बा सुहाङ्गे़म्बाहाॽ, ते़ङ्गप् युक्साबाहाॽ, चुक्सा हाङ्हाॽ नु हाङ् सुजासाबाहाॽ खे़ङ्हाॽरे़ खुन्छिॽ कब्रिङ् पिसाङ् चिहुॽ चिहुॽ मे़जुप्से़॥ खे़ङ्हाॽरे़ खुन्छिॽ थक्किन् मिःल्ले़ आजे़ःत्छिक्काङ् मिमे़दिगे़न्बा खे़ङ्हाॽरे़ मे़निसुसि, खे़ङ्हाॽरे़ खुन्छिॽ थक्कोबा मुरिक् थिक्काङ् मे़ङ्गिक्के पत्छे़, खे़ङ्हाॽरे़ खुन्छिॽ चाङ्हाॽ मिःल्ले़ मे़न्छुए पत्छे़ हे़क्क्याङ् खे़ङ्हाॽओ मिःल्ले़ कुनाम् थिक्काङ् होःप्ते़॥ 28 खे़न् एगाङ् नबुकदनेसररे़ मे़त्तुसि, “सद्रक, मेसक नु अबेद्नगोरे़ खुन्छिॽ निङ्वाॽफुमाङ्ङिल्ले़ कुनारा पोररो, खुने़ॽ कुमाङ्लाइङ्बे़न् पाङ्घुआङ् कुसे़वारोबाहाॽ ताङ्से़ःप्तुसि॥ खे़ङ्हाॽरे़ खुने़ॽ नसान् मे़जोगु, खे़ङ्हाॽ आङ्गाॽ आइङ्जाङ्ङिन् खे़म्मा मे़न्दे़न्दे़न् हे़क्क्याङ् खुन्छिॽ हिङ्मे़न् आप्फेक् के़साक्पो मे़धासु॥ खे़ङ्हाॽरे़ खुन्छिॽ आप्फेक् निङ्वाॽफुमाङ्ङिन्नाङ्धो वेॽ आत्तिन् माङ्ङिन्नाङ् साबन् मे़भन्छिङ्ङाङ् माङ्से़वा मे़म्मे़त्तुन्॥ 29 कल्ले़चोगुल्ले़ आङ्गाॽ कन् पाःन्निन् उवा चोगुङ्ल पत्ता, आत्तिन् सुवाङ्हाॽरे़ इग्र आत्तिन् पाःन्दाङ् के़बाःप्पा मनाहाॽरे़ सद्रक, मेसक नु अबेद्नगोरे़ खुन्छिॽ निङ्वाॽफुमाङ्ङिल्ले़ कुदक्ले़ङ्वाओ कुभा पान् मे़बाःत्तुने़भग्र, खे़ङ्हाॽ कुजक्ता कुले़म्दा मे़बोङ्ल च्ये़प्मासि पोङ्ॽ हे़क्क्याङ् खे़ङ्हाॽरे़ खुन्छिॽ हिम्धाःङ्हाॽ खाप्पुथ्यःङ् चोःक्मा पोङ्ॽ, थेआङ्भे़ल्ले़ अक्खेलॽरिक् वेॽ आत्तिन् माङ्ङिल्ले़आङ् ताङ्से़ःप्मा आन्छुक्ने़न्॥” 30 खे़न् एगाङ् हाङ्ङिल्ले़ सद्रक, मेसक नु अबेद्नगोन् बेबिलोन ते़ङ्गप्पो यम्बा चोगुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.