Biblia Todo Logo
Bib sou entènèt

- Piblisite -

दानिए़ल 2 - लिम्‍बु


नबुकदनेसरे़ल्‍ले़ कुसे़प्‍माङ्

1 नबुकदनेसररे़ युक् चोगुबा निसिगेक्‍पा तङ्‌बेओ खुने़ॽ से़प्‍माङ्‌हाॽ माक्‍तु॥ खुने़ॽ कुनिङ्‌वाॽ चारामे़आङ् खुने़ॽ इम्‍माए मे़सुक्‍ते़न्॥

2 कल्‍ले़चोगुल्‍ले़ हाङ्‌ङिल्‍ले़ माक्‍तुबा से़प्‍माङ्‌हाॽ चे़क्‍मासिरे़ लागि कित्‍चाक् के़जोःक्‍पाहाॽ, साम्‍माङ्‌च्‍याःङ् मुरा के़मे़प्‍पाहाॽ, ये़बाहाॽ नु खागे़इक्‍पाहाॽ उःत्ते़म् तारे़म्‍से़ॽ फाॽआङ् इङ्‌जाङ् पिरुसि॥ आल्‍ल खे़ङ्‌हाॽ मे़द्‌ये़आङ् हाङ्‌ङिल्‍ले़ कुदगि मे़ये़म्‍सिङ्,

3 खुने़ॽ खे़ङ्‌हाॽ मे़त्तुसि, “आङ्‌गाॽ लत्‍छा से़प्‍माङ् माक्‍तुङ्‌ङाङ् वाॽ॥ खे़ल्‍ले़ आङ्‌गाॽ निङ्‌वाॽ तुक्‍खे चामो थ्‍याङ्‌ल याःन्‍दाङ्‌ङाङ् वाॽआ, हे़क्‍क्‍याङ् खे़ल्‍ले़ कुबेन् आङ्‌गाॽ कुसिङ् निःप्‍मा आनिङ्‌वाॽ वाॽ॥”

4 खे़ब्‍याङ् खागे़इक्‍पाहाॽरे़ अरामि पाःन्‍दाङ्‌ङो हाङ्‌ङिन् मे़मे़त्तु, “पयम् हाङ्‌ङे के़धाःक् चाॽररो! आदाङ्‌बारे़ के़से़वारोबाहाॽ के़से़प्‍माङ्‌ङिन् आजे़क्‍ते़ॽ, हे़क्‍क्‍याङ् आनिगे खे़ल्‍ले़ कुबेन् हन्‍दुम् पिआसिगे़ॽ॥”

5 हाङ्‌ङिल्‍ले़ खे़न् खागे़इक्‍पाहाॽ मे़त्तुसि, “आङ्‌गाॽ कन् पाःन्‍निन् निःन्‍धो चोगुङ्‌ङाङ् वाॽ—खिनिॽ आङ्‌गाॽ माक्‍तुङ्‌बा से़प्‍माङ्‌ङिन् नु खे़ल्‍ले़ कुबेन् हम्‍मा के़न्‍छुक्‍तुम्‍मिन्‍ने़भग्र, खिनिॽ कुजक्‍ता कुले़म्‍दा के़बोःक्‍खिर याःन्‍निङ्‌ॽ हे़क्‍क्‍याङ् खिनिॽ हिम्‍धाःङ्‌हाॽ खाप्‍पुथ्‍यःङ् पोङ्‌ल याःन्‍दुङ्‌ॽ॥

6 कर खिनिॽ आङ्‌गाॽ आसे़प्‍माङ्‌ङिन् नु खे़ल्‍ले़ कुबेन् के़हन्‍दुम्‍ने़भग्र, आङ्‌गाॽलाम् खिनिॽ मिक्‍पेहाॽ नु थुम्‍घोहाॽ हे़क्‍क्‍याङ् यम्‍बा मिङ्‌सो इङ्‌धाङ् के़घोसुम्‌ॽ॥ कल्‍ले़चोगुल्‍ले़ आङ्‌गाॽ आसे़प्‍माङ्‌ङिन् नु खे़ल्‍ले़ कुबेन् आजे़क्‍ते़म्‍मे़ॽ॥”

7 याम्‍मो थिक्‍ले़ङ् खे़ङ्‌हाॽरे़ खुने़ॽ मे़मे़त्तु, “पयम् हाङ्‌ङिल्‍ले़ के़से़प्‍माङ्‌ङिन् के़से़वारोबाहाॽ आजे़क्‍ते़ॽ हे़क्‍क्‍याङ् आनिगे खे़ल्‍ले़ कुबेन् हन्‍दुम् पिआसिगे़ॽ॥”

8 खे़ब्‍याङ् हाङ्‌ङिल्‍ले़ खे़ङ्‌हाॽ नुगप् पिरुसि, “आङ्‌गाॽलाम् खिनिॽ ये़म् के़नाःक्‍तुम्‍माङ् नाम्‍देसिङ्‌मा के़गोःत्तुम्‍ल के़वयिॽ फाॽआङ् आङ्‌गाॽ से़क्‍खा निसुङ्‌ङाङ् वाॽ, थेआङ्‌भे़ल्‍ले़ आङ्‌गाॽ थेःन् निःन्‍धो चोगुङ्‌ङाङ् वाॽ खे़न् खिनिॽ निङ्‌वाॽ के़घोसुम्‍माङ् के़वयिॽ॥

9 खिनिॽ आङ्‌गाॽ आसे़प्‍माङ्‌ङिल्‍ले़ कुबेन् के़न्‍हन्‍दुम्‍मिन्‍ने़भग्र खिनिॽ लागि लत्‍छारक् खुम्‍दिङ् वाॽ॥ खे़न् याक्‍नाम्‍मिन् ले़ङ्‌बिला के़लॽबा निङ्‌वाॽ के़इःत्तुम्‍माङ् खिनिॽ मे़न्‌वाॽमनाबा नु फे़न्‌याःम्‍बक् चोःक्‍मा इङ् के़दङ्‌घुम्‍माङ् वाॽ॥ कल्‍ले़चोगुल्‍ले़ आसे़प्‍माङ्‌ङिन् आजे़क्‍ते़म्‍मे़ॽ, हे़क्‍क्‍याङ् खिनिॽ खे़ल्‍ले़ कुबेन् हम्‍मा के़सुक्‍तुम् फाॽआङ् आङ्‌गाॽ निङ्‌वाॽ खोसुङ्‌ॽ॥”

10 खागे़इक्‍पाहाॽरे़ हाङ्‌ङिन् नुगप् मे़बिरु, “पयम् हाङ्‌ङिल्‍ले़ के़बाःत्तुबा पाःन्‍निन् चोःक्‍मा के़सुक्‍पा कन् इक्‍सादिङ् खाम्‍बेःक्‍मो आत्तिन्‍नाङ्‌ होप्॥ आक्‍ख्‍याक् पयम् यम्‍बा नु मुक्‍साम्‍साबा चोःक्‍साङ् आत्तिन् हाङ्‌ङिल्‍ले़आङ् कित्‍चाक् के़जोःक्‍पाहाॽ इग्र साम्‍माङ्‌च्‍याःङ् मुरा के़मे़प्‍पाहाॽ किग्र खागे़इक्‍पाहाॽ अक्‍तङ्‌बा पान् आप्‍फाल्‍ले़आङ् नाःक्‍तुसिबा होप्॥

11 पयम् यम्‍बा हाङ्‌ङिल्‍ले़ सेःन्‍दो के़जोगुबा कन् से़ःन्‍लाप्‍पिन् साॽरिक् के़साक्‍पा चोक्॥ माङ्‌हाॽनुःल्‍ले़ वेॽ आत्तिल्‍ले़आङ् कन् पाःन्‍निन् पयम् हाङ्‌ङिन् चे़क्‍मा के़न्‍छुक्‍ने़न्॥ खे़न् माङ्‌हाॽ मनाहाॽरे़ खुन्‍छिॽ लुम्‍मो मे़न्‌वाॽने़न्॥”

12 कल्‍ले़चोगुल्‍ले़ हाङ्‌ङिन् साॽरिक् कुसिक् पोगे़ हे़क्‍क्‍याङ् खुने़ॽ बेबिलोनबा के़रे़क् सिक्‍कुम्‍साबा ये़म्‍बित्‍छाहाॽ सिमे़ल्‍ले़ खुम्‍दिङ् पिमासि इङ्‌जाङ् पिरुसि॥

13 कम्‍भलॽरिक् सिक्‍कुम्‍साबा ये़म्‍बित्‍छाहाॽ सिमे़ल्‍ले़ खुम्‍दिङ् पिमासि इङ्‌जाङ् लःन्‍दे़ हे़क्‍क्‍याङ् दानिए़ले़न् नु कुन्‍देःङ्‌बाहाॽआङ् से़प्‍मासि फाॽआङ् खे़ङ्‌हाॽ उःप्‍मासिरे़ लागि मनाहाॽ मे़बाङ्‌घुसिरो॥

14 आल्‍ल हाङ्‌ङिल्‍ले़ कुधक् कम्‍ब्राङ् के़मे़प्‍पे़ल्‍ले़ कुधक्‍मोबा अर्योके़न् बेबिलोनबा सिक्‍कुम्‍साबा ये़म्‍बित्‍छाहाॽ सिमे़न्‍ले़ खुम्‍दिङ् पिमासिरे़ लागि लःन्‍दे़ल्‍ले़, दानिए़लरे़ सिक्‍कुम्‍दिङ् निङ्‌वाॽ नु साॽरिक् सिङ्‌सिङ् ये़क्‌ये़क्‍काङ् खे़न् पान् सेःन्‍दोसु,

15 “हाङ्‌ङिल्‍ले़ थेआङ् अक्‍तङ्‌बा के़आःप्‍पा इङ्‌जाङ् लःत्तुबाबे?” खे़ब्‍याङ् अर्योकरे़ दानिए़ले़न् के़रे़क् पाःन्‍हाॽ चे़क्‍तु॥

16 कन् खे़प्‍सुआङ् दानिए़ले़न् हाङ्‌ङिल्‍ले़ कुदगि पे हे़क्‍क्‍याङ् से़प्‍माङ्‌ङिल्‍ले़ कुबेन् चे़क्‍मा फाॽआङ् ये़म् खोमारे़ लागि पेलि फाक्‍तु॥

17 खे़ब्‍याङ् दानिए़ले़न् कुहिम्‍मो नुःक्‍खे़आङ् खे़न् पाःन्‍निन् हनन्‍याह, मिसाएल नु अजर्‍याह कुन्‍जुम्‍हाॽ चे़क्‍तुसि॥

18 बेबिलोनबा वेॽ सिक्‍कुम्‍साबा ये़म्‍बित्‍छाहाॽनु खुने़ॽ हे़क्‍क्‍याङ् कुन्‍जुम् कुन्‍देःङ्‌हाॽ सोरिक् सिमा मे़बोङ्‌ने़न्‍ल फाॽआङ् कन् सिबिॽ पाःन्‍निन् पाःप्‍मारे़ लागि साङ्‌ग्राम्‍पेदाङ्‌बा निङ्‌वाॽफुमाङ्‌ङिल्‍ले़ लुङ्‌माॽ आदुक्‍ल फाॽआङ् खुने़ॽनु पेलिगे़न् तुवा चोःक्‍मारे़ लागि कुन्‍जुम् कुन्‍देःङ्‌हाॽ पेलि फाक्‍तुसि॥

19 से़न्‍दिक् सुफोओ कन् सिबिॽ पाःन्‍निन् दानिए़लरो ओसेःन्‍धाङ् पोःक्‍खे़॥ खे़ब्‍याङ् दानिए़लरे़ साङ्‌ग्राम्‍पेदाङ्‌बा निङ्‌वाॽफुमाङ्‌ङिन् कुनारा फोसु॥

20 हे़क्‍क्‍याङ् खुने़ॽ अक्‍खे पाःत्तुरो, “आभे़ल्‍ले़साङ् निङ्‌वाॽफुमाङ्‌ङिल्‍ले़ कुमिङ्‌ङिन् इङ्‌धाङ् पोङ्‌लरो॥ सिक्‍कुम्‍दिङ् निङ्‌वाॽ नु मुक्‍साम्‍मिन् खुने़ॽइन्‍नेरो॥

21 खुने़ॽए ये़म् नु याक्‌वाहाॽ ले़क्‍खुरो॥ खुने़ॽए हाङ्‌हाॽ हाङ्‌युक्‍नाओ युक्‍खुसिरो हे़क्‍क्‍याङ् खुने़ॽए खे़ङ्‌हाॽ खे़त्तुसिरो॥ खुने़ॽ सिक्‍कुम्‍साबाहाॽ ने़हिनिङ्‌वाॽ पिरुसिरो खे़ब्‍याङ् खासिङ् के़निःप्‍पाहाॽ सिक्‍कुम् निङ्‌वाॽ पिरुसिरो॥

22 खुने़ॽ कुबे के़याक्‍पा पाःन्‍हाॽ नु सिबिॽबा पाःन्‍हाॽ ओसेःन्‍धाङ् चोगुरो, खामाक्‍मो के़वाॽबा पाःन्‍हाॽ खुने़ॽ निसुरो हे़क्‍क्‍याङ् ओःत्तिःन् खुने़ॽओ याङ्‌धोक्‍लो॥

23 आसुधे़बा आधाःक्‍थे़बाहाॽरे़ खुन्‍छिॽ निङ्‌वाॽफुमाङ्‌ङे, आङ्‌गाॽ खे़ने़ॽ नुगे़न् पिने़रो हे़क्‍क्‍याङ् खे़ने़ॽ के़नारा फोसुङ्‌लो, खे़ने़ॽ सिक्‍कुम्‍दिङ् निङ्‌वाॽ नु आङ्‌गाॽ मुक्‍साम् के़बिराङ्‌ङाङ् वाॽरो॥ आनिगे खे़ने़ॽ नाःक्‍कासिगे़बा पाःन्‍निन् आङ्‌गाॽ ओसेःन्‍गे़धाक्‍ताङ्‌ङाङ् वाॽरो खे़ने़ॽ हाङ्‌ङिल्‍ले़ कुसे़प्‍माङ्‌ङिन् आनिगे याप्‍मि ओःन्‍गे़धाक्‍ते़आङ् वाॽरो॥”


दानिए़लरे़ से़प्‍माङ्‌ङिल्‍ले़ कुबेन् हन्‍दु

24 खे़ब्‍याङ् बेबिलोनबा सिक्‍कुम्‍साबा ये़म्‍बित्‍छाहाॽ से़प्‍मासि फाॽआङ् हाङ्‌ङिल्‍ले़ मुरामे़त्तुबा अर्योकओ दानिए़ले़न् पेआङ् खुने़ॽ मे़त्तु, “खे़ने़ॽ बेबिलोनबा सिक्‍कुम्‍साबाहाॽ मे़से़रे़से़न्‍ने़ॽ॥ आङ्‌गाॽ हाङ्‌ङे़ओ तेॽराङ्‌ङे़ॽ हे़क्‍क्‍याङ् आङ्‌गाॽ खुने़ॽ कुसे़प्‍माङ्‌ङिल्‍ले़ कुबेन् चे़क्‍तुङ्‌ॽ॥”

25 हे़क्‍क्‍याङ् अर्योकरे़ खिमो दानिए़ले़न् हाङ्‌ङे़ओ तेॽरुआङ् मे़त्तु, “यहुदालाम् के़भे़म्‍बा मे़दे़म्‍सु मे़भे़त्तुसिबाहाॽओ आङ्‌गाॽ मनाधिक् तुमुङ्‌ङाङ् वाॽ, खुने़ॽ हाङ्‌ङिल्‍ले़ कुसे़प्‍माङ्‌ङिल्‍ले़ कुबेन् चे़ङ्‌मा सुक्‍तुॽ॥”

26 हाङ्‌ङिल्‍ले़ दानिए़ले़न् (खुने़ॽ कुमिङ् बेलतसजरआङ् वये़) सेःन्‍दोसु, “थे आङ्‌गाॽ माक्‍तुङ्‌बा आसे़प्‍माङ्‌ङिन् पाःप्‍मा नु खे़ल्‍ले़ कुबेन् खे़ने़ॽ हम्‍मा के़सुक्‍तुबि?”

27 दानिए़लरे़ नुगप् पिरु, “पयम् हाङ्‌ङिल्‍ले़ से़ःन्‍गे़दोसुबा सिबिॽ पाःन्‍निल्‍ले़ कुबेन् सिक्‍कुम्‍साबा ये़म्‍बित्‍छा, साम्‍माङ्‌च्‍याःङ् मुरा के़मे़प्‍पा, कित्‍चाक् के़जोःक्‍पा इग्र थुम्‍म्‍या के़इबा आत्तिल्‍ले़आङ् कुबे हम्‍मा मे़सुक्‍तुन्‌ॽ,

28 कर साङ्‌ग्राम्‍पेदाङ्‌ङो निङ्‌वाॽफुमाङ् वाॽ, खुने़ॽ सिबिॽबा पाःन्‍हाॽ ओसेःन्‍धाङ् चोगुॽ॥ खुने़ॽ के़दाबा ये़म्‍मो के़बोङ्‌बा पाःन्‍हाॽ पयम् हाङ् नबुकदनेसरे़न् ओसेःन्‍धाक्‍तुआङ् वाॽ॥ आदाङ्‌बा ने़त्‍नाओ के़सोःन्‍छिङ्‌ङाङ् के़ने़स्‍से़ल्‍ले़ आदाङ्‌बारे़ के़निङ्‌वाॽओ के़माक्‍तुबा से़प्‍माङ्‌ङिन् नु के़निसुबा सुफोहाॽ हाबा कन्‍हाॽएरो—

29 “पयम् हाङ्‌ङे, आदाङ्‌बा ने़त्‍नाओ के़सोःन्‍छिङ्‌ङाङ् के़ने़स्‍से़बा ये़म्‍मो ताःन्‍दि थे पोङ्‌बिला फाॽआङ् आदाङ्‌बारे़ के़निङ्‌वाॽ ताॽजे़क्‍खे़, हे़क्‍क्‍याङ् सिबिॽ पान् ओसेःन्‍धाङ् के़जोःक्‍पे़ल्‍ले़ ताये़म्‍मो के़बोङ्‌बा पाःन्‍हाॽ ओसेःन्‍गे़धाक्‍ते़आङ् वाॽ॥

30 आङ्‌गाॽलाम् कन् सिबिॽ पाःन्‍निल्‍ले़ कुबे ओसेःन्‍धाङ् पोःक्‍खे़बान् आङ्‌गाॽ वेॽ कुहिङ्‌वे़त् मे़न्‍छाम् याप्‍मिहाॽनुःल्‍ले़ यरिक् सिक्‍कुम्‍साबा पोःक्‍खाङ्‌बाल्‍ले़ चोगुल्‍ले़ मेःन्, कर आदाङ्‌बा पयम् हाङ्‌ङिल्‍ले़ के़से़प्‍माङ्‌ङिल्‍ले़ कुबेन् हन्‍ल हे़क्‍क्‍याङ् आदाङ्‌बारे़ के़निङ्‌वाॽओ के़वाॽबा पाःन्‍हाॽ कुसिङ् निःप्‍मा के़सुक्‍तुर फाॽआङ् ओसेःन्‍धाङ् पोःक्‍खे़आङ् वाॽ॥

31 “पयम् हाङ्‌ङे, आदाङ्‌बारे़ ओगे़मे़त्तुर के़बत्‍छे़ल्‍ले़ यम्‍बा इत् थिक् ये़बे़बा के़निसु॥ कन् इःत्तिन् साॽरिक् यम्‍बा नु से़ल्‍ले़ङ् से़ल्‍ले़ङ् के़ओःप्‍पा निदे़त्ते़ हे़क्‍क्‍याङ् कुनारान् किप्‍मागे़घुबा चोगे़॥

32 खे़न् इःत्ते़ल्‍ले़ कुधे़गेक्‍पान् साम्‍म्‍याङ् इसेःङ्‌बा, कुसङ्‌बप्‍मान् नु कुहुक्‍हाॽ युप्‍पा, कुसाप्‍पोःक्‍किन् नु कुलाङ् से़बङ्‌बान् कासा,

33 कुलाङ्‌हाॽ फे़न्‍जेॽ हे़क्‍क्‍याङ् कुलाङ् ताप्‍पेॽहाॽ कुभा फे़न्‍जेॽ नु कुभा पसाक्‍के़साक्‍पा खाम्‍मिन् फुप्‍मनाआङ् चोःक्‍मनाबा चोगे़॥

34 आदाङ्‌बारे़ ओगे़मे़त्तुर के़बत्‍छे़ल्‍ले़ याक्‍पेॽओलाम् यम्‍बा लुङ्‌धिक् मनाहाॽरे़ मे़न्‍छुए खक्‍ते़ ये़॥ कन् लुङ्‌ङिन् फे़न्‍जेॽ नु पसाक्‍के़साक्‍पा खाम्‍मिल्‍ले़ चोःक्‍मनाबा खे़न् इःत्तिल्‍ले़ कुलाङ्‌ङो तोःक्‍ते़ खे़ब्‍याङ् खे़न् फयःप्‍फयःप् यःप्‍सुदेसु॥

35 खे़ब्‍याङ् खे़न् फे़न्‍जेॽ, पसाक्‍के़साक्‍पा खाम्, कासा, युप्‍पा नु साम्‍म्‍याङ्‌हाॽ थिक्‍ले़ङ्‌ले़ कुम्‍जिक्‍मा पोःक्‍खे़, हे़क्‍क्‍याङ् हाङ्‌वामा ये़म्‍मो चा थाम्‍मादे़न्‍नोलाम् चाःल्‍ले़ कुसिप्‍हाॽ सुरित् केजङ्‌ङिल्‍ले़ फुत्‍लुम् फे़सुदेॽरुबा कुइसिक् खे़न् वरे़ङ्‌ले़ङ् फे़सुदेॽरु॥ कर खे़न् इःत्तो के़दोःक्‍पा लुङ्‌ङिन् यम्‍बा पोःक्‍खे़र पेआङ् कोःक्‍मा फाङ्‌जङ् पोःक्‍खे़ हे़क्‍क्‍याङ् खे़ल्‍ले़ काक् इक्‍सादिङ् खाम्‍बेःक्‍मान् ते़प्‍तु॥

36 “से़प्‍माङ्‌ङिन् हाबा कन्‍लो, हे़क्‍क्‍याङ् आल्‍ल पयम् हाङ्‌ङिन् कल्‍ले़ कुबेन् चे़क्‍कासिगे़ॽ॥

37 आदाङ्‌बाए हाङ्‌हाॽरे़ खुन्‍छिॽ पयम् हाङ् के़वाॽ॥ साङ्‌ग्राम्‍पेदाङ्‌बा निङ्‌वाॽफुमाङ्‌ङिल्‍ले़ आदाङ्‌बान् हाङ्‌जुम्, हाङ्‌वा माङ्‌वा, मुक्‍साम् नु मिमिदिङ् के़बिरे़आङ् वाॽ॥

38 खुने़ॽ आदाङ्‌बारे़ के़हुक्‍को इक्‍सादिङ् खाम्‍बेःक्‍मोबा के़रे़क् मे़न्‍छाम् याप्‍मिहाॽ नु कुबु थक्‍साहाॽ हे़क्‍क्‍याङ् ताङ्‌साङ्‌बोबा पुसाहाॽ के़बिरे़आङ् वाॽ॥ खे़ङ्‌हाॽ आत्तो आत्तो मे़वाॽ, खुने़ॽ खे़ङ्‌हाॽ सम्‍धाङ् खे़ने़ॽ युक् के़बिरे़आङ् वाॽ॥ खे़न् साम्‍म्‍याङ् थे़गेक्‍पाङ्‌ग आदाङ्‌बान्‍नेरो॥

39 “आदाङ्‌बारे़ के़एगाङ् ताःन्‍दि, आदाङ्‌बारे़न्‍नुःल्‍ले़ मिसाक् चुक्‍पा कुमुक् के़याक्‍पा हाङ्‌जुम् थिक् पोङ्‌ॽ॥ खे़न् एगाङ् कासाबा सुम्‍सिगेक्‍पा हाङ्‌जुम्‍मिल्‍ले़ काक् इक्‍सादिङ् खाम्‍बेःक्‍मो हाङ्‌युक् चोगुॽ॥

40 कुनुप्‍मो, फे़न्‍जेॽ यारिक् के़धुम्‍बा लिसिगेक्‍पा हाङ्‌जुम् पोङ्‌ॽ, थेआङ्‌भे़ल्‍ले़ फे़न्‍जेल्‍ले़ के़रे़क् पाःन्‍हाॽ कुम्‍जिक् चोगुबा कुइसिक् खे़ल्‍ले़ वेॽ के़रे़क् मे़क्‍खुसिआङ् फुत्‍छिङ्‌ज्‍याङ् चोगुसिॽ॥

41 आदाङ्‌बारे़ कल्‍ले़ कुलाङ्‌हाॽ नु कुलाङ्‌जोःक्‍हाॽ कुभा पसाक्‍के़साक्‍पा खाम्, कुभा फे़न्‍जेल्‍ले़ चोःक्‍मनाबा के़निसुबा कुइसिःक्‍के कन् के़से़म्‍बा हाङ्‌जुम् पोङ्‌ॽ, हे़क्‍केसाङ् आदाङ्‌बारे़ फे़न्‍जेन् पसाक्‍के़साक्‍पा खाम्‍मिन्‍नु फुत्‍छिङ्‌बा के़निसुबा कुइसिक् कप्‍मो कुभा फे़न्‍जेन् के़धुम्‍बा पोङ्‌ॽ॥

42 खे़न् लाङ्‌जोःक्‍हाॽ कुभा फे़न्‍जेॽ नु कुभा पसाक्‍के़साक्‍पा खाम्‍मिल्‍ले़न् पत्‍छे़बा कुइसिःक्‍के कन् हाङ्‌जुम्‍मिन् कुभा के़धुम्‍बा नु कुभा मे़न्‍धुम्‍मनाबा पोङ्‌ॽ॥

43 हे़क्‍क्‍याङ् आदाङ्‌बारे़ फे़न्‍जेन् पसाक्‍के़साक्‍पा खाम्‍मिन्‍नु पःन्‍दे़बा के़निसुबा कुइसिक् मनाहाॽआङ् के़बःम्‍बा मे़न्‍छाम् सुवाङ् मे़बोङ्‌ङाङ् फे़न्‍जेन् पसाक्‍के़साक्‍पा खाम्‍मिन्‍नु मे़दङ्‌ने़म्‍बा कुइसिक् खे़ङ्‌हाॽ थिक्‍हुप् मे़म्‍बोङ्‌ने़न्॥

44 “कन् हाङ्‌हाॽरे़ खुन्‍छिॽ ये़म्‍मो साङ्‌ग्राम्‍पेदाङ्‌बा निङ्‌वाॽफुमाङ्‌ङिल्‍ले़ आप्‍फाल्‍ले़आङ् मे़न्‍नुप्‍मनाबा हाङ्‌जुम् थिक् चोगुॽ, खे़न् हाङ्‌जुम्‍मिन् आप्‍फाल्‍ले़आङ् वेॽ सुवाङ्‌हाॽरे़ खुन्‍छिॽ हुक्‍को मे़जुक्‍ने़न्॥ कल्‍ले़ खे़न् हाङ्‌जुम्‍हाॽ के़रे़क् खाप्‍पुथ्‍यःङ् चोगुसिआङ् नुप्‍सुसिॽ, कर खे़न् हाङ्‌जुम्‍मिन् सदादिङ् आभे़ल्‍ले़आङ् मे़नुप्‍ने़न्॥

45 मनाहाॽरे़ खुन्‍छिॽ हुक्‍किल्‍ले़ मे़न्‍छुए याक्‍पेॽओलाम् खक्‍ते़ ये़बा लुङ्‌ङिल्‍ले़ फे़न्‍जेॽ, कासा, पसाक्‍के़साक्‍पा खाम्, युप्‍पा नु साम्‍म्‍याङ्‌हाॽ खाप्‍पुथ्‍यःङ् चोगुबा आदाङ्‌बारे़ के़निसुबा लुङ्‌ङिल्‍ले़ कुबेन् हाबा कन्‍लो॥ के़रे़क्‍नुःल्‍ले़ यम्‍बा निङ्‌वाॽफुमाङ्‌ङिल्‍ले़ के़दाबा ये़म्‍मो के़बोङ्‌बा पाःन्‍हाॽ पयम् हाङ्‌ङिन् ओसेःन्‍गे़धाक्‍ते़आङ् वाॽ॥ खे़न् से़प्‍माङ्‌ङिन् से़क्‍खाबा नु खे़ल्‍ले़ कुबेन् नसान् चोःक्‍मा सुक्‍के़दे़प्‍पा चोक्‍लो॥”


हाङ्‌ङिल्‍ले़ दानिए़ले़न् हाङ्‌से़म् पिरु

46 खे़ब्‍याङ् नबुकदनेसर हाङ्‌ङिन् खाम्‍बाङ्‌ङो अःक्‍खुम् फन्‍छिङ्‌ङाङ् दानिए़ले़न् से़वा मे़त्तु हे़क्‍क्‍याङ् खुने़ॽ मिङ्‌सो इङ्‌धाङ् पिरु, खे़न्‍नु सोसोरिक् हुक्‌वायाङ् पिरे़म्‍मे़ॽ, सुक्‍पा हाःन्‍दे़म्‍मे़ॽ फाॽआङ् इङ्‌जाङ् पिरुसि॥

47 हाङ्‌ङिल्‍ले़ दानिए़ले़न् मे़त्तु, “से़क्‍खाए खिनिॽ निङ्‌वाॽफुमाङ्‌ङिन् माङ्‌हाॽरे़आङ् खुन्‍छिॽ निङ्‌वाॽफुमाङ् हे़क्‍क्‍याङ् हाङ्‌हाॽरे़ खुन्‍छिॽ दाङ्‌बा नु सिबिॽ पाःन्‍हाॽरे़ कुबे के़हम्‍बा चोःक्‍ले़त्‍छ, थेआङ्‌भे़ल्‍ले़ खे़ने़ॽ कन् सिबिॽ पाःन्‍निल्‍ले़ कुबेन् हम्‍मा के़सुक्‍तु॥”

48 खे़ब्‍याङ् हाङ्‌ङिल्‍ले़ दानिए़ले़न् थोधोक्‍पा ताक्‍फाओ युक्‍खुआङ् इमे़ल्‍लुङ्‌बा मिक्‍तोःक्‍हाॽ पिरु॥ हाङ्‌ङिल्‍ले़ खुने़ॽ बेबिलोनबा ते़ङ्‌गप्‍पो युक्‍साबा चोगु हे़क्‍क्‍याङ् खे़प्‍मोबा के़रे़क् सिक्‍कुम्‍साबा ये़म्‍बित्‍छाहाॽरे़ खुन्‍छिॽ तुम् लाम्‍लोबा चोगु॥

49 खे़न्‍नुःल्‍ले़ वेॽ दानिए़लरे़ हाङ्‌ङिन् पेलि फाक्‍तु हे़क्‍क्‍याङ् सद्रक, मेसक नु अबेद्‌नगोन् बेबिलोन ते़ङ्‌गप्‍पो खे़ङ्‌हाॽ हाङ्‌युक्‍पा युक्‍तिङ् चोगुसि॥ दानिए़ले़न् आबाङे हाङ्‌हिम्‍मोए वये़रो॥

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite