दानिए़ल 12 - लिम्बुकुनुप्मोबा ये़म् 1 “खे़न् ये़म्मो तुम् माङ्लाइङ्बा मिखाएले़न् ओसेःन्धाङ् पोङ्ङाङ् खुने़ॽ के़मनाहाॽ ताङ्से़ःप्तुसिॽ॥ मे़न्छाम् याप्मिहाॽरे़ खुन्छिॽ हेःक्सिङ्मा पोःक्खे़आङ्धो खे़न् ये़म्मो थारिक् हे़क्तङ्बा आप्फाल्ले़आङ् मे़म्बोङ्ङे के़वाॽबा अक्तङ्बा साॽरिक् तुक्खे लाक्खेरे़ ये़म् तारो—कर साप्पन्नो मिङ् साप्ते़आङ् के़बप्पा के़रे़क् के़मनाहाॽ ताङ्मे़से़ःप्लो॥ 2 इक्सादिङ् खाम्बेःक्मोबा खाम्हिःक्को के़ने़बा आत्तातान्ने यरिक् मनाहाॽ याम्मो कुहिङ्वे़त् मे़बोङ्ॽ, कुभा नुप्मे़न्दिङ् हिङ्मन्ले़ लागि हे़क्क्याङ् कुभाग सिरिङ्ममा नु सदादिङ् आप्तिक्ले़ लागि मे़बोक्॥ 3 सिक्कुम्साबाहाॽ ताङ्साङ्बो से़ल्ले़ङ् के़ले़क्पा ओःत्ति कुइसिक् हे़क्क्याङ् यरिक् मनाहाॽ साम्योबा लाम्मो लाम्गे़लोबाहाॽग खेःम्सिक्पाहाॽ हे़क्के सदादिङ् आभे़ल्ले़साङ् मे़ओत्॥ 4 कर खे़ने़ॽग दानिए़लए, कन् सिहोॽबा साप्लाथःङ्मोबा पाःन्जाःक्हाॽ कुनुप्मा ये़म्मो थारिक् एःप्साप् एःप्ते़ ने़स्से़ॽ॥ सिक्कुम् निङ्वाॽ फोमारे़ लागि यरिक् मनाहाॽ ना नु कत्ना मे़लोःक्लो॥” 5 खे़ब्याङ् आङ्गाॽ, दानिए़ले़न् ओमयाङ् हे़क्क्याङ् आदगाङ् मना ने़त्छि ये़म्ने़त्छि, थिक्पा वहःङ् कत्नाहाङ् ले़प्माङ् कुयाओ ये़म्सिङ् हे़क्क्याङ् थिक्पा नाहाङ्दाङ् ले़प्माङ् कुयाओ ये़म्सिङ्॥ 6 खे़न् ने़प्फुहाॽओ थिक्पारे़ वहःङ्ङोबा च्वाःत्तिल्ले़ कुसम्धाङ् के़ये़प्पा नैनासुत् चाङ् के़जाङ्बे़न् मे़त्तु, “कन् निङ्वाॽ के़माबा पाःन्हाॽ के़प्मारे़ लागि आक्खे़न् ये़म् थरुबे?” 7 खे़न् वहःङ्ङोबा च्वाःत् सम्धाङ् के़ये़प्पा नैनासुत् चाङ् के़जाङ्बा मनाःल्ले़ कुजुक्वा नु कुभे़ङ्वा हुक्हाॽ साङ्ग्राम्पेदाङ् ले़प्माङ् फोःक्खु, हे़क्क्याङ् सदादिङ् के़वाॽबे़ल्ले़ कुमिङ्ङो अक्खे पाःत्तुआङ् माङ्हे़क्सिङ्बे़न् आङ्गाॽ खे़प्सुङ्, “कन् ये़म्, ये़म्हाॽ नु कुभ्रे़ःङ् ये़म्ले़ लागि पोङ्ॽ॥ आल्ल सेसे मनाहाॽरे़ खुन्छिॽ मुक्साम्मिन् कुनुप्मो नुप्, खे़ब्याङ् कन् के़रे़क् पाःन्हाॽ के़त्लो॥” 8 आङ्गाॽ खे़म्माग खे़प्सुङ् कर कुसिङ् मे़निःत्तुङ्ङिन्॥ कल्ले़चोगुल्ले़ आङ्गाॽ सेःन्दोसुङ्, “आदाङ्बे, कन् के़रे़क् पाःन्हाॽरे़ कुनुप्मान् आक्तङ्बा पोङ्बे?” 9 खुने़ॽ आङ्गाॽ मे़त्ताङ्, “दानिए़लए, खे़ने़ॽ आप्फेक् के़लाम् नाःत्ते़ॽआङ् थासिङ्ङे़ॽ, थेआङ्भे़ल्ले़ कन् पाःन्हाॽ कुनुप्मा ये़म् थारिक् मे़सुबुआङ् एःप्साप् मे़युक्तुआङ् ने़रो॥ 10 यरिक् मनाहाॽ सुत्थो मे़जोगुसिॽ, फोत्या मेःन्नेबा नु सेसे मे़जोगुसिॽ, कर ताक्के़भे़ॽबाहाॽरे़ फे़न्याःम्बक् मे़जोगुर मे़देॽरु॥ ताक्के़भे़ॽबाहाॽओ आत्तिल्ले़आङ् कुसिङ् मे़निःत्तुन्ॽ, कर सिक्कुम्साबाहाॽरे़ कुसिङ् मे़निःत्तुॽ॥ 11 “थिक्याःन्धक्पा सिदुङ्जभाहाॽ मे़साक्तुआङ् आमे़ङ्मे़ङ्बा याम्गे़सिङ्बा पाःन्निन् मे़युक्खुबा ये़म्माङ्धो के़रे़क्ले़ १,२९० ये़न् पोङ्ॽ॥ 12 १,३३५ ये़न् थारिक् के़हाङ्बाआङ् कुनुप्मो थारिक् के़गे़प्पा मनाःङ्ग मुॽइसाबारो! 13 “खे़ने़ॽग कुनुप्मा थारिक्के के़लाम्मो थासिङ्ङे़ॽ॥ खे़ने़ॽ नाःम्सिङ्मा के़घोसुॽ, हे़क्क्याङ् खे़न् एगाङ् निःन्धो के़बोङ्बा के़लक्खोमे़न् ताःक्मारे़ लागि खे़ने़ॽ ये़न्हाॽरे़ कुनुप्मो याम्मो के़बोःक्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.