दानिए़ल 11 - लिम्बु1 मादि हाङ् दाराःल्ले़ हाङ्युक् चोगुबा थिक्सिगेक्पा तङ्बेओ खुने़ॽ के़धुम्बा चोःक्मा नु ताङ्से़ःप्मारे़ लागि आङ्गाॽ पोगाङ्॥) मिस्र नु सिरिया लाजेॽबा हाङ्जुम्हाॽ 2 “आल्ल आङ्गाॽ खे़ने़ॽ से़क्खाबा पाःन्निन् मे़त्ने़रो—फारसबा वेॽ सुम्सि हाङ्हाॽ ओसेःन्धाङ् मे़बोङ्ॽ हे़क्क्याङ् खे़ङ्हाॽओ के़रे़क्नुःल्ले़ याङ्साकुन्धेसाबा वेॽ लिसिगेःक्पे़न्नाङ् ओसेःन्धाङ् पोङ्ॽ॥ आल्ल खुने़ॽ कुयाङ्सा कुन्धेलाम् मुक्साम् खोसुआङ् खुने़ॽ ग्रिस हाङ्जुम्मिल्ले़ कुदक्ले़ङ्वाओ के़रे़क् हुसुसिरो॥ 3 “खे़न् एगाङ् मुक्के़गुबा हाङ्धिक् पोक्, खुने़ॽ यम्बा मुक्साम्नु हाङ्युक् चोगुॽ हे़क्क्याङ् खुने़ॽ थे चोःक्मा निङ्वाॽ इःत्तु, हाबा खे़न् चोगुॽ॥ 4 खुने़ॽ कुमुक्साम्मो पोःक्काङ् एगाङ्, खुने़ॽ कुहाङ्जुम्मिन् खे़ःक्काङ् कुलक् लिसिओ पःङ्ॽ॥ खुने़ॽ कुस्साहाॽरे़ खे़न् मे़ङ्घोसुन्ॽ, खुने़ॽ युक् चोगु कत्तुबे़न्नाङ् कुस्साहाॽरे़ मे़ङ्घोसुन्ॽ, हे़क्क्याङ् खुने़ॽ हाङ्युक् चोगुल्ले़ हाङ्जुम्मिन् कुमुक् यागे़बा हे़क्के कुमुक् के़याक्पा मे़बोङ्ने़न्, थेआङ्भे़ल्ले़ खुने़ॽ कुहाङ्जुम्मिन् कुसाःप्पोनुए हाॽयाक् मे़आःक्खुआङ् वेॽहाॽ मे़बिरुसिॽ॥ 5 “लाङ्गे़त् पिसाङ्बा हाङ्ङिन् मुक्साम्साबा पोङ्ॽ, खुने़ॽ कुधक्मोबाहाॽओ थिक्पा आल्लसाङ् खुने़ॽनुःल्ले़ मुक्साम्साबा पोङ्ॽ हे़क्क्याङ् खे़ल्ले़ यम्बा मुक्साम्लाम् आप्फेक् कुहाङ्जुम्मो युक् चोगुॽ॥ 6 “कुभा तङ्बे एगाङ् खे़ङ्हाॽ तेःङ्जुम् लाजेॽ मे़बोङ्ॽ॥ लत्छा नादङ् चोःक्मारे़ लागि लाङ्गे़त् ले़प्माङ्बा हाङ्ङिल्ले़ कुस्सा मे़न्छुमान् थाङ्गे़त् ले़प्माङ्बा हाङ्ङिन्नु पेक्, कर खे़न् मे़न्छुमाःल्ले़ कुमुक्साम्मिन् हाबा मे़वाॽने़न्, खे़ब्याङ् खे़न् हाङ्ङिन् नु कुमुक्साम्मिन् इरिक् मे़वाॽने़न्॥ खे़न् ये़न्हाॽओ खे़ल्ले़ कुहाङ् कम्ब्राङ्बाहाॽ नु खुने़ॽ कुम्बा हे़क्क्याङ् खुने़ॽ कुभाॽबाङ्हाॽनु सोसोरिक् खुने़ॽ हुक्मे़सुप्तुॽ॥ 7 खे़ल्ले़ कुयुक्नान् मे़त्छिङ्मारे़ लागि खुने़ॽए कुहिम्सयङ्लाम् थिक्पा पोक्॥ खुने़ॽ थाङ्गे़त् पिसाङ्बा हाङ्ङिल्ले़ के़धुम्बा कुधक्सुबाहाॽ थङ्ङो फत्तुसिॽ हे़क्क्याङ् खे़ल्ले़ कुहाङ्यक्किन् फुरुत् लिसुॽ॥ खुने़ॽ खे़ङ्हाॽरे़ खुन्छिॽ तक्ले़ङ्वाओ थङ् चोःक्काङ् खे़ङ्हाॽ नाःन्दुसिॽ॥ 8 खुने़ॽ खे़ङ्हाॽरे़ खुन्छिॽ माङ् साम्माङ्, खुन्छिॽ फे़न्जेॽ नावाइत्लाहाॽ हे़क्क्याङ् साम्म्याङ् नु युप्पा कुमे़न् के़घिःक्पा खप्प्या सामाहाॽआङ् मे़त्छिङ्ॽ हे़क्क्याङ् खुने़ॽ मिस्र लाजेॽ ले़प्माङ् तेॽरुआङ् पेक्॥ कुभा तङ्बेरे़ लागि खुने़ॽ थाङ्गे़त् पिसाङ्बा हाङ्ङिन् ले़रुॽ॥ 9 “खे़ब्याङ् थो थाङ्गे़प्पा हाङ्ङिल्ले़ यो लाङ्गे़प्पा हाङ्ङिल्ले़ कुहाङ्जुम्मिन् थङ्ङो फत्तुॽ कर खुने़ॽ आप्फेक् कुलाजेॽओ नुःङ्ॽ॥ 10 खुने़ॽ कुस्साहाॽ थङ् चोःक्मारे़ लागि यारिप् मे़बोङ्ॽ हे़क्क्याङ् आत्तातान्ने यरिक् थक्सुबाहाॽ मे़सुप्सुसिॽ, खे़ङ्हाॽरे़ साक्मा सुक्मे़न्दे़प्मनाबा के़गुङ्बा च्वाःत् कुइसिक् मे़नाःन्दुसिर थङ्ङिन् हाङ्यक्को थारिक् मे़गे़त्तुॽ॥ 11 “खे़ब्याङ् लाङ्गे़त् पिसाङ्बा हाङ्ङिन् कुसिक् पोःक्काङ् थाङ्गे़त् पिसाङ्बा हाङ्ङिल्ले़ कुदक्ले़ङ्वाओ थङ् चोःक्से़ थाङ्ॽ, हे़क्क्याङ् थाङ्गे़त् पिसाङ्बा हाङ्ङिल्ले़ यरिक् थक्सुबाहाॽ फोःक्खुसिॽ कर खे़न् थक्सुबाहाॽ हारिमे़दारो॥ 12 आल्ल खे़न् थक्सुबाहाॽ मे़दे़म्सु मे़देॽरुसिल्ले़ यो लाङ्गे़प्पा हाङ्ङिन् आङ्दिङ् लॽआङ् यरिक् हे़न्छिङ् थक्सुबाहाॽ से़रुसिॽ, हे़क्केसाङ् खुने़ॽ थङ् के़नाःम्बा मे़बोङ्ने़न्ॽ॥ 13 “थेआङ्भे़ल्ले़ थाङ्गे़त् पिसाङ्बा हाङ्ङिल्ले़ तगिनुःल्ले़आङ् यरिक् थक्सुबाहाॽ सुप्सुसिॽ हे़क्क्याङ् कुभा ये़म् एगाङ् फे़जुम्भे़यारे़ काप्तुसिबा साॽरिक् किप्मा के़घुबा यरिक् थक्सुबाहाॽनु तगि थासिङ् युरो॥ 14 खे़न् ये़न्हाॽओ यरिक् मनाहाॽ लाङ्गे़त् पिसाङ्बा हाङ्ङिल्ले़ कुदक्ले़ङ्वाओ मे़बोक्॥ कन् सुफोन् के़प्मारे़ लागि खे़ने़ॽ आप्फेक् के़सुवाङ्हाॽओ लाम्बाए कुॽइगे़भे़म्बा मनाहाॽ मे़लःन्ॽ कर खे़ङ्हाॽ कुलिङ्दो मे़ङ्गे़त्ने़न्ॽ॥ 15 खे़न् एगाङ् थो थाङ्गे़प्पा हाङ्ङिन् युआङ् लुङ्धाक् लुःम्मारे़ लागि उःक्चम्जम्बा ते़न्हाॽ चोगुॽ हे़क्क्याङ् लुङ्धाक्किल्ले़ कबुबा ये़क्यक्थिक् हुक्काप् चोगुॽ॥ लाङ्गे़त्पा थक्सुबाहाॽ खे़न्नु थक्मारे़ लागि मुक्साम् मेःन्नेबा मे़बोङ्ॽ, खे़ङ्हाॽओ के़रे़क्नुःल्ले़ नुरिक् के़धक्पा थक्सुबाहाॽआङ् थक्मा मे़न्छुक्मनाबा मे़बोङ्ॽ॥ 16 “थङ् के़जोःक्पे़ल्ले़ निङ्वाॽ इःत्तुबा कुइसिःक्के चोगुॽ, आत्तिन्नाङ् खुने़ॽ कुदक्ले़ङ्वाओ पोःक्मा मे़सुक्ने़न्ॽ॥ खुने़ॽ आप्फेक् खे़न् नुबा लाजेॽओ युङ्सिङ्ॽ हे़क्क्याङ् खुने़ॽए खे़न् लाजेन् मे़ङ्मा मुक्साम् कत्तुॽ॥ 17 खुने़ॽ कुहाङ्जुम्मोबा के़रे़क् मुक्साम्नु सोरिक् युमा निःन्धो चोगुॽ॥ खे़ब्याङ् खे़न् हाङ्जुम्मिन् नाःम्मारे़ लागि खुने़ॽ आप्फेक् कुस्सा मे़न्छुमान् खे़न्नु मेःक्खिम् चोःक्मा फाःक्तुआङ् नादङ् चोगुॽ, कर खुने़ॽ सोःक्तुबा पाःन्निन् कुलिङ्दो मे़गे़त्ने़न्ॽ, कुभाॽआङ् मे़बोङ्ने़न्॥ 18 “खे़ब्याङ् खुने़ॽ वरःङ्ङिल्ले़ कुयाओबा लाजेॽहाॽ ले़प्माङ् निङ्वाॽ पिमा हेःक्तु हे़क्क्याङ् खे़ङ्हाॽओबा यरिक्तङ्बा खुने़ॽ कुयुक्को थासुसिॽ, कर थक्मोबा थिक्ले़ खुने़ॽ कुहे़न्छिङ्मे़न् नुप्सु पिरुॽ हे़क्क्याङ् खुने़ॽ कुसम्धाङ्ङे कुहे़न्छिङ्मे़न् नुःक्तु पिरुॽ॥ 19 कन् एगाङ् खुने़ॽ आप्फेक् कुलाजेॽओबा हाङ्यक्हाॽओ नुःङ्बेक्, कर याम्मो आप्फाल्ले़आङ् निमे़न्दे़त्ते थारिक् खुने़ॽ चोःन्नाङ् हर्गुप् मे़क्॥ 20 “हाङ् हाङ्वा माङ्वान् हाबा कप्मारे़ लागि खुने़ॽ कुलक्खोबे़ल्ले़ एःङ्याङ् के़भोङ्बा मनाधिक् पाङ्घुयुसुॽ॥ कर कुभा तङ्बेरे़सा सिक्पोःक्मो इग्र थङ्ङो मे़न्धाए कन् मे़मे़क्खुरो॥” सिरियाबा ताक्के़भे़ॽबा हाङ् 21 “हाङ् मिङ्सो थाङ्सो मे़ङ्घोम्नाबा कुनामे़न्छाॽ मे़मे़त्तुबा मना थिक् खे़ल्ले़ कुयुक्नाओ युङ्सिङ्ॽ॥ आल्ल मनाहाॽ हाङ्हाङ् लॽरिक् नु खे़न् ता फाॽआङ् मे़न्इःत्ते मे़वाॽबा ये़म्मो खे़ल्ले़ चे़म्भन्लाम् हाङ्जुम्मिन् हुक्काप् चोगुॽ॥ 22 खे़न् एगाङ् खे़ल्ले़ कुदगि मुक्साम्साबा थक्सुबाहाॽ मे़क्खुसिॽ, हे़क्क्याङ् खे़न्नु सोरिक् माङ्हुप्पोबा लाम्लोबे़न्नाङ् मे़मे़क्खुॽ॥ 23 खुने़ॽ खे़न्नु नादङ् चोगु सुरुआङ् खे़ल्ले़ इङ्ले़क् याःम्बक् चोगुॽ हे़क्क्याङ् सुःल्लिक् मनाहाॽनु खुने़ॽ युक् चोगुॽ॥ 24 के़रे़क्नुःल्ले़ याङ्साकुन्धेसाबा ते़ङ्गप्हाॽरे़ कम्ब्राङ्ङो मे़वाॽबा निङ्वाॽ मे़इःत्तुआङ् मे़वाॽबा ये़म्मो खे़ल्ले़ थङ्ङो फत्तुसिॽ, हे़क्क्याङ् खे़ल्ले़ कुम्बा कुन्धबाहाॽरे़ मे़न्जोगुम्बा याःम्बक् चोगुॽ॥ खे़ल्ले़ नाप्तुसिबा सामाहाॽ नु याङ्साकुन्धेहाॽ खुने़ॽ के़दिम्बाहाॽ हाःत्तुसिॽ॥ खे़ल्ले़ हाङ्यक्हाॽ नाःम्मासिरे़ लागि चे़म्भन् चोगुॽ कर कन् सप्मा थिक्ले़ लागिरक् पोङ्ॽ॥ 25 “यरिक् थक्सुबाहाॽनु सोरिक् पोङ्ङाङ् खुने़ॽ लाङ्गे़त् पिसाङ्बा हाङ्ङिल्ले़ कुदक्ले़ङ्वाओ कुमुक्साम् नु कुसिक्सम्मो के़दम्बा ले़ङ्सिङ्ॽ॥ लाङ्गे़त् पिसाङ्बा आत्तातान्ने यरिक् नु साॽरिक् मुक्साम्साबा थक्सुबाहाॽ फोःक्खुसिआङ् थङ् चोक्, कर खुने़ॽ कुदक्ले़ङ्वाओ मे़जोगुबा चे़म्भन्ने़ल्ले़ चोगुल्ले़ खुने़ॽ पोःक्मा मे़सुक्ने़न्ॽ॥ 26 खुने़ॽए कुदःक् के़जाबाहाॽरे़ खुने़ॽ मे़ङ्मा मे़गोःत्तुॽ॥ खुने़ॽ कुधक्सुबाहाॽ मे़नाःन्दुसिॽ खे़म्ब्याङ् यरिक् मनाहाॽ थङ्ङो मे़सिरो॥ 27 खे़न् ने़त्छि हाङ्हाॽरे़ फे़न्निङ्वाॽ इःत्छु हे़क्क्याङ् लत्छा चाजामादे़न्नो युङ्सिआङ् खुन्छिॽ लुम्मो इङ्ले़क् पान् पाःत्छिॽ, कर निङ्वाॽ चोःक्सुबा पाःन्निन् खुन्छिॽ मे़घोसुन्ॽ, थेआङ्भे़ल्ले़ कुनुप्मा ये़न्निङ्ग निःन्धो के़बोङ्बा ये़म्मोए तारो॥ 28 “यरिक् याङ्साकुन्धेनु थाङ्गे़त् ले़प्माङ्बा हाङ्ङिन् खुने़ॽ आप्फेक् कुलाजेॽओ नुःङ्बेक्, कर खे़ल्ले़ कुनिङ्वान् सेसे माङ्हुप्पिल्ले़ कुदक्ले़ङ्वाओ वाॽ॥ खुने़ॽ कल्ले़ कुदक्ले़ङ्वाओ याःम्बक् चोगुॽ, हे़क्क्याङ् आप्फेक् कुलाजेॽओ नुःङ्बेक्॥ 29 “निःन्धो के़बोङ्बा ये़म्मो खे़ल्ले़ याम्मो लाङ्गे़त् ले़प्माङ्बा लाजेन् थङ्ङो फत्तुॽ, कर कन् ये़म्मो तगिबा याक्नाम्मिन्नुःल्ले़ वेॽ पोङ्ॽ॥ 30 नाम्धा कुया ले़प्माङ्बा लाजेॽहाॽलाम् खे़ल्ले़ कुदक्ले़ङ्वाओ वालाधाहाॽ मे़भे़न्ॽ, हे़क्क्याङ् खे़ल्ले़ कुसक्मा पुॽरो॥ खे़ब्याङ् नुःङ्ङाङ् सेसे माङ्हुप्पिल्ले़ कुदक्ले़ङ्वाओ खे़ल्ले़ कुसाक्के़न्निन् थासुॽ॥ खे़न् नुःङ्बेःक्काङ् खुने़ॽ सेसेमाङ्हुप् के़ले़प्पा के़देबाहाॽ लुङ्माॽ तुक्तुसिॽ॥ 31 “माङ्हिम्मिन् आसुत्थो चोःक्मारे़ लागि खजुम्घया फे़जुम्भे़यारे़ काप्तुसिबा खे़ल्ले़ कुधक्सुबाहाॽ मे़बोक् हे़क्क्याङ् खे़ङ्हाॽरे़ थिक्याःन्धक्पा सिदुङ्जभाहाॽ मे़साक्तुॽ॥ खे़न् एगाङ् खे़ङ्हाॽरे़ आमे़ङ्मे़ङ्बा याम्गे़सिङ्बा नावाइत्लान् मे़युक्खुॽ॥ 32 माङ्हुप् के़भेःम्बाहाॽ खे़ल्ले़ इङ्ले़क्तुसिआङ् चमुसि हे़क्क्याङ् फे़त्लाःन्दुसिॽ, कर खुन्छिॽ निङ्वाॽफुमाङ् कुसिङ् के़निःप्पाहाॽरे़ चक्मे़ल्लॽए खुने़ॽ मे़अत्तुॽ॥ 33 “आत्तिन्हाॽ सिक्कुम्साबा मे़जोक्, खे़ङ्हाॽरे़ यरिक् मनाहाॽ निसाम् मे़हुॽरुसिॽ, हे़क्केसाङ् कुभा ये़म्ले़ लागि खे़ङ्हाॽ ताभेःल्ले़ मे़ज्ये़प्तुसिॽ इग्र मिःल्ले़ मे़ओॽरुसिॽ इग्र पुङ्लाहिम्मो मे़साक्तुसिॽ इग्र मे़नाप्तुसिॽ॥ 34 आल्ल खे़ङ्हाॽ कन् पाःन्नो मे़जोःन्निल्ले़, खे़ङ्हाॽरे़ चबे़ःत्छिक् कुभाॽ मे़घोसुॽ, हे़क्क्याङ् आत्तिन्हाॽ कुदोःप्मा मे़न्जोःक्ने़न्, खे़ङ्हाॽ खे़प्मो मे़बत्॥ 35 खे़ङ्हाॽओ कुभा सिक्कुम्साबाहाॽ मे़दोक्, कम्भलॽरिक् खे़ङ्हाॽ कुनुप्मा ये़न्नो थारिक् सुत्थो मे़बोङ्ॽ, सेसे मे़बोङ्ॽ हे़क्क्याङ् आप्तिक् मेःन्नेबा मे़जोगुसिॽ, थेआङ्भे़ल्ले़ खे़न् ये़न्निन् निःन्धो के़बोङ्बा ये़म्मो तारो॥ 36 “थाङ्गे़त् पिसाङ्बा हाङ्ङिल्ले़ थे चोःक्मा कुसिराॽथाङ् हाबा खे़न्ने चोगुॽ॥ खुने़ॽ आप्फेक् के़रे़क् माङ्हाॽनुःल्ले़ थो यम्बा चोःक्सिङ्ॽ हे़क्क्याङ् के़रे़क्नुःल्ले़ यम्बा निङ्वाॽफुमाङ्ङिल्ले़ कुदक्ले़ङ्वाओ आप्फाल्ले़आङ् मे़ङ्घे़म्मेबा पान् पाःत्तुॽ॥ निङ्वाॽफुमाङ्ङिल्ले़ कुसिक् पोःक्मा ये़म्मिन् मे़न्नुप्पे थारिक् खे़न् कुलिङ्दो के़गे़प्पा पोङ्ॽ, थेआङ्भे़ल्ले़ थे़मा पाःन्निन् निःन्धो पोःक्खे़आङ् वाॽ, खे़न् पाःन्निन् के़प्माए पोङ्ॽ॥ 37 खुने़ॽ कुम्बा कुन्धे़बाहाॽरे़ खुन्छिॽ माङ्साम्माङ्हाॽ इग्र मे़न्छुमाहाॽरे़ खुन्छिॽ सिराॽ के़धाङ्मे़न्नाङ् खुने़ॽ निनि मे़लाप्तुन्, खुने़ॽ आत्तिन् माङ्ङिन्नाङ् निनि खे़म्घे़म् मे़लाप्तुन्ॽ, कर खुने़ॽ आप्फेक् खे़ङ्हाॽ के़रे़क्नुःल्ले़ थो यम्बा चोःक्सिङ्ॽ॥ 38 खे़ङ्हाॽरे़ कुले़क्वा खुने़ॽ हाङ्यक्हाॽओबा माङ्धिक् मिङ्सोधाःङ्सो पिरुॽ, खुने़ॽ कुम्बा कुन्धे़बाहाॽरे़ कुसिङ् मे़न्निःत्तुम्बा माङ्ङिन् साम्म्याङ् नु युप्पा, इमे़ल्लुङ्बा मुधिङ्लुङ्हाॽ हे़क्क्याङ् कुमे़न् के़घिःक्पा मिक्तोःक्हाॽ तोःन्दुआङ् मिङ्सोधाःङ्सो पिरुॽ॥ 39 खुने़ॽ लत्छा वेॽ लाजेॽबा माङ्ङिल्ले़ कुभाॽलाम् के़रे़क्नुःल्ले़ के़धुम्बा हाङ्यक्हाॽ थङ्ङो फत्तुसिॽ हे़क्क्याङ् खुने़ॽ कुबान् के़घे़म्बाहाॽ मिङ्सोधाःङ्सो पिरुसिॽ॥ खुने़ॽ खे़ङ्हाॽ यरिक् मनाहाॽरे़ खुन्छिॽ सम्धाङ् युक्साबा चोगुसिॽ हे़क्क्याङ् हाङ्से़म् कुइसिक् लाजेॽसिङ्बुङ् फःक्खु पिरुसिॽ॥ 40 “कुनुप्मा ये़म्मो लाङ्गे़त् ले़प्माङ्बा हाङ्ङिन् खे़न्नु थङ् चोक्, हे़क्क्याङ् थाङ्गे़त् ले़प्माङ्बा हाङ्ङिन् अन्लाधाहाॽ, अन्गे़युक्पाहाॽ नु यरिक् वालाधाहाॽ युरुसिआङ् खे़ल्ले़ कुदक्ले़ङ्वाओ सुरित् केजङ् कुइसिक् युरो॥ खुने़ॽ यरिक् लाजेॽहाॽ थङ्ङो फत्तुसिॽ, खुने़ॽ के़गुङ्बा के़युबा च्वाःत् हे़क्के खे़ङ्हाॽ सुःप्तुसिॽ॥ 41 खुने़ॽ खे़न् नुबा लाजेःन्नाङ् थङ्ङो फत्तुॽ॥ यरिक् लाजेॽहाॽ खाप्पुथ्यःङ् पोङ्ॽ, कर ए़दोम, मोआब नु अम्मोनबा नुबा ते़न्हाॽ खे़ल्ले़ कुहुक्कोलाम् ताङ्ॽ॥ 42 खे़ल्ले़ यरिक् लाजेॽहाॽओ खुने़ॽ कुमुक्साम्मिन् फोसुआङ् मिस्र लाजेःन्नाङ् मे़दाङ्ने़न्॥ 43 खुने़ॽ मिस्र लाजेॽबा साम्म्याङ् नु युप्पा हे़क्क्याङ् के़रे़क् याङ्साकुन्धेहाॽ खुने़ॽ कुयुक्को तारुॽ हे़क्क्याङ् लिबियालिहाॽ नु कुसिहाॽ युक्को तारुसिॽ॥ 44 “कर नाङ्गे़न् नु थाङ्गे़त् पिसाङ्लाम् के़युबा इङ्घङ्हाॽरे़ खुने़ॽ कुयङ्मा के़त् हे़क्क्याङ् खुने़ॽ साॽरिक् कुसिक् पोःक्काङ् यरिक् मनाहाॽ हदॽ मे़ङ्मासि नु खुन्छिॽ मिङ् मामा पिमासिरे़ लागि तगि थासिङ् पेक्॥ 45 खुने़ॽ खे़न् नुबा सेसे कोःक्माओ नु वरःङ्हाॽरे़ कुलुम्मो खुने़ॽ कुहाङ् साःङ्गाहाॽ लेःत्तुॽ॥ हे़क्केसाङ् खे़न् मे़क् हे़क्क्याङ् हाःत्ले़आङ् खुने़ॽ मे़भाॽरुन्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.