दानिए़ल 10 - लिम्बुताइग्रिस वहःङ्ङिल्ले़ कुयाओ दानिए़लरे़ सुफो निसु 1 फारसबा हाङ् कोरेसरे़ हाङ्युक् चोगुबा सुम्सिगेक्पा तङ्बेओ दानिए़लरे़ (खुने़ॽ बेलतसजर मे़मे़त्तु) वेॽ सुफो थिक् निसु॥ कन् सुफोःल्ले़ इङ्घङ्ङिन् से़क्खाबा चोगे़ हे़क्क्याङ् कन् लत्छा यम्बा थङ्ले़ कुयाःम्बेओ वये़॥ खे़न् इङ्घङ्ङिल्ले़ कुबेन् खुने़ॽ सुफोओ कुसिङ् निःत्तुआङ् वये़॥ 2 खे़न् ये़म्मो आङ्गाॽ, दानिए़ले़न्, ये़त्नाम् सुम्सि थारिक् मे़रिङ् थक्ताङ्ल वयाङ्॥ 3 आङ्गाॽ थेआङ् कुजा के़नुॽबा कुजा मे़न्जाबान्, सा, चे़ल्ले़क्सेॽ थि आम्ब्राओ मे़लासे़न्, हे़क्क्याङ् ये़त्नाम् सुम्सि मे़ल्ले़क्के थारिक् आङ्गाॽ आत्तिन् परिक्ले़न्नाङ् निःङ्गेॽ मे़हुःत्छिङ्ङान्॥ 4 थिक्सिगेक्पा लाओबा निबोङ्ङाङ् लिसि के़रे़बा ये़न्नो आल्ल आङ्गाॽ यम्बा ताइग्रिस वहःङ्ङिल्ले़ कुयाओ ये़बाङ्गराङ्ङिल्ले़, 5 आङ्गाॽ थाःङ् ओमयाङ् हे़क्क्याङ् आङ्गाॽ आदगि कुगेङ्ङो उपज लाजेॽबा साॽरिक् नुबा साम्म्याङ् फॽइ के़युम्बाआङ् नैनासुत् चाङ् के़जाङ्बा मनाधिक् निसुङ्॥ 6 खुने़ॽ कुधक्किन् इमे़ल्लुङ्बा मुधिङ् कुइसिक् के़ओःप्पा चोगे़, खुने़ॽ कुनारान् साःम्भे के़ले़क्पा हे़क्के के़दिःप्पा चोगे़, खुने़ॽ कुमिक्किन् त्याःल्लोत् हे़क्के तिरे़आङ् पत्छे़॥ खुने़ॽ कुहुक् नु कुलाङ्हाॽ इःङ्मनाबा कासा हे़क्के से़ल्ले़ङ् से़ल्ले़ङ् ले़क्ते़ खम्भ्याङ् खुने़ॽ कुइक्लाःङ्ग यरिक् मनाहाॽ हयङ् किल्लिङ् मे़लॽबा इक्ला हे़क्के लॽरे़॥ 7 आङ्गाॽ, दानिए़लरे़रक् खे़न् सुफोन् निसुङ्॥ आङ्गाॽनु के़वाॽबा मनाहाॽरे़ खे़न् मे़न्निसुन्, कर खे़ङ्हाॽ पगि मे़गिसे़ हे़क्क्याङ् मे़घे़त्छिङ्ङाङ् आप्फेक् मे़जिङ्सिङ्॥ 8 कल्ले़चोगुल्ले़ आङ्गाॽ खे़न् निङ्वाॽ के़माबा सुफोन् ओमे़त्तुङ्ङाङ् पत्छाङ्बा ये़म्मो आङ्गाॽ एःक् मे़ले़राङ् मे़ध्याङ्॥ आङ्गाॽ चबे़ःत्छिक्काङ् मे़धुम्दाङ्ङिन्, आङ्गाॽ आनारान् के़सिबा कुइसिक् अम्गे़लॽबा पोःक्खे़आङ् थेआङ् चोःक्मा मे़न्छुक्मनाबा पोःक्खाङ्॥ 9 खे़ब्याङ् खुने़ॽ पारे़बा खे़प्सुङ् हे़क्क्याङ् आल्ल खुने़ॽ कुबाःन्निन् खे़प्सुङ्ल पत्छाङ्ङिल्ले़ आङ्गाॽ खाम्बाङ्ङो साबन् पत्छाङ्ङाङ् मुरुक् खारुक् इप्साङ् लासाङ्॥ 10 लत्छा हुक्थिक्ले़ आङ्गाॽ सुसाङ् हे़क्क्याङ् आङ्गाॽ किसाङ्ङाङ् यक्खाङ्ङाङ् पत्छाङ्लए आहुक् नु आधुङ्बोःल्ले़ तक्सिङ्ङाङ्ल याःन्दाङ्॥ 11 खुने़ॽ आङ्गाॽ मे़त्ताङ्, “दानिए़लए, निङ्वाॽफुमाङ्ङो खे़ने़ॽग साॽरिक्के इमे़ल्लुङ्बा के़जोक्, आङ्गाॽ खे़ने़ॽ मे़त्ने़र पत्ताबा पाःन्जाःक्हाॽ नुरिक्काङ् निङ्वाॽ इःत्ते़ॽ, हे़क्क्याङ् तक्पे़त् ये़बे़ॽ, थेआङ्भे़ल्ले़ आङ्गाॽ खे़ने़ॽओ मे़बाङ्घाङ्ङाङ् वाॽआ॥” आल्ल खुने़ॽ कन् मे़त्ताङ्ङाङ् आङ्गाॽ थे़गक्कक्ना यक्खाङ्ल ये़म्सिङ्ङारो॥ 12 खुने़ॽ पाःत्तुर तेॽरु, “दानिए़लए, मे़गिसे़न्ने़ॽ, खे़ने़ॽ के़निङ्वान् खासिङ्निःप्मा ले़प्माङ् निङ्वाॽ के़बिरुबा नु खे़ने़ॽ के़निङ्वाॽफुमाङ्ङिल्ले़ कुदगि आप्फेक् नःम्नःम्बा के़जोःक्सिङ्बा थिक्सिगेक्पा ये़न्नाङ्धोए के़बेःल्लिहाॽ के़निङ्वाॽफुमाङ्ङिल्ले़ खे़प्सुआङ् वये़, आङ्गाॽ के़बेलिगे़न् तुवाःल्ले़ नुगप् पिसे़ याङ्ङाङ् वाॽआ॥ 13 कर फारस हाङ्जुम्मोबा याम्साम्गे़न् युक्साबे़ल्ले़ आङ्गाॽ निबोङ्ङाङ् थिक्ये़न् थारिक् अत्ताङ्॥ खे़ब्याङ् तुम् माङ्लाइङ्बा मिखाएले़न् आङ्गाॽ आभाॽसे़ ये़, थेआङ्भे़ल्ले़ आङ्गाॽ फारसबा हाङ्हाॽनु एःक्से़त्छा हाबा खे़प्मो वयाङ्॥ 14 आल्ल के़दाबा ये़म्मो के़मनाहाॽ थे मे़बोङ्ॽ के़लॽबा पाःन्निन् खे़ने़ॽ चे़क्मारे़ लागि आङ्गाॽ खे़ने़ॽओ य्याङ्आङ् वाॽआ, थेआङ्भे़ल्ले़ सुफोन् ताःन्दि के़दाबा पाःन्हाॽनु तङ्लो॥” 15 खुने़ॽ आङ्गाॽ अक्खे मे़त्ताङ्ल पत्छाङ्ङिल्ले़ आङ्गाॽ आधेगेःक्किन् तर्घुॽ मे़त्तुङ्ङाङ् थःत्था पोःक्खाङ्॥ 16 हे़क्क्याङ् खे़न् मना हे़क्तङ्बा निगे़दे़प्पा थिक्ले़ आङ्गाॽ आम्ब्रान् सुसु, हे़क्क्याङ् आङ्गाॽ आम्ब्रान् हन्दुङ्ङाङ् पाःप्मा हेःक्ताङ्॥ आङ्गाॽ आदगि के़ये़प्पे़न् मे़त्तुङ्, “आदाङ्बे, सुफोःल्ले़ चोगुल्ले़ आङ्गाॽ याम्दुक्मा नु थेआङ् चोःक्मा मे़न्छुक्मनाबा पोःक्खाङ्ङाङ् वाॽआ॥ 17 आङ्गाॽ, आदाङ्बारे़ के़से़वारोबे़न्, आक्खेलॽरिक् खे़ने़ॽनु पाःप्मा सुक्काबे, आदाङ्बे? आङ्गाॽ मे़न्धुम्मनाबा पोःक्खाङ्ङाङ् वाॽआ खे़ब्याङ् सक्मा सोःन्छिङ्माआङ् के़साक्पा तुमुङ्ङाङ् वाॽ॥” 18 याम्मो खे़न् मना हे़क्तङ्बा निगे़दे़प्पे़ल्ले़ आङ्गाॽ सुसाङ्ङाङ् के़धुम्बा चोगाङ्॥ 19 खुने़ॽ मे़त्ताङ्, “निङ्वाॽफुमाङ्ङो खे़ने़ॽग साॽरिक्के इमे़ल्लुङ्बा के़जोक्, मे़गिसे़न्ने़ॽ॥ के़निङ्वाॽ हाङ्हाङ् लॽर, आल्ल खे़ने़ॽ, के़धुम्बा पोःक्खे़ॽ॥” आल्ल खुने़ॽ आङ्गाॽनु पारे़ल्ले़, आङ्गाॽ के़धुम्बा पोःक्खाङ्ङाङ् पाराङ्, “आदाङ्बे, पारे़ॽ, थेआङ्भे़ल्ले़ आङ्गाॽ के़धुम्बा के़जोगाङ्ङाङ् वाॽ॥” 20 कल्ले़चोगुल्ले़ खुने़ॽ मे़त्ताङ्, “आङ्गाॽ खे़ने़ॽओ थेआङ् य्याङ्आङ् वाॽआ, खे़ने़ॽ के़निसुबि? फारसबा याम्साम्गे़न् युक्साबे़न्नु थक्मारे़ लागि आङ्गाॽ हाराए नुःङ्ङारो, हे़क्क्याङ् आल्ल आङ्गाॽ पेःक्काआङ् ग्रिसबा याम्साम्गे़न् युक्साबे़न् फे़न्॥ 21 कर से़क्खाबा साप्पन्नो थे साप्ते़आङ् पत्, तगि आङ्गाॽ खे़न् खे़ने़ॽ चे़क्ने़रो॥ (खे़ने़ॽ तुम् के़माङ्लाइङ्बा मिखाएले़न्नुःल्ले़ वेॽ हाःत्ले़आङ् खे़ङ्हाॽरे़ खुन्छिॽ तक्ले़ङ्वाओ थङ् चोःक्मा आङ्गाॽ मे़भाॽआन्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.