दानिए़ल 1 - लिम्बुदानिए़ले़न् नु कुन्जुम्हाॽ ( १:१–६:२८ ) बेबिलोन्नो के़गे़प्पा थाङ्बे़न्हाॽ 1 यहुदाबा हाङ् यहोयाकिमरे़ युक् चोगुबा सुम्सिगेक्पा तङ्बेओ बेबिलोनबा हाङ् नबुकदनेसरे़न् फे़रे़आङ् यरुसले़ःम्मिन् थङ्ङो कब्रिङ् किर्गप् कबु॥ 2 हे़क्क्याङ् निङ्वाॽफुमाङ्ङिल्ले़ कुहिम्मोबा कुभा खप्प्या सामाहाॽनु सोसोरिक् यहुदाबा यहोयाकिम हाङ्ङिन् नबुकदनेसरे़न् दाङ्बे़ल्ले़ हुक्सुप्तु॥ खुने़ॽ खे़न् खप्प्या सामाहाॽ बेबिलोनबा लाजेॽओ के़युङ्बा कुमाङ्हिम्मो तेॽरुआङ् माङ्हिम्मोबा थाःङ्ङो युक्खु॥ 3 खे़ब्याङ् वेॽ लाजेॽओलाम् मे़लःत्तु मे़देॽरुसिबा इस्राइलिहाॽओलाम् हाङ्हिम्सयङ् नु खासिङ् के़निःप्पा हिम्सयङ्बा कुभा नालिगे़न् थाङ्बे़न् मनाहाॽ सेगे़से़ॽ फाॽआङ् हाङ्ङिल्ले़ तुम् कुसुहाङ्युक्पा असपेनजे़न् इङ्जाङ् पिरु॥ 4 खे़न् नालिगे़न् थाङ्बे़न् मनाहाॽ खुन्छिॽ थक्ला लिङ्गे़न्नो थेआङ् के़गाःम्बा मे़म्बप्मना, पनुनुबा, के़रे़क् परिक्पा निसाम् हुॽसिङ्मा के़सुक्पा, सिक्कुम्दिङ् निङ्वाॽ के़गप्पा, हारा हुॽसिङ्मा के़सुक्पा नु हाङ्हिम्मो याःम्बक् चोःक्मा के़सुक्पा पोङ्मा के़बोङ्बा वये़॥ असपेनजरे़ खे़ङ्हाॽ बेबिलोनबा पाःन्दाङ् नु साप्सक् हुॽमासि के़बोङ्बा वये़॥ 5 हाङ्ङिल्ले़ हाङ्हिम्मो खुने़ॽ थिक्याःन्धक् चबा कुजाहाॽ नु चे़ल्ले़क्सेॽ थिहाॽ खे़ङ्हाॽ पिरे़से़ॽ फाॽआङ् असपेनजे़न् इङ्जाङ् पिरु॥ खे़ङ्हाॽ तङ्बे सुम्सि थारिक् हुॽमासि के़बोङ्बा वये़, खे़न् एगाङ् खे़ङ्हाॽ हाङ्ङिल्ले़ कुयाःम्बक्को केःप्मासि के़बोङ्बा वये़॥ 6 कन्हाॽओबाहाॽ कुभा यहुदा थाःक्कोबाहाॽ मे़वये़—दानिए़ल, हनन्याह, मिसाएल नु अजर्याह मे़वये़॥ 7 तुम् सुहाङ्युक्पाल्ले़ खे़ङ्हाॽ कुसङ् मिङ् पिरुसि— दानिए़ले़न् बेलतसजर, हनन्याहःन् सद्रक, मिसाएले़न् मेसक हे़क्क्याङ् अजर्याहन् अबेद्नगो॥ 8 कर दानिए़लरे़ हाङ्हिम्मोबा कुजान् चामा नु चे़ल्ले़क्सेॽ थिन् थुङ्माआङ् आप्फेक् आसुत्थो मे़न्जोःक्सिङ्मा निःन्धो चोगु, खे़ब्याङ् कम्भलॽरिक् आसुत्थो मे़न्जोःक्सिङ्मारे़ लागि खुने़ॽ तुम् सुहाङ्युक्पे़न् पेलि फाक्तु॥ 9 हे़क्क्याङ् निङ्वाॽफुमाङ्ङिल्ले़ खे़न् सुहाङ्युक्पे़न् दानिए़ले़न् लुङ्माॽ तुक्मा नु नुरिक् मे़प्मा निङ्वाॽ पिरु, 10 कर सुहाङ्युक्पे़ल्ले़ दानिए़ले़न् मे़त्तु, “खिनिॽ के़जाम्बा नु के़धुङुम्बा कुजाहाॽरे़ कुयाःम्बेओ आङ्गाॽ मुरा के़मे़प्पा आन्दाङ्बा पयम् यम्बा हाङ्ङिन्नु आङ्गाॽ किआरो॥ खिनिॽ पे़रे़ॽदाङ्लाबा वेॽ नालिगे़न् थाङ्बे़न्हाॽनुःल्ले़ खिनिॽ थेआङ् खुने़ॽ कुदगि सोगिःक्किःक्पा निगे़धाबिरबे? खिनिॽ के़जोगुम्मिल्ले़ पयम् हाङ्ङिल्ले़ आङ्गाॽ आध्गेक्पान् फुॽयाक् फुन्दुदेसु पिआ॥” 11 खे़न् एगाङ् दानिए़ल, हनन्याह, मिसाएल नु अजर्याहरे़ लागि असपेनजरे़ मुरामे़त्तुबा से़वारोबे़न् दानिए़लरे़ मे़त्तु, 12 “खे़ने़ॽ के़से़वारोबाहाॽ, आनिगे थिबोङ् ये़न् थारिक् ओआमे़त्ते़ आसाॽरे़ॽ॥ आनिगे चामारे़ लागि नुधि साक्चिॽ नु थुङ्मारे़लागि च्वाःत्लक् आबिरे़ॽ॥ 13 खे़न् एगाङ् हाङ्ङिल्ले़ कुजा के़जाबा नालिगे़न् थाङ्बे़न्हाॽनु आनिगे आदङ्घे़ आसाॽरे़ॽ हे़क्क्याङ् खे़ने़ॽ के़निसुबा कुइसिक् के़से़वारोबाहाॽनु याःम्बक् चोगे़ॽ॥” 14 कल्ले़चोगुल्ले़ कन् पाःन्नो खुने़ॽ ते़न्दे़ हे़क्क्याङ् थिबोङ् ये़न् थारिक् खे़ङ्हाॽ साॽरुसि॥ 15 थिबोङ् ये़न् एगाङ् हाङ्हिल्ले़ कुजा के़जाबा खे़न् वेॽ नालिगे़न् थाङ्बे़न्हाॽनुःल्ले़ खुन्छिॽ कुयाम् चाङ्जाङ्बा नु लरिक्लिक्पा निमे़धाबे़॥ 16 कल्ले़चोगुल्ले़ खे़न् कम्ब्राङ्बाल्ले़ खे़ङ्हाॽ पिमासि के़बोङ्बा कुजाॽ के़नुॽबा कुजाहाॽ नु चे़ल्ले़क्सेॽ थिहाॽ खे़त्तुदेसुआङ् खे़ङ्हाॽ नुधि साक्चिॽ पिरुसि॥ 17 कन् लिसि नालिगे़न् थाङ्बे़न्हाॽ निङ्वाॽफुमाङ्ङिल्ले़ के़रे़क् परिक्पा सक्साप् कुसिङ् निःप्मा नु निसाम् हे़क्क्याङ् ने़हिनिङ्वाॽ पिरुसि॥ हे़क्क्याङ् दानिए़ले़न् के़रे़क् परिक्पा मिक् निमा सुफो नु से़प्माङ्हाॽरे़ कुबे हम्मा के़सुक्पा पोःक्खे़॥ 18 हाङ्ङिल्ले़ खे़ङ्हाॽ तारे़म्से़ॽ फाॽआङ् निःन्धो चोगुबा ये़म्मिन् के़रे़आङ् एगाङ् खे़न् तुम् सुहाङ्युक्पे़ल्ले़ खे़ङ्हाॽ हाङ् नबुकदनेसररे़ कुदगि तारुसि॥ 19 हाङ्ङिन् खे़ङ्हाॽनु ताॽजे़क्खे़ हे़क्क्याङ् खुने़ॽ दानिए़ल, हनन्याह, मिसाएल नु अजर्याहन्नाङ्धो हाःत्ताङ् कुदङ्बा मे़घोसुसिन्॥ कल्ले़चोगुल्ले़ खे़ङ्हाॽ हाङ्ङिल्ले़ कुयाःम्बक्को युक्तिङ् मे़बोःक्खे़॥ 20 हाङ्ङिल्ले़ सिक्कुम्दिङ् निङ्वाॽ नु खासिङ्निःप्मारे़ कुयाःम्बेओ सेःन्दोसुसिल्ले़, हाङ्जुम्मोबा के़रे़क् कित्चाक् के़जोःक्पा नु साम्माङ्च्याःङ् मुरा के़मे़प्पाहाॽनुःल्ले़ थिबोङ्ले़ङ् यारिक् नुरिक् मे़ले़सुबा निङ्वाॽ खोसु॥ 21 हे़क्क्याङ् कोरेस हाङ्ङिल्ले़ युक् चोगुबा ये़म्मोबा थिक्सिगेक्पा तङ्बे थारिक् दानिए़ले़न् हाबा खे़प्मोए वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.