२ सामुए़ल 9 - लिम्बुदाउद नु मपिबोसेत 1 हे़क्क्याङ् दाउदरे़ सेःन्दोसुसि, “सावलरे़ कुहिम्सयङ्ओ आल्लसाङ् कुभा हिङे़आङ् वाॽबि? कुभा हिङे़आङ् वाॽने़भग्र जोनाथानरे़ कुले़क्वा आङ्गाॽ खे़न्नु नसाःन्साबा पोङ्ङाआङ् लुङ्माॽ तुक्तुङ्ॽ॥” 2 आल्ल सावलरे़ कुहिम्सयङ्ङो सिवा मे़प्नाबा लत्छा सेवारोबाधिक् वये़॥ हे़क्क्याङ् खे़न् दाउदरे़ॽओ मे़उःत्तु॥ हे़क्क्याङ् दाउद हाङ्ङिल्ले़ सेःन्दोसु, “खे़ने़ॽ सिवाने़बि?” खे़ल्ले़ मे़त्तु, “आदाङ्बारे़ के़से़वारोबा सिबान् आङ्गाॽएरो॥” 3 हे़क्क्याङ् हाङ्ङिल्ले़ पाःत्तु, “सावलरे़ कुहिम्सयङ्ओ हात् कुहिङ्वे़त् वाॽबे? निङ्वाॽफुमाङ्ङिन्नु चोगुङ्बा माङ्हुप् कुइसिक् आङ्गाॽ खे़न् लुङ्माॽ तुक्तुङ्ॽ॥” सिबाःल्ले़ मे़त्तु, “ओरो, जोनाथानरे़ लत्छा कुस्सा वाॽ॥ खे़ल्ले़ ने़प्माङ् कुलाङ् के़सक्पा चोक्॥” 4 हाङ्ङिल्ले़ सेःन्दोसु, “खुने़ॽ आत्तान् वाॽ?” हे़क्क्याङ् सिबाःल्ले़ मे़त्तु, “खुने़ॽ लो-देबार मे़प्नाबा ते़न्नो अमिएलरे़ कुस्सा माकिररे़ कुहिम्मो वाॽ॥” 5 खे़ल्ले़चोगुल्ले़ हाङ्ङिल्ले़ लो-देबारओ मना पाङ्घुसिआङ् अमिएलरे़ कुस्सा माकिररे़ कुहिम्मोलाम् खे़न् मे़दारु॥ 6 सावलरे़ कुम्मे़न्छाॽ जोनाथानरे़ कुस्सा मपिबोसेते़न् दाउदरे़ॽओ के़रे़, हे़क्क्याङ् साम्बोन् हबत् फन्छिङ्ङाङ् हाङ्ङिन् से़वा मे़त्तु॥ दाउदरे़ मे़त्तु, “मपिबोसेतए!” खे़ल्ले़ मे़त्तु, “आदाङ्बे, आङ्गाॽ के़से़वारोबान् कप्मो वाॽआरो॥” 7 दाउदरे़ पाःत्तु, “मे़गिसे़न्ने़ॽ॥ खे़ने़ॽ के़म्बा जोनाथानरे़ कुले़क्वा लुङ्माॽ तुक्ने़॥ आङ्गाॽ के़न्धे़बा सावलरे़ के़रे़क् कुलाजेॽ कुसिङ्बुङ्हाॽ नुःक्तुङ् पिने़॥ खे़ने़ॽ हाङ्ङिल्ले़ कुजा चाजामादे़न्नो आङ्गाॽनु के़युङ्ङाङ् आभे़ल्ले़साङ् के़जरो॥” 8 मपिबोसेतरे़ याम्मो साम्बोन् हबत् फन्छिङ्ङाङ् से़वा मे़त्तुर पाःत्तु, “आङ्गाॽ हाःत्ताआङ्बे? हे़क्क्याङ् आङ्गाॽ ख्याबा हे़क्तङ्बा के़सिबा मनान् आदाङ्बारे़ थेआङ् लुङ्माॽ के़दुक्काबाबे?” 9 खे़ब्याङ् दाउदरे़ सावलरे़ कुसे़वारोबा सिबाःन् खुने़ॽओ उःत्तुआङ् मे़त्तु, “आङ्गाॽ खे़ने़ॽ के़न्दाङ्बाल्ले़ कुम्मे़न्छाॽइन् सावल नु खुने़ॽ कुहिम्सयङ्बा के़रे़क् याङ्साकुन्धेन् आल्लोसा पिरुङ्ल पत्ता॥ 10 हे़क्क्याङ् खे़ने़ॽ, के़स्साहाॽ नु खे़ने़ॽ के़से़वारोबाहाॽ खुने़ॽ कुलाजेॽ कुसिङ्बुङ्ङो यान् के़मयिआङ् खे़न् लाम्बा के़धोःक्पा कुजान् के़न्दाङ्बाल्ले़ कुसुवाङ्ङिन् पिमा पोङ्ॽ॥ हे़क्क्याङ् मपिबोसेत, खे़ने़ॽ के़न्दाङ्बाल्ले़ कुम्मे़न्छाॽइल्ले़ आङ्गाॽनु युङ्ङाङ् चःॽ॥” (सिबारे़ थिबोङ्ङाङ् ङासि कुस्सा नु निबोङ् कुसे़वारोबा मे़वये़॥) 11 हे़क्क्याङ् सिबाःल्ले़ हाङ्ङिन् मे़त्तु, “आदाङ्बारे़ इङ्जाङ् के़बिराङ्बा कुइसिक् आङ्गाॽ के़रे़क् चोगुङ्ॽ॥” खे़ल्ले़चोगुल्ले़ए हाङ्ङिल्ले़ कुस्साहाॽओ लत्छा हाङ्सा कुइसिक् मपिबोसेतरे़ दाउदे़न्नु सोरिक् चामा हेःक्तु॥ 12 मपिबोसेतरे़ मिका मे़प्नाबा लत्छा चुक्सा कुस्सा वये़॥ सिबाःन् नु कुहिम्सयङ्हाॽ के़रे़क् मपिबोसेतरे़ कुसे़वारोबा मे़बोःक्खे़॥ 13 हे़क्क्याङ् मपिबोसेते़न् यरुसले़म युङ्मा हेःक्ते़, हे़क्क्याङ् हाङ्ङिल्ले़ कुजामादे़न्नो हाङ्ङिन्नुए युङे़आङ् खुने़ॽ कुजा च॥ खुने़ॽ ने़प्माङ् कुलाङ् के़सक्पा वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.