२ सामुए़ल 8 - लिम्बुदाउदरे़ थङ् नाःन्दुॽ ( १ साप्मु १८:१-१७ ) 1 खे़न् एगाङ् दाउदरे़ पलिस्तिहाॽ नाःन्दुसि, हे़क्क्याङ् खे़ङ्हाॽ दाउदे़न्नु मे़नःम्सिङ्, हे़क्क्याङ् खुन्छिॽ हुक्लाम्बा मेथेगआमाह ते़न्निन् हुक्काप् चोगु॥ 2 दाउदरे़ मोआबिहाॽआङ् नाःन्दुसि, हे़क्क्याङ् खुने़ॽ खे़ङ्हाॽ खाम्बाङ्ङो ने़मा पाङ्घुसि, हे़क्क्याङ् लत्छा थाक्पाःल्ले़ सिःक्तुसि॥ सिःक्तुसिल्ले़ कुसिःक्मा ने़त्छिओ के़धाबाहाॽ से़प्मा पाङ्घुसि, हे़क्क्याङ् कुसिःक्मा सुम्सिओ के़धाबाहाॽ ले़प्मादेमा पाङ्घुसि॥ अक्खेलॽरिक् मोआबिहाॽ खुने़ॽ कुयुक्को मे़बोःक्खे़, हे़क्क्याङ् खे़ङ्हाॽरे़ खुने़ॽ एःङ्याङ् मे़हुङु॥ 3 युफ्रेतिस वहःङ्ङिल्ले़ कुयाओ थारिक् युक् चोःक्से़ याम्मो पेर पत्छे़ल्ले़ सोबाबा हाङ्, रहोबरे़ कुस्सा हददेजेरे़न्नाङ् थङ्ङो दाउदरे़ नाःन्दु॥ 4 दाउदरे़ खुने़ॽलाम् हे़न्छिङ् थिक् अन्लाधाहाॽ, हे़न्छिङ् नुसि अन्लाधा के़लोङ्बाहाॽ नु निबोङ् हे़न्छिङ् खाम्बाङ्ङो थङ् के़जोःक्पा थक्सुबाहाॽ ते़म्सुसिआङ् साक्तुसि॥ खुने़ॽ कुलागि चाहा के़जोःक्पा अन्लाधा के़उःङ्बा किप् थिक् अन्हाॽ युक्खुसिआङ् के़नम्बा के़रे़क् अन्हाॽरे़ खुन्छिॽ लाङ्साॽइन् खक्तु पिरुसि॥ 5 दमस्कसबा अरामिहाॽ सोबाबा हाङ् हददेजेरे़न् कुभाॽसे़ मे़द्ये़, दाउदरे़ खे़ङ्हाॽ निबोङ्ङाङ् ने़त्छि हे़न्छिङ् खुन्छिॽ थक्सुबाहाॽ से़रुसि॥ 6 हे़क्क्याङ् दमस्कसबा अरामिहाॽरे़ खुन्छिॽ ते़ङ्गप्पो थक्सुबा साःङ्गाहिम् लेःत्तु॥ खे़ङ्हाॽ खुने़ॽ कुयुक्को मे़द्ये़, हे़क्क्याङ् हाङ्ङो हुङ्मा के़बोङ्बा एःङ्याङ् मे़हुङु॥ अक्खेलॽरिक् दाउदे़न् आत्तान् आत्तान् पे, यहवे दाङ्बाल्ले़ थङ् के़नाःम्बा चोगु॥ 7 दाउदरे़ हददेजेररे़ कुसुहाङ्युक्पाहाॽरे़ मे़गत्तुबा साम्म्याङ् खोहाॽ नाप्तुसि, हे़क्क्याङ् के़रे़क् यरुसले़म तेॽरु॥ 8 खुने़ॽ हददेजेररे़ कुयुक्को के़ने़बा तेबह नु बेरोत ये़क्यक्लाम्बा यरिक् कासाहाॽ तेॽरु॥ 9 दाउदरे़ हददेजेररे़ के़रे़क् कुधक्सुबाहाॽ थङ् थक्मा नाःन्दुसि के़लॽबा पाःन्निन् हमातबा हाङ् तोउःल्ले़ खे़प्सु, 10 हे़क्केःल्ले़ खुने़ॽ कुस्सा योराम्मे़न् दाउदरे़ॽओ से़वा तोःन्छे़ नु थङ् नाःन्दुबाओ नाजम् इङ्घङ् पिसे़ पाङ्घु॥ थेआङ्भे़ल्ले़ हददेजेर नु तोइलुम्मो थङ् पोःक्खे़र वये़॥ हे़क्क्याङ् योरामरे़ युप्पा साम्म्याङ् नु कासा चिगक्वाहाॽ तेॽरु पिरु॥ 11 खे़न् चिगक्वाहाॽ दाउद हाङ्ङिल्ले़ यहवे दाङ्बाओ तोःन्दु, हे़क्केलॽरिक् खुने़ॽ नाःन्दुसिबा के़रे़क् सुवाङ्बा मनाहाॽरे़ खुन्छिॽ युप्पा नु साम्म्याङ्हाॽ— 12 ए़दोम, मोआब, अम्मोनि, पलिस्ति नु अमाले़कि, हे़क्क्याङ् सोबाबा हाङ् रहोबरे़ कुस्सा हददेजेरलाम्बा नाप्तुसिबा के़रे़क् चिगक्वाहाॽ यहवे दाङ्बाओए तोःन्दु॥ 13 हे़क्क्याङ् युम् मे़प्नाबा ने़ने़बादे़न्लाम् थिबोङ्ङाङ् ये़त्छि हे़न्छिङ् एदोमिहाॽ से़रुसिआङ् नुःक्खे़ल्ले़ दाउदरे़ कुमिङ्सो पोरे़॥ 14 दाउदरे़ ए़दोम के़रे़क् पिसाङ् थक्सुबा साःङ्गाहिम् लेःत्तु, हे़क्क्याङ् के़रे़क् एदोमिहाॽ खुने़ॽ कुयुक्को मे़बोःक्खे़॥ अक्खेलॽरिक् खुने़ॽ आत्तान् आत्तान् पे खे़प्मो यहवे दाङ्बाल्ले़ खुने़ॽ थङ् के़नाःम्बा चोगुरो॥ 15 हे़क्केलॽरिक् दाउदरे़ के़रे़क् इस्राइल सम्धाङ् हाङ्युक् चोगु, हे़क्क्याङ् खुने़ॽ के़रे़क् कुमनाहाॽरे़ लागि साम्योबा नु कुदोःप्मा खासे़न् चोगु॥ 16 खे़न् ये़म्मो सरुयाहरे़ कुस्सा योआबे़न् थक्सुबाहाॽरे़ खुन्छिॽ लाम्लोबा वये़॥ हे़क्क्याङ् अहिलुदरे़ कुस्सा यहोसापाते़न् खानिःत् के़युङ्बा वये़॥ 17 हे़क्क्याङ् अहितुबरे़ कुस्सा सदोके़न् नु अबियाथाररे़ कुस्सा अहिमेलेके़न् निङ्वाॽफुसाम्बा वये़सि॥ सरायाहन् सुहाङ्मिबा वये़॥ 18 यहोयादारे़ कुस्सा बनायाहन् करेति नु पेलेथिहाॽ ओगे़मे़प्पा सुहाङ्युक्पा वये़॥ दाउदरे़ कुस्साहाॽ हाङ् इङ्जाङ्साबा मे़वये़॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.