२ सामुए़ल 7 - लिम्बुनिङ्वाॽफुमाङ्ङिल्ले़ दाउदे़न्नु माङ्हुप् चोगु ( १ साप्मु १७:१-१५ ) 1 आल्ल दाउदे़न् हाङ्हिम्मो युङ्मा हेःक्ते़, हे़क्क्याङ् खुने़ॽ कुघिरिबा कुनिङ्मिहाॽनु थङ् चोःक्मा मे़बोःक्खे़न्, थेआङ्भे़ल्ले़ यहवे दाङ्बे़ल्ले़ नाःम्सिङ्मा पिरु, 2 खुने़ॽ माङ्निङ्वाॽपान् के़बाःप्पा नाताने़न् मे़त्तु, “आङ्गाॽग साम्माङ्सिङ्ङिल्ले़ चोःक्मनाबा हिम्मो युङ्ङा, कर यहवे दाङ्बे़ल्ले़ कुमाङ्हुप् सन्दोक्किन् लाःक्कात् साःङ्गाहिम्मो युङ्॥” 3 नातानरे़ हाङ्ङिन् मे़त्तु, “के़निङ्वाॽओ थे वाॽ हाबाघे़न् चोगे़ॽ, थेआङ्भे़ल्ले़ यहवे दाङ्बे़न्ने खे़ने़ॽनु वाॽ॥” 4 कर हाबा खे़न् से़न्दिक् यहवे दाङ्बाल्ले़ कुइङ्घङ्ङिन् नातानरे़ॽओ के़रे़— 5 “पेगे़ॽआङ् आङ्गाॽ आसे़वारोबा दाउदे़न् मे़त्ते़ॽ, यहवे दाङ्बे़ल्ले़ अक्खे पाःत्तुॽ, ‘आङ्गाॽ आलागि लत्छा युङ्मा हिम् खे़ने़ॽए के़जोगुबाबि? 6 इस्राइलिहाॽ मिस्रलाम्बा थाक्तुङ्सिङ्ङाङ्धो आइन् थारिक् आङ्गाॽ आप्फाल्ले़आङ् हिम्मो मे़न्युङ्ङे वाॽआ॥ कर साःङ्गाहिम्हाॽओरक् चत्छिङ्ङार युङ्ङार वाॽआ॥ 7 आङ्गाॽ इस्राइलबा मनाहाॽनु आत्तान् पेगाङ्साङ् आङ्गाॽ आमना इस्राइलबा पित्के़गम्बाहाॽओ आत्तिन् युक्साबे़न्नाङ् आङ्गाॽ आलागि साम्माङ् सिङ्ङिल्ले़न् हिम् थेआङ् के़न्जोगुन्? फाॽआङ् सेःन्दोसुङ्बा होप्॥’ 8 “आल्ल आङ्गाॽ आसे़वारोबा दाउदे़न् मे़त्ते़म्मे़ॽ, मुक्साम्दाङ्बा यहवे दाङ्बे़ल्ले़ पाःत्तुॽ, ‘मे़ल्लुक् के़गमुसिर के़यागे़ल्ले़ मे़ल्लुक् चाराम्मादे़न्नोलाम् आङ्गाॽ इस्राइलि आमनाहाॽ लाम्लोसे़से़ॽ फाॽआङ् सेःन्ने़॥ 9 खे़ने़ॽ आत्तातान् के़बे आङ्गाॽ खे़ने़ॽनु वयाङ्, हे़क्क्याङ् खे़ने़ॽ के़रे़क् के़निङ्मिहाॽ खे़ने़ॽ के़दगिए मे़क्खुङ्सिङ्॥ आल्ल इक्सादिङ् खाम्बेःक्पा मिङ् के़से़बा मनाहाॽरे़ खुन्छिॽलुम्मो खे़ने़ॽ कुमिङ् के़इङ्बा चोःक्ने़॥ 10 हे़क्क्याङ् इस्राइलबा आङ्गाॽ आमनाहाॽरे़ लागि लत्छा ते़न् चोगुङ्ॽ, हे़क्क्याङ् खुन्छिॽ आबाङे युङ्मादे़न् पोङ्ॽ, हे़क्क्याङ् खे़ङ्हाॽ आत्तिल्ले़आङ् याम्मो तुक्खे मे़जाःत्तुसिन्ॽ कुॽइगे़भे़म्बा मनाहाॽरे़ तगिबा हे़क्के तुक्खेआङ् मे़न्जाःत्तुन्छिन्॥ 11 इस्राइलबा आङ्गाॽ आमनाहाॽ सम्धाङ् खासे़न्लोःम्बाहाॽ युक्तिङ् चोगुङ्सिङ्बा ये़न्नाङ्धो, खे़ङ्हाॽ कुॽइके़भे़ॽबा मनाहाॽरे़ तुक्खे मे़जाःत्तुसि॥ कर आल्लआङ्धो खे़ने़ॽ के़रे़क् के़निङ्मिहाॽरे़ आफाल्ले़आङ् के़मे़म्भत्ने़न्॥ खिनिॽ लागि यहवे दाङ्बे़ल्ले़ हाङ् सुवाङ्धिक् चोगुङ् फाॽआङ् खुने़ॽ उवा चोगुआङ् वाॽ॥ 12 खे़ने़ॽ काप्पोबा के़दुम्, के़सिआङ् खे़ने़ॽ के़न्धे़बाहाॽनु के़बेःक्, हे़क्क्याङ् खे़ने़ॽ के़मुॽइदाङ्साहाॽओलाम्बा, खे़ने़ॽए के़धक्लाम्बा लत्छा लक्खोबा पोङ्मारे़ लागि फोःक्खुङ्ॽ, हे़क्क्याङ् खे़ल्ले़ कुहाङ्जुम्मिन् सदादिङ्बा चोगुङ्ॽ॥ 13 खे़ल्ले़ए आङ्गाॽ आलागि लत्छा हिम् चोगु पिआ, हे़क्क्याङ् खे़ल्ले़ कुहाङ्युक्नान् सदादिङ्ले़ लागि चोगुङ् पिरुङ्ॽ॥ 14 आङ्गाॽ खे़ल्ले़ कुम्बा पोङ्ङाॽ, हे़क्क्याङ् खे़न् आङ्गाॽ आबुगे़न् आस्सा पोङ्ॽ॥ खे़ल्ले़ लायो चोगुने़भग्र मनाहाॽरे़ खुन्छिॽ साहाॽ तक्काःत्तिल्ले़ मे़घुम्सुसिबा कुइसिक् आङ्गाॽ खे़न् खुम्सुङ्ॽ॥ 15 आङ्गाॽ सावले़न् खे़ने़ॽ के़लाम्मोनु खे़त्तुङ्, हे़क्क्याङ् आङ्गाॽ खे़न् लुङ्माॽ तुक्मा नाॽरुङ् कर आङ्गाॽ खे़ने़ॽ के़स्सान् आभे़ल्ले़आङ् लुङ्माॽ तुक्मा मे़ले़त्तान्॥ 16 खे़ने़ॽ के़हिम्सयङ् नु खे़ने़ॽ के़हाङ्जुम्मिन् आङ्गाॽ आदगि सदादिङ् वाॽ, हे़क्क्याङ् खे़ने़ॽ के़हाङ्युक्नान् सदादिङ्रे़ लागि थधप् मे़ल्लॽमनाबा पोङ्ॽ॥’” 17 अक्खेलॽरिक् निङ्वाॽफुमाङ्ङिल्ले़ ओसेःन्धाङ् चोगुबा पाःन्निन् माङ्निङ्वाॽपान् के़बाःप्पा नाताने़ल्ले़ के़रे़क् दाउदे़न् मे़त्तुरो॥ दाउदरे़ कुबेलि ( १ साप्मु १७:१६-२७ ) 18 हे़क्क्याङ् दाउद हाङ्ङिन् यहवे दाङ्बा वये़बादे़न्नो पे, हे़क्क्याङ् युङ्सिङ्ङाङ् पेलिगे़न् तुवा चोगु, “यहवे दाङ्बाए, आङ्गाॽ हाःत्ताबे? आङ्गाॽ आहिम्सयङ्हाॽ थेसिबे? हे़क्क्याङ् आङ्गाॽ थेआङ् कप्मो थारिक् के़दाराङ्बाबे?” 19 यहवे दाङ्बे, हे़क्केसाङ् कन् के़रे़क्हाॽग खे़ने़ॽ के़निमाओ लत्छा चुक्पासा पाःन्लो॥ खे़ने़ॽ के़से़वारोबाल्ले़ कुहिम्सयङ्हाॽरे़ लागि के़बोङ्बा ताःन्दिबा पाःन्निन्ने के़बाःत्तुरो॥ यहवे दाङ्बा निङ्वाॽफुमाङ्ङे, खे़ने़ॽ मनाहाॽरे़ लागि सदादिङ् हाबा अक्खेए के़जोगुबि? 20 हे़क्क्याङ् दाउदरे़ कन्नाङ्धो वेॽ थे पाःप्मा सुक्तुआङ्बे? यहवे दाङ्बाए, थेआङ्भे़ल्ले़ खे़ने़ॽ के़से़वारोबान् नुरिक्काङ् कुसिङ् के़निःत्तुआङ् वाॽरो! 21 खे़ने़ॽ माङ्के़हे़क्सिङ्बाल्ले़ चोगुल्ले़, खे़ने़ॽ के़बाःत्तुबा हे़क्क्याङ् के़निङ्वाॽ कुइसिःक्के कन् पयम्बा याःम्बक्किन् के़जोगुआङ् वाॽ, हे़क्क्याङ् के़से़वारोबान् के़मे़त्तुआङ् वाॽ॥ 22 “खे़ल्ले़चोगुल्ले़ यहवे दाङ्बाए, खे़ने़ॽग पयम् यम्बा के़जोक्॥ खे़ने़ॽ हे़क्तङ्बा हाःत्ताङ् होप् के़लॽबा आनिगे के़रे़क्ले़ खे़प्सुम्बे़, हे़क्क्याङ् खे़ने़ॽआङ्धो वेॽ निङ्वाॽफुमाङ् हाःत्ताङ् होप्॥ 23 हे़क्क्याङ् इक्सादिङ् खाम्बेःक्मो खे़ने़ॽ आबाङे ताङ्से़ःप्से़ के़बेबा खे़ने़ॽ के़सेगुबा इस्राइल सुवाङ् हे़क्तङ्बा वेॽ सुवाङ् हात् वाॽबे? खे़न् सुवाङ्ङिल्ले़ लागि खे़ने़ॽ आबाङे ताङ्से़ःप्से़ के़बे॥ खे़न्लाम्बाए खे़ने़ॽ आबाङे के़मिङ्ङिन् के़से़सु हे़क्क्याङ् मिस्रलाम्बा के़लःत्तु के़धाक्तु॥ खे़ङ्हाॽरे़ खुन्छिॽ लाम्मो के़युङ्बा वेॽ सुवाङ्हाॽ नु खे़ङ्हाॽरे़ खुन्छिॽ माङ्हाॽ के़नाःत्तुसि॥ हे़क्क्याङ् पयम् यम्बा किप्मा के़घुबा नु निङ्वाॽ के़माबा याःम्बक्हाॽ के़जोगु॥ 24 खे़ने़ॽ आबाङे के़मना इस्राइले़न् सदादिङ्ले़ लागि आबाङे के़मना के़जोगुआङ् वाॽ, हे़क्क्याङ् यहवे दाङ्बाए खे़ने़ॽ खे़ङ्हाॽरे़ खुन्छिॽ निङ्वाॽफुमाङ् के़बोक्खे़आङ् के़वाॽरो॥ 25 “आल्ल यहवे दाङ्बा निङ्वाॽफुमाङ्ङे, खे़ने़ॽ के़से़वारोबा हे़क्क्याङ् कुहिम्सयङ्हाॽनु के़जोगुबा माङ्हुप् कुइसिक् सदादिङ् चोगे़ॽओ, 26 खे़ने़ॽ के़मिङ्ङिन् सदादिङ् पयम् यम्बा पोङ्ल, हे़क्क्याङ् मनाहाॽरे़ अक्खे मे़बाःत्तुर, ‘मुक्साम्दाङ्बा यहवे दाङ्बे़न् इस्राइल सम्धाङ् निङ्वाॽफुमाङ्लो॥’ हे़क्क्याङ् के़से़वारोबा दाउदरे़ कुकुहिम्सयःङ्ङिन् खे़ने़ॽ के़निमाओ सदादिङ् युक्सिङ् पोङ्लो॥ 27 ‘मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङे, खे़ने़ॽ आङ्गाॽ आलागि हिम्धिक् के़जोगु के़लॽबा पाःन्निन् के़से़वारोबान् ओसेःन्गे़धाक्ताङ्॥ खे़ल्ले़चोगुल्ले़ आङ्गाॽ खे़ने़ॽओ कन् तुवान् तोःम्मारे़ लागि आःन्छिङ्मा खोसुङ्॥’ 28 “यहवे दाङ्बा निङ्वाॽफुमाङ्ङे, खे़ने़ॽए निङ्वाॽफुमाङ्ने़रो॥ खे़ने़ॽ के़बाःन्जाःक्किन् नसाःन्साबा चोक्, हे़क्क्याङ् खे़ने़ॽ के़से़वारोबे़न्नु कन् नुबा पाःन्हाॽ माङ्हुप् के़जोगुआङ् वाॽरो॥ 29 खे़ल्ले़चोगुल्ले़ आल्ल के़से़वारोबाल्ले़ कुहिम्सयङ्हाॽ हाङ्वामुॽइ पिरे़से़ॽओ, हे़क्क्याङ् खे़न् खे़ने़ॽ के़दगि सदादिङ् वाॽर॥ थेआङ्भे़ल्ले़ यहवे दाङ्बा निङ्वाॽफुमाङ्ङे, खे़ने़ॽ के़बाःत्तुआङ् वाॽ, हे़क्क्याङ् खे़ने़ॽ के़हाङ्वा मुॽइलाम्बाए के़से़वारोबाल्ले़ कुहिम्सयङ्हाॽरे़ सदादिङ् हाङ्वामुॽइ मे़घोसुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.