२ सामुए़ल 6 - लिम्बुमाङ्हुप् सन्दोक्किन् यरुसले़म मे़दारु ( १ साप्मु १३:१-१४ , १५:२५–१६:६,४३ ) 1 दाउदरे़ याम्मो इस्राइलबा सुम्बोङ् हे़न्छिङ् सेःक्मनाबा थक्सुबाहाॽ उःत्तुसि, 2 हे़क्क्याङ् खे़न् के़रे़क् मनाहाॽनु निङ्वाॽफुमाङ्ङिल्ले़ कुमाङ्हुप् सन्दोक्किन् ताःप्मा फाॽआङ् यहुदाबा बालालाम्बा दाउदे़न् लःन्दे़आङ् पे, करुब मे़प्नाबा माङ्लाइङ्बाहाॽरे़ खुन्छिॽ लुम्मो के़युङ्बा मुक्साम्दाङ्बा यहवे दाङ्बाल्ले़ कुमिङ् खे़न् सन्दोक्को पत्छे़॥ 3 हे़क्क्याङ् खे़ङ्हाॽरे़ निङ्वाॽफुमाङ्ङिल्ले़ कुमाङ्हुप् सन्दोक्किन् लत्छा कुसङ् पित्लाधाओ मे़याक्तु, हे़क्क्याङ् कोःक्माओ के़युङ्बा अबिनादाबरे़ कुहिम्मोलाम् मे़दारु, हे़क्क्याङ् अबिनादाबरे़ कुस्सा उज्जाह नु अहियोःल्ले़ पित्लाधान् लाम्लोसे़छुर तेॽरे़छु॥ 4 हे़क्क्याङ् अहियोन् सन्दोक्किल्ले़ कुदगि कुदगि थासिङ्॥ 5 दाउदे़न् नु के़रे़क् इस्राइलि सुवाङ्हाॽ खुन्छिॽ सिक्समे़र साम्लोनु, साराङ्गि, तुःङ्गे, के, खित्चिङ् खित्चिङ् के़लॽबा मुक्ला नु साप्फङ्गा हिप्नु मे़सःत्ते़र मे़यागे़॥ 6 खे़ङ्हाॽ नाकोनबा कुजा फुङ्मादे़न्नो मे़गे़रे़, हे़क्केःल्ले़ पित्हाॽरे़ खुन्छिॽ लाङ्हाॽ तोःक्ते़, हे़क्क्याङ् उज्जाहःल्ले़ कुहुक्किल्ले़ निङ्वाॽफुमाङ्ङिल्ले़ कुमाङ्हुप् सन्दोक्किन् तक्तु॥ 7 कर यहवे दाङ्बे़न् उज्जाहःन्नु साॽरिक् कुसिक् पोगे़, खे़ल्ले़ कुहुक्किल्ले़ सुमा मे़न्नुॽमनाबा निङ्वाॽफुमाङ्ङिल्ले़ कुमाङ्हुप् सन्दोक्किन् सुसुबाल्ले़ चोगुल्ले़ निङ्वाॽफुमाङ्ङिल्ले़ खे़न् आम्भा खे़प्मोए हदॽ स्ये़रु॥ अक्खेलॽरिक् निङ्वाॽफुमाङ्ङिल्ले़ कुमाङ्हुप् सन्दोक्किल्ले़ कुबेसाङ् खे़न् स्ये़॥ 8 यहवे दाङ्बे़न् अक्खेलॽरिक् थिक्ले़ङ्ले़ कुसाक्के़न्निल्ले़ मि पोःक्खे़आङ् उज्जाहःन् खुम्दिङ् पिरुबाल्ले़ चोगुल्ले़ दाउदे़न् कुयाःक्ले़ॽरे़, हे़क्क्याङ् खुने़ॽ खे़न् ते़न्निल्ले़ कुमिङ् फारेस उज्जाह युक्खु॥ आल्ल थारिक्साङ् खे़ल्ले़ कुमिङ् बाघे़न् वाॽरो॥ 9 खे़न् ये़न्नो दाउदे़न् यहवे दाङ्बे़न्नु साॽरिक् किसे़, हे़क्क्याङ् पाःत्तु, “आल्ल आक्खेलॽरिक् यहवे दाङ्बे़ल्ले़ कुमाङ्हुप् सन्दोक्किन् आङ्गाॽनु युक्खुङ्बाबे?” 10 यहवे दाङ्बे़ल्ले़ कुमाङ्हुप् सन्दोक्किन् खुने़ॽनु दाउदरे़ कुये़क्यक्को तेॽमा निङ्वाॽ मे़जोगुन्॥ कर थिक्नाहाङ् ले़प्माङ् पेआङ् गात के़युङ्बा ओबेद-एदोमरे़ कुहिम्मो तेॽरु॥ 11 अक्खेलॽरिक् यहवे दाङ्बे़ल्ले़ कुसन्दोःक्किन् ओबेद-एदोमरे़ कुहिम्मो ला सुम्सि थारिक् युङे़, हे़क्क्याङ् यहवे दाङ्बे़ल्ले़ ओबेद ए़दोम नु खुने़ॽ कुहिम्सयङ्हाॽ हाङ्वामुॽइ पिरु॥ 12 यहवे दाङ्बे़ल्ले़ कुमाङ्हुप् सन्दोक्किल्ले़ चोगुल्ले़ यहवे दाङ्बे़ल्ले़ ओबेद-एदोमले़ कुहिम्सयङ् हे़क्क्याङ् खुने़ॽनु के़वाॽबा चिगक्वाहाॽओ हाङ्वामुॽइ पिरु के़लॽबा पाःन्निन् दाउदे़न् मे़जे़क्तु, हे़क्क्याङ् दाउदे़न् पेआङ् ओबेद-एदोमरे़ कुहिम्लाम् यहवे दाङ्बे़ल्ले़ कुमाङ्हुप् सन्दोक्किन् पसःत् सःत्ते़र दाउदरे़ कुये़क्यक्को तारु॥ 13 यहवे दाङ्बे़ल्ले़ कुमाङ्हुप् सन्दोक् के़गुबाहाॽरे़ लाङ्गाङ् तुक्सि मे़धासुधप्मा खुने़ॽ लत्छा कुम्बाबा पित् नु कुसोत् के़याक्पा थक्सा सिदुङ्जभा चोगु॥ 14 दाउदे़न् यहवे दाङ्बे़ल्ले़ कुदगि कुसुक्सुक् के़रे़क् कुमुक्साम्नु लाःक्खे़॥ हे़क्क्याङ् खुने़ॽ नाइनासुःत्लाम् तःम्नाबा एपोद तेःत्तिन् चाक्खुआङ् वये़॥ 15 हे़क्केलॽरिक् दाउदे़न् नु के़रे़क् इस्राइलि सुवाङ्हाॽरे़ मे़सःत्ते़र सादाङ्ङिन् मे़मुःत्तुआङ् मे़मुक्खुर यहवे दाङ्बे़ल्ले़ कुमाङ्हुप् सन्दोक्किन् यरुसले़म्मो मे़दारु॥ 16 यहवे दाङ्बे़ल्ले़ कुमाङ्हुप् सन्दोक्किन् दाउदरे़ कुये़क्यक्को मे़गे़त्तुर मे़बत्छे़, सावलरे़ कुस्सा मे़न्छिन् मिकले़न् पेधाःप्पोलाम् ओमये़, हे़क्केःल्ले़ दाउद हाङ्ङिन् यहवे दाङ्बे़ल्ले़ कुदगि पिन्दे़र लाःक्खे़बा निसु, हे़क्क्याङ् खे़ल्ले़ दाउदे़न् कुनिङ्वाॽ सिगाङ्लाम् चिःत्तु॥ 17 हे़क्क्याङ् खे़ङ्हाॽरे़ यहवे दाङ्बे़ल्ले़ कुमाङ्हुप् सदोक्के़न् दाउदरे़ चोगुबा साःङ्गाहिम् सिगाङ् कुयुङ्मादे़न्नो मे़युक्खु॥ हे़क्क्याङ् दाउदरे़ यहवे दाङ्बे़ल्ले़ कुदगि मिधिङ्मनादेमनाबा नु तङ्जुम् वयागे़न् सिदुङ्जभा तोःन्दु॥ 18 आल्ल दाउदरे़ कन् वयागे़न् सिदुङ्जभाहाॽ तोःन्दु सुरुआङ् खुने़ॽ मुक्साम्दाङ्बा यहवे दाङ्बे़ल्ले़ कुमिङ्ङो मनाहाॽ हाङ्वागे़न् मुॽइसाम् पिरुसि, 19 हे़क्क्याङ् खुने़ॽ मनाहाॽ, या खे़प्मो के़जुम्बा के़रे़क् इस्राइलिहाॽ ये़म्बित्छा मे़न्छुमा कुले़प् थिक्थिक् खरे़ःङ्, खे़बक्सिङ्ङिल्ले़ कुजाॽ थिक्थिक् नु कुहेद्याॽ चे़ल्ले़क्सेॽ कुबजा थिक्थिक् पिरुसि॥ हे़क्क्याङ् के़रे़क् मनाहाॽ खुन्छिॽ हिम्हिम् मे़बे॥ 20 दाउदे़न् कुहिम्सयङ्हाॽ हाङ्वामुॽइ पिसे़ त्ये़ःल्ले़ सावलरे़ कुस्सा मे़न्छुमा मिकले़न् खुने़ॽ कुदुम्से़ लःन्दे़, हे़क्क्याङ् मे़त्तु, “इस्राइलबा हाङ्ङिल्ले़ कुलागि आइन् आक्खे़न् मिङ्सो इङ्धाङ्बा ये़न्निबे! खुने़ॽ कुसे़वारोमाहाॽरे़ खुन्छिॽ तगाङ् ले़क्चाॽबुधुक् पोःक्खे़आङ् खार्जोःम्बा ले़ङ्सिङ्॥” 21 हे़क्केःल्ले़ दाउदरे़ मिकले़न् मे़त्तु, “कङ्ग यहवे दाङ्बे़ल्ले़ कुदगि वये़, खुने़ॽ कुमना इस्राइलिहाॽओ खे़ने़ॽ के़म्बा नु खुने़ॽ कुसुवाङ्हाॽनुःल्ले़आङ् थोधोक्पा हाङ् पोङ्से़ सेगाङ्, खे़ल्ले़चोगुल्ले़ आङ्गाॽ यहवे दाङ्बे़ल्ले़ कुदगाङ् सःत्ताॽर लाःङ्ङा॥ 22 खे़ने़ॽ के़निमो कुनामे़न्छाॽ पोङ्मा सुक्काबिला, हे़क्क्याङ् आङ्गाॽ आबाङे कन्नुःल्ले़आङ् यरिक् कुनामे़न्छाॽ पोङ्ङा॥ कर खे़न् से़वारोमाहाॽरे़ कल्ले़ लागि आङ्गाॽ मिङ्सो इङ्धाङ् मे़बिआ॥” 23 हे़क्क्याङ् सावलरे़ कुस्सा मे़न्छ्या मिकलरे़ कुसिमा ये़न् थारिक्साङ् कुस्सा मे़न्वये़न्॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.