२ सामुए़ल 5 - लिम्बुदाउदे़न् हाङ् पोःक्खे़ ( १ साप्मु ११:१-९ , १४:१-७ ) 1 आल्ल इस्राइलबा के़रे़क् सुवाङ्हाॽ दाउद वये़बादे़न् हे़ब्रोन्नो मे़द्ये़आङ् मे़मे़त्तु, “आनिगे़ग आदाङ्बारे़ए के़गाॽइदिगे़रो॥ 2 आल्ल पेये़म्मो साउले़न् हाङ् वये़ल्ले़सा आदाङ्बारे़ इस्राइलबा थक्सुबाहाॽ थङ्ङो तगि लाम्गे़लोसुसि॥ हे़क्क्याङ् यहवे दाङ्बा आदाङ्बारे़ के़निङ्वाॽफुमाङ्ङिल्ले़ आदाङ्बा अक्खे के़मे़त्ते़, ‘खे़ने़ॽए आमना इस्राइलिहाॽरे़ खुन्छिॽ मे़ल्लुक्कम्बा के़बोङ्ॽ, खे़ने़ॽ खे़ङ्हाॽरे़ खुन्छिॽ युक्साबा के़बोङ्ॽ॥’” 3 हे़क्केःल्ले़ इस्राइलबा के़रे़क् काप्पो तुम्साहाॽ दाउद हाङ्ङिन् वये़बादे़न् हे़ब्रोन्नो मे़द्ये़॥ दाउदरे़ खे़ङ्हाॽनु यहवे दाङ्बाल्ले़ कुदगि माङ्हुप् चोगु, हे़क्क्याङ् खे़ङ्हाॽरे़ दाउदे़न् इस्राइलओ हाङ् पोङ्मारे़ लागि माङ्थोःक्ना मे़बिरु॥ 4 दाउदे़न् हाङ् पोःक्खे़ल्ले़ सुम्बोङ् तङ्बेॽ योरे़आङ् वये़, हे़क्क्याङ् खुने़ॽ लिबोङ् तङ्बेॽ थारिक् हाङ्युक् चोगु॥ 5 खुने़ॽ हेब्रोन युङे़आङ् यहुदाओ नुसि तङ्बेआङ् कुभ्रे़ःङ् हाङ्युक् चोगु, हे़क्क्याङ् यहुदा नु इस्राइल ने़प्माङ्ङो यरुसले़म युङे़आङ् सुम्बोङ्ङाङ् सुम्सि तङ्बेॽ थारिक् हाङ्युक् चोगु॥ 6 खे़न् एगाङ् दाउद हाङ्ङिन् नु खुने़ॽ कुधक्सुबाहाॽ यरुसले़म के़युङ्बा यबुसिहाॽनु थङ् चोःक्से़ मे़बे॥ यबुसिहाॽरे़ दाउदे़न् मे़मे़त्तु, “खे़ने़ॽ कप्मो तामा के़न्छुक्ने़न्, मिक्फःम्बा नु लाङ्सक्पाहाॽरे़आङ् नाःप्मा के़म्सुक्॥” खुन्छिॽ निङ्वाॽओ दाउदे़न् आप्फाल्ले़आङ् यरुसले़म लाःप्मा मे़सुक्ने़न् के़लॽबा वये़॥ 7 हे़क्केसाङ् दाउदरे़ सियोनबा यक्किन् हुक्काप् चोगु, खे़न् आल्लो दाउदरे़ कुये़क्यक् मे़मे़त्तु॥ 8 खे़न् ये़न्नो दाउदरे़ पाःत्तु, “हाःत्ले़ यबुसिहाॽ से़रुसिॽ, खे़ल्ले़ दाउदरे़ कुनिङ्मि मिक्फःम्बा नु लङ्ले़ःङ्वाहाॽ च्वाःत् लाङ्गे़घेःक्पा हङ्गारिबो लाःत्ताङ् खे़ङ्हाॽ ते़म्सुसिर पोङ्ॽ॥” खे़ल्ले़चोगुल्ले़ खे़ङ्हाॽरे़ मे़बाःत्तु, “मिक्फःम्बा नु लाङ्सक्पाहाॽ माङ्हिम्मो लाःप्मा मे़ङ्घोने़न्॥” 9 हे़क्क्याङ् दाउदे़न् हाबा खे़न् यक्को युङ्मा हेःक्ते़, खे़न् यक्किल्ले़ कुमिङ् दाउदरे़ कुये़क्यक् युक्खु॥ दाउदरे़ कुलुङ्धाक्हाॽरे़ कुदक्मा थुप्थाॽओ ले़प्माङ्नु यक् के़रे़क् पिसाङ् ये़क्यक् चोगु॥ 10 हे़क्क्याङ् खुने़ॽ मुक्के़गुबा पोःक्खे़र पे, थेआङ्भे़ल्ले़ मुक्साम्दाङ्बा यहवे दाङ्बा निङ्वाॽफुमाङ्ङिन् खुने़ॽनु वये़॥ 11 तुरोसबा हेराम हाङ्ङिल्ले़ दाउदरे़ओ इङ्साबाहाॽ पाङ्घु युसुसि॥ खुने़ॽ साम्माङ्सिङ् सिङ्हाॽ हे़क्क्याङ् लुङ्गाम्बाहाॽ नु सिङ्गाम्बाहाॽआङ् दाउदरे़ कुहाङ्हिम् चोःक्से़ पाङ्घु युसुसि॥ 12 आल्ल यहवे दाङ्बे़ल्ले़ इस्राइलओ दाउदे़न् हाङ् चोगु, हे़क्क्याङ् खुने़ॽ कुमना इस्राइलिहाॽरे़ खुन्छिॽ लागि कुहाङ्युक् मुक्साम्मिन् थाःङ्धाक् चोगु फाॽआङ् दाउदरे़ निङ्वाॽ खोसु॥ 13 हे़क्क्याङ् दाउदे़न् हे़ब्रोनलाम्बा यरुसले़म त्ये़आङ् यरिक् मेःत् नु मेःत् पाःक्माहाॽ तारुसि॥ हे़क्क्याङ् खुने़ॽ वेॽ कुस्सा ये़म्बित्छा नु मे़न्छुमाहाॽ सामे़वाःन्छिङ्॥ 14 यरुसले़मओ सागे़वाःन्छिङ्बा कुस्साहाॽरे़ खुन्छिॽ मिङ् हाबा कन्हाॽरो—सम्मुअ, सोबाब, नातान, सोलोमन, 15 यिभार, एलिसुअ, नेपेग, यापि, 16 एलिसामा, एल्यादा नु एलिपेलेत॥ पलिस्तिहाॽ हारिमे़द्ये़ ( १ साप्मु १४:८-१७ ) 17 दाउदे़न् इस्राइलओ हाङ् मे़सेःन्दु के़लॽबा पाःन्निन् पलिस्तिहाॽरे़ मे़घे़प्सु, खे़ङ्हाॽरे़ थक्सुबाहाॽ मे़देॽरुसिआङ् दाउदरे़ कुगोःत्छे़ मे़लःन्दे़, कर कन् पाःन्निन् दाउदरे़ खे़प्सुआङ् यो यक्को थासिङ्॥ 18 आल्ल पलिस्तिहाॽ रपाइहाॽरे़ खुन्छिॽ ने़ने़बा ते़म्बेॽओ मे़से़रे़आङ् मे़युङ्सिङ्॥ 19 हे़क्क्याङ् दाउदरे़ यहवे दाङ्बे़न् सेःन्दोसु, “आङ्गाॽ पलिस्तिहाॽरे़ खुन्छिॽ तक्ले़ङ्वाओ पेःक्काबि? खे़ङ्हाॽ आङ्गाॽ आहुक्को हुक्के़सुप्पाबि?” यहवे दाङ्बे़ल्ले़ मे़त्तु, “पेगे़ॽ, आङ्गाॽ पलिस्तिहाॽ से़क्खाए खे़ने़ॽ के़हुक्को हुक्सुप्ने़॥” 20 खे़ब्याङ् दाउदे़न् बाल-पराजिम मे़प्नाबा ते़न्नो पेआङ् थङ् चोगु, पलिस्तिहाॽ थङ्ङो नाःन्दुसि॥ दाउदरे़ पाःत्तु, “वहःङ्ङिल्ले़ कुयान् थुप्सुबा कुइसिःक्के यहवे दाङ्बे़ल्ले़ आङ्गाॽलाम् थे़ःक्पे़त् के़ये़प्पा आनिङ्मिहाॽ मे़क्खुसि॥” कल्ले़चोगुल्ले़ खे़न् ते़न्निल्ले़ कुमिङ् बाल-पराजिम युक्खु॥ 21 पलिस्तिहाॽरे़ खुन्छिॽ नावाइत्लाहाॽ हाबा खे़प्मो मे़ले़रु मे़धसि, हे़क्क्याङ् दाउद नु खुने़ॽ कुमनाहाॽरे़ खे़ङ्हाॽ मे़देॽरुसिआङ् मे़बे॥ 22 याम्मो पलिस्तिहाॽ रपाइहाॽरे़ खुन्छिॽ ते़म्बेॽओ मे़धाङे़ हे़क्क्याङ् मे़से़सिङ्ङाङ् मे़युङ्सिङ्॥ 23 दाउदरे़ याम्मो यहवे दाङ्बे़न् सेःन्दोसु, कर यहवे दाङ्बे़ल्ले़ मे़त्तु, “कन् ये़म्मो थिक्ले़ङ्ले़ मे़भत्ते़से़न्ने़ॽ, कर खे़ङ्हाॽ किर्गप् कबे़से़ॽआङ् पिपोर सिङ्बुङ्ङिल्ले़ कुदगाङ्लाम् खुन्छिॽ एगाङ्लाम्बा फत्ते़से़ॽ॥ 24 खे़न् एगाङ् पिपोर सिङ्बुङ्हाॽरे़ कुसम् कुसम्मो हुरुरु लॽरिक् सःक्नुमे़ःन्ने खे़ङ्हाॽनु थङ् थक्ते़ॽ, थेआङ्भे़ल्ले़ खे़न् ये़म्मो यहवे दाङ्बे़न् पलिस्तिहाॽरे़ खुन्छिॽ थक्सुबाहाॽ नाःन्छे़ खे़ने़ॽ के़दगि पेःक्लो॥” 25 यहवे दाङ्बे़ल्ले़ इङ्जाङ् पिरुबा कुइसिक् दाउदरे़ चोगु, हे़क्क्याङ् पलिस्तिहाॽ गिबोनलाम्बा गेजेर थारिक् नाःत्तु तेॽरुसिआङ् स्ये़रुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.