२ सामुए़ल 4 - लिम्बुइस्बोसेते़न् सिःॽ 1 सावलरे़ कुस्सा इस्बोसेतरे़ हे़ब्रोन्नो अबनेरे़न् मे़से़रु के़लॽबा खे़प्सु, हे़क्केःल्ले़ खे़ल्ले़ कुलाङ् कुहुक् साॽइ पुॽरे़ हे़क्क्याङ् के़रे़क् इस्राइलिहाॽ मे़गिसे़॥ 2 इस्बोसेतरे़ ने़प्फु कुलाम्लोबा वये़सि, खे़ङ्हाॽ चिगक्वा के़नाप्पाहाॽरे़ खुन्छिॽ लाम्लोबा वये़सि, खुन्छिॽ मिङ् बानाह नु रेकाब वये़॥ खुन्छिॽ बेन्यामिन सुवाङ्बा वये़सि बेरोत ये़क्यक्कोबा रिम्मोनरे़ कुस्सा वये़सि॥ तगि खे़ङ्हाॽरे़ खुन्छिॽ हिम्सयङ्हाॽ बेरोत मे़प्मनाबा ये़क्यक्को मे़युङे़॥ 3 थेआङ्भे़ल्ले़ कुभा ये़म् तगि बेरोतिहाॽ गित्तै मे़प्नाबा ते़न्नो मे़घे़त्छिङ् मे़बेआङ् मे़वये़, हे़क्क्याङ् आल्ल थारिक्साङ् खे़प्मोए वे़प्मिबा मे़बोःक्खे़आङ् मे़युङ्॥ 4 सावलरे़ कुस्सा जोनाथानरे़ लत्छा कुस्सा वये़, खे़ल्ले़ कुलाङ् ने़प्माङ् लाङ्सक्पा चोगे़॥ यिजरेललाम्बा सावल नु जोनाथान मे़से़रुसि के़लॽबा इङ्घङ् त्ये़ःल्ले़ खे़न् तङ्बेॽ ङासि के़रे़आङ् वये़॥ खे़न् ओगे़मे़प्माल्ले़ खे़न् याङ्सिङ्ङाङ् खे़त्तु तेॽरुआङ् वये़, कर हाराहारा खे़त्छिङ् पेःल्ले़ खे़न् के़ङे़, हे़क्क्याङ्ङे खे़न् लाङ्सक्पा पोःक्खे़आङ् वये़॥ खे़ल्ले़ कुमिङ् मपिबोसेत वये़॥ 5 ले़न्दिक् नाम्सेःक्ते़आङ् इस्बोसेते़न् इप्से़आङ् ने़स्से़ल्ले़ खुने़ॽ कुहिम्मो बेरोति रिमोनरे़ कुस्सा रेकाब नु बानाहःन् त्ये़सिआङ् हिम्सिगाङ् लासे़छि॥ 6 हे़क्क्याङ् खे़ङ्हाॽ हिम्सिगाङ् मासि लासे़ पेसिबा कुइसिक् पेसिआङ् खे़ङ्हाॽरे़ कुस्साप्पोःक्को थुबे़छुआङ् से़रे़छु॥ हे़क्क्याङ् रेकाब नु कुम्भुॽ बानाहःन् स्वाःत् लःन्दे़छि॥ 7 इस्बोसेते़न् कुहिम्मोबा आबाङे कुइप्नाओ इप्से़आङ् ने़स्से़ल्ले़ खे़ङ्हाॽ हिम्सिगाङ् लासे़छि॥ खुन्छिॽ लाःक्किल्ले़ थुबु से़रुसिआङ् खे़ङ्हाॽरे़ खे़ल्ले़ कुधेगेःक्पे़न् फुॽयाक् खक्ते़त्छुआङ् तेॽरे़छु, हे़क्क्याङ् अराबालाम् पोःक्खे़छिर से़न्छे़न् लाङ्घेगे़छिआङ् पेसि॥ 8 खे़ङ्हाॽरे़ इस्बोसेतरे़ कुधेगेःक्पे़न् हे़ब्रोन्नो के़वाॽबा दाउदरे़ॽओ तेॽरे़छु, हे़क्क्याङ् हाङ्ङिन् मे़त्ते़छु, “आदाङ्बा से़प्मा के़गोःप्पा, आदाङ्बारे़ के़निङ्मि सावलरे़ कुस्सा इस्बोसेतरे़ कुधेगेःक्पे़न् ओमे़त्ते़ॽ कप्मो वाॽ॥ आदाङ्बारे़ के़लागि यहवे दाङ्बे़ल्ले़ सावल नु खुने़ॽ कुसुवाङ्हाॽओ आइन् कुले़क्वा हुङुआङ् वाॽ॥” 9 दाउदरे़ बेरोति रिमोनरे़ कुस्सा रेकाब नु कुन्साॽ बानाहःन् मे़त्तुसि, “यहवे दाङ्बाल्ले़ए के़रे़क् तुक्खेओलाम्बा आङ्गाॽ से़ःप्ताङ्, यहवे दाङ्बे़न् कुहिङ्वे़त् वाॽबा कुइसिक् माङ्हे़क् चोगुङ्ङाङ् पाःत्तुङ्ॽ, 10 सावल स्ये़बान् नुबा इङ्घङ् लॽरिक् के़इःप्पाआङ् आङ्गाॽओ इङ्घङ् के़दाःप्पा मनान् ते़म्सुङ्, हे़क्क्याङ् सिक्लगओ खे़न् से़रुङ्॥ आङ्गाॽ खे़ल्ले़ कुइङ्घङ्ङिल्ले़ चोगुल्ले़ सिमा पाङ्घुङ्॥ 11 कर कुॽइके़भे़ॽबा मनाहाॽरे़ लत्छा आप्तिक् मेःन्नेबा मनान् खे़ल्ले़ कुयुक्ना कुइम्दे़न्नो से़रे़छुने़भग्र खे़ल्ले़ कुले़क्वा आक्खे़न् यम्बा पोङ्बे? खे़न्छिॽ के़जोगे़छुबा फे़न्याःम्बक्किल्ले़ कुले़क्वा खे़न्छिॽ कन् खाम्बेःक्मोलाम् के़म्मे़क्सिम्बि?” 12 खे़ब्याङ् दाउदरे़ कुमनाहाॽ इङ्जाङ् पिरुसि, हे़क्क्याङ् खे़ङ्हाॽरे़ खे़न् ने़प्माङ् मे़से़रुसि॥ खे़ङ्हाॽरे़ खुन्छिॽ लाङ् हुक्हाॽ मे़घक्तु, हे़क्क्याङ् हे़ब्रोन्नो वाबाक्किल्ले़ कुबेसाङ् मे़भोःन्दुसि॥ कर इस्बोसेतरे़ कुधेगेःक्पे़न् खे़ङ्हाॽरे़ मे़देॽरुआङ् हे़ब्रोन्नो अबनेररे़ कुःइप्पुङ्ङो मे़ने़स्सुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.