२ सामुए़ल 3 - लिम्बु1 दाउद नु सावले़न् के़दिम्बाहाॽरे़ खुन्छिॽ लुम्मो यरिक् ये़न् थारिक् थङ् पोःक्खे़॥ दाउदे़न् छे़न्ना के़धुम्बा पोःक्खे़र पे, हे़क्क्याङ् सावलरे़ कुहिम्सयङ्हाॽ छे़न्ना योःन्जोॽजोॽबा मे़बोःक्खे़र मे़बेरो॥ दाउदरे़ कुस्साहाॽ 2 हे़क्क्याङ् हे़ब्रोन्नो दाउदरे़ कुस्सा सामे़वाःन्छिङ्—तुम्बा कुस्सान् अमनोन वये़, खुने़ॽ कुम्मा यिजरेलि अहिनोम वये़, 3 खुने़ॽ कुस्सा सरुम्बे़न् किलाब वये़, खे़ल्ले़ कुम्मा कार्मेलबा नाबालरे़ कुमेमेदुमा अबिगेल वये़, खुने़ॽ कुस्सा याङ्सरुम्बे़न् अब्सालोम वये़, खुने़ॽ कुम्मा गसुरबा हाङ् तल्मैरे़ कुस्सा मे़न्छुमा माका वये़, 4 थाङ्सरुम्बे़न् अदोनिया वये़, खुने़ॽ कुम्मा हगित वये़, ङासिगेःक्पे़न् सपत्याह वये़, खुने़ॽ कुम्मा अबितल वये़, 5 हे़क्क्याङ् फोःक्वाबे़न् यित्राम वये़, खुने़ॽ कुम्मा दाउदरे़ कुमेत् एग्ला वये़॥ कन्हाॽ के़रे़क् हे़ब्रोन्नो सागे़वाःन्छिङ्बा दाउदरे़ कुस्साहाॽ मे़वये़रो॥ दाउदे़न् नु अबनेरे़न् तङ्सि 6 सावल नु दाउदे़न् के़दिम्बाहाॽरे़ खुन्छिॽ लुम्मो थङ् पोःक्खे़र पे, अबनेरे़न् नङेःक्काङ् सावलरे़ कुसुवाङ्ङो के़धुम्बा चोःक्सिङ्ल पे॥ 7 आल्ल अय्यारे़ कुस्सा मे़न्छिन् रिस्पान् सावलरे़ कुमेत् पाःक्मा वये़॥ इस्बोसेतरे़ अबनेरे़न् मे़त्तु, “थेआङ् खे़ने़ॽ आम्बारे़ कुमेत् पाःक्मे़न्नु के़इप्से़?” 8 हे़क्केःल्ले़ इस्बोसेतरे़ पाःत्तुबा पाःन्नो अबनेरे़न् साॽरिक् कुसिक् पोगे़आङ् पाःत्तु, “आङ्गाॽ यहुदारे़ कुसे़वा के़जोःक्पा ख्याबाआबि? आल्ल थारिक् खे़ने़ॽ के़म्बा सावलरे़ कुहिम्सयङ्, खुने़ॽ कुम्भुॽ कुन्साॽसि नु कुन्जुम्हाॽरे़ खुन्छिॽ मना वयाङ्, हे़क्क्याङ् आङ्गाॽ दाउदरे़ कुहुक्को हुक्मे़सुप्ने़न्॥ हे़क्केसाङ् कन् मे़न्छुमान्नु आप्तिक् के़गुःत्ता! 9 आल्ल दाउदरे़ कुलागि निङ्वाॽफुमाङ्ङिल्ले़ ‘चोगुङ्’ लॽरिक् माङ्हे़क्सिङ्बा पाःन्निन् के़प्मारे़ लागि आङ्गाॽ आसुक्सुक् मे़जोगुङ्ङिन्ने़भग्र, निङ्वाॽफुमाङ्ङिल्ले़ आङ्गाॽ साॽरिक् खुम्दिङ् पिआर॥ 10 आङ्गाॽ सावलरे़ कुहिम्सयङ्ङिन् हाङ्युक्नालाम् के़ङ्मा हे़क्क्याङ् दाउदे़न् दानलाम्बा बेर्सेबा थारिक् इस्राइल नु यहुदाबा हाङ्युक्नाओ युङ्मा याःम्बक् चोगुङ्॥” 11 हे़क्क्याङ् इस्बोसेते़न् अबनेरे़न्नु किसे़बाल्ले़ चोगुल्ले़ खुने़ॽ थेआङ् मे़प्मा मे़सुक्तुन्॥ 12 खे़न् एगाङ् अबनेरे़ल्ले़ अक्खे मे़त्तुसिआङ् दाउदरे़ॽओ कुमनाहाॽ पाङ्घुसि, “कन् लाजेॽइन् हाःत्ले़न्बे? आनिॽ तङि, हे़क्क्याङ् के़रे़क् इस्राइल लाजेॽइन् खे़ने़ॽ ले़प्माङ् ताःप्मा आसुक्सुक् फाॽने़॥” 13 हे़क्केःल्ले़ दाउदरे़ अक्खेलॽरिक् मे़त्तु, “पोङ्ॽ, कर सावलरे़ कुस्सा मे़न्छुमा मिकले़न् आङ्गाॽओ तारे़आङ् त्ये़ॽ, हे़क्क्याङ्लक् आङ्गाॽ खे़ने़ॽनु तङ्ङा॥” 14 दाउदरे़ सावलरे़ कुस्सा इस्बोसेते़न्नाङ् अक्तङ्बा इङ्घङ् हाक्तुदेसु, “आङ्गाॽ किप् थिक् पलिस्तिहाॽरे़ खुन्छिॽ चुत्चुॽबाहाॽ मे़ल्लुङ् कुइसिक् हुङुङ्ङाङ् नाःक्तुङ्बा आङ्गाॽ आमेत् मिकले़न् आङ्गाॽ पिराङ्ङे़ॽ॥” 15 खे़ल्ले़चोगुल्ले़ इस्बोसेतरे़ मनाहाॽ पाङ्घुसिआङ् मिकले़न् खुने़ॽ कुये़म्बा लेसरे़ कुस्सा पल्तिएल लाम्बा फे़त्तु॥ 16 कर कुये़म्बा पल्तिएले़न् हाबे़र बहुरिम थारिक् मिकले़न् तिम्दुर फे़रे़॥ हे़क्केःल्ले़ अबनेरे़ल्ले़ खुने़ॽ मे़त्तु, “नुःक्खे़ पेगे़ॽ”, हे़क्क्याङ् खुने़ॽ नुःक्खे़आङ् पे॥ 17 हे़क्क्याङ् अबनेरे़न् इस्राइलबा काप्पो तुम्साहाॽरो पेआङ् मे़त्तुसि, “यरिक् तगिआङ्धो दाउदे़न् हाङ् पोङ्ल याःन्दुम्बे़ के़लॽबा खिनिॽ निङ्वाॽ वये़॥ 18 आल्ल ये़म्मिन् त्ये़आङ् वाॽ, थेआङ्भे़ल्ले़ दाउदरे़ कुयाःम्बेओ यहवे दाङ्बे़ल्ले़ पाःत्तुआङ् वाॽ, ‘आङ्गाॽ आसे़वारोबा दाउदरे़ के़हुक्लाम्बाए इस्राइलि आमनाहाॽ पलिस्तिहाॽ नु वेॽ के़रे़क् निङ्मि हुक्लाम् से़ःप्तुङ्सिङ्ॽ॥’” 19 अबनेरे़न् विन्यामिनिहाॽनुआङ् ताॽजे़क्खे़॥ खे़ब्याङ् इस्राइलिहाॽ नु विन्यामिनिहाॽ मे़दे़न्दे़बा के़रे़क् पाःन्निन् मे़त्छे़ अबनेरे़न् दाउद वये़बादे़न् हे़ब्रोन्नो पे॥ 20 अबनेरे़न् निबोङ् कुमनाहाॽनु दाउद वये़बादे़न् हे़ब्रोन्नो पे, दाउदरे़ अबनेर हे़क्क्याङ् खुने़ॽनु के़वाॽबा मनाहाॽरे़ लागि चामा थुङ्मा पिरुसि॥ 21 हे़क्क्याङ् अबनेरे़ल्ले़ दाउदे़न् मे़त्तु, “आल्ल आङ्गाॽ पेःक्मा फाःक्ताङ्ङे़ॽ हे़क्क्याङ् आदाङ्बा हाङ्ङिल्लो के़रे़क् इस्राइलिहाॽ सुप्सुङ् तारुङ्सिङ्, हे़क्केःल्ले़ खे़ङ्हाॽरे़ आदाङ्बानु लत्छा माङ्हुप् मे़जोगुर॥ हे़क्क्याङ् खे़ने़ॽ आत्तो थारिक् हाङ्चोःक्मा निङ्वाॽ के़जोगुॽ खे़प्मो थारिक् हाङ् चोगे़ॽओ॥” हन्नाङ् दाउदरे़ अबनेरे़न् पाङ्घुदेसु, हे़क्क्याङ् खुने़ॽ नुरिक्काङ् पेरो॥ अबनेरे़न् मे़से़रु 22 कर खे़न् एगाङ् खिदोए नाप्से़ के़बेःक्पाआङ् के़वाॽबा दाउदरे़ कुधक्सुबाहाॽ योआबे़न्नु मे़नाप्तुसिबा यरिक् चिगक्वाहाॽ मे़दारुआङ् मे़नुःक्खे़ मे़गे़रे़॥ अबनेरे़न् दाउदे़न्नु हे़ब्रोन्नो होःप्ते़, थेआङ्भे़ल्ले़ खुने़ॽ दाउदरे़ नुरिक्काङ् पाङ्घुदेसुबाल्ले़ चोगुल्ले़ खुने़ॽ होःप्ते़॥ 23 योआब हे़क्क्याङ् खुने़ॽनु के़वाॽबा थक्सुबाहाॽ मे़गे़रे़, हे़क्क्याङ् नेरे़ल्ले़ कुस्सा अबनेरे़न् हाङ्ङिल्ले़ॽओ त्ये़आङ् नुरिक्काङ् नुःक्खे़ पेबा खे़ल्ले़ खे़प्सु॥ 24 हे़क्केःल्ले़ योआबे़न् पेआङ् हाङ्ङिन् मे़त्तु, “आदाङ्बारे़ कन् थे के़जोगुबा? अबनेरे़न् आदाङ्बारो त्ये़आङ् वये़॥ आदाङ्बारे़ आक्खेआङ् के़बाङ्घु के़देसुबा? खुने़ॽग खे़त्छिङ्ङाङ् पे॥ 25 आदाङ्बारे़ नेरे़ल्ले़ कुस्सा अबनेरे़न् कुसिङ् के़निःत्तुआङ् वाॽ॥ खुने़ॽग आदाङ्बारे़ थे के़जोगुर के़वाॽ खे़न् के़रे़क् कुसिङ्निःत्छे़ नु के़इङ्ले़क्से़ त्ये़आङ् वये़॥” 26 योआबे़न् दाउदरे़ कुदगिलाम् लःन्दे़, खे़ब्याङ् खुने़ॽ अबनेरे़ल्ले़ कुएगाङ् इङ्घङ्साबाहाॽ पाङ्घुसि, हे़क्क्याङ् खे़ङ्हाॽरे़ खुने़ॽ याम्मो सिराबा वाबाक्लाम् मे़नुःक्तुआङ् मे़दारु॥ कर दाउदरे़ कन् पाःन्निन् कुसिङ् मे़न्निःत्ते वये़॥ 27 हे़क्क्याङ् अबनेरे़न् हेब्रोन नुःक्खे़, हे़क्केःल्ले़ योआबरे़ सिबिॽआङ् ताॽगे़जे़ङ्बा ले़ङ्सिङ्ङाङ् खुने़ॽनु लाम्धेःप्पाल्ले़ नाहाङ् ले़प्माङ् तेॽरुआङ् पे, हे़क्क्याङ् खुने़ॽ कुन्साॽ असाहेले़ल्ले़ कुले़क्वा हुङ्से़ अबनेरे़न् कुस्साप्पोःक्को थुबुआङ् से़रु॥ 28 दाउदरे़ खे़न् पाःन्निन् खे़प्सुआङ् पाःत्तु, “नेररे़ कुस्सा अबनेरे़ल्ले़ कुसिमाओ आङ्गाॽ नु आङ्गाॽ आलाजेन् यहवे दाङ्बाल्ले़ कुनिमाओ थेआङ् आप्तिक् होप्॥ 29 योआब नु खुने़ॽ कुम्बारे़ के़रे़क् कुधाःक्हाॽरे़ खुन्छिॽ थे़गेःक्पो खे़न् आप्तिःक्के़न् थाररो॥ हे़क्क्याङ् योआबरे़ कुहिम्सयङ्हाॽओ मिक्वा के़लःम्बा याङ्घेःक् नु के़जत्छिङ्बा होरिक् तुक्माल्ले़ आप्फाल्ले़आङ् मे़ले़रुसिल्ल, तक्कातिल्ले़ तक्सिङ्माआङ् लाङ्घेःक्मा इग्र ताभेलाम्बा सिमा इग्र नाःक्माआङ् चामारक् पोङ्ल॥” 30 अक्खेलॽरिक् गिबोनबा थङ्ङो अबनेरे़ल्ले़ खुन्छिॽ नुसाॽ असहेले़न् से़रुबाल्ले़ चोगुल्ले़ योआब नु खुने़ॽ कुन्साॽ अबिसैःल्ले़ अबनेरे़न् से़रे़छुरो॥ अबनेरे़न् इपुङ्ङो मे़ने़स्सु 31 दाउदरे़ योआब हे़क्क्याङ् खुने़ॽनु के़वाॽबा के़रे़क् मनाहाॽ खुन्छिॽ तेत् थे़ःङ्मा, सगितेत् चाङ्मा नु अबनेररे़ कुजे तगि मे़रिङ् थक्मार लाङ्घेःक्मा इङ्जाङ् पिरुसि, हे़क्क्याङ् हाङ्ङिन् आबाङे चे के़बङ्बाहाॽरे़ खुन्छिॽ एगाङ् एगाङ् लाङ्घेगे़॥ 32 खे़ङ्हाॽरे़ अबनेरे़न् हे़ब्रोन्नो मे़लुप्तु, हे़क्क्याङ् खुने़ॽ कुइपुङ्ङो हाङ्ङिन् हे़क्क्याङ् खुने़ॽनु के़वाॽबाहाॽ साॽरिक् मे़हाबे़॥ 33 हे़क्क्याङ् हाङ्ङिल्ले़ अबनेरे़ल्ले़ कुलागि लत्छा हाःप्मा साम्लोधिक् चोगुरो— “अबनेरए, थेआङ् कुॽइके़भे़ॽबा मना कुइसिक् के़स्ये़बाबे? 34 खे़ने़ॽ के़हुक् इमे़ङ्घेःङ्ङे पत्छे़, खे़ने़ॽ के़लाङ्ङो फे़न्जेॽ सिक्रि मे़बत्छे़न्, खे़ने़ॽग कुॽइके़भे़ॽबाहाॽरे़ खुन्छिॽ हुक्को के़ध्ये़बा कुइसिक् के़गे़ङे़रो॥” हे़क्केःल्ले़ याम्मो के़रे़क् मनाहाॽ मे़हाबे़॥ 35 हे़क्क्याङ् खे़ङ्हाॽरे़ दाउदे़न् नाम् मे़न्धाएसा कुभा चा चर फाॽआङ् मे़बिरु, कर दाउदरे़ माङ्हे़क्सिङ्ङाङ् अक्खेलॽरिक् पाःत्तु, “नाम् थामानुःल्ले़ तगि आङ्गाॽ कुजा सुसुङ्ने़भग्र निङ्वाॽफुमाङ्ङिल्ले़ आङ्गाॽ साॽरिक् खुम्दिङ् पिआर॥” 36 खे़प्मो के़वाॽबा के़रे़क्ले़ पान् कुसिङ् मे़निःत्तु, हे़क्क्याङ् खुने़ॽनु मे़दे़न्दे़॥ हाङ्ङिल्ले़ चोगुबा के़रे़क् पाःन्नो खे़ङ्हाॽ मे़सःत्ते़॥ 37 खे़न् ये़न्नो इस्राइलबा के़रे़क् मनाहाॽरे़ नेररे़ कुस्सा अबनेरे़ल्ले़ कुसिमाओ हाङ्ङिल्ले़ कुहुक् होप् के़लॽबा पाःन्निन् कुसिङ् मे़निःत्तु॥ 38 दाउदरे़ खुने़ॽ कुमनाहाॽ मे़त्तुसि, “इस्राइलओ आइन् लत्छा थङ् थक्मा के़धुम्बा, यम्बा मनाधिक् स्ये़ फाॽआङ् खिनिॽ के़न्निसुम्मिम्बि? 39 आङ्गाॽ माङ्ले़ सेःन्दाङ्बा हाङ् पोःक्खाङ्साङ् के़नुॽबा नु नःम्नःम्बा चोगाङ् कर कन् सरुयाहरे़ कुस्साहाॽरे़ मनाहाॽ स्ये़रे़त्छुसि॥ खे़ङ्हाॽ आङ्गाॽनुःल्ले़ के़आःप्पा पोःक्खे़छि॥ यहवे दाङ्बे़ल्ले़ कुॽइके़भे़ॽबा याःम्बक् के़जोक्पे़न् खे़ल्ले़ खोमा के़बोङ्बा खुम्दिङ् पिरुररो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.