२ सामुए़ल 24 - लिम्बुदाउदरे़ थङ् के़धक्पा थक्सुबाहाॽ निरुसिॽ 1 याम्मोआङ् इस्राइलिहाॽरे़ खुन्छिॽ तक्ले़ङ्वाओ यहवे दाङ्बे़ल्ले़ कुसिक् पोगे़, हे़क्क्याङ् खुने़ॽए खे़ङ्हाॽरे़ खुन्छिॽ तक्ले़ङ्वाओ दाउदे़न् फोःक्खु, हे़क्क्याङ् मे़त्तु, “पेगे़ॽआङ् इस्राइल नु यहुदाबा मनाहाॽ निरे़से़ॽ॥” 2 खे़ल्ले़चोगुल्ले़ योआबे़न् हे़क्क्याङ् खुने़ॽनु के़वाॽबा थक्सुबा लाम्लोबाहाॽ दाउदरे़ मे़त्तुसि, “दानलाम् बेर्सेबा थारिक् इस्राइलबा के़रे़क् सुवाङ् के़वाॽबादे़न्नो पेगे़म्मे़ॽ हे़क्क्याङ् थङ् के़धक्पाहाॽ निराम्सिम्मे़ॽआङ् त्ये़म्मे़ॽ॥ खे़ङ्हाॽ आक्ख्यारिक् मे़वाॽ खे़न् निङ्वाॽ खोमा आनिङ्वाॽ वाॽ॥” 3 कर योआबे़ल्ले़ हाङ्ङिन् मे़त्तु, “यहवे दाङ्बा के़निङ्वाॽफुमाङ्ङिल्ले़ आल्लो के़वाॽबा के़मनाहाॽ किप्थिक्ले़ङ् यारिक् यरिक् फोसुसिर, हे़क्क्याङ् आदाङ्बारे़ खे़न् के़रे़क् के़निसुर थारिक् निङ्वाॽफुमाङ्ङिल्ले़ के़धाःक् चाॽर चोगुर॥ कर आदाङ्बा हाङ्ङिल्ले़ अक्तङ्बा याःम्बक् थेआङ् चोःक्मा के़गोःत्तुबाबे?” 4 कर हाङ्ङिल्ले़ योआबे़न् नु थक्सुबा लाम्लोबाहाॽ कुबाःन्निल्ले़ नाःन्दुसिबाल्ले़ इस्राइलबा थक्सुबाहाॽरे़ खुन्छिॽ खानिःत् चोःक्से़ खे़प्मोलाम् मे़धासिङ्॥ 5 खे़ङ्हाॽरे़ यर्दन वहःङ्ङिन् मे़गाःक्तुआङ् मे़बे, हे़क्क्याङ् गाद ते़ङ्गप्पोबा ने़ने़बादे़न् कुलुम्मो के़ने़बा अरोएर ये़क्यक्किल्ले़ लाङ्गे़त् पिसाङ् साःङ्गाहिम् मे़लेःतु, गाद मे़बोःक्खे़र याजेर थारिक् मे़बे॥ 6 हन्नाङ् खे़न्हाॽ गिलाद नु तातिमहोदसि हे़क्क्याङ् दान-यान नु सिदोनबा कुगप्पिन् मे़गबु॥ 7 हे़क्क्याङ् खे़ङ्हाॽ तुरोसबा यक् थारिक् मे़बे, हिब्बि नु कनानिहाॽरे़ खुन्छिॽ ये़क्यक्हाॽ थारिक् मे़बे॥ खे़न् एगाङ् यहुदाबा नेगेव मे़प्मनाबाल्ले़ लाङ्गे़त् पिसाङ् लाजेॽबा बेर्सेबा मे़प्नादे़न्नो मे़बे॥ 8 हे़क्केलॽरिक् खे़ङ्हाॽरे़ के़रे़क् लाजेॽ मे़गबु, हे़क्क्याङ् फाङ्सि लाआङ् निबोङ् ये़न्नो यरुसले़म मे़नुःक्खे़ मे़द्ये़॥ 9 खे़ब्याङ् योआबरे़ हाङ्ङिन् थक्सुबाहाॽरे़ खुन्छिॽ खानिःत् अक्खेलॽरिक् पिरु—थङ्ङो ताभे पङ्मा के़सुक्पा इस्राइलिहाॽलाम्बा ८,००,००० (लाङे़न्छिङ् ये़त्छि) नु यहुदालाम्बा ५,००,००० (लाङे़न्छिङ् ङासि) मे़वाॽ॥ 10 कर मनाहाॽ खानिःत् चोःक्मा चुरे़आङ् दाउदे़न् कुनिङ्वाःल्ले़ ये़ःक्खु, हे़क्क्याङ् खुने़ॽ यहवे दाङ्बे़न् मे़त्तु, “आङ्गाॽ साॽरिक् यम्बा लायो चोगुङ्! यहवे दाङ्बाए, के़से़वारोबाल्ले़ चोगुबा ताप्फे़ःम्बा याःम्बक्किन् माःङ्घा चोगे़ पिराङ्ङे़ॽ॥ आङ्गाॽ साॽरिक् अदङ् चोगाङ्॥” 11 हे़क्क्याङ् खुने़ॽ तानाम् पोगे़॥ कर हाबा कन् लुम्मो यहवे दाङ्बाल्ले़ कुइङ्घङ्ङिन् दाउदरे़ कुघागे़इक्पा गादबा माङ्निङ्वाॽपान् के़बाःप्पो के़रे़ चुरे़आङ् वये़— 12 “पेगे़ॽआङ् दाउदे़न् अक्खे मे़त्ते़ॽ, यहवे दाङ्बे़ल्ले़ अक्के पाःत्तुॽ, ‘आङ्गाॽ खे़ने़ॽ के़दगि सुम्सि पान् तारुङ् पिने़॥ खे़ङ्हाॽओ लत्छा सेगे़ॽ, हे़क्क्याङ् खे़न्ने खे़ने़ॽ के़दक्ले़ङ्वाओ केःत्तुङ् पिने़॥’” 13 खे़ब्याङ् गादे़न् त्ये़आङ् आम्भा खे़न् पाःन्निन् दाउदे़न् मे़त्तु, “आदाङ्बारे़ के़लाजेॽओ तङ्बेॽ सुम्सि थारिक् साक् पोःक्ल, इग्र ला सुम्सि थारिक् आदाङ्बा से़प्मा के़गोःप्पा के़निङ्मिहाॽलाम् खे़त्छिङ्मा पोङ्ल, इग्र आदाङ्बारे़ के़लाजेॽओ सुम्ये़न् थारिक् मिन्देॽ पोःक्ल? आल्ल निङ्वाॽ इःत्ते़ॽ, हे़क्क्याङ् आङ्गाॽ के़बाङ्बे़न् थे इङ्घङ् हुॽरुङ्बा खे़न् पाःन्निन् मे़त्ताङ्ङे़ॽ॥” 14 खे़ब्याङ् दाउदरे़ पाःत्तु, “आङ्गाॽग साॽरिक् तुक्खेओ थ्याङ्ङाङ् वाॽआ॥ आनिगे़ग यहवे दाङ्बे़ल्ले़ कुहुक्को थामाए नुबा पोङ्ॽ, थेआङ्भे़ल्ले़ खुने़ॽ कुमिःम्जिन् यम्बा चोक्॥ कर आङ्गाॽ मनाहाॽरे़ खुन्छिॽ हुक्को थामा मे़बोङ्ने़ल्ल॥” 15 खे़ल्ले़चोगुल्ले़ तानाम्माङ्धो यहवे दाङ्बाल्ले़ पिरुसिबा ये़म्धारिक् इस्राइल खाराक् माङ्दुक्मा पाङ्घुदासु, हे़क्क्याङ् दानलाम् बेर्सेबा थारिक् नुबोङ् हे़न्छिङ् मनाहाॽ मे़स्ये़॥ 16 यहवे दाङ्बाल्ले़ कुमाङ्लाइङ्बाल्ले़ यरुसले़ःम्मिन् मे़ङ्मारे़ लागि कुहुक्किन् फोःक्खु, हे़क्केःल्ले़ यहवे दाङ्बाल्ले़ मनाहाॽ खुम्मा कुनिङ्वाॽइन् नुःक्तुआङ् मना के़से़प्पा माङ्लाइङ्बान् मे़त्तु, “आल्ल याःक्तु, के़हुक् फोःक्खे़॥” खे़म्भे़ल्ले़ यहवे दाङ्बाल्ले़ कुमाङ्लाइङ्बे़न् याबुसि अरौनारे़ कुजा फुङ्मादे़न्नो ये़बे़॥ 17 दाउदरे़ मना के़से़प्पार के़वाॽबा माङ्लाइङ्बान् निसुआङ् यहवे दाङ्बान् मे़त्तु, “ओमे़त्ते़ॽ! आङ्गाॽग लायो चोगुङ्, हे़क्क्याङ् आङ्गाॽ ताप्फे़ःम्बा याःम्बक् चोगुङ्॥ कर कन् मे़ल्लुक्हाॽरे़ थे मे़जोगुआङ् वाॽबे? के़हुक्किन् आदक्ले़ङ्वाओ नु आहिम्सयङ्हाॽओ फोःक्खे़ॽ, आम्बारे़ कुसुवाङ्ओ मे़भोःक्खे़न्ने़ॽ॥” 18 हाबा खे़न् ये़न्नो गादे़न् त्ये़आङ् दाउदे़न् मे़त्तु, “पेगे़ॽ, याबुसि अरौनारे़ कुजा नुक्मादे़न्नो यहवे दाङ्बाल्ले़ कुलागि ले़त्ति तोःम्मादे़न्धिक् चोगे़ॽ॥” 19 खे़ल्ले़चोगुल्ले़ दाउदरे़ यहवे दाङ्बाल्ले़ कुबाःन्निन् खे़प्सुआङ् गादरे़ मे़त्तुबा कुइसिक् चोगु॥ 20 हे़क्क्याङ् अरौनारे़ यो ओमत्तुल्ले़ दाउद नु खुने़ॽ कुसे़वारोबाहाॽ खुने़ॽओ मे़धाङे़र मे़बत्छे़बा निसु॥ हे़क्क्याङ् अरौनान् पेआङ् साम्बोन् हबत् फन्छिङ्ङाङ् हाङ्ङिन् से़वा मे़त्तु॥ 21 हे़क्क्याङ् अरौनारे़ मे़त्तु, “थेआङ् आदाङ्बा हाङ्ङिन् के़से़वारोबाल्लो के़द्ये़बाबे?” दाउदरे़ मे़त्तु, “मनाहाॽलाम् माङ्दुक्मान् पेःक्ल फाॽआङ् यहवे दाङ्बे़ल्ले़ कुलागि ले़त्ति तोःम्मादे़न् चोःक्से़ कन् के़जाभुङ्मादे़न्निन् इङ्से़ त्याङ्बारो॥” 22 हे़क्क्याङ् अरौनारे़ दाउदे़न् मे़त्तु, “आदाङ्बा हाङ्ङे तेॽरे़ओ, आदाङ्बारे़ थे चोःक्मा के़सिराॽधाङ् हाबाहे़क्के चोगे़ॽओ, ले़त्ति तोःम्मारे़ लागि पित् आङ्गाॽनु मे़वाॽ, सिङ्ले़ लागि चा नुक्मा ताःन्दे नु खे़ःप्सिङ्हाॽ ने़ःॽ॥ 23 हाङ्ङे, आङ्गाॽ अरौनारे़ के़रे़क् आजिगक्वाहाॽ हाङ्ङिन् पिने़, यहवे दाङ्बा के़निङ्वाॽफुमाङ्ङिल्ले़ खे़ने़ॽ के़दाःक्ल॥” 24 कर हाङ्ङिल्ले़ मे़त्तु, “मेःन्, कल्ले़ कुलागि आङ्गाॽ कुमे़ल्लुङ् हुङुङ्ॽ॥ आङ्गाॽ याङ् मे़न्हुङ्ङेबा चिगक्वान् यहवे दाङ्बाओ सिदुङ्जभा मे़दोःन्नान्॥” खे़ल्ले़चोगुल्ले़ दाउदरे़ खे़न् कुजा फुङ्मादे़न्निन् नु पित्हाॽ ङाबोङ् सेकेल युप्पा हुङुआङ् इङु॥ 25 खे़ब्याङ् दाउदरे़ यहवे दाङ्बे़ल्ले़ कुलागि सिदुङ्जभा तोःम्मादे़न् चोगुआङ् मिधिङ्मनादेमनाबा सिदुङ्जभा नु तङ्जुम् वयागे़न् सिदुङ्जभा तोःन्दु॥ हे़क्क्याङ् लाजेॽरे़ लागि चोगुबा तुवान् यहवे दाङ्बाल्ले़ ताःक्तु, इस्राइलओ के़दाबा माङ्दुक्मान् पेरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.