२ सामुए़ल 23 - लिम्बुदाउदरे़ कुनुप्मा कुबान् 1 आल्ल दाउदरे़ कुनुप्मो पाःत्तुबा पाःन्हाॽ हाबा कन्लो— यिसैरे़ कुस्सा दाउदरे़ पाःत्तुबा पाःन्निन् हाबा कन्लो, निङ्वाॽफुमाङ्ङिल्ले़ थो फोःक्खुबा खे़न् मनाःल्ले़ पाःत्तुबा पाःन्, याकुबरे़ कुनिङ्वाॽफुमाङ्ङिल्ले़ सेगुबा हाङ्, हे़क्क्याङ् इस्राइलबा साम्लो साम्गे़मे़प्पाल्ले़ कुबाःन्लो— 2 यहवे दाङ्बाल्ले़ कुयाम्साम्मिन् आङ्गाॽलाम् पारे़रो, हे़क्क्याङ् खुने़ॽ कुबाःन्जाक्किन् आङ्गाॽ आम्ब्राओ पत्छे़रो॥ 3 इस्राइलबा निङ्वाॽफुमाङ्ङिन् पारे़रो, इस्राइलबा याक्पेॽइल्ले़ मे़त्ताङ्लो, “हाःत्ले़ मनाहाॽओ नुरिक् युक् चोगुॽ, हाःत्ले़ निङ्वाॽफुमाङ्ङिन् मिङ्सो इङ्धाङ् पिरुर युक् चोगुॽ, 4 खुने़ॽ खाॽमित् मेःन्नेबा तानाम् के़गे़प्पा नाम् कुइसिक् ले़क्लो, वहित् थाआङ् खाम्बाङ्लाम् यान् लिङ् के़बाङ्बा खाओःत्मे़न् कुइसिक् पोङ्लो॥” 5 हे़क्क्याङ् हे़क्केलॽरिक्के आङ्गाॽ आधाःक्हाॽ निङ्वाॽफुमाङ्ङिल्ले़ मुॽइसाम् पिरुसिरो, थेआङ्भे़ल्ले़ खुने़ॽए आङ्गाॽनु आभाल्ले़आङ् मे़न्नुप्नाबा माङ्हुप् चोगुरो, आभे़ल्ले़आङ् फे़त्मे़ल्लाॽमनाबा माङ्हुप्, आफाल्ले़आङ् मे़ल्ले़ङ्मना माङ्हुप्, खे़न्ने आङ्गाॽ आनिङ्वाॽ वाॽरो, खे़न्ने आङ्गाॽ थङ् आनाःम्मारो, हे़क्क्याङ् निङ्वाॽफुमाङ्ङिल्ले़ के़त्तुरो॥ 6 कर ताक्के़भे़ॽबा मनाहाॽग लाप्फेःम्नाबा तिङ् कुइसिक् मे़जोक्लो, खे़न् तिङ्हाॽग हुक्किल्ले़ सुम्माआङ् सुक्मे़दे़त्ने़न्लो॥ 7 कर फे़न्जेॽ नु सिङ्ङिल्ले़रक् सुम्मा सुक्ते़त्लो॥ सुम्मनाबा तिङ्हाॽ मिओ हाःम्मा पोङ्लो॥ दाउदरे़ के़धुम्बा कुधक्सुबाहाॽ ( १ साप्मु ११:१०-४१ ) 8 दाउदरे़ के़धुम्बा मनाहाॽरे़ खुन्छिॽ मिङ् बागन्लो॥ तहकमोनिलाम्बा योसब-बस्सेबेत वये़—के़धुम्बा सुम्सिओ कन् थिक्सिगेक्पा लाम्लोबा वये़॥ खे़ल्ले़ लाःक्किल्ले़ किप्सिङ् ये़त् मनाहाॽ थिक्ले़ङ्माल्ले़ से़रुसि॥ 9 खे़न् सुम्सिहाॽओ निसिगेक्पान् अहोहि दोदैरे़ कुस्सा एलाजार वये़॥ खुने़ॽ दाउदनु पास-दम्मिमओ वये़, खे़प्मोए पलिस्तिहाॽ थङ्ले़ लागि मे़जुप्से़आङ् मे़वये़॥ इस्राइलिहाॽ थङ् चोःक्मा मे़न्छुक्तुन्नाङ् मे़नुःक्खे़, हे़क्केःल्ले़ खुने़ॽए थङ् चोःक्से़ पेआङ् 10 कुहुक् मे़ङ्घिॽए थारिक् पलिस्तिहाॽ च्ये़प्तुसिर यागे़, खुने़ॽ कुहुक्कोग ताभेन् खिप्तुआङ्ङे पत्छे़॥ अक्खेलॽरिक् यहवे दाङ्बाल्ले़ यम्बा थङ् नाःम्मा कुभाॽ पिरु॥ खे़न् एगाङ् इस्राइलबा मनाहाॽ के़सिबाहाॽरे़ खुन्छिॽ चिगक्वाहाॽ नाप्से़रक् एलाजार वये़बादे़न्नो मे़नुःक्खे़ मे़द्ये़॥ 11 हे़क्क्याङ् खे़न् एगाङ् हरारबा आगिरे़ कुस्सा सम्मा वये़॥ पलिस्तिहाॽ ले़हि मे़प्नाबादे़न्नो मे़जुप्से़आङ् मे़वये़, खे़प्मो कारिॽ हेॽप्नाबा प्याङ्सिधिक् ने़स्से़॥ हे़क्क्याङ् पलिस्तिहाॽरे़ इस्राइलिहाॽ मे़भत्तुसिआङ् मे़नाःत्तुसि, 12 हे़क्केःल्ले़ सम्मान् प्याङ्सिओ ये़म्सिङ्, हे़क्क्याङ् खे़न् प्याङ्सिन् से़ःप्तु, हे़क्क्याङ् पलिस्तिहाॽ नाःन्दुसि॥ अक्खेलॽरिक् यहवे दाङ्बे़ल्ले़ पयम् यम्बा थङ् नाःम्मा पाङ्घुसि॥ 13 हे़क्क्याङ् चाभुङ्मा ये़म् त्ये़र पत्छे़ल्ले़ खे़न् सुम्बोङ् मनाहाॽओलाम्बा सुम्सि के़ये़क्पा मनाहाॽ अदुल्लाम फुक्कुओ दाउदे़न् कुदुम्से़ मे़द्ये़॥ पलिस्तिहाॽ रपाइबा ने़ने़बादे़न्नो यक् मे़लेःत्तुआङ् मे़युङे़॥ 14 खे़न् ये़म्मो दाउदे़न् यक्को वये़, हे़क्क्याङ् पलिस्तिबा थक्सुबाहाॽ बेथले़हे़मओ मे़वये़॥ 15 हे़क्क्याङ् थिक्ये़न् दाउदे़न् साॽरिक् वामिःक्माल्ले़ तरु, हे़क्क्याङ् पाःत्तु, “ए! बेथले़हे़मबा यम्बा लाम्धेःत्तिल्ले़ कुयाओ के़ने़बा वबाक्कोबा च्वाःत्तिन् थुङ्मा खोसुङ्ङिल्ले़ग नुरे़बामे़न्!” 16 खे़ल्ले़चोगुल्ले़ खे़न् सुम्सि के़धुम्बा थक्सुबाहाॽ पलिस्तिहाॽरे़ खुन्छिॽ तिःक्लाओलाम् मे़भिःन्छिङ् मे़बेआङ् बेथले़हे़म लाम्धेत् कुबेसाङ्बा वाबाक्कोलाम् च्वाःत्तिन् मे़युरुआङ् दाउदे़न् मे़बिरु॥ कर दाउदे़न् खे़न् च्वाःत्तिन् थुङ्मा मे़दे़न्दे़न्॥ खुने़ॽ खे़न् च्वाःत्तिन् यहवे दाङ्बे़ल्ले़ कुदगि हुक्खुदेसु॥ 17 हे़क्क्याङ् पाःत्तु, “यहवे दाङ्बाए, आङ्गाॽ कन् च्वाःत्तिन् थुङ्मा मे़बोङ्ने़ल्ल॥ कन् मनाहाॽरे़ खुन्छिॽ माक्खिॽइल्ले़ मे़ले़क्तुबा हे़क्तङ्बा च्वाःत्तिन् आक्खेलॽरिक् थुङुङ्बाबे? कन् च्वाःत्तिल्ले़ कुलागि खे़ङ्हाॽरे़ खुन्छिॽ हिङ्मन् मे़बिरुआङ् मे़वाॽ॥” खे़ल्ले़चोगुल्ले़ खे़न् च्वाःत्तिन् खुने़ॽ मे़धुङुन्॥ खे़न् सुम्सि के़धुम्बा मनाहाॽरे़ खुन्छिॽ याःम्बक्हाॽ बाअक्तङ्बा वये़॥ 18 सरुयाहरे़ कुस्सा योआबरे़ कुन्साॽ अबिसैन् कन् सुम्सि मनाहाॽरे़ लागि कुधे़गेक् लाम्लोबा वये़॥ थिक्ले़ङ् खुने़ॽ किप् सुम्सि मनाहाॽरे़ खुन्छिॽ लुम्मो लाःक्किन् याङुआङ् खे़ङ्हाॽ थुबु से़रुसि, हे़क्क्याङ् कम्भलॽरिक् खे़न् सुम्सि मनाहाॽ कुइसिक् खुने़ॽ कुमिङ् के़इङ्बा पोःक्खे़॥ 19 खे़न् सुम्सि मनाहाॽनुःल्ले़ यरिक् खुने़ॽ मिङ्सो इङ्धाङ् खोसुआङ् खे़ङ्हाॽरे़ खुन्छिॽ थक्पेबा पोःक्खे़, करसाङ् खुने़ॽ खे़न् सुम्सि मनाहाॽ यारिक् कुमिङ् मे़इङे़न्॥ 20 यहोयादारे़ कुस्सा कब्सेल के़युङ्बा बनायाहन्नाङ् लत्छा के़धुम्बा वये़॥ खुने़ॽआङ् यम्बा याःम्बक् चोगुआङ् वये़॥ मोआबबा ने़त्छि मुक्साम्बा मना के़से़प्पा खुने़ॽए वये़॥ नाःङ् थ्ये़बा ये़न्नो खुने़ॽ लत्छा लुम्बाःत्तो लासे़आङ् खिरिङ्बा थिक् स्ये़रुआङ् वये़॥ 21 हे़क्क्याङ् खुने़ॽए लत्छा यम्बा केःम्बा मिस्रिधिक् से़रु, मिस्रिःल्ले़ कुहुक्को लत्छा लाःक् कत्तु॥ बनायाहःल्ले़ कुहुक्को तक्कात् थिक् याङ्सिङ्ङाङ् थक्से़ पे, हे़क्क्याङ् खे़न् मिस्रिःल्ले़ कुहुक्कोलाम् लाःक्किन् नाप्तुआङ् हाबा खे़न् लाःक्किल्ले़ फनॽ थुबु स्ये़रुआङ् वये़॥ 22 ये़होयादारे़ कुस्सा बनायाहल्ले़ कुधुम्मा याःम्बक्किन् हाबा अक्तङ्बा वये़॥ खे़न् सुम्सि मनाहाॽ हे़क्केए खुने़ॽ कुमिङ् के़इङ्बा पोःक्खे़॥ 23 खुने़ॽ खे़न् सुम्बोङ् मनाहाॽनुःल्ले़आङ् यरिक् कुमिङ् के़इङ्बा वये़, करसाङ् खुने़ॽ खे़न् सुम्सि मनाहाॽ यारिक् कुमिङ् मे़इङे़न्॥ दाउदे़ल्ले़ खे़न् खुने़ॽ कुधक् कम्ब्राङ् के़मे़प्पाहाॽरे़ खुन्छिॽ लाम्लोबा चोगुरो॥ 24 खे़न् सुम्बोङ्हाॽओ योआबरे़ कुन्साॽ असाहेल्लाङ् वये़रो, बेथले़हे़मबा दोदैरे़ कुस्सा एल्हानान, 25 हरोदबा सम्मा, हरोदबा एलिका, 26 पल्तिबा हेलेस, तक्कोबा इक्केसरे़ कुस्सा इरा, 27 अनातोतबा अबिएजेर, हुसाति मबुन्ने, 28 अहोहि सल्मोन, नतोपाति महरै, 29 नतोपाति बानाहरे़ कुस्सा हेलेद, हे़क्क्याङ् बेन्यामिन गिबाबा रिबैरे़ कुस्सा इथै, 30 पिरातोन्बा बनायाह, गासबा ने़ने़बादे़न्लाम्बा हिद्दै, 31 अराबाबा अब्बि-अल्बोन्, बहुरिमि अज्मावेत, 32 साल्बोनि एल्याहबा, यासेनरे़ कुस्साहाॽ, 33 हरारबा सम्मारे़ कुस्सा जोनाथान, हरारबा सराररे़ कुस्सा अहिआम, 34 माकाति आहसबैरे़ कुस्सा एलिपेलेत, गिलोनि अहितोपेलरे़ कुस्सा एलिआम, 35 कर्मेलि हेस्रो, अर्बाबा पारै, 36 सोबा के़युङ्बा नातानरे़ कुस्सा यिगाल, हग्रिरे़ कुस्सा, गादबा बानि, 37 अम्मोनबा सेलेक, बेरोतबा नहरै, कन् सरुयाहरे़ कुस्सा योआबरे़ कुभे़जुम् कुभे़या के़बङ्बा वये़, 38 यित्रि इरा, यित्रि गारेब, 39 हे़क्क्याङ् हित्ति उरियाह॥ कङ्हाॽ के़रे़क्को सुम्बोङ्ङाङ् नुसि मे़वये़॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.