२ सामुए़ल 21 - लिम्बुगिबोनिहाॽ नु सावलरे़ कुहिम्सयङ् 1 दाउदरे़ तङ्बेॽ सुम्सि हाङ् चोगुबा ये़म्मो साॽरिक् के़जाॽबा साक् पोगे़॥ हे़क्क्याङ् दाउदरे़ यहवे दाङ्बे़न् सेःन्दोसु॥ यहवे दाङ्बे़ल्ले़ दाउदे़न् मे़त्तु, “सावल नु खुने़ॽ कुहिम्सयङ्हाॽ मना के़से़प्पा मे़मे़त्तुसि, थेआङ्भे़ल्ले़ खे़ङ्हाॽरे़ गिबोनिहाॽ मे़से़रुसि॥ खे़ल्ले़चोगुल्ले़ साक् पोगे़आङ् वाॽ॥” 2 (गिबोनिहाॽ इस्राइलि सुवाङ्बा मे़होःप्ते़॥ खे़ङ्हाॽ एमोरि सुवाङ्लाम्बा लत्छा लक् मे़वये़, इस्राइलिहाॽरे़ खे़ङ्हाॽ मे़से़त्तासिगे़न् मे़मे़त्तुसिआङ् माङ्हे़क् मे़जोगुआङ् मे़वये़॥ हे़क्केसाङ् सावलरे़ इस्राइल नु यहुदारे़ लागि कुसिक्समे़बाल्ले़ चोगुल्ले़ गिबोनिहाॽ से़प्मासि फाॽआङ् निङ्वाॽ इःत्तुआङ् वये़॥) खे़ल्ले़चोगुल्ले़ दाउद हाङ्ङिल्ले़ गिबोनिहाॽ उःत्तुसि, 3 हे़क्क्याङ् मे़त्तुसि, “आङ्गाॽ खिनिॽ लागि थे चोगुङ्बाबे? खिनिॽ मे़न्वाॽमना के़म्मे़त्तिबाल्ले़ कुले़क्वा खिनिॽ लागि आङ्गाॽ थे नुबा चोःक्मा सुक्तुङ्बे? खे़ल्ले़चोगुल्ले़ यहवे दाङ्बे़ल्ले़ कुमनाहाॽ खिनिॽ हाङ्वामुॽइ पिमा के़सुक्तुम्सिम्ल॥” 4 गिबोनिहाॽरे़ मे़मे़त्तु, “सावल हे़क्क्याङ् कुहिम्सयङ्हाॽनु आनिगे खे़माॽइन् साम्म्याङ् युप्पारे़ तङ्मा आनिगे युक् मे़गत्तुम्बे़न्, हे़क्क्याङ् इस्राइलबा मनाहाॽ से़प्मासि युक्काङ् मे़गत्तुम्बे़न्॥” खे़ब्याङ् दाउदरे़ सेःन्दोसु, “हे़क्केग्र आङ्गाॽ खिनिॽ लागि थे चोगुङ्बाबे?” 5 खे़ङ्हाॽरे़ हाङ्ङिन् मे़मे़त्तु, “सावलरे़ आनिगे मे़ङ्मा कोःत्तिगे़ हे़क्केःल्ले़ इस्राइलबा लाजेॽओ आत्तान्नाङ् आनिगे युङ्मादे़न् मे़ने़ने़न्, 6 खे़न् मनाःल्ले़ कुमुॽइदाङ्साहाॽओबा नुसि ये़म्बित्छाहाॽ आनिगे हुक् आसुप्ते़ॽ, यहवे दाङ्बे़ल्ले़ सेगुबा सावल हाङ्ङिल्ले़ कुये़क्यक् गिबाओ यहवे दाङ्बे़ल्ले़ कुदगि खे़ङ्हाॽ से़रुम्सिम्बे़आङ् तिःक्सुम् फत्छुम्सिम्बे़॥” हाङ्ङिल्ले़ मे़त्तुसि, “आङ्गाॽ खिनिॽ के़बाःत्तुम्बा कुइसिक् खे़ङ्हाॽ खिनिॽ हुक्को पिनिङ्ॽ॥” 7 दाउद नु जोनाथानरे़ यहवे दाङ्बे़ल्ले़ कुदगि माङ्हे़क् चोगे़सुआङ् वये़सिबाल्ले़ चोगुल्ले़ दाउदे़ल्ले़ सावलरे़ कुम्मे़न्छाॽ जोनाथानरे़ कुस्सा मपिबोसेते़न् ताङ्घु युक्खु॥ 8 कर आय्यारे़ कुस्सा मे़न्छुमा रिस्पाःल्ले़ सावललाम्बा कत्तुसिबा ने़प्फु कुस्सा आरमोनि नु मपिबोसेते़न् हाङ्ङिल्ले़ पिरुसि॥ रिस्पान् आय्याःल्ले़ कुस्सा मे़न्छुमा वये़॥ खे़ब्याङ् हाङ्ङिल्ले़ सावलरे़ कुस्सा मे़न्छुमा मेराबरे़ महोलाति बर्जिलैरे़ कुस्सा अद्रिएललाम्बा कत्तुसिबा ङासि कुस्साहाॽ पिरुसि॥ 9 दाउदरे़ गिबोनिहाॽरे़ खुन्छिॽ हुक्को पिरुसि, हे़क्क्याङ् खे़ङ्हाॽरे़ यहवे दाङ्बे़ल्ले़ कुदगि कोःक्माओ मे़दिःक्खुसिआङ् मे़भोःन्दुसि॥ खे़न् नुसिए थिक्ले़ङ्माल्ले़ सोरिक् हःक्सि तुप्मा हेःक्मा ये़म्मो मे़से़रुसि॥ 10 हे़क्क्याङ् अय्यारे़ कुस्सा मे़न्छुमा रिस्पाःल्ले़ सगितेत्तिन् सि तुप्मा ये़म्माङ्धो ताङ्साक्पालाम् के़सिबाहाॽरे़ खुन्छिॽ थक्को च्वाःत् मे़न्धाधारिक् लुङ् सम्धाङ् खिङ्घु फत्छु॥ हे़क्क्याङ् ले़न्दिक् ताङ्साक्पो के़बे़बा पुहाॽ खे़न् के़सिबा थक्किन् चामा मे़भाःक्तुसिन् हे़क्क्याङ् से़न्दिक् ताम्भुङ् थक्साहाॽ खे़न् के़सिबा थक्किन् चामा मे़भाःक्तुसिन्॥ 11 सावलरे़ कुमेत् पाःक्मा अय्यारे़ कुस्सा मे़न्छुमा रिस्पाःल्ले़ चोगुबा पाःन्निन् दाउदे़न् मे़जे़क्तु, 12 खे़ब्याङ् कन् पाःन्निन् दाउदरे़ खे़प्सुआङ् सावल नु कुस्सा जोनाथानरे़ खुन्छिॽ ये़प्पाहाॽ याबेस गिलादबा मनाहाॽलाम् तारु॥ (गिल्बो कोःक्माओ पलिस्तिहाॽरे़ सावले़न् नु जोनाथाने़न् मे़से़रुसि, हे़क्क्याङ् बेथ-सान्बा मना चुम्मादे़न्नो पलिस्तिहाॽरे़ मे़दिःक्सु मे़भत्छुसिबा खे़न् के़सिबाहाॽरे़ खुन्छिॽ थक्किन् याबेस गिलियादबा मनाहाॽरे़ मे़घुःत्तु मे़देॽरु॥) 13 हे़क्क्याङ् सावल नु जोनाथानरे़ खुन्छिॽ ये़प्पाहाॽ तारु, खे़ब्याङ् मे़भोःन्दुसिआङ् मे़से़रुसिबा मनाहाॽरे़ खुन्छिॽ ये़प्पाहाॽ सुम्मा पाङ्घुसि॥ 14 हे़क्क्याङ् खे़ङ्हाॽरे़ सावल नु कुस्सा जोनाथानरे़ खुन्छिॽ ये़प्पाहाॽ बिन्यामिनिहाॽरे़ खुन्छिॽ लाजेॽओबा ये़क्यक् सला मे़प्नाबा ते़न्नो सावलरे़ कुम्बा किसरे़ कुइपुङ्ङो मे़लुप्तु॥ हाङ्ङिल्ले़ खे़ङ्हाॽ थे चोगाम्मे़ॽ मे़त्तुसिआङ् वये़, खे़न् के़रे़क् खे़ङ्हाॽरे़ मे़जोगु॥ खे़न् एगाङ् लाजेःल्ले़ कुलागि मे़भाक्तुबा पेलिन् यहवे दाङ्बे़ल्ले़ खे़प्सुरो॥ पलिस्तिहाॽनु ते़न्धङ् ( १ साप्मु २०:४-८ ) 15 याम्मो पलिस्ति नु इस्राइलिहाॽरे़ खुन्छिॽलुम्मो थङ् पोङ्मा हेःक्ते़॥ दाउद नु खुने़ॽ कुमनाहाॽ थङ् चोःक्से़ यो मे़ध्ये़, कर पलिस्तिहाॽनु थङ् चोःक्नु यागे़ल्ले़ खुने़ॽ साॽरिक् नासे़॥ 16 हे़क्क्याङ् रफारे़ कुमुॽइदाङ्साहाॽओ लत्छा इस्वि बनोब मे़प्मनाबाधिक् वये़, खे़ल्ले़ किप् सुम्सि सेकेल यारिक् के़लिःप्पा लाःक् कत्तु, खे़ल्ले़ ताभेन् हेसुआङ् पत्छे़, खे़ल्ले़ दाउदे़न् से़रुङ् पाःत्तुआङ् वये़॥ 17 कर सरुयाहरे़ कुस्सा अबिसैन् दाउदे़ल्ले़ कुभाॽसे़ त्ये़॥ खे़ल्ले़ पलिस्तिधिक् हिप्तुसे़रु॥ हे़क्क्याङ् दाउदरे़ कुमनाहाॽरे़ माङ्मे़हे़क्सिङ्ल खुने़ॽ मे़मे़त्तु, “आदाङ्बा आभाल्ले़आङ् थङ्ङो आनिगे़नु के़म्बेःक्ने़न्, के़बेःक्ने़भग्र इस्राइल के़धोॽबा हाङ्ङिन् सिःॽ॥” 18 खे़न् एगाङ् याम्मोआङ् गोब मे़प्नादे़न्नो पलिस्तिहाॽनु थङ् पोःक्खे़॥ खे़न् ये़म्मो हुसाति सिब्बकैःल्ले़ रफारे़ कुमुॽइदाङ्सा सफ मे़प्नाबे़न् से़रु॥ 19 गोब मे़प्मनाबादे़न्नो पलिस्तिहाॽनु वेॽ थङ्ङो बेथले़हे़मबा यारे़ल्ले़ कुस्सा एल्हानानरे़ गित्ति गोल्याते़न् से़रु, खे़ल्ले़ कुलाःक्किल्ले़ कुलाःन् थाक् किप्मा सिङ्लःङ्सा याःप्पा चोगे़॥ 20 हे़क्क्याङ् गात मे़प्नाबादे़न्नो वेॽ लत्छा थङ्ङो तुक्सि तुक्सि कुहुक्चोक् नु तुक्सि तुक्सि कुलाङ्जोक् के़बप्पा के़रे़क्ले़ निबोङ्ङाङ् लिसि कुहुक्चो कुलाङ्जो यम्बा होरु मनाधिक् थाःम्सिङ्॥ खे़न्नाङ् रफारे़ कुधाःक्पा वये़॥ 21 खे़ल्ले़ इस्राइले़न् साःत्तु खे़ब्याङ् दाउदरे़ कुम्भुॽ सिमेअरे़ कुस्सा जोनाथने़ल्ले़ खे़न् स्ये़रु॥ 22 गात के़युङ्बा कन् लिसि मनाहाॽ रफारे़ कुसुवाङ्बा मे़वये़, हे़क्क्याङ् कन्हाॽ खक्पे़त् दाउद नु खुने़ॽ कुमनाहाॽरे़ खुन्छिॽ हुक्लाम् मे़स्ये़रुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.