२ सामुए़ल 20 - लिम्बुसेबान् दाउदरे़ कुदक्ले़ङ्वाओ पोक् 1 खे़प्मो सेबा मे़प्नाबा कुॽइगे़भे़म्बा मनाधिक् वये़, खुने़ॽ बेन्यामिन बिक्रि मे़प्नाबे़ल्ले़ कुस्सा वये़॥ खे़ल्ले़ सादाङ्ङिन् मुक्खु, हे़क्क्याङ् अःक्ते़र पाःत्तु, “दाउदओ आनिॽ थे़मा लक् वाॽबे? यिसैरे़ कुस्साःल्लो आनिॽ थेआङ् युक् आङ्गत्तुम्मिन्! इस्राइलिसे खिनिॽ आबाङे हिम्हिम् पेगे़म्मे़ॽ!” 2 खे़ल्ले़चोगुल्ले़ बिक्रिरे़ कुस्सा सेबाःल्ले़ कुएगाङ् पेःक्मारे़ लागि इस्राइलबा मनाहाॽरे़ दाउदे़न् मे़ले़रु, कर यहुदाबा मनाहाॽरे़ दाउदे़न् मे़ल्ले़रुन्, हे़क्क्याङ् यर्दन यङ्घङ्लाम् यरुसले़म थारिक् दाउदे़न् मे़दिःक्तुआङ् मे़बे॥ 3 हे़क्क्याङ् दाउदे़न् आबाङे हाङ्हिम् यरुसले़म त्ये़, खे़ब्याङ् हाङ्हिम् कोसे़ युक्खुसिबा थिबोङ् कुमेत् पाःक्माहाॽ तेॽरुसिआङ् के़गोबा मनाहाॽरे़ खुन्छिॽ कम्ब्राङ्ङो युक्खुसि॥ खुने़ॽ खे़ङ्हाॽ चामा थुङ्मा पिरुसि कर खे़ङ्हाॽनु इम्से़ मे़बेने़न्॥ अक्खेलॽरिक् खुन्छिॽ सिसि थारिक्साङ् खे़ङ्हाॽ साक्तुसिआङ् युक्खुसि, हे़क्क्याङ् खे़ङ्हाॽ खुन्छिॽ ये़म्बा के़सिबा मेमेदुमा कुइसिक् मे़युङे़॥ 4 खे़ब्याङ् हाङ्ङिल्ले़ अमासान् मे़त्तु, “यहुदाबा मनाहाॽ सुप्से़से़ॽ, हे़क्क्याङ् सुम्ये़न्ले़सा खे़ने़ॽनु सोरिक् आङ्गाॽओ तारे़से़ॽ॥” 5 अमासान् यहुदाबा मनाहाॽ सुम्से़ पे, कर हाङ्ङिल्ले़ पिरुबा ये़म्मिन्नुःल्ले़आङ् यरिक् ये़म् तेसु॥ 6 हे़क्क्याङ् दाउदरे़ अबिसैन् मे़त्तु, “बिक्रिरे़ कुस्सा सेबाःल्ले़ग आनिॽ अब्सालोमनुःल्ले़आङ् साॽरिक् तुक्खे आजात्॥ खे़ने़ॽ के़न्दाङ्बाल्ले़ कुमनाहाॽ तेॽरे़से़ॽआङ् नाःत्ते़ॽ, मेःन्ने़भाग्र खे़न् लुङ्धाक् से़प्मनाबा ये़क्यक् सिगाङ् लाःत्ताङ् आनिॽ हुक्को मे़धाने़न्॥” 7 खे़ल्ले़चोगुल्ले़ योआबरे़ कुमनाहाॽ, हे़क्क्याङ् करेति नु पेलेथि हे़क्क्याङ् के़रे़क् थङ् के़जोःक्पा मनाहाॽ अबिसैन्नु मे़बे॥ खे़ङ्हाॽ बिक्रिरे़ कुस्सा सेबान् नाःत्छे़ यरुसले़मलाम् मे़धासिङ्॥ 8 खे़ङ्हाॽ गिबोन कुबेसाङ्बा यम्बा लुङ्ङो मे़गे़रे़ल्ले़ अमासान् खे़ङ्हाॽरे़ कुदुम्से़ त्ये़॥ खे़न् ये़म्मो योआबरे़ थङ् चोःक्मे़ल्ले़ चाङ्मनाबा तेत् चाक्खुआङ् वये़, खे़ब्याङ् फॽइ युप्सुआङ् ताभे हेॽसिङ्ङाङ् वये़॥ हे़क्क्याङ् खुने़ॽ तगि पेर पत्छे़ल्ले़ कुदाभेन् मक्थ्ये़॥ 9 हे़क्क्याङ् योआबरे़ अमासान् मे़त्तु, “खे़ने़ॽ के़नुॽर के़वाॽबि आन्साॽए॥” हे़क्क्याङ् खुने़ॽ अमासान् चुप् मे़त्छे़ खुने़ॽ कुजुक्वा हुक्किल्ले़ अमासाःल्ले़ कुम्धोॽइन् ते़म्सु॥ 10 अमासाःल्ले़ योआबरे़ कुहुक्को ताभेन् पत्छे़बा मे़निसुन्॥ हे़क्क्याङ् योआबरे़ खे़ल्ले़ कुसाप्पोःक्को थुबु पिरु, निले़ङ् मे़धुबुन्, थिक्ले़ङ् थुबुल्ले़सा कुहिदुःत्ते़न् खाम्बाङ्ङो मक्थ्ये़आङ् खे़न् स्ये़॥ हे़क्क्याङ् योआबे़न् नु कुन्साॽ अबिसैःल्ले़ बिक्रिरे़ कुस्सा सेबान् नाःत्तुसिर पेसि॥ 11 योआबरे़ कुमनाहाॽओ थिक्किल्ले़ के़सिबा अमासाःल्ले़ कुबेसाङ् ये़म्सिङ्ङाङ् पाःत्तु, “योआब नु दाउद ले़प्माङ् के़वाॽबा के़रे़क्ले़ योआबे़न् तिम्दे़म्मे़ॽ॥” 12 अमासाःल्ले़ के़सिबा कुधक्किन् माक्खिॽ वजे़ःक् निबे़आङ् लाम्मिल्ले़ कुलुम्मो ने़स्से़, हे़क्क्याङ् खे़न् लाम् के़बोङ्बाआङ् लाङ्गे़घेःक्पा के़रे़क् खे़प्मो मे़गे़रे़आङ् मे़ये़म्सिङ्बा योआबरे़ कुमनाधिक्ले़ निसु॥ हे़क्केःल्ले़ खे़ल्ले़ अमासाःल्ले़ कुधक्किन् लाम्मिल्ले़ नानाक् इक्ताप्पो तेॽरुआङ् लाप्फुसु, हे़क्क्याङ् तेःत्तिल्ले़ खे़न् ते़प्तु॥ 13 के़सिबा थक्किन् खे़ल्ले़ लाम्मिल्ले़ नानाक् तेॽरुआङ् के़रे़क् मनाहाॽ बिक्रिरे़ कुस्सा सेबान् नाःप्मारे़ लागि योआबे़न् मे़दिम्दु॥ 14 सेबाःल्ले़ हाबिल बेथ माकाबा के़रे़क् इस्राइलि सुवाङ्हाॽ तुमुसिर पे, हे़क्क्याङ् कन् ते़ङ्गप्पोबा के़रे़क् मनाहाॽ खुने़ॽनु मे़दङ्सिङ्॥ खे़ङ्हाॽ मे़जुप्से़आङ् ये़क्यक्को योआबे़न् मे़दिम्दु॥ 15 योआबरे़ कुधक्सुबाहाॽ मे़बेआङ् हाबिल बेथ माकाओ सेबान् मे़गबु, लुङ्धाक्किल्ले़ नाहाङ् ले़प्माङ् खाम्लुङ्हाॽ मे़लुप्सु मे़धाक्तु, हे़क्क्याङ् खे़न् खाम्लुङ्हाॽओ मे़जन्छिङ्ङाङ् लुङ्धाक्किन् लुःम्मा मे़हेःक्तु॥ 16 हे़क्केःल्ले़ लत्छा साॽरिक् चाःप्मा मे़न्छुमाधिक् लुङ्धाक्को थाःम्सिङ्, हन्नाङ् पाःत्तु, “खे़प्से़म्मे़ॽओ! खे़प्से़म्मे़ॽओ! योआबे़न् कप्मो तार, आङ्गाॽ खुने़ॽनु ताॽजे़ङ्ङा॥” 17 हे़क्क्याङ् योआबे़न् तगि पे, हे़क्क्याङ् खे़न् मे़न्छुमाःल्ले़ मे़त्तु, “खे़ने़ॽ योआबने़बि?” खुने़ॽ मे़त्तु, “ओरो, आङ्गाॽए योआबआरो॥” खे़ल्ले़ मे़त्तु, “आङ्गाॽ के़से़वारोमाल्ले़ थे पाःत्तुङ्ल पत्ता नुरिक् खे़प्से़ॽओ॥” खुने़ॽ मे़त्तु, “आङ्गाॽ खे़प्सुङ्ल पत्ता॥” 18 खे़ल्ले़ मे़त्तु, “उन्छोन् अक्खेलॽरिक् मे़बाःत्तु, ‘नोगप् खोमारे़ लागि हाबिल पेःक्मा॥’ हे़क्क्याङ् हे़क्केलॽरिक्के के़रे़क् पान् पुॽरो॥ 19 आनिगे ये़क्यक् इस्राइल ये़क्यक्किन् साॽरिक् चिजिबा चोक्, हे़क्क्याङ् हाङ्ङिन् मिङ्सो इङ्धाङ् के़बिबा चोक्॥ कङ्ग इस्राइलओ लत्छा मा हे़क्तङ्मा चोक्लो, हे़क्क्याङ् खे़ने़ॽग खे़न् यम्मा के़गोःत्तुॽ॥ खे़ने़ॽ थेआङ् यहवे दाङ्बे़ल्ले़ कुलक्किन् मे़ङ्मा के़गोःत्तुबाबे?” 20 योआबे़ल्ले़ मे़त्तु, “मे़ङ्मा पाःन्निन् आङ्गाॽनु माःङ्घा पोङ्ल, 21 आनिगे निङ्वान् हे़क्तङ्बा होप् कर एफ्राइम लाजेॽबा कोःक्माहाॽओ के़युङ्बा बिक्रि मे़प्नाबे़ल्ले़ कुस्सा सेबान् दाउद हाङ्ङिल्ले़ कुदक्ले़ङ्वाओ पोगे़आङ् वाॽ॥ हाबा खे़न् मनान् आनिगे हुक्को याप्मि आबिरे़ॽ, हे़क्क्याङ् आनिगे कन् ये़क्यक्लाम् पेगिगे़॥” खे़न् मे़न्छुमाःल्ले़ योआबे़न् मे़त्तु, “खे़ल्ले़ कुधेगेःक्पे़न् मे़भुन्दुआङ् लुङ्धाक्कोलाम् लाप्मे़भुसु के़म्बिॽ॥” 22 हे़क्क्याङ् खे़न् मे़न्छुमान् पे, के़जुम्बा के़रे़क् मनाहाॽ खुने़ॽ कुसुजान् चे़क्तुसि॥ खे़ङ्हाॽरे़ बिक्रिरे़ कुस्सा सेबाःल्ले़ कुधेगेःक्पे़न् मे़घक्तुआङ् योआबरे़ॽओ लाप्मे़भुसु मे़बिरु॥ हे़क्क्याङ् योआबरे़ सादाङ्ङिन् मुःत्तु, हे़क्क्याङ् के़रे़क् थक्सुबाहाॽरे़ खे़न् ये़क्यक्किन् मे़ले़रुआङ् आबाङे खुन्छिॽ हिम्हिम् मे़धासिङ्, हे़क्क्याङ् योआबे़न् हाङ्ङिन् वये़बादे़न् यरुसले़म नुःक्खे़रो॥ दाउदरे़ कुसुहाङ्युक्पाहाॽ 23 आल्ल योआबे़न् के़रे़क् इस्राइलि थक्सुबाहाॽरे़ खुन्छिॽ लाम्लोबा वये़, हे़क्क्याङ् यहोयादारे़ कुस्सा बनायाहन् करेति नु पेलेथिहाॽरे़ खुन्छिॽ सुहाङ्युक्पा वये़॥ 24 हे़क्क्याङ् एदोनिरामे़न् मनाहाॽ स्याङ्मे़न्दाङ् याःम्बक्को के़भम्बा लाम्लोबा वये़॥ अहिलुदरे़ कुस्सा यहोसापाते़न् खानिःत् के़युङ्बा वये़॥ 25 सेभान् सुहाङ्मिबा वये़, हे़क्क्याङ् सदोक नु अबियाथारे़न् निङ्वाॽफुसाम्बा वये़सि॥ 26 हे़क्क्याङ् याइर ये़क्यक्कोलाम् के़दाबा इरान् दाउदरे़ निङ्वाॽफुसाम्बा कत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.