२ सामुए़ल 2 - लिम्बुयहुदा लाजेॽओ दाउदे़न् हाङ् पोःक्खे़बा 1 कन् एगाङ् दाउदरे़ यहवे दाङ्बे़न् अक्खे मे़त्तु, “आङ्गाॽ यहुदाबा लत्छा ये़क्यक्को पेःक्काबि?” हे़क्क्याङ् यहवे दाङ्बे़ल्ले़ मे़त्तु, “थो पेगे़ॽ॥” दाउदरे़ याम्मो सेःन्दोसु, “आत्तिन् ये़क्यक्को पेःक्काबे?” यहवे दाङ्बे़ल्ले़ याम्मो नोगप् पिरु, “थो हे़ब्रोन्नो पेगे़ॽ॥” 2 खे़ल्ले़चोगुल्ले़ यिजरेल के़युङ्मा दाउदरे़ कुमेत् अहिनोम्मे़न् नु कार्मेलबा नाबालरे़ कुमेमेदुमा अबिगेले़न् खुने़ॽनु सोरिक् तेॽरुसिआङ् खे़प्मो पे॥ 3 हे़क्क्याङ् दाउदरे़ खुने़ॽनु के़वाॽबा कुधक्सुबाहाॽआङ् खुन्छिॽ मेःत् साहाॽनु के़रे़क् तेॽरुसि, खे़ब्याङ् खे़ङ्हाॽ हेब्रोन नु खे़प्मोबा ये़क्यक्हाॽओ युङ्मा मे़हेःक्ते़॥ 4 हे़क्क्याङ् यहुदाबा मनाहाॽ मे़द्ये़आङ् यहुदाबा सुवाङ् सम्धाङ् दाउदे़न् हाङ् मे़जोगु॥ याबेस गिलादबा मनाहाॽरे़ सावले़न् मे़लुप्तुआङ् वये़ फाॽआङ् दाउदे़न् मे़मे़त्तु॥ 5 खे़ब्याङ् दाउदरे़ खे़ङ्हाॽ अक्तङ्बा इङ्घङ् हाक्तुसि, “खिनिॽ दाङ्बा सावल ले़प्माङ् लुङ्माॽ तुक्मा याःम्बक् ओसेःन्धाङ् के़जोगुम्बा नु खुने़ॽ के़लुप्तुम्बाओ यहवे दाङ्बे़ल्ले़ हाङ्वा मुॽइसाम् के़बिरिररो॥ 6 आल्ल यहवे दाङ्बे़ल्ले़ खिनिॽ आप्फाले़साङ् थधप् मे़ल्लॽमनाबा मिःम्जि के़मे़त्तिबान् नु खुने़ॽ नसाःन्साबा चोःक्पान् ओसेःन् के़धाक्तिर, हे़क्क्याङ् खिनिॽ सावले़न्नु के़जोगुम्बा पाःन्नो आङ्गाॽआङ् खिनिॽनु नुबा याःम्बक् चोगुङ्॥ 7 आल्ल खिनिॽ हुक्हाॽ के़धुम्बा पोङ्ल, हे़क्क्याङ् हाङ्हाङ् लॽरे़म्मे़ॽ, थेआङ्भे़ल्ले़ खिनिॽ दाङ्बा सावले़न् स्ये़आङ् होप्, हे़क्क्याङ् यहुदाबा मनाहाॽरे़ आङ्गाॽ खुन्छिॽ हाङ् मे़जोगाङ्ङाङ् वाॽरो॥” इस्बोसेते़न् इस्राइबा हाङ् पोःक्खे़ 8 हाबा कन् लुम्मो सावलरे़ कुधक्मोबा नेरे़ल्ले़ कुस्सा अबनेरे़ल्ले़ सावलरे़ कुस्सा इस्बोसेते़न् महनोम्मो तारु, 9 हे़क्क्याङ् गिलाद, असुर, यिजरेल, एफ्राइम नु बेन्यामिन खे़म्ब्याङ् के़रे़क् इस्राइलओ हाङ्युक् चोगु॥ 10 इस्राइलबा हाङ् पोःक्खे़ल्ले़ इस्बोसेते़न् लिबोङ् तङ्बेॽ योरे़आङ् वये़, हे़क्क्याङ् खुने़ॽ तङ्बेॽ ने़त्छि थारिक् हाङ्युक् चोगु॥ हे़क्केसाङ् यहुदाबा मनाहाॽरे़ग दाउदे़न्ने मे़दिम्दु॥ 11 हे़क्क्याङ् हे़ब्रोन्नो यहुदा सुवाङ् सम्धाङ् दाउदरे़ तङ्बेॽ नुसिआङ् कुभ्रे़ःङ् थारिक् हाङ्युक् चोगुरो॥ इस्राइल नु यहुदालुम्मो थङ् पोःक्खे़ 12 नेररे़ कुस्सा अबनेरे़ल्ले़ सावलरे़ कुस्सा इस्बोसेते़ल्ले़ कुधक्सुबाहाॽ तेॽरुसिआङ् महनोमलाम् गिबोन ले़प्माङ् पे॥ 13 हे़क्क्याङ् सरुयाहरे़ कुस्सा योआबरे़ दाउदरे़ कुधक्सुबाहाॽ तेॽरुसिआङ् हे़ब्रोनलाम् थासिङ्ङाङ् पे॥ खे़ङ्हाॽ गिबोनबा वरक्को मे़दुमे़, हे़क्क्याङ् थिक्किल्ले़ वरक् कत्नाहाङ् ले़प्माङ् नु वेॽइल्ले़ वरक् नाहाङ्दाङ् थङ् चोःक्मा यारिप् मे़बोःक्खे़॥ 14 अबनेरे़ल्ले़ योआबे़न् मे़त्तु, “खे़ने़ॽ नु आङ्गाॽ थाङ्बे़न् आमनाहाॽओ लत्छा लत्छा आन्छिॽ तगाङ् थक्सिर॥” योआबरे़ मे़त्तु, “लु पोङ्, खे़ङ्हाॽरे़ हाबाहे़क्के चोःक्सुर॥” 15 हे़क्केःल्ले़ खे़ङ्हाॽ मे़बोगे़, हे़क्क्याङ् बेन्यामिन नु सावलरे़ कुस्सा इस्बोसेत ले़प्माङ्बा थिबोङ्ङाङ् ने़त्छि हे़क्क्याङ् दाउद ले़प्माङ्बा थिबोङ्ङाङ् ने़त्छि लत्छा लत्छा आबाङे ते़न्नो मे़ये़म्सिङ्॥ 16 हे़क्क्याङ् खे़ङ्हाॽ के़रे़क्ले़ आबाङे खुनिॽ निङ्मिहाॽरे़ थे़गेःक्पो मे़दे़म्सुसिआङ् ताभेःल्ले़ साप्पोःक्को मे़धुबुसि॥ अक्खेलॽरिक् खे़ङ्हाॽ थिक्ले़ङ्ले़ सोरिक् मे़स्ये़॥ खे़ल्ले़चोगुल्ले़ गिबोनबा खे़न् ते़न्निन् हेल्कत-हज्जुरिम मे़मे़त्तु॥ 17 खे़न् ये़न्नो साॽरिक् यम्बा थङ् पोःक्खे़, हे़क्क्याङ् अबनेरे़न् नु इस्राइलबा मनाहाॽ दाउदरे़ कुधक्सुबाहाॽनु हारिमे़द्ये़॥ 18 सरुयाहरे़ सुम्ब्राङ् कुस्साहाॽ योआब, अबिसै नु असाहेल खे़प्मो मे़वये़॥ असाहेले़न् ते़म्बेॽओ पे़ःङ्वानुःल्ले़ चात्तुर के़लोःक्पा वये़॥ 19 खुने़ॽ चुक्वा फे़ङ्वा आत्तान्नाङ् मे़न्हिसिङ्ङे अबनेरे़न् नाःत्तुर पे॥ 20 हे़क्केःल्ले़ अबनेरे़न् खुने़ॽ कुएगाङ् हिसिङ्ङाङ् ओमे़त्तुआङ् मे़त्तु, “असाहेलए, खे़ने़ॽएबि?” “ओरो” लॽरिक् खुने़ॽ मे़त्तु॥ 21 अबनेरे़ल्ले़ मे़त्तु, “चुक्वा इग्र फे़ङ्वा ले़प्साङ् पेगे़ॽआङ् थाङ्बे़न्हाॽओ लत्छा ते़म्से़आङ् खे़ल्ले़ कुभे़जा कुदक्काःत्हाॽ नाप्ते़ॽ॥” कर असाहेलरे़ खुने़ॽ नाःप्मा मे़ले़रुन्॥ 22 हे़क्क्याङ् अबनेरे़ल्ले़ असाहेले़न् “आङ्गाॽ नाःप्मा ले़राङ्ङे़ॽ” मे़त्तुर साम्दिङ् पिरु॥ खुने़ॽ मे़त्तु, “आङ्गाॽ थेआङ् से़त्ने़बे? खे़ने़ॽ से़त्ने़आङ् के़म्भुॽ योआबे़न् आक्खेलॽरिक् आनारान् ओःन्धाक्तुङ्बाबे?” 23 कर असाहेले़न् नुःङ्मा मे़दे़न्दे़न्, हे़क्केःल्ले़ अबनेरे़ल्ले़ मे़न्हिसिङ्ङे एगाङ्लाम् लाःक्किल्ले़ फे़ङ् लॽरिक् ले़प्तुदेसुआङ् खे़ल्ले़ कुस्साप्पोःक्किन् फ्याक् लस्सु, लाःक्किन् कुएगाङ् लःन्दे़, हे़क्क्याङ् खुने़ॽ लाम्मोए हर्जुॽ चोःन्दे़आङ् स्ये़॥ असाहेले़न् चोःन्दे़आङ् स्ये़बादे़न्नो के़गे़प्पा के़रे़क् खे़प्मोए मे़नाःम्सिङ्॥ 24 कर योआब नु अबिसैरे़ अबनेरे़न् हाबा नाःत्तुसिआङ् पत्छे़सि॥ हे़क्क्याङ् नाम् लासे़र पत्छे़ल्ले़ खे़ङ्हाॽ अम्माबा गिह कुबेसाङ्बा कोःक्माओ मे़गे़रे़, खे़न् गिबोनबा मुरे़क् खारे़क् ये़ःङ्घादे़न्नोबा लाम्मो ने़ःॽ॥ 25 बिन्यामिनिहाॽ अबनेर ले़प्माङ् मे़भुङ्सिङ्, हे़क्क्याङ् लत्छा कोःक्माल्ले़ कुजङ्धाङ् थङ्ले़ लागि यारिप् मे़बोःक्खे़॥ 26 हे़क्केःल्ले़ अबनेरे़न् अःक्ते़आङ् योआबे़न् मे़त्तु, “थे ताभेःल्ले़ आभे़ल्ले़साङ् मनाहाॽ मे़क्खुसिबाबि? ‘आबाङे फुॽनुसाॽहाॽ आल्ल मे़नाःत्ते़म्सिम्मे़न्ने़ॽ’ के़मे़त्तुसिआङ् खे़ने़ॽ के़मनाहाॽ के़न्नुःक्तुन्सिम्बाबि?” 27 योआबे़ल्ले़ मे़त्तु, “से़क्खासाङ् निङ्वाॽफुमाङ्ङिल्ले़ कुमिङ्ङो पाःत्तुङ्ॽ, खे़ने़ॽ कन् पाःन्निन् के़म्बाःत्तुन्निल्ले़ग आमनाहाॽरे़ खुन्छिॽ फुॽनुसाॽहाॽ ताःन्दिक् तानाम् थारिक्साङ् नाःप्मा मे़ल्ले़रुसिन्मे़न्॥” 28 हे़क्क्याङ् योआबरे़ थुत्तुरिप्पे़न् मुःत्तुआङ् मुक्खु, हे़क्क्याङ् के़रे़क् मनाहाॽरे़ इस्राइलिहाॽ नाःप्मा मे़ले़रुसि, खम्ब्याङ् थङ् पोङ्मा चक् लॽरे़॥ 29 हे़क्क्याङ् अबनेरे़न् नु कुमनाहाॽ अराबालाम् से़न्दिक् नाम्दाःत्तात् लाङ्मे़घेगे़र मे़बेआङ् खे़ङ्हाॽरे़ यर्दन ते़म्बेःन् मे़नाःक्खु, हे़क्क्याङ् तानाम् आक्खोक् थारिक् लाङ्मे़घेगे़र महनोम मे़गे़रे़॥ 30 योआबरे़ अबनेरे़न् नाःप्मा ले़रुआङ् कुधक्सुबाहाॽ सुप्सुसि, हे़क्केःल्ले़ असाहेले़न्नुःल्ले़ वेॽ थिबोङ्ङाङ् फाङ्सि दाउदरे़ कुमनाहाॽ मे़होःप्ते़॥ 31 कर दाउदरे़ कुसे़वारोबाहाॽरे़ अबनेरे़न् के़दिम्बा बिन्यामिनरे़ कुमनाहाॽ किप् सुम्सिआङ् तुक्पोङ् (३६०) मे़से़रुसिआङ् वये़॥ 32 खे़ङ्हाॽरे़ असाहेले़न् मे़गुयुआङ् मे़देॽरु, हे़क्क्याङ् बेथले़हे़म्मो खुने़ॽ कुम्बारे़ कुबेसाङ् मे़लुप्तु॥ खे़न् एगाङ् योआबे़न् नु कुमनाहाॽ से़न्दिक् नाम्दाःत्तात् लाङ्मे़घेगे़आङ् तानाम् हे़ब्रोन्नो मे़गे़रे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.