२ सामुए़ल 18 - लिम्बुअब्सालोमे़न् हारि त्ये़आङ् मे़से़रु 1 दाउदरे़ खुने़ॽनु के़वाॽबा थक्सुबाहाॽ थङ्ले़ लागि फुक्खुसि, हे़क्क्याङ् हे़न्छिङ् हे़न्छिङ् नु किप्थिक् किप्थिक् थक्सुबाहाॽ लाम्गे़लोबा लाम्लोबाहाॽ सेगुसि॥ 2 हे़क्क्याङ् दाउदरे़ खे़ङ्हाॽ सुम्सि लक्को से़न्दुसिआङ् पाङ्घुसि—सरुयाहरे़ कुस्सा योआब नु खे़ल्ले़ कुन्साॽ अबिसैन् हे़क्क्याङ् गित्ति इत्तैन् लाम्लोबा वये़॥ हाङ्ङिल्ले़ लाम्लोबाहाॽ मे़त्तुसि, “आङ्गाॽआङ् खिनिॽनुए थङ्ङो पेःक्का॥” 3 कर थक्सुबाहाॽरे़ मे़मे़त्तु, “मेःन्, आदाङ्बा मे़बेगे़न्ने़ॽ॥ थङ्ङो आनिगे खे़त्छिङ्मा पोङ्ङिल्ले़ कुभ्रे़ःङ् यारिक् स्ये़ॽइगे़साङ् आत्तिल्ले़आङ् यारमे़न्जोगिगे़न्॥ कर आदाङ्बाग आनिगे थिबोङ् हे़न्छिङ् कुइसिःक्पा के़जोक्॥ खे़ल्ले़चोगुल्ले़ आदाङ्बा ये़क्यक्को के़युङ्ङाङ् आनिगे याप्मि के़भाॽइल्ले़ नुबा पोङ्॥” 4 हाङ्ङिल्ले़ मे़त्तुसि, “हे़क्केग्र खिनिॽ थे चोःक्मा सिराॽधाङ् आङ्गाॽ हाबाघे़न् चोगुङ्ॽ॥” खे़ल्ले़चोगुल्ले़ हाङ्ङिन् लाम्धेःप्पाल्ले़ कुबेसाङ् ये़बे़, हे़क्क्याङ् लाम्लोबाहाॽरे़ थङ् के़जोःक्पा थक्सुबाहाॽ हे़न्छिङ् हे़न्छिङ् नु किप् थिक् थिक्को कुबेसाङ्लाम् लाम्मे़लोसुसि॥ 5 हाङ्ङिल्ले़ योआब, अबिसै नु इत्तैन् कन् इङ्जाङ् पिरुसि, “आङ्गाॽ आलागि खे़न् थाङ्बे़न् आस्सा अब्सालोम्मिन् मे़से़रे़म्मिन्ने़ॽ॥” अब्सालोम्मिन् से़ःप्ताम्मे़ॽ फाॽआङ् हाङ्ङिल्ले़ लाम्लोबाहाॽ अब्सालोमरे़ कुयाःम्बेओ पिरुसिबा इङ्जाङ्ङिन् के़रे़क् थक्सुबाहाॽरे़ मे़घे़प्सु॥ 6 हे़क्क्याङ् थक्सुबाहाॽ इस्राइलिहाॽरे़ खुन्छिॽ तक्ले़ङ्वाओ थङ् चोःक्से़ मे़लःन्दे़, हे़क्क्याङ् थङ्ङिन् एफ्राइमबा ताम्भुङ्मो पोःक्खे़॥ 7 खे़प्मो दाउदरे़ कुधक्सुबाहाॽरे़ इस्राइलिहाॽ मे़नाःन्दुसि॥ हे़क्क्याङ् खे़प्मो साॽरिक् यरिक् मे़से़त्छिङ्, खे़न् ये़न्नो हे़न्छिङ् निबोङ् मनाहाॽ थङ्ङो मे़स्ये़॥ 8 थङ्ङिन् के़रे़क् पिसाङ् से़रे़, हे़क्क्याङ् ताभेल्ले़नुःल्ले़ यरिक् ताम्भुङ्मो मनाहाॽ मे़स्ये़॥ 9 हे़क्क्याङ् दाउदरे़ कुमनाहाॽरे़ अब्सालोम्मिन् मे़निसु॥ खुने़ॽ कुअदङ्ङिन् युक्तुआङ् वये़, कर खे़न् अदङ्ङिन् यहिबा सिङ्बुङ्ङिल्ले़ कुसिगाङ्लाम् लाङ्घेगे़आङ् पे, हे़क्केःल्ले़ अब्सालोमरे़ कुधे़गेक् इःन् कुबोराक्को हाप्तुआङ् ते़ल्ले़म् फोःन्छिङ्, अदङ्ङिन् कुसिःक्तोलाम् पे॥ 10 दाउदरे़ कुमनाधिक्ले़ खे़न् निसुआङ् योआबे़न् मे़त्तु, “आङ्गाॽ अब्सालोम्मिन् यहिबा सिङ्बुङ्मो फोःन्छिङ्ङाङ् पत्छे़बा निसुङ्॥” 11 कन् पाःन्निन् के़मे़प्पा मनान् योआबे़ल्ले़ मे़त्तु, “खे़ने़ॽ खे़न् के़निसुबि? थेआङ् खे़ने़ॽ हाबा खे़न् ये़म्मो के़न्छे़रुन्? आङ्गाॽ थिबोङ् सेकेल नु थङ् नाःम्मा फॽइःन् पिने़मे़न्॥” 12 कर खे़न् मनाःल्ले़ योआबे़न् मे़त्तु, “खे़ने़ॽ हे़न्छिङ्धिक् सेकेल के़बिराङ्साङ् हाङ्ङिल्ले़ कुस्सान् मे़न्छे़प्पाङ्ङिम्बारो॥ थेआङ्भे़ल्ले़ ‘हाःत्ले़ खे़न् थाङ्बे़न् सा अब्सालोम्मिन् निसुॽ खे़न् खे़ल्ले़ आङ्गाॽ आलागि से़ःप्ताम्मे़ॽ’ फाॽआङ् हाङ्ङिल्ले़ खे़ने़ॽ, अबिसै नु इत्तैन् इङ्जाङ् के़बिरिबान् आनिगे खे़प्सुम्बे़आङ् वाॽ॥ 13 कर आङ्गाॽ हाङ्ङिल्ले़ कुइङ्जाङ्ङिन् खे़म्मा मे़न्दे़न्ने अब्सालोम्मिन् से़रुङ्ने़भग्र हाङ्ङिल्ले़ कन् पाःन्निन् खे़प्सुॽ, हे़क्क्याङ् के़रे़क्नुःल्ले़ तगि आङ्गाॽ याप्मि पक्के़धाबाआङ् के़बेःक्पा खे़ने़ॽए के़बोःक्खे़मे़न्॥” 14 योआबे़ल्ले़ मे़त्तु, “खे़ने़ॽनु आङ्गाॽ नाम्देसिङ्मा चाहा मे़जोक्कान्॥” हे़क्क्याङ् योआबे़ल्ले़ सुम्सि लाःक् याङ्सिङ्, हे़क्क्याङ् सिङ्बुङ्मो कुहिङ्वे़त् के़भोःन्छिङ्बा अब्सालोमरे़ कुसङ्बेॽमो थुबु॥ 15 हे़क्क्याङ् योआबरे़ कुभे़जुम् कुभे़या के़बङ्बा थिबोङ् मनाहाॽरे़ अब्सालोमे़न् मे़गबु, हे़क्क्याङ् खे़न् मे़हिप्तुआङ् मे़से़रु॥ 16 हे़क्क्याङ् योआबरे़ सादाङ्ङिन् मुःत्तु, हन्नाङ् थक्सुबाहाॽरे़ इस्राइलिहाॽ नाःप्मा मे़ले़रुसिआङ् मे़नुःक्खे़, थेआङ्भे़ल्ले़ योआबरे़ थक्सुबाहाॽ आल्ल याःक्तु मे़त्तुसि॥ 17 हे़क्क्याङ् खे़ङ्हाॽरे़ अब्सालोमरे़ कुजेन् मे़देॽरुआङ् ताम्भुङ्ङोबा यम्बा पाःक्खुम्बिओ लाप्मे़भुसु, हन्नाङ् खे़न् सम्धाङ् लुङ् मे़लुप्सु॥ हे़क्क्याङ् के़रे़क् इस्राइलिहाॽ मे़घे़त्छिङ्ङाङ् आबाङे खुन्छिॽ हिम्मो मे़बे॥ 18 अब्सालोम कुहिङ्वे़त् वये़ल्ले़ हाङ्ङिल्ले़ कुने़ने़बादे़न् खुने़ॽ सित्लाङ्धिक् ये़प्सुआङ् ये़बे़, थेआङ्भे़ल्ले़ खुने़ॽ पाःत्तुआङ् वये़, “आङ्गाॽ आमिङ् युङ्मारे़ लागि आङ्गाॽ आस्सा मे़होप्॥” खे़न् सित्लाङ्ङिन्ने खुने़ॽ कुमिङ् वाःत्तु, हे़क्क्याङ् आइन् थारिक् खे़न् सित्लाङ्ङिन् अब्सालोमरे़ कुइःत्ला मे़मे़त्तुरो॥ दाउदरे़ अब्सालोमे़न् स्ये़बा खे़प्सु 19 सदोकरे़ कुस्सा अहिमासरे़ पाःत्तु, “यहवे दाङ्बे़ल्ले़ हाङ्ङिन् कुनिङ्मिहाॽलाम् से़ःप्तु के़लॽबा इङ्घङ् हाङ्ङिन् पिमा फाॽआङ् आङ्गाॽ पेःक्मा आभाःक्ते़ॽ॥” 20 हे़क्क्याङ् योआबरे़ मे़त्तु, “आइङ्ग खे़ने़ॽ इङ्घङ् तेॽमा मे़नुॽने़न्॥ वेॽ ये़न्नो खे़ने़ॽ इङ्घङ् के़देॽरुसाङ् पोङ्, कर आइन्ग मेःन्॥ थेआङ्भे़ल्ले़ हाङ्ङिल्ले़ कुस्सान् आइन् स्ये़आङ् वाॽ॥” 21 हे़क्क्याङ् योआबे़ल्ले़ लत्छा कुस सुवाङ्बा मनान् मे़त्तु, “खे़ने़ॽ के़निसुबा पाःन्निन् पेगे़ॽआङ् हाङ्ङिन् चे़क्ते़ॽ॥” हन्नाङ् खे़न् कुसि सुवाङ्बान् साम्बोन् फन्छिङ्ङाङ् योआबे़न् से़वा मे़त्तु, खे़ब्याङ् लोःक्ते़र पे॥ 22 सदोकरे़ कुस्सा अहिमासरे़ याम्मो योआबे़न् पेलि फाक्तु॥ खे़ल्ले़ मे़त्तु, “आक्खेलॽरिक्साङ् आङ्गाॽ कुसिःल्ले़ कुएगाङ् कुएगाङ् लोःक्माआङ् पेःक्मा आबाङ्घे़ॽ॥” योआबे़ल्ले़ सेःन्दोसु, “आस्साए, खे़ने़ॽ थेआङ् के़बेःक्पा? खे़ने़ॽ के़इङ्घङ्ङिल्ले़ लागि खे़ने़ॽ थेआङ् थुम्घो के़ङ्घोसुन्॥” 23 अहिमासे़ल्ले़ मे़त्तु, “ज्या पोङ्ग्र पोङ्॥ आङ्गाॽ लोःक्कार पेःक्का॥” योआबे़ल्ले़ मे़त्तु, “हे़क्केग्र पेगे़ॽ॥” हे़क्केःल्ले़ अहिमासे़न् यर्दनबा ते़म्बेॽलाम् पोःक्खे़आङ् लोःक्ते़, हे़क्क्याङ् खे़न् कुस सुवाङ्बा मनान् लाम्बाक्तु॥ 24 खे़न् ये़म्मो दाउदे़न् लाम्धेत् सिगाङ् नु लाःक्कात् लःम्मा लाम्धेःत्तिल्ले़ कुलुम्मोबा याक्फाङ्ङो युङे़॥ हे़क्क्याङ् इक्के़गोबे़न् थो खाम्बुओ पेआङ् नाना कत्ना लाङ्घेगे़र ओममा हेःक्ते़, हे़क्केलॽरिक् खुने़ॽ ओमये़ल्ले़ लत्छा मनाधिक् एःक् लोःक्ते़ फे़रे़र पत्छे़बा निसु॥ 25 खे़न् लाम्धेत् के़गोबाल्ले़ हाङ्ङिन् कन् पाःन्निन् मे़त्तु॥ हाङ्ङिल्ले़, “खे़न् ए़क्लेःक् वाॽने़भाग्र से़क्खासाङ् नुबा इङ्घङ् फे़त्तुइरा॥” खे़न् मनान् निःत्ताङ् फे़रे़र फे़रे़॥ 26 लाम्धेत् इक्के़गोबाल्ले़ वेॽ लत्छा मनाधिक् लोःक्ते़ फे़रे़र पत्छे़बा निसु॥ खे़ल्ले़ योसमा लाम्धेःत्तो के़ये़प्पा मनान् मे़त्तु, “ओमे़त्ते़! वेॽ मनाधिक्काङ् लोःक्ल फे़न्ल पत्॥” हाङ्ङिल्ले़ पाःत्तु, “खे़ल्ले़आङ् नुबा इङ्घङ्ङे तारुर पत्तिरा॥” 27 खे़न् इक्के़गोबे़ल्ले़ मे़त्तु, “खे़न् तगि के़लोःक्पे़ङ्ग सदोकरे़ कुस्सा अहिमासे़न् हे़क्के लॽ॥” हाङ्ङिल्ले़ मे़त्तु, “खे़ङ्ग साॽरिक् नुबा मनारो, नुबाए इङ्घङ् तारुआङ् तार पत्तिरा॥” 28 हे़क्क्याङ् अहिमासे़ल्ले़ यम्बा इक्लाओ हाङ्ङिन् मे़त्तु, “नुबाए वाॽ॥” हाङ्ङिल्ले़ कुदगि साम्बोन् हबत् फन्छिङ्ङाङ् से़वा मे़त्तुर पाःत्तु, “यहवे दाङ्बा के़निङ्वाॽफुमाङ्ङिल्ले़ कुनारा पोर, खुने़ॽए आदाङ्बारे़ के़दक्ले़ङ्वाओ के़बोःक्पा मनाहाॽ आदाङ्बारे़ के़हुक्को के़बिरे़आङ् वाॽ॥” 29 हाङ्ङिल्ले़ मे़त्तु, “थाङ्बे़न् अब्सालोमे़न् नुॽर वाॽबि?” अहिमासरे़ मे़त्तु, “योआबरे़ हाङ्ङिल्ले़ के़से़वारोबान् नु आङ्गाॽ के़से़वारोबान् पाङ्घे़सिगे़ल्ले़ आङ्गाॽ यम्बा हयङ् किल्लिङ् पोःक्खे़बा निसुङ्, कर खे़प्मो थे पोःक्खे़ खे़न् मे़न्निबाङ्लो॥” 30 हाङ्ङिल्ले़ खे़न् थिक्ले़प्माङ् ये़प्मा पाङ्घु॥ खुने़ॽ थिक्ले़प्माङ् पेआङ् ये़बे़॥ 31 हे़क्क्याङ् खे़न् कुसि सुवाङ्बा मनान् त्ये़आङ् मे़त्तु, “आदाङ्बे, इङ्घङ् नुबा वाॽ! आदाङ्बारे़ के़दक्ले़ङ्वाओ के़बोःक्पा के़रे़क्लाम् यहवे दाङ्बाल्ले़ आइन् खे़ने़ॽ के़से़ःप्ते़आङ् वाॽ॥” 32 हाङ्ङिल्ले़ खे़न् कुस सुवाङ्बान् सेःन्दोसु, “अब्सालोमे़न् नुॽर वाॽबि?” कुसि सुवाङ्बा मनाःल्ले़ मे़त्तु, “हाङ्ङिल्ले़ के़रे़क् कुनिङ्मिहाॽ नु कुदक्ले़ङ्वाओ के़बोःक्पाहाॽरे़ हाबा खे़न् थाङ्बे़न् मनाःल्ले़ तुमुबा याक्नाम् हे़क्तङ्बा मे़दुमुर के़लॽबा निङ्वाॽ चोगुङ्॥” 33 हे़क्क्याङ् हाङ्ङिन् कुयोम् पुॽरे़आङ् लाम्धेत् सम्धाङ्बा याक्फाङ्ङो लासे़आङ् हाबे़, हे़क्क्याङ् थो पेर पत्छे़ल्ले़ अक्खे पाःत्तुर हाबे़, “आस्साए, आस्सा अब्सालोःम्मे! आङ्गाॽ आस्सा अब्सालोःम्मे! खे़ने़ॽ के़ले़क्वाओ आङ्गाॽ स्याङ्साङ् पोःक्खे़बारो! अब्सालोःम्मे, आङ्गाॽ आस्साए, आङ्गाॽ आस्साए!” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.