२ सामुए़ल 17 - लिम्बुहुसैःल्ले़ अब्सालोमे़न् लाम्भोःत्तु 1 अहितोपेलरे़ अब्सालोःम्मे़न् मे़त्तु, “हे़न्छिङ् थिबोङ्ङाङ् ने़त्छि मनाहाॽ आङ्गाॽ सेगुङ्सिङ्मे़न्, हे़क्क्याङ् आइन् से़न्दिक्सा आङ्गाॽ दाउदे़न् नाःत्तुङ्मे़न्॥ 2 खे़न् नाआङ् कुस्साॽइ यङ्ङिल्ले़ पेःक्काआङ् फत्तुङ्मे़न्॥ खुने़ॽ यङ्मा से़रुङ्ङाङ् खे़न्नु के़वाॽबा मनाहाॽ फुत्चिङ्ज्याःङ् मे़बोङ्मे़न्॥ हाङ्ङिन्लक् से़रुङ् वेॽ आत्तिन्नाङ् मे़से़त्तासिङ्ङान्॥ 3 हे़क्क्याङ् सिसागे़न् मेःत्तिन् कुये़म्बाॽइल्ले़ कुहिम्मो ताबा कुइसिक् आङ्गाॽ खे़न् के़रे़क् मनाहाॽ नुःक्तुङ् तारुङ्सिङ्॥ खे़ने़ॽग लत्छा मनाःल्लक् से़प्मा के़गोःत्तुबा, हे़क्क्याङ् वेॽ मनाहाॽग मेःन्॥” 4 हे़क्क्याङ् अब्सालोम नु इस्राइलबा के़रे़क् काप्पो तुम्साहाॽ अहितोपेलरे़ कुसुजाओ मे़दे़न्दे़॥ 5 हे़क्केःल्ले़ अब्सालोमरे़ पाःत्तु, “अरकि हुसैन् उःत्ते़म्मे़ॽ, हे़क्क्याङ् खुने़ॽ थे पाःत्तुइ खे़न् आनिॽ खे़प्सुम्॥” 6 हे़क्क्याङ् हुसैन् अब्सालोमरे़ॽओ त्ये़, अब्सालोमरे़ खे़न् मे़त्तु, “अहितोपेलरे़ पाःत्तुबा कुइसिक् आनिगे चोगुम्बे़बाबि? मेःन्ने़फग्र खे़ने़ॽ के़निङ्वाॽओ थे वाॽ पाःत्ते़ॽ॥” 7 हुसैःल्ले़ अब्सालोम्मिन् मे़त्तु, “अहितोपेलरे़ कुसुजान् नुबा होप्॥” 8 हुसैःल्ले़ आल्लसाङ् मे़त्तु, “खे़ने़ॽ के़म्बा हे़क्क्याङ् खुने़ॽनु के़वाॽबाहाॽ थङ् चोःक्मा के़धुम्बा मे़वाॽ, हे़क्क्याङ् कुस्सा नाप्नाबा ताम्भुङ्मोबा माःक्युबा कुइसिक् मे़बोःक्खे़आङ् मे़वाॽ॥ के़म्बारे़ थङ् चोःक्मा साॽरिक् ले़स्सुॽ, खुने़ॽ थक्सुबाहाॽनु से़न्दिक् मे़वाॽने़न्॥ 9 आल्लसाङ् खुने़ॽ फुक्कुओ इग्र आत्ताइ चिङ्सिङ्ङाङ् युङ्ङिरा॥ खुने़ॽ तगिसा खे़ने़ॽ के़मनाहाॽ फत्तुसिॽ हे़क्क्याङ् खे़न् पाःन्निन् निङ्वाॽ के़घोबाहाॽरे़ मे़बाःत्तुॽ, ‘अब्सालोमरे़ कुधक्सुबाहाॽ मे़मे़गे़॥’ 10 हे़क्केःल्ले़ यम्बा मना नु केबा कुइसिक् कुगिमा के़होप्पा मनाःल्ले़ कुसिरे पोःक्मान् मारो॥ थेआङ्भे़ल्ले़ के़रे़क् इस्राइलिहाॽरे़ खे़ने़ॽ के़म्बा के़धुम्बा चोक् हे़क्क्याङ् खुने़ॽनु के़वाॽबाहाॽआङ् के़धुम्बा मे़जोक् के़लॽबान् मे़निसुआङ् वाॽ॥ 11 आङ्गाॽ आसुजान् अक्तङ्बा वाॽ—दानलाम्बा बेर्सेबा थारिक्पा आत्तातान्ने यरिक् इस्राइलिहाॽ वहःङ्ङोबा ये़ःङ्घा कुइसिक् खे़ने़ॽओ फुक्खे़से़ॽ, हे़क्क्याङ् खे़ङ्हाॽरे़ खुन्छिॽ तगि खे़ने़ॽ आबाङे थङ्ङो मनाहाॽ तेॽरे़से़ॽआङ् थासिङ्ङे़ॽ॥ 12 हे़क्केःल्ले़ खुने़ॽ आत्ता वाॽसाङ् आनिॽ आयाङ्घुम्, हे़क्क्याङ् खाम्बाङ्ङो हिःक्वा थाबा कुइसिक् आनिॽ खुने़ॽओ आलुम्सिङ्॥ हे़क्क्याङ् खुने़ॽनु के़वाॽबाहाॽ लत्छाआङ् मे़न्हिङ्ने़न्॥ 13 खुने़ॽ से़ःप्सिङ्मारे़ लागि ये़क्यक्को लाःत्ने़भग्र आनिगे मनाहाॽरे़ इदाःक्किन् मे़दारुॽ हे़क्क्याङ् खे़न् ये़क्यक्किन्ने मे़घेःक्खुआङ् यो ने़ने़बादे़न्नो मे़उःक्खु मे़धासुॽ॥ थे़गुःल्ले़ कुसम्धाङ् लत्छा लुङ्जेःक्काङ् मे़ने़ने़न् मे़याःक्ने़न्॥” 14 हे़क्क्याङ् अब्सालोम नु इस्राइलबा के़रे़क् मनाहाॽरे़ मे़बाःत्तु, “अरकि हुसैःल्ले़ अहितोपेलनुःल्ले़आङ् नुबा सुजा आबिरे़आङ् वाॽ॥” कङ्ग अहितोपेलरे़ कुसुजान् फे़त्लाःम्मा नु अब्सालोमरे़ कुमे़क्मे़न् यहवे दाङ्बे़ल्ले़ कुनिङ्वाॽ वये़रो॥ इङ्घङ् खे़प्सुआङ् दाउदे़न् खे़त्छिङ् 15 हुसैरे़ सदोक नु अबियाथार निङ्वाॽफुसाम्बाहाॽ अहितोपेलरे़ अब्सालोम नु इस्राइलबा मनाहाॽ पिरुसिबा सुजान् नु खुने़ॽ पिरुसिबा सुजान् चे़क्तुसि॥ 16 खे़ल्ले़चोगुल्ले़ हुसैःल्ले़ दाउदे़न् अक्तङ्बा इङ्घङ् हाक्तु, “मुरे़क् खारे़क् थेआङ् के़होःप्पादे़न्नोबा च्वाःत् काःक्मादे़न्नो याङ्मे़न्धोःक्ने़ल्ल, कर आल्लोसा हारा वहःङ्ङिन् मे़गाःक्तुर, मेःन्ने़भग्र हाङ्ङिन् हे़क्क्याङ् खुने़ॽनु के़वाॽबा के़रे़क् मे़मे़क्॥” 17 आल्ल जोनाथान नु अहिमास एन-रोगेल मे़प्मनाबा ते़न्नो हाङ्घुसिआङ् युङे़सि, हे़क्क्याङ् लत्छा से़वारोमाधिक् पेःक्काङ् खे़ङ्हाॽ इङ्घङ् मे़त्तुसि, हन्नाङ् खे़ङ्हाॽरे़ दाउदे़न् मे़मे़त्तुॽ॥ थेआङ्भे़ल्ले़ ये़क्यक् सिगाङ् खे़ङ्हाॽ ये़क्यक्को मनाहाॽरे़ मे़न्निसुसिल्ल के़लॽबा पान् वये़॥ 18 कर कन् ये़म्मोग लत्छा थाङ्बे़न्धिक्ले़ खे़ङ्हाॽ निसुसि, हे़क्क्याङ् खे़ल्ले़ अब्सालोम्मिन् मे़त्तु॥ खे़ल्ले़चोगुल्ले़ खे़न् ने़प्माङ् हाराहारा बहुरिमबा लत्छा मनाःल्ले़ कुहिम्मो लासे़सि॥ खे़ल्ले़ कुलक्खुम्मो लत्छा वबाक् ने़स्से़, हे़क्क्याङ् खे़ङ्हाॽ खे़प्मो लासे़सिआङ् चिङ्ने़सि॥ 19 हे़क्क्याङ् खे़ल्ले़ कुमेःत्तिल्ले़ वबाक्किल्ले़ कुसम्धाङ् कुभे़माधिक् फे़सुआङ् खे़न् सम्धाङ् याॽरोन् नाम्भे़त्तु, हे़क्क्याङ् आत्तिल्ले़आङ् निङ्वाॽ मे़ङ्घोसुन्॥ 20 अब्सालोमरे़ कुमनाहाॽ मे़द्ये़आङ् खे़न् मे़न्छुमान् सेःन्मे़दोसु, “अहिमास नु जोनाथान आत्ता वाॽसि?” खे़ल्ले़ मे़त्तुसि, “खे़ङ्हाॽग वहःङ् नाहाङ् पिसाङ् पेसि॥” खे़ङ्हाॽरे़ ना कत्ना मे़गोःत्तुसि, कर आत्तिन्नाङ् मे़घोसुसिन्॥ खे़ल्ले़चोगुल्ले़ खे़ङ्हाॽ यरुसले़म मे़नुःक्खे़॥ 21 खे़न् अब्सालोमरे़ कुमनाहाॽ मे़बेआङ् खे़न् ने़प्फु मनाहाॽ वबाक्कोलाम् लःन्दे़सि, हे़क्क्याङ् दाउद हाङ्ङिल्ले़ओ पेसिआङ् के़रे़क् पान् चे़क्ते़सु॥ खे़ङ्हाॽरे़ मे़त्ते़सु, “पोगे़ॽ, हारा यङ्घङ्ङिन् काःक्ते़ॽ॥” हे़क्क्याङ् हाङ्ङिल्ले़ कुदक्ले़ङ्वाओ अहितोपेलरे़ अक्तङ्बा सुजा पिरुसि के़लॽबान् चे़क्तु॥ 22 खे़ल्ले़चोगुल्ले़ दाउद नु खुने़ॽ के़रे़क् कुमनाहाॽ हाराहारा यर्दन यङ्घङ् नाधाःम्बि मे़बे॥ खाओःप्मासोरि यङ्घङ् मे़ङ्गाःक्मना मना हाःत्ताङ् मे़होःप्ते़॥ 23 अहितोपेलरे़ पिरुसिबा कुसुजान् यरिक् कुसिक्ले़ मे़ङ्घे़प्सुम्बा निङ्वाॽ खोसुआङ् खुने़ॽ कुअदङ्ङो लासे़आङ् आबाङे कुये़क्यक्कोबा कुहिम्मो पे॥ खुने़ॽ कुहिम्मोबा पाःन्हाॽ हिसु तङ्सुधआङ् आबाङे खे़प्मो फोःन्छिङ् स्ये़॥ खे़न् अक्खेलॽरिक् स्ये़ हे़क्क्याङ् कुम्बारे़ कुइपुङ्बेसाङ् मे़लुप्तु॥ 24 अब्सालोम हे़क्क्याङ् खुने़ॽनु के़वाॽबा के़रे़क् इस्राइलिहाॽ यर्दन मे़गाःक्तु, कर दाउद तगिसा महनोम के़रे़ चुरे़आङ् वये़॥ 25 अब्सोमरे़ योआबरे़ कुले़क्वा अमासान् थक्सुबाहाॽ लाम्गे़लोबा थक्मोबा चोगुआङ् वये़॥ अमासान् इस्राइलि येतेररे़ कुस्सा वये़, अबिगेले़न् खे़ल्ले़ कुम्मा वये़॥ अबिगेले़न् नाहासरे़ कुस्सा मे़न्छुमा वये़ हे़क्क्याङ् सरुयाहःन् योआबरे़ कुम्मा वये़॥ सरुयाहःन् अबिगेलरे़ कुन्साॽ वये़॥ 26 इस्राइलिहाॽ नु अब्सालोमरे़ गिलाद लाजेॽओ थक्सुबा साःङ्गाहिम् मे़लेःत्तु॥ 27 दाउद महनोम के़रे़, हे़क्केःल्ले़ अम्मोनिहाॽरे़ खुन्छिॽ लाजेॽ रब्बा के़युङ्बा नाहासरे़ कुस्सा सोबि, लोदेबार के़युङ्बा अम्मिएलरे़ कुस्सा माकिर नु रागलि के़युङ्बा गिलादि बर्जिल्लैल्ले़ 28 कुघाम्मा कुलोमा, खप्प्या नु खोर्याहाॽ तारुआङ् पिरु॥ खे़ङ्हाॽरे़ मासि, हःक्सि, मासि फेॽरुम्, नमनाबा हःक्सि, सिःम्बि, कारिॽ, 29 सक्वा खु, नुदाक्, मे़ल्लुक्हाॽ नु पित्नुलाम्बा मे़जोगुबा पनिरे़न् दाउद हे़क्क्याङ् खुने़ॽनु के़वाॽबा मनाहाॽरे़ लागि चामा तारु पिरु, थेआङ्भे़ल्ले़ मनाहाॽ मुरे़क् खारे़क्पा ये़ःङ्घादे़न्नो साक्किल्ले़ तरुसिआङ् मे़वये़, वामिमाल्ले़ तरुसिआङ् मे़वये़ हे़क्क्याङ् साॽरिक् मे़नासे़आङ् मे़वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.