२ सामुए़ल 16 - लिम्बुदाउद नु सिवा 1 दाउदे़न् कोःक्माओ चिनानाक् के़रे़ल्ले़ चघप् मपिबोसेतरे़ कुसे़वारोबा सिबाःन् तुमु॥ खे़ल्ले़ खुने़ॽनु किप् ने़त्छि लोःत्तो, कुबजा किप् थिक् खे़ङ्मनाबा चे़ल्ले़क्सेॽ, किप् थिक् कुबजा पःत्छेॽसेॽ नु सेहोॽ सुक्वाधिक् कुले़ःम् सेजःङ्वा अदङ् लुप्हाॽ कुःत्तुसिआङ् फे़रे़र पत्छे़॥ 2 हाङ्ङिल्ले़ सिबाःन् मे़त्तु, “खे़ने़ॽ कन् के़रे़क् थेआङ् के़दारुबाबे?” सिबाःल्ले़ मे़त्तु, “कन् अदङ्हाॽ हाङ्ङिल्ले़ कुहिम्सयङ्हाॽरे़ खुन्छिॽ युक्मारे़ लागि, लोःत्तो नु पःत्छेॽसेॽहाॽ थाङ्बे़न् मनाहाॽरे़ लागि हे़क्क्याङ् सेजङ्वान् मुरे़क् खारे़क् थेआङ् के़होप्पादे़न्नो के़नाबाहाॽरे़ लागिरो॥” 3 हाङ्ङिल्ले़ सेःन्दोसु, “खे़ने़ॽ के़न्दाङ्बाल्ले़ कुम्मे़न्छाॽइन् आत्तान् वाॽ?” सिबाःल्ले़ मे़त्तु, “खुने़ॽग यरुसले़म वाॽ, थेआङ्भे़ल्ले़ इस्राइलबा सुवाङ्हाॽरे़ खुने़ॽ कुन्धे़बारे़ कुहाङ्युक्नान् मे़नुःक्तुॽ के़लॽबा निङ्वाॽ इःत्तुआङ् वाॽ॥” 4 हाङ्ङिल्ले़ सिबाःन् मे़त्तु, “मपिबोसेतरे़ कत्तुबा के़रे़क् कुयाङ्साकुन्धेन् खे़ने़ॽए पिने़॥” सिबाःल्ले़ मे़त्तु, “आदाङ्बे, आङ्गाॽ आहाङ्ङे, आङ्गाॽग खे़ने़ॽ के़से़वारोबाआरो॥ आदाङ्बारे़ के़लुङ्मा तुक्मे़न् खोसुङ्लरो॥” दाउद नु सिमि 5 दाउद हाङ्ङिन् बहुरिम के़रे़, हे़क्केःल्ले़ खे़प्मो सावलरे़ कुहिम्सयङ्बा लत्छा मना, गेरारे़ कुस्सा सिमिन् लिगक् लःन्दे़आङ् दाउदे़न् साक्मुरा मे़त्तुर त्ये़॥ 6 खे़ल्ले़ दाउदे़न् नु खुने़ॽ कुसुहाङ्युक्पाहाॽ लुङ्ङिल्ले़ ले़प्मा हेःक्तुसि॥ दाउदरे़ कुजुक्वा नु कुभे़ङ्वा ले़प्माङ् खुने़ॽ कुधक्सुबा नु ताङ्गे़से़ःप्पाहाॽ मे़वये़॥ 7 हे़क्क्याङ् सिमिःल्ले़ अक्खे पाःत्तुर दाउदे़न् साक्मुरा मे़त्तु, “पेगे़ॽ, मना के़से़प्पा मनान् पेगे़ॽ, पेगे़ॽ! पेगे़ॽ! 8 सावलरे़ कुहिम्सयङ्ङोबा यरिक् मनाहाॽ के़से़रुसिआङ् खुने़ॽ कुहाङ्युक्नान् के़नाप्तुबाल्ले़ चोगुल्ले़ यहवे दाङ्बाल्ले़ कुले़क्वा हुङुबारो, हे़क्क्याङ् खे़न् हाङ्जुम्मिन् यहवे दाङ्बे़ल्ले़ के़स्सा अब्सालोम्मिन् पिरुआङ् वाॽ॥ आल्ल खे़ने़ॽ के़मे़गे़, थेआङ्भे़ल्ले़ खे़ने़ॽग मना के़से़प्पाने़रो॥” 9 हे़क्क्याङ् सरुयाहरे़ कुस्सा अबिसैरे़ हाङ्ङिन् मे़त्तु, “आदाङ्बे, कन् कुसिवे़त् ख्याबाल्ले़ आदाङ्बा थेआङ् साक्मुरा के़मे़प्पाबे? आङ्गाॽ पेःक्काॽआङ् खे़ल्ले़ कुधेगेःक्पे़न् फुन्दुङ् पिरुङ्बि?” 10 कर हाङ्ङिल्ले़ मे़त्तु, “सरुयाहरे़ कुस्सासे, खिनिॽ पाःप्मा पान् थेआङ् होप्, यहवे दाङ्बे़ल्ले़ दाउदे़न् साक्मुरा मे़त्ते़ॽ मे़त्तुआङ् वाॽने़भग्र हाःत्ले़ साक्मा सुक्तुबे?” 11 दाउदरे़ अबिसैन् नु खुने़ॽ कुसे़वारोबाहाॽ मे़त्तुसि, “आङ्गाॽ आस्साःल्ले़ए से़प्मा कोःताल्ले़ कन् बिन्यामिनिन्नुग थे पाःप्माबे? खे़न् ले़राम्देसाम्मे़ॽ॥ खे़ल्ले़ साक्मुरा मे़त्ताॽर॥ थेआङ्भे़ल्ले़ यहवे दाङ्बे़ल्ले़ए खे़न् हाबाहे़क्के चोगे़ॽ मे़त्तुआङ् वाॽइरा॥ 12 आइन् आङ्गाॽ खोसुङ्बा साक्मुराःल्ले़ कुले़क्वा यहवे दाङ्बे़ल्ले़ आङ्गाॽ आदुक्खेन् ओमे़त्तुइरा हे़क्क्याङ् आङ्गाॽ हाङ्वामुॽइ पिॽआइरा॥” 13 खे़ल्ले़चोगुल्ले़ दाउद नु खुने़ॽ कुमनाहाॽ खुन्छिॽ लाम् मे़धासिङ्, हे़क्क्याङ् सिमिन् दाउद लाङ्घेगे़बा लाम्मिल्ले़ थोहाङ् ले़प्माङ्बा कोःक्माए कोःक्मा पे, हे़क्क्याङ् पेःल्ले़ दाउदे़न् साक्मुरा मे़त्तुर लुङ्ङिल्ले़ ले़प्तु हे़क्क्याङ् खाम्हिःक्किल्ले़ चुःत्तुर पे॥ 14 हाङ्ङिन् हे़क्क्याङ् खुने़ॽनु के़वाॽबा के़रे़क् मनाहाॽ मे़नासे़आङ् यर्दन मे़गे़रे़॥ हे़क्क्याङ् खे़प्मो खुने़ॽ आबाङे नाःम्सिङ्, चाङ्जाङ् मे़त्छिङ्॥ अब्सालोमे़न् यरुसले़म पेक् 15 आल्ल अब्सालोम हे़क्क्याङ् खुने़ॽनु के़वाॽबा के़रे़क् इस्राइलिहाॽ यरुसले़म मे़गे़रे़, अहितोपेलआङ् खुने़ॽनु वये़॥ 16 हे़क्क्याङ् दाउदरे़ कुन्देङ् अरकि हुसैल्ले़ अब्सालोमे़न् तुमु, हे़क्क्याङ् मे़त्तु, “हाङ्ङिन् सदादिङ् हिङ्ल! हाङ्ङिन् सदादिङ् हिङ्ल!” 17 कर अब्सालोमरे़ मे़त्तु, “खे़ने़ॽ के़न्देःङ्बे़न्नु नसाःन्साबा के़बोक्खे़बान् हाबा कन्बि? खे़ने़ॽ खुने़ॽनु थेआङ् के़म्बेने़न्?” 18 हुसैल्ले़ अब्सालोम्मिन् मे़त्तु, “निङ्वाॽफुमाङ्ङिल्ले़ सेगुबा मनान्, इस्राइलबा के़रे़क् मनारे़ मे़सेगुबा मनाःन्नु वाॽमा निङ्वाॽ चोगुङ्ङाङ् वाॽ॥ हे़क्क्याङ् आङ्गाॽ खे़न्नुए युङ्ङा॥ 19 याम्मो आङ्गाॽ हाःत्ले़ कुसे़वा चोगुङ्बाबे? कुस्साःल्ले़ कुसे़वा चोःक्मा मे़बोङ्ने़म्बि? आङ्गाॽ आक्खेलॽरिक् के़म्बारे़ कुसे़वा चोगुङ्, हाबा हे़क्केलॽरिक्के आङ्गाॽ खे़ने़ॽ के़से़वा चोगुङ्ॽ॥” 20 अब्सालोमरे़ अहितोपेले़न् मे़त्तु, “आनिगे थे चोगुम्बे़बा? सुजा आबिरे़ॽ॥ आनिगे आक्खेलॽरिक् याःम्बक् चोगुम्बे़बाबे?” 21 अहितोपेलरे़ मे़त्तु, “हाङ्हिम् के़गोमा के़म्बारे़ कुमेत् पाःक्माहाॽनु इप्से़ॽ॥ हे़क्क्याङ् के़म्बा दाउदरे़ कुन्बो के़देसुबा साॽरिक् याम्गे़सिङ्बा ताप्फे़ःम्बा याःम्बक्किन् के़रे़क् इस्राइलबा मनाहाॽरे़ मे़घे़प्सुॽ, हे़क्क्याङ् खे़ने़ॽनु के़वाॽबाहाॽरे़ खुन्छिॽ हुक् आल्लसाङ् के़धुम्बा पोङ्॥” 22 खे़ल्ले़चोगुल्ले़ खे़ङ्हाॽरे़ कौसिओ अब्सालोमरे़ कुलागि लत्छा ते़न् मे़जोगु, हे़क्क्याङ् के़रे़क् इस्राइलिहाॽरे़ मे़निसुर खे़न् कुम्बारे़ कुमेत् पाःक्माहाॽनु इप्से़॥ 23 खे़न् ये़म्मो अहितोपेलरे़ कुसुजान् निङ्वाॽफुमाङ्ङिन् सेःन्दोःम्मनाबा कुइसिक् चोगे़॥ दाउद नु अब्सालोमरे़ खे़म्भ्याक् साॽरिक् अहितोपेलरे़ कुसुजान् खे़प्से़छुआङ् वये़सिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.