२ सामुए़ल 15 - लिम्बुअब्सालोमरे़ कुजे़म्भन् 1 खे़न् एगाङ् अब्सालोमरे़ आबाङे कुलागि लत्छा अन्लाधा, अन्हाॽ नु कुदगि लाङ्गे़घेःक्पा ङाबोङ् मनाहाॽ यारिप् चोगुसि॥ 2 खुने़ॽ थिक्याःन्धक् तानाम् आन्देन् पोगे़आङ् ये़क्यक् सिगाङ् लाःप्मा लाम्धेःप्पो ये़बे़॥ हाङ्ङिल्ले़ॽओ खासे़न् नाःक्से़ मना मे़दाःल्ले़ अब्सालोमरे़ खे़न् मनान् उःत्तुआङ् सेःन्दोसु, “खे़ने़ॽ आत्तिन् ये़क्यक्लाम् के़द्ये़बा?” हे़क्केःल्ले़ अक्तङ्बा नोगप् खोसु, “आदाङ्बे आङ्गाॽ अक्तङ्बा इस्राइल सुवाङ्लाम् त्याङ्बा॥” 3 हे़क्केःल्ले़ अब्सालोमरे़ मे़त्तुसि, “खे़ने़ॽ के़दुःन्देॽङ्ग नुबाए चोक्, कर खे़ने़ॽ के़बान् के़घे़म्बा हाङ्ङिल्ले़ कुमना हाःत्ताङ् मे़होप्॥” 4 हे़क्क्याङ् अब्सालोमरे़ मे़त्तु, “आङ्गाॽ कन् लाजेॽओबा खासे़न्दाङ्बा पोःक्खाङ्बा वये़ःल्ले़ग अक्तङ्बा तुःन्देॽ के़दाःप्पा के़रे़क् मनाहाॽ नुरिक् खासे़न् लोःन्दुङ् पिरुङ्सिङ्मे़न्॥” 5 हे़क्क्याङ् मनाहाॽ खुने़ॽ कुबेसाङ् साम्बोन् हबत् मे़भन्छिङ्ङाङ् से़वा मे़त्छे़ मे़द्ये़ःल्ले़ अब्सालोमरे़ कुहुक्किल्ले़ हे़प्तुसिआङ् चुप् मे़त्तुसि॥ 6 हाङ्ङिन्नु खासे़न् लोःन्छे़ के़दाबा के़रे़क्नु अक्तङ्बा याःम्बक् चोगुआङ् अब्सालोमरे़ इस्राइलिहाॽरे़ खुन्छिॽ लुङ्मादुक्मे़न् खुने़ॽ ले़प्माङ् उःक्खु॥ 7 तङ्बेॽ लिसि एगाङ् अब्सालोमरे़ हाङ्ङिन् मे़त्तु, “यहवे दाङ्बाल्ले़ कुलागि माङ्हुप् चोगुङ्बान् के़त्छे़ आङ्गाॽ हेब्रोन पेःक्मा आबाङ्घे़ॽ॥ 8 थेआङ्भे़ल्ले़ आङ्गाॽ आरामबा गसुर लाजेॽओ वयाङ्ङिल्ले़ यहवे दाङ्बे़ल्ले़ यरुसले़म ताभाःक्काने़भग्र आङ्गाॽ हे़ब्रोन्नो यहवे दाङ्बे़ल्ले़ कुसे़वा चोगुङ् लरिक् कन् माङ्हुप्पिन् चोगुङ्ङाङ् वये़॥” 9 हाङ्ङिल्ले़ खुने़ॽ मे़त्तु, “नुरे़तासे़ॽर पेगे़ॽ॥” हन्नाङ् खे़न् हेब्रोन पे॥ 10 हे़क्क्याङ् अब्सालोमरे़ इस्राइलबा के़रे़क् सुवाङ्हाॽओ, “सादाङ्ङिन् मे़मुःत्तुबा इक्ला के़घे़प्सुम्नुमे़ःन्ने, ‘अब्सालोमे़न् हेब्रोनबा हाङ् पोःक्खे़!’” के़लॽबा पान् मे़त्छे़ सिबिॽबा इङ्घङ्साबाहाॽ पाङ्घुसि॥ 11 अब्सालोमे़न्नु किप् ने़त्छि मनाहाॽ यरुसले़मलाम् मे़बेआङ् मे़वये़॥ खे़ङ्हाॽरे़ उःत्छिङ् मे़घोसुआङ् वये़, हे़क्क्याङ् कन् पाःन्निल्ले़ कुबेओ थेआङ् मे़ङ्घे़म्मे मे़बेआङ् मे़वये़॥ 12 अब्सालोमरे़ सिदुङ्जभाहाॽ तोःन्दुर यागे़ल्ले़ गिलोह ये़क्यक्लाम् दाउदरे़ कुसुजादाङ्बा अहितोपेले़न्नाङ् कुबाङ्भेॽलाम् उःत्तु॥ कन् चे़म्भःन्निन् पयम् यम्बा पोःक्खे़र पे, हे़क्क्याङ् अब्सालोम ले़प्माङ् के़लाःप्पा मनाहाॽआङ् मे़बोरे़र मे़बेरो॥ दाउदे़न् यरुसले़मलाम् खे़त्छिङ् 13 लत्छा इङ्घङ् के़दाःप्पान् दाउदरे़ॽओ त्ये़आङ् मे़त्तु, “इस्राइलबा मनाहाॽरे़ खुन्छिॽ निङ्वाॽइङ्ग अब्सालोम ले़प्माङ् वाॽ॥” 14 खे़ब्याङ् यरुसले़मओ दाउदे़न्नु के़वाॽबा सुहाङ्युक्पाहाॽ मे़त्तुसि, “आनिॽ हारा खे़त्छिङ्मा पोङ्ॽ, मेःन्ने़भाग्र आनिॽ हाःत्ताङ् अब्सालोमरे़ कुहुक्लाम् आन्हिङ्ने़न्॥ हारा पेगि, मेःन्ने़फग्र खे़न् हाराए कप्मो ताआङ् थङ् आनाःन् हे़क्क्याङ् ये़क्यक्किन् ताभेःल्ले़ थ्यःङ् चोगुॽ॥” 15 हाङ्ङिल्ले़ कुयुक्साबाहाॽरे़ मे़बाःत्तु, “आदाङ्बारे़ थे के़बाःत्तुॽ बाहे़क्के चोःक्मा आनिगे यारिप् वयिगे़॥” 16 हे़क्क्याङ् हाङ्ङिन् लःन्दे़आङ् पे, वेॽ के़रे़क् कुहिम्सयङ्हाॽ खुने़ॽ कुएगाङ् मे़धासिङ्॥ थिबोङ् कुमेत् पाःक्माहाॽ हिम् कोसे़ हाङ्हिम्मोए मे़युङे़ मे़लारे़॥ 17 हे़क्क्याङ् हाङ्ङिन् लःन्दे़ पे, खुने़ॽनु के़वाॽबा के़रे़क् मनाहाॽआङ् खुने़ॽनु मे़बे॥ कुभा माःङ्घा मे़बेआङ् मे़नाःम्सिङ्॥ 18 हे़क्क्याङ् हाङ्ङिन्नु गातलाम्बा के़दाबा किप् तुक्सि गित्ति, हे़क्क्याङ् के़रे़क् करेति नु पेलेथिहाॽ हाङ्ङिल्ले़ कुदगि लाङ्मे़घेगे़आङ् मे़बे॥ 19 हे़क्केःल्ले़ हाङ्ङिल्ले़ गित्ति इत्तैन् मे़त्तु, “खे़ने़ॽ थेआङ् आनिगे़नु के़धासिङ्बा? नुःक्खे़ पेगे़ॽआङ् हाङ् अब्सालोमे़न्नु युङे़ॽ, थेआङ्भे़ल्ले़ खे़ने़ॽ लत्छा वेॽ लाजेॽबा मना, खे़ने़ॽग के़लाजेॽलाम् के़म्लःते़बाआङ्लो॥ 20 खे़ने़ॽग मिःप्मा सिङ्ये़न्लक् के़द्ये़बारो, हे़क्क्याङ् आङ्गाॽ आबाङे आत्तान् पेःक्काॽर पत्ताॽ आङ्गाॽए मे़निआन्, हे़क्केःल्ले़ आक्खेलॽरिक् आङ्गाॽनु पित्छि मे़प्मा सुक्तुङ्बे? यरुसले़ःम्मो नुःक्खे़ पेगे़ॽ, खे़ने़ॽ के़लाजेॽबा मनाहाॽआङ् खे़ने़ॽनुए तेॽरे़से़ॽ, यहवे दाङ्बे़ल्ले़ आभे़ल्ले़साङ् थधप् मे़ल्लॽमनाबा मिःम्जि के़मे़त्ल हे़क्क्याङ् खे़ने़ॽनु नसाःन्साबा पोङ्ल॥” 21 कर इःत्तैल्ले़ अक्खे पाःत्तुआङ् हाङ्ङिन् मे़त्तु, “यहवे दाङ्बे़न् कुहिङ्वे़त् वाॽबा कुइसिक् माङ्हे़क्सिङाआङ् पाःत्तुङ्ॽ, खे़ने़ॽ आङ्गाॽ आदाङ्बा नु आहाङ्ङिन् आत्ता के़वाॽ, आङ्गाॽ सिआसाङ् हिङासाङ् आदाङ्बारे़ के़से़वारोबान् खे़प्मोए वारो॥” 22 हे़क्क्याङ् दाउदरे़ इत्तैन् मे़त्तु, “हे़क्केग्र थासिङे़ॽ॥” खे़ल्ले़चोगुल्ले़, गित्ति इत्तैन् हे़क्क्याङ् खुने़ॽनु के़वाॽबा कुमनाहाॽ हे़क्क्याङ् खुन्छिॽ हिम्सयङ्हाॽनु थासिङ्॥ 23 अक्खेलॽरिक् खे़ङ्हाॽ के़रे़क् मे़लःन्दे़आङ् मे़बेःल्ले़ खे़न् लाजेॽबा मनाहाॽ साॽरिक् मे़हाबे़॥ हाङ्ङिल्ले़ किद्रोन ने़ने़बादे़न्निन् काःक्तुर पे, हे़क्क्याङ् के़रे़क् मनाहाॽ मुरे़क् खारे़क् थेआङ् के़होःप्पादे़न् ले़प्माङ् मे़धासिङ्॥ 24 सादोके़न्नाङ् के़रे़क् ले़बिहाॽनु खे़प्मोए वये़॥ खे़ङ्हाॽरे़ यहवे दाङ्बाल्ले़ कुमाङ्हुप् सन्दोक्किन् मे़बक्खुआङ् मे़बेर मे़बत्छे़॥ खे़न् खे़ङ्हाॽरे़ मे़नाःप्सु मे़युक्खु हे़क्क्याङ् के़रे़क् मनाहाॽरे़ ये़क्यक्किन् मे़ल्ले़त्ते थारिक् अबियाथाररे़ सिदुङ्जभाहाॽ तोःन्दु॥ 25 हे़क्केःल्ले़ हाङ्ङिल्ले़ सदोक्के़न् मे़त्तु, “निङ्वाॽफुमाङ्ङिल्ले़ कुमाङ्हुप् कुसन्दोःक्किन् ये़क्यक्को नुःक्ते़ तेॽरे़आङ् पेगे़ॽ॥ निङ्वाॽफुमाङ्ङिल्ले़ कुसिराॽ थाङ्ङाने़भग्र खुने़ॽ याम्मो नुःक्ए़ ताःत्ले़र, हे़क्क्याङ् आङ्गाॽ कुसन्दोःक्किन् नु खुने़ॽ कुयुङ्मादे़न्निन् याम्मो निमा सुक्तुङ्ल याःन्नार॥ 26 खुने़ॽ आङ्गाॽनु कुनिङ्वाॽ मे़दाने़न्ने़भग्र आङ्गाॽ हाबा कप्मो वाॽआ, खुने़ॽ थे चोःक्मा निङ्वाॽ चोगुॽ खे़न्ने आङ्गाॽनु चोगुर॥” 27 हाङ्ङिल्ले़ सदोक निङ्वाॽफुसाम्बान् अक्खेआङ् मे़त्तु, “खे़ने़ॽग सुफो के़निबाने़ मेःम्बि? खे़ने़ॽ नु अबियाथार, हे़क्क्याङ् के़स्सा अहिमस नु अबियाथाररे़ कुस्सा जोनाथाने़न् तेॽरे़से़ॽआङ् ये़क्यक्को नुःक्खे़ पेगे़ॽ॥ 28 खे़ने़ॽलाम्बा इङ्घङ् मे़ङ्घे़म्मे थारिक् आङ्गाॽ मुरे़क् खारे़क् थेआङ् के़होःप्पादे़न्नोबा च्वाःत् काःक्मादे़न्नो हाङ्घुङ्ल युङ्ङा॥” 29 हे़क्केःल्ले़ सदोक्के़न् नु अबियाथाररे़ निङ्वाॽफुमाङ्ङिल्ले़ कुमाङ्हुप् सन्दोक्किन् यरुसले़म नुःक्तु तेॽरुसि, हे़क्क्याङ् खे़ङ्हाॽ हाबा खे़प्मो युङे़ लारे़सि॥ 30 पे़ःङ्वालिःत्छेॽ कोःक्माथो पेःल्ले़ दाउदे़न् हाबे़र पे॥ खुने़ॽ कुधेगेःक्पे़न् सुःप्तुआङ् लाङ्सुःप् मेःन्ने लाङ्घेगे़आङ् पे॥ खुने़ॽनु के़वाॽबा के़रे़क् मनाहाॽआङ् खुन्छिॽ थे़गेःक्पे़न् मे़सुःप्तुआङ् मे़हाबे़र लाङ्मे़घेगे़आङ् मे़बे॥ 31 हे़क्क्याङ् दाउदे़न् कुभारे़ मे़मे़त्तु, “अहितोपेले़न् चे़म्भन् के़जोःक्पाहाॽनु अब्सालोम ले़प्माङ् लासे़आङ् वाॽ॥” हे़क्केःल्ले़ दाउदरे़ अक्खेलॽरिक् तुवा चोगे़, “यहवे दाङ्बाए, अहितोपेलरे़ कुसुजान् हने़बा चोगे़ॽओ॥” 32 दाउदे़न् निङ्वाॽफुमाङ्ङिन् से़वामे़प्मादे़न् कोःक्माओ थो के़रे़ल्ले़ हुसै अरकिःल्ले़ के़दे़ःङ्बा चाङ् चाक्खु हे़क्क्याङ् कुधे़गेःक्पो खाम्भुत्रान् याक्तुआङ् दाउदरे़ कुदुम्से़ थाङे़आङ् वये़॥ 33 दाउदरे़ खे़न् मे़त्तु, “खे़ने़ॽ आङ्गाॽनु के़धाङ्ग्र आङ्गाॽ आगक्लक् के़बोङ्, 34 कर खे़ने़ॽ ये़क्यक्को के़नुःङ् के़बेःक्काङ् अब्सालोम्मिन् ‘आङ्गाॽ आदाङ्बारे़ के़से़वारोबा पोङ्ङाॽ, आल्ल थारिक् के़म्बारे़ कुसे़वारोबा वयाङ्, कर आल्ल आदाङ्बारे़ के़से़वारोबा पोङ्ङा’ के़मे़त्तुने़भग्र, अहितोपेलरे़ कुसुजान् फे़त्लाःम्मारे़ लागि खे़ने़ॽ फाॽमा के़सुक्का॥ 35 खे़ने़ॽ के़निसुॽ, सदोक नु अबियाथार निङ्वाफुसाम्बाहाॽ खे़ने़ॽनु वाॽसि॥ हाङ्ङिल्ले़ कुहिम्मो खे़ने़ॽ थेधे के़घे़प्सुॽ खे़न् के़रे़क् खे़ने़ॽ खे़ङ्हाॽ चे़क्ते़से़ॽ॥ 36 खे़ङ्हाॽनु सदोकरे़ कुस्सा अहिमस नु अबियाथाररे़ कुस्सा जोनाथान वाॽसि॥ खे़ने़ॽ थे के़घे़प्सुॽ खे़न् खे़ङ्हाॽलाम्बा आङ्गाॽओ इङ्घङ् हाङाङ् पिराङ्ङे़ॽ॥” 37 खे़ल्ले़चोगुल्ले़ अब्सालोमे़न् यरुसले़म लासे़र पत्छे़ल्ले़सा दाउदरे़ कुन्देङ् हुसैन् ये़क्यक्को त्ये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.