२ सामुए़ल 14 - लिम्बुयोआबे़ल्ले़ अब्सालोमे़न् यरुसले़म नुःक्मा कोःत्तु 1 हाङ्ङिल्ले़ कुनिङ्वाॽइन् अब्सालोम ले़प्माङ् नुःक्खे़ के़लॽबा सरुयाहरे़ कुस्सा योआबरे़ निङ्वाॽ खोसु, 2 हे़क्क्याङ् योआबरे़ तको मे़प्नाबादे़न्नो मनाहाॽ पाङ्घुसिआङ् लत्छा चाःप्मा मे़न्छुमाधिक् उःप्मा पाङ्घुसि॥ खे़न् मे़त्तु, “के़हाःम्सिङ्मा ले़ङ्सिङ्ङे़ॽ, के़हाःम्सिङ्माहाॽरे़ मे़जाक्खुबा चाङ् हे़क्तङ्बा चाङ् चाक्खे़ॽ, के़धे़गेःक्पो निःङ्गेॽ मे़याक्ते़न्ने़ॽ, हे़क्क्याङ् यरिक् ये़न्नाङ्धो ने़त्तो के़युङ्मा मे़न्छुमा हे़क्तङ्मा ले़ङ्सिङ्ङे़ॽ॥ 3 हाङ्ङिल्ले़ॽओ पेगे़ॽआङ् खुने़ॽ अक्खे मे़त्ते़ॽ॥” योआबरे़ए खुने़ॽ कन् पाःन्हाॽ हुॽरु, खुने़ॽए कन् के़रे़क् पाःन्हाॽ कुम्ब्राओ केःत्तु पिरुबारो॥ 4 तकोबा मे़न्छुमान् हाङ्ङिल्ले़ॽओ पे, हे़क्क्याङ् साम्बोन् हबत् फन्छिङ्ङाङ् हाङ्ङिन् से़वा मे़त्तुर अक्खे मे़त्तु, “हाङ्ङे, से़ःप्ताङ्ङे़ॽओ॥” 5 हाङ्ङिल्ले़ खे़न् सेःन्दोसु, “खे़ने़ॽ थे़मा तुक्खे के़दुमुआङ् वा?” खे़ल्ले़ पाःत्तु, “आदाङ्बे, आङ्गाॽग मिमेदुमाआरो॥ आङ्गाॽ आये़म्बा स्ये़आङ् वाॽरो॥ 6 हे़क्क्याङ् आङ्गाॽ ने़प्फु आस्सा वये़सि, खे़ङ्हाॽ ते़म्बेॽओ चुङे़छि॥ खे़प्मो खे़ङ्हाॽ के़से़म्बा हाःत्ताङ् मे़होःप्ते़॥ थिक्किल्ले़ वेॽइन् हिप्तुआङ् से़रु॥ 7 आल्ल अमे़त्ते़ना, के़रे़क् आङ्गाॽ आमनाहाॽ आङ्गाॽ आदक्ले़ङ्वाओ मे़बोगे़आङ् अक्खे मे़बाःत्तुॽ, ‘आबाङे कुन्साॽ के़से़प्पे़न् आनिगे हुक् आसुप्ते़ॽ हे़क्क्याङ् खे़ल्ले़ आबाङे कुन्साॽ से़रुबाल्ले़ चोगुल्ले़ आनिगे खे़न् से़रुम्बे़॥ हे़क्क्याङ् खुने़ॽ कुलक् के़घोबे़न्नाङ् से़रुम्बे़॥’ खे़ङ्हाॽरे़ हे़क्के मे़जोगुल्ले़ग लत्छाधिक् के़नम्बा मिहोःम्बे़न्नाङ् मे़से़रुॽ, हे़क्क्याङ् आङ्गाॽ आये़म्बाःल्ले़ कुमिङ्ङिन् मे़मासुल्ले़ कन् इक्सा खाम्बेःक्मो हाःत्ताङ् कुसाकुए मे़न्याःक्ने़ल्लो॥” 8 हाङ्ङिल्ले़ खे़न् मे़न्छुमान् मे़त्तु, “पेगे़ॽ, आङ्गाॽए खे़ने़ॽ ले़प्माङ् खासे़न् चोगुङ् पिने़॥” 9 कर तकोबा मे़न्छुमाःल्ले़ आल्लसाङ् पाःत्तु, “आदाङ्बे, कल्ले़ कुआप्तिक्किन् आङ्गाॽ नु आङ्गाॽ आम्बारे़ कुसुवाङ्ङो चुक्ल॥ हाङ् नु खुने़ॽ कुहाङ्युक्नान् थिक्मा मे़बोङ्ने़ल्लरो॥” 10 हाङ्ङिल्ले़ मे़त्तु, “आल्लसाङ् मनारे़ खे़ने़ॽ थेइ के़म्मे़त्ने़फग्र, खे़न् आङ्गाॽओ ताराम्मे़ॽ, हे़क्क्याङ् खे़ल्ले़ याम्मो खे़ने़ॽ आप्फाल्ले़आङ् तुक्खे के़न्जाःत्ने़न्॥” 11 हे़क्क्याङ् याम्मो खे़न् मे़न्छुमाःल्ले़ पाःत्तु, “कुले़क्वा के़हुङ्बाहाॽ ताप्फे़ःम्बा चोःक्मा मे़म्बाङ्मा नु आङ्गाॽ आस्सान् सिमा मे़म्बाङ्मारे़ लागि आदाङ्बारे़ के़निङ्वाॽफुमाङ्ङिन्नु तुवा चोगे़ॽ॥” हाङ्ङिल्ले़ अक्खे पाःत्तुआङ् माङ्हे़क्सिङ्, “खे़ने़ॽ के़स्साःल्ले़ कुधे़गेक् इ लत्छाआङ् खाम्बाङ्ङो मक्मे़धाने़न् फाॽआङ् यहवे दाङ्बे़न् कुहिङ्वे़त् वाॽबा कुइसिक् आङ्गाॽ पाःत्तुङ्॥” 12 हे़क्केःल्ले़ खे़न् मे़न्छुमाॽइल्ले़ पाःत्तु, “आदाङ्बे, आङ्गाॽ आल्लसाङ् लत्छा पान् पाःप्मा सुक्तुङ्बि?” हाङ्ङिल्ले़ पाःत्तु, “पाःत्ते़ॽ॥” 13 खे़न् मे़न्छुमाःल्ले़ पाःत्तु, “निङ्वाॽफुमाङ्ङिल्ले़ कुमनाओ अक्तङ्बा ताप्फे़ःम्बा चोःक्मा आदाङ्बारे़ के़निङ्वाॽओ आक्खेलॽरिक् अक्तङ्बा पान् लासे़? हाङ्ङिल्ले़ए अक्खे पाःत्तुॽ, खुने़ॽ आबाङे याःम्बक् फे़त्लाःन्दुल्ले़ आप्तिक्साबा मे़बोङ्ने़म्बि? थेआङ्भे़ल्ले़ लाजेॽलाम् के़लःत्तु के़देसुबा मनान् आदाङ्बारे़ याम्मो नुःक्मा ताःप्मा के़नाॽरुआङ् वाॽ॥ 14 खाम्बाङ्ङो के़वे़प्पा च्वाःत्तिन् याम्मो सुम्मा सुक्मे़दे़त्ने़म्बा कुइसिक् आनिगे के़रे़क् सिमाए के़बोङ्बा पोःक्खे़॥ कर निङ्वाॽफुमाङ्ङिल्ले़ मनाग आन्छे़त्ने़न्, खुने़ॽग खुने़ॽलाम्बा माःङ्घा के़बोङ्बान् नुःक्मा ताःप्मा निङ्वाॽ चोगुॽ॥ 15 “आङ्गाॽ कन् पाःन्निन् आदाङ्बा मे़त्छे़ त्याङ्बा, थेआङ्भे़ल्ले़ मनाहाॽरे़ आङ्गाॽ यङ्मा मे़से़राङ्ङाङ् वाॽ, हे़क्क्याङ् आङ्गाॽ के़से़वारोमाल्ले़ निङ्वाॽ इःत्तुङ्, हाङ्ङिन्नु पान् पाःप्मा खोसुङ्ने़फग्र खुने़ॽ आङ्गाॽ आबाःन्निन् खे़प्सुॽ, 16 हे़क्क्याङ् आङ्गाॽ नु आङ्गाॽ आस्सान् निङ्वाॽफुमाङ्ङिल्ले़ याप्मि पिरे़बा लक्के़घोबा पोङ्मालाम् माःङ्घा चोःक्मा के़गोःप्पा मनाःन्लाम् से़ःप्पा॥ 17 “आल्ल आदाङ्बारे़ के़से़वारोमाल्ले़ निङ्वाॽ इःत्तुङ्ॽ, ‘आदाङ्बा हाङ्ङिल्ले़ के़बाःन्निल्ले़ आङ्गाॽ आसिक् ने़ने़ मे़त्ताॽर, थेआङ्भे़ल्ले़ ताप्फे़ःम्बा नु नुबा से़न्छे़ आदाङ्बाग निङ्वाॽफुमाङ्ङिल्ले़ कुमाङ्लाइङ्बा कुइसिक् के़जोक्॥ यहवे दाङ्बा के़निङ्वाॽफुमाङ्ङिन् आदाङ्बानु वाॽर॥’” 18 हे़क्केःल्ले़ हाङ्ङिल्ले़ खे़न् मे़न्छुमाॽइन् मे़त्तु, “आङ्गाॽनु पान् मे़जिक्खे़न्ने़ॽ॥ आङ्गाॽ लत्छा पान् सेःन्दोने़॥” खे़ल्ले़ मे़त्तु, “पाःत्ते़ना आदाङ्बे॥” 19 हाङ्ङिल्ले़ पाःत्तु, “कन् के़रे़क् पाःन्नो योआबरे़ कुहुक् वाॽबि?” खे़ल्ले़ मे़त्तु, “आदाङ्बारे़ के़मिङ्ङो माङ्हे़क्सिङाॽआङ् पाःत्तुङ्, आदाङ्बारे़ सेःन्दोमा याःम्बक् के़जोगुल्ले़ के़बाःप्पे़न् चुक्वा फे़ङ्वा लॽमाए मे़घोसुन्॥ आदाङ्बारे़ के़से़वारोबा योआबरे़ए कन् पाःन्निन् हुॽराङ्बारो, खुने़ॽए आङ्गाॽ आमुराओ कन् के़रे़क् पान् केःत्तु पिराङ्बारो॥ 20 आल्लोबा याक्नाम्मिन् वेॽ ले़प्माङ् ले़ङ्से़ आदाङ्बारे़ के़से़वारोबा योआबरे़ कन् चोगुबारो॥ कर आदाङ्बाग निङ्वाॽफुमाङ्ङिल्ले़ कुमाङ्लाइङ्बा कुइसिक् सिक्कुम् निङ्वाॽ के़गप्पा के़जोक्, लाजेॽओ थे पोङ्ल पत् खे़न् के़रे़क् के़निसुॽ॥” 21 हाङ्ङिल्ले़ योआबे़न् मे़त्तु, “कन् पाःन्नो आङ्गाॽ खे़ने़ॽनु ते़न्दाङ्॥ पेगे़ॽआङ् अब्सालोम्मिन् नुःक्ते़ तारे़ॽ॥” 22 हे़क्केःल्ले़ योआबे़न् साम्बोन् हबत् फन्छिङ्ङाङ् हाङ्ङिन् से़वा मे़त्तुआङ् हाङ्वामुॽइ पिरुर योआबरे़ मे़त्तु, “आइन् आङ्गाॽ आबेलिन् के़घे़प्सुबाल्ले़ चोगुल्ले़ आदाङ्बा हाङ्ङिल्ले़ आङ्गाॽ के़सिराॽ थाङाङ् के़लॽबा पाःन्निन् निङ्वाॽ खोसुङ्॥” 23 खे़ल्ले़चोगुल्ले़ योआब गसुर पेआङ् अब्सालोम्मिन् यरुसले़म तारु॥ 24 कर हाङ्ङिल्ले़ मे़त्तु, “खे़न् आप्फेक् कुहिम्मो युङ्ल॥ खे़न् आङ्गाॽ आदुम्से़ आभे़ल्ले़आङ् मे़दाने़न्ल॥” खे़ल्ले़चोगुल्ले़ अब्सालोमे़न् आप्फेक् कुहिम्मो पे, हे़क्क्याङ् हाङ्ङिल्ले़ कुदगि ओसेःन् मे़धाक्सिङ्ङे़न्लो॥ दाउदरे़ अब्सालोमे़न् हाःप्तु 25 आल्ल के़रे़क् इस्राइलओ अब्सालोम हे़क्के नुबा निगे़धाःप्पा साॽरिक् मे़जमुबा वेॽ हाःत्ताङ् होःप्ते़॥ कुधे़गेःक्काङ् यो कुलाङ् थारिक् कुयोक् थेआङ् मे़बत्छे़न्॥ 26 खुने़ॽ कुधे़गेक् मुरिक्किन् खक्तुआङ् (थे़गेःक्पे़न् पोरे़आङ् लिःप्ते़बाल्ले़ चोगुल्ले़ खक्तुर वये़) मे़धाङ्सुल्ले़ किप् ने़त्छि सेकेल योरे़॥ 27 अब्सालोमरे़ सुम्सि कुस्सा नु तामार मिङ् के़वाःप्मा मे़न्छिमाधिक् सावाःन्छिङ्ङाङ् वये़॥ तामारे़न् साॽरिक् नुमा मे़न्छुमा वये़॥ 28 अब्सालोमे़न् तङ्बेॽ ने़त्छिधारिक् यरुसले़म हाङ्ङिल्ले़ कुबेसाङ् ओसेःन् मे़न्धाक्सिङ्ङे युङे़॥ 29 हे़क्केःल्ले़ अब्सालोमरे़ योआबे़न् हाङ्ङिल्ले़ॽओ पेःक्ल फाॽआङ् इङ्घङ् हाक्तु, कर योआबे़न् मे़द्ये़ने़न्॥ अब्सालोमरे़ खे़न् निले़ङ् उःत्तु, हे़क्केसाङ् योआबे़न् मे़द्ये़ने़न्॥ 30 हे़क्केःल्ले़ अब्सालोमरे़ कुसे़वारोबे़न् मे़त्तु, “योआबरे़ लत्छा कुबारि आङ्गाॽ आबारिःल्ले़ कुबेसाङ् ने़ःॽ, हे़क्क्याङ् खे़प्मो हःक्सि लिङ्लपत् फाॽआङ् खिनिॽ के़निसुम्॥ पेगे़म्मे़ॽ, हे़क्क्याङ् खे़प्मो मि थे़गे़म्मे़ॽ॥” खे़ल्ले़चोगुल्ले़ अब्सालोमरे़ कुसे़वारोबाहाॽरे़ खे़प्मो मि मे़याक्तु॥ 31 खे़न् एगाङ् योआबे़न् अब्सालोमरे़ कुहिम्मो त्ये़आङ् मे़त्तु, “खे़ने़ॽ के़से़वारोबाहाॽरे़ थेआङ् आङ्गाॽ आबारिओ मि मे़याक्तुबाबे?” 32 अब्सालोमरे़ मे़त्तु, “आङ्गाॽओ के़दाआङ् खे़ने़ॽलाम्बा हाङ्ङिन् ‘थेआङ् आङ्गाॽ गसुरलाम् के़दाराङ्बा? आङ्गाॽग खे़प्मो युङाङ्ङिल्ले़ए नुबा पोःक्खे़बामे़न्’ के़लॽबा इङ्घङ्ङिन् हाक्मा फाॽआङ् उःत्ने़आङ् वये़ कर के़न्द्ये़ने़न्॥ खे़ल्ले़चोगुल्ले़ आङ्गाॽ हाङ्ङिल्ले़ॽओ पेःक्मा खोआर॥ हे़क्क्याङ् आङ्गाॽ सिमारे़ लागि पाःन्धिक्मा पान् कुयुङ्ङाङ् वाॽआने़भग्र खुने़ॽ से़त्ताॽर॥” 33 हे़क्क्याङ् योआबे़न् हाङ्ङिल्ले़ॽओ पेआङ् कन् पाःन्निन् चे़क्तु॥ हे़क्केःल्ले़ हाङ्ङिल्ले़ अब्सालोमे़न् उःत्पाङ्घुसि॥ खे़न् त्ये़, हे़क्क्याङ् अःक्खुम् फन्छिङ्ङाङ् हाङ्ङिन् से़वा मे़त्तु॥ हाङ्ङिल्ले़ अब्सालोम्मिन् चुप् मे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.