२ सामुए़ल 13 - लिम्बुअमनोन नु तामार 1 दाउदरे़ कुस्सा अब्सालोमरे़ तामार मिङ् के़वाःप्मा लत्छा नुमा कुन्साॽ मे़न्छुमाधिक् वये़॥ हे़क्क्याङ् दाउदरे़ वेॽ कुस्सा अमनोन मे़प्नाबे़ल्ले़ खे़न् साॽरिक् नानुॽरु॥ 2 अमनोनरे़ कुम्मा पाःक्मे़ल्ले़ कत्तुमा खुने़ॽ कुन्साॽ मे़न्छुमान् कुसिराॽ थाङे़बाल्ले़ चोगुल्ले़ खुने़ॽ यॽबा थे़त्ते़र पे॥ थेआङ्भे़ल्ले़ खे़न् सिसागे़न् मे़न्छ्या वये़बाल्ले़ खे़न्नु थेआङ् चोःक्मा मे़सुक्तुन्॥ 3 कर दाउदरे़ कुम्भुॽ सिमाहरे़ कुस्सा योनादाब मे़प्नाबे़न् अमनोनरे़ कुन्देःङ्बा वये़, खे़न् साॽरिक् चाःप्पा वये़॥ 4 खे़ल्ले़ अमनोने़न् मे़त्तु, “हाङ्साए, खे़ने़ॽ थेआङ् अक्खेलॽरिक् यॽबा के़धे़त्ते़र के़बेबाबे? खे़ने़ॽ के़म्मे़त्तान्बाबि?” अमनोनरे़ मे़त्तु, “आङ्गाॽ आम्भुॽ अब्सालोमरे़ कुन्साॽ मे़न्छुमा तामारे़न् आसिराॽ थाङे़आङ् वाॽ॥” 5 योनादाबरे़ मे़त्तु, “के़दुक्पा ले़ङ्सिङ्ङे़ॽआङ् युक्नाओ ने़स्से़ॽ॥ हे़क्क्याङ् के़म्बा के़साॽसे़ ताःल्ले़ अक्खे मे़त्ते़ॽ, ‘तामारे़न् ताआङ् आङ्गाॽ आलागि कुजा चोगु पिआर, आङ्गाॽ आदगि थोःक्तुर, आङ्गाॽ आदगि चोगुबान् ओमे़त्तुङ्, हे़क्क्याङ् खे़ल्ले़ कुहुक्कोलाम् चाङ्ॽ॥’” 6 खे़ल्ले़चोगुल्ले़ योनादाबरे़ मे़त्तुबा कुइसिक् अमनोने़न् के़दुक्पा ले़ङ्सिङ्ङाङ् युक्नाओ ने़सिङ्ङाङ् ने़स्से़॥ हाङ्ङिन् कुसाॽसे़ त्ये़ हे़क्केःल्ले़ अमनोने़ल्ले़ मे़त्तु, “आङ्गाॽ आन्साॽ तामारे़न् ताआङ् आङ्गाॽ आदगिए कुजा चोगु पिआर, हे़क्क्याङ् कुहुक्कोलाम् चामा खोसुङ्ल॥” 7 हे़क्क्याङ् दाउदरे़ तामारे़न् इङ्घङ् हाक्तु, “खे़ने़ॽ के़म्भुॽ अमनोनरे़ कुहिम्मो पेगे़ॽआङ् खुने़ॽ कुलागि कुजा चोगे़ पिरे़ॽ॥” 8 खे़ल्ले़चोगुल्ले़ तामारे़न् कुम्भुॽरे़ॽओ त्ये़, हे़क्क्याङ् खे़न् ने़स्से़बा निसु॥ खुने़ॽ फेॽरुम्जि सॽरुआङ् खे़ल्ले़ कुदगि लोःत्तो एःप्सु पिरु॥ 9 हे़क्क्याङ् खे़ल्ले़ लोःत्तो एःम्मे़न् तेॽरुआङ् अमनोनरे़ कुदगि कुजामा चे़त्थ्याओ लोःत्तोन् याक्तु पिरु, कर अमनोने़न् चामा मे़दे़न्दे़न्॥ हे़क्क्याङ् अमनोनरे़ के़रे़क् मनाहाॽ कुयाक्फाङ्लाम् पाङ्घुदेसुसि॥ 10 खे़ङ्हाॽ के़रे़क् मे़बेआङ् खुने़ॽ तामारे़न् मे़त्तु, “आजामा चाःन् आयाक्फाङ्ओ फे़त्ते़ॽ, हे़क्क्याङ् आङ्गाॽ के़हुक्कोलाम् चाङ्ॽ॥” खुने़ॽ एःप्सुबा लोःत्तोन् अमनोनरे़ कुयाक्फाङ्ओ तेॽरु पिरु॥ 11 कर खे़ल्ले़ अमनोने़न् लोःत्तोन् पिरुर पत्छे़ल्ले़ कुहुक्को ते़म्सुआङ् मे़त्तु, “फे़रे़ॽ, आङ्गाॽनु इप्से़ॽ॥” 12 कर खे़ल्ले़ मे़त्तु, “मेःन् आम्भुॽए, आङ्गाॽ आजाःत्थि मे़देसे़न्ने़ॽ॥ अक्तङ्बा याःम्बक् इस्राइलओ चोःक्मा मे़नुॽने़न्॥ अक्तङ्बा ताप्फे़ःम्बा याःम्बक् मे़जोगे़न्ने़ॽ॥ 13 आङ्गाॽ आनारान् आत्तान् तेॽरुङ्ङाङ् चिक्खुङ्बाबे? हे़क्क्याङ् खे़ने़ॽआङ् इस्राइलओ लत्छा ताप्फे़ःम्बा मना, अदङ् के़बोङ्॥ आङ्गाॽ आलागि हाङ्ङिन्नु ताॽजे़क्खे़ॽ, हे़क्क्याङ् खुने़ॽ आङ्गाॽनु मेःक्खिम् चोःक्मा के़भाःक्॥” 14 कर खुने़ॽ तामाररे़ कुबाःन्निन् मे़घे़प्सुन्, हे़क्क्याङ् खुने़ॽ के़धुम्बा चोगे़बाल्ले़ चोगुल्ले़ मे़दे़न्दे़न्छाङ् ते़म्सुआङ् खे़न्नु इप्से़॥ 15 खे़न् एगाङ् अमनोनरे़ खे़न् साॽरिक् चिःप्मा हेःक्तु॥ अमनोनरे़ तगि आक्ख्यारिक् नानुॽरु आल्लो खे़न्नुःल्ले़आङ् साॽरिक् चिःत्हेःक्तु॥ हे़क्क्याङ् अमनोनरे़ खे़न् मे़त्तु, “पोगे़ॽआङ् पेगे़ॽ॥” 16 कर खुने़ॽ अमनोने़न् मे़त्तु, “आम्भुॽए, आङ्गाॽ अक्खेलॽरिक् के़लःत्ताबाङ्ग नुबा मेःन्॥ खे़ने़ॽ के़जोगुबा ताप्फे़ःम्बा याःम्बक्किन्नुःल्ले़आङ् कङ्ग साॽरिक् ताप्फे़ःम्बा पोःक्खे़॥” खे़ल्ले़ तामाररे़ कुबाःन्निन् खे़म्माए मे़घे़प्सुन्, 17 हे़क्क्याङ् खुने़ॽ कुयाःम्बक् के़जोक्पे़न् उःत्तुआङ् मे़त्तु, “कन् मे़न्छुमान् लःत्ते़देसे़ॽ॥ कन् लाःक्कात् लःत्ते़ॽआङ् लाम्धेःप्पे़न् ए़त्ते़ॽ॥” 18 हे़क्क्याङ् कुयाःम्बक् के़जोःक्पे़ल्ले़ खे़न् पाःक्खा लःत्तुदेसुआङ् लाम्धेःप्पे़न् ए़त्तु॥ तामारे़ल्ले़ मेःक्खिम् मे़न्जोःक्के के़वाॽमा हाङ्सामारे़ मे़जाक्खुबा कुभुङ् इसेःङ्बा साॽरिक् नुबा चाङ् चाक्खुआङ् वये़॥ 19 हे़क्क्याङ् खुने़ॽ कुधे़गेःक्पो खाप्पु हुःत्छिङ्, खुने़ॽ चाक्खुआङ् वये़बा केःम्बा कुजाङ्ङिन् थे़ःक्खु, हे़क्क्याङ् कुधे़गेःक्पो कुहुक्किन् फत्छुआङ् हाबे़र पे॥ 20 हे़क्केःल्ले़ कुम्भुॽ अब्सालोमरे़ सेःन्दोसु, “खे़ने़ॽ के़म्भुॽ अमनोने़न् खे़ने़ॽनु वये़बि? आल्ल स्वाःत् युङे़ॽ॥ खुने़ॽग खे़ने़ॽ के़म्भुॽरो, कन् पाःन्निन् के़निङ्वाॽओ मे़युक्खे़न्ने़ॽ॥” हे़क्केःल्ले़ तामारे़न् कुम्भुॽ अब्सालोमरे़ कुहिम्मो लाप्मे़भुसुमा मे़न्छुमा कुइसिक् युङे़॥ 21 दाउद हाङ्ङिल्ले़ कन् के़रे़क् पाःन्हाॽ खे़प्सुआङ् साॽरिक् कुसिक् पोगे़॥ 22 कर अब्सालोमरे़ अमनोने़न् थेआङ् पान् मे़मे़त्तुन्॥ खुने़ॽ कुन्साॽ मे़न्छुमान् कुजाःत्थि तेसु पिरुबाल्ले़ चोगुल्ले़ अमनोने़न् चिःप्मा हेःक्तुरो॥ अब्सालोमरे़ कुले़क्वा नुःक्तु 23 तङ्बेॽ ने़त्छि एगाङ् अब्सालोमरे़ के़रे़क् हाङ्साहाॽ एफ्राइम कुबेसाङ् बाल हासोर मे़प्नाबा ते़न्नो मे़ल्लुक् मुरिक् नःङ्मा तङ्नाम्मो उःत्तुसि॥ 24 अब्सालोमे़न् हाङ्ङिल्ले़ कुदुम्से़ पेआङ् मे़त्तु, “आदाङ्बे, आङ्गाॽ मे़ल्लुक् नःङ्मा तङ्नाम् तोसुङ्॥ आदाङ्बा हाङ्ङिन् नु खे़ने़ॽ के़से़वारोबाहाॽ के़द्ये़इबि?” 25 हाङ्ङिल्ले़ मे़त्तु, “मेःल्लो, आङ्गाॽ आस्सा, आनिगे के़रे़क् त्ये़इगे़आङ् खे़ने़ॽ तुक्खे मे़जाःत्तासिगे़न्॥” अब्सालोमरे़ याम्मो मे़त्तु, कर दाउदे़न् पेःक्मा मे़दे़न्दे़न्, हे़क्क्याङ् मुॽइसाम् पिरु॥ 26 हे़क्केःल्ले़ अब्सालोमरे़ मे़त्तु, “आदाङ्बा तामा के़न्छुक्ने़न्ने़भग्र आम्भुॽ अमनोने़न् के़बाङ्घुबि?” हाङ्ङिल्ले़ सेःन्दोसु, “खे़न् थेआङ् खे़ने़ॽनु पेःक्पाबे?” 27 कर अब्सालोमरे़ अमनोन नु हाङ्ङिल्ले़ वेॽ कुस्साहाॽ खुने़ॽनु मे़म्बाङ्सिङ्ङे थारिक् हाङ्ङिन् ये़ःक्काङ् ये़ःक् मे़त्तुर पेलि फाक्तु॥ 28 अब्सालोमरे़ कुमनाहाॽ अक्तङ्बा इङ्जाङ् पिरुसि, “खे़प्से़म्मे़ॽ, अमनोने़न् सेजङ्वाःल्ले़ मयुॽ, हे़क्क्याङ् आङ्गाॽ ‘अमनोने़न् थगे़म्मे़ॽ’ मे़त्निङ्ङिल्ले़ खे़न् से़रे़म्मे़ॽ॥ मे़गिसे़म्मिन्ने़ॽ॥ कङ्ग आङ्गाॽ आइङ्जाङ्लो॥ थधप् मे़ल्लॽए हाङ्हाङ् लॽरे़म्मे़ॽ॥” 29 हे़क्क्याङ् अब्सालोमरे़ कुमनाहाॽ मुरा मे़त्तुसिबा कुइसिक् अमनोने़न् मे़मे़त्तु॥ हे़क्केःल्ले़ के़रे़क् हाङ्साहाॽ हाराहारा खुन्छिॽ अदङ्हाॽओ मे़लासे़आङ् हिम्मो मे़बे॥ 30 खे़ङ्हाॽ लाम्मो मे़बेर मे़बत्छे़ल्ले़सा हाङ्ङिल्लो अक्तङ्बा इङ्घङ् के़रे़, “अब्सालोमरे़ के़रे़क् हाङ्साहाॽ से़रुसि, हे़क्क्याङ् आत्तिन्नाङ् मे़न्हिङे़न्॥” 31 हे़क्केःल्ले़ हाङ्ङिन् पोगे़आङ् कुदेःत्ते़न् थे़ःक्खु, हे़क्क्याङ् खाम्बाङ्ङो सल्लिक् सन्छिङ्॥ खुने़ॽ कुबेसाङ् के़ये़प्पा कुसे़वारोबाहाॽरे़आङ् खुन्छिॽ तेत्हाॽ मे़धे़ःक्खु॥ 32 कर दाउदरे़ कुम्भुॽ सिमाहरे़ कुस्सा योनादाबरे़ मे़त्तु, “खे़ल्ले़ के़रे़क् हाङ्साहाॽ से़रुसि फाॽआङ् आदाङ्बारे़ मे़इःत्ते़न्ने़ॽ॥ अमनोने़ल्लक् स्ये़॥ खे़ल्ले़ कुन्साॽ तामारे़न् अमनोनरे़ कुजाःत्थि तेसुर इप्तुआङ्धो अब्सालोमरे़ हे़क्के चोःक्मा निङ्वाॽ कत्तुआङ् वये़॥ 33 के़रे़क् हाङ्साहाॽ मे़स्ये़ के़लॽबा इङ्ले़क्पा इङ्घङ्ङो आदाङ्बारे़ निङ्वाॽ मे़बिरे़न्ने़ॽ॥ अमनोने़ल्लक् स्ये़॥” 34 हे़क्के पोःक्खे़ल्ले़ अब्सालोमे़न् खे़त्छिङ्ङाङ् पे॥ खे़ब्याङ् लाम्धेत् के़गोबाल्ले़ कुनारान् फोःक्खुआङ् ओमये़ल्ले़ मनालुप्हाॽ होरोनाइम लाम्बा कोःक्माए कोःक्मा मे़ये़र मे़बत्छे़बा निसुसि॥ खे़न् त्ये़आङ् हाङ्ङिन् अक्तङ्बा इङ्घङ् पिरु, “होरोनाइमलाम् कोःक्माए कोःक्मा मनाहाॽ मे़ये़र मे़बत्छे़बा आङ्गाॽ निसुङ्सिङ्॥” 35 योनादाबरे़ हाङ्ङिन् मे़त्तु, “ओमे़त्ते़ॽ, खे़ङ्हाॽ मे़दा फाॽआङ् आङ्गाॽ मे़त्ने़बा कुइसिक् हाङ्साहाॽ मे़दार मे़बत्॥” 36 खे़ल्ले़ पाःत्तुसुरुनामे़ःन्ने हाङ्साहाॽ हिम्मो मे़लासे़, हे़क्क्याङ् फिरिक् फिरिक् मे़भिःक्ते़र मे़हाबे़॥ हाङ्ङिन् नु के़रे़क् कुमनाहाॽआङ् साॽरिक् मे़हाबे़॥ 37 अब्सालोमे़न् गसुरबा हाङ् अम्मिउदरे़ कुस्सा तल्मैरो पेआङ् युङ्मा हेःक्ते़॥ कर हाङ्ङिल्ले़ थिक्याःन्धक् कुस्सा अमनोने़न् हाःप्तुर युङे़॥ 38 गसुर लाजेॽओ खे़त्छिङ् पेआङ् अब्सालोमे़न् तङ्बे सुम्सि खे़प्मो युङे़॥ 39 हे़क्क्याङ् अमनोने़न् स्ये़बाओ कुलुङ्माॽ हिःम्मा नाॽरे़ हे़क्क्याङ् दाउदे़न् आःन्छिङ्ङाङ् याम्मो अब्सालोमरे़ॽओ पेःक्मा निङ्वाॽ चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.