२ सामुए़ल 12 - लिम्बुनातानरे़ दाउदे़न् फे़ःक्तु 1 हे़क्क्याङ् यहवे दाङ्बे़ल्ले़ माङ्निङ्वाॽपान् के़बाःप्पा नाताने़न् दाउदरे़ॽओ पाङ्घु, हे़क्क्याङ् दाउदरे़ॽओ त्ये़आङ् मे़त्तु, “लत्छा ये़क्यक्को ने़त्छि मना वये़सि, थिक्किन् याङ्साकुन्धेसाबा वये़, वेॽसमा याङ्गे़साॽबा वये़॥ 2 याङ्साकुन्धेसाबा मनाःल्ले़न् यरिक् मे़ल्लुक् मे़ःन्दालुप् नु पित्लुप् मे़वये़, 3 कर खे़न् याङ्गे़साॽबा मनाःन्नु थेआङ् होःप्ते़, खुने़ॽ इङुबा लत्छा कुम्मामा मे़ल्लुक्साःत्थिक् कत्तु॥ खुने़ॽ खे़न् आबाङे हिङ्घुआङ् वये़, आबाङे कुहिम्मो खुने़ॽ कुस्साहाॽनु खे़न् यम्मा पोःक्खे़आङ् वये़॥ खे़ल्ले़ कुजे़त्थ्याओए च, कुघोर्याओए थुङु, हे़क्क्याङ् कुभक्तुङ्मोए इप्से़॥ खे़न् खुने़ॽ कुस्सा मे़न्छिन् कुइसिक् मे़त्तु॥ 4 थिक्ये़न् लत्छा लाम्दिःक्पा थिक् खे़न् याङ्साकुन्धेसाबा मनाःल्ले़ कुहिम्मो त्ये़, हे़क्क्याङ् खे़न् याङ्साकुन्धेसाबा मनाःल्ले़ आबाङे कुमे़ल्लुक् लुप्लाम् लाम्दिःक्पा मनान् सा पिमा निङ्वाॽ मे़जोगुन्, कर खे़न् याङ्गे़साॽबाल्ले़ कुमे़ल्लुक्साःत्ते़न् तारुआङ् खे़न् लाम्दिःक्पान् साभाङ्जा पिमा यारिप् चोगु॥” 5 दाउदे़न् खे़न् पाःन्निल्ले़ साॽरिक् कुसिक् पोगे़, हे़क्क्याङ् अःक्ते़आङ् पाःत्तु, “यहवे दाङ्बे़न् कुहिङ्वे़त् वाॽबा कुइसिक् पाःत्तुङ्ॽ, अक्तङ्बा याःम्बक् के़जोःक्पा मनान् सिमा लाॽरु! 6 खे़ल्ले़ लुङ्माॽ मे़न्दुक्के अक्तङ्बा याःम्बक् चोगुबाल्ले़ चोगुल्ले़ खे़न् मे़ल्लुक्साःत्तिल्ले़ कुले़क्वा लिसिले़ङ् थारिक् यरिक् कुमे़न् हुङ्मा पोङ्ॽ॥” 7 हे़क्केःल्ले़ नातानरे़ दाउदे़न् अक्खे मे़त्तु, “खे़न् मनान् खे़ने़ॽएरो! यहवे दाङ्बा इस्राइलबा निङ्वाॽफुमाङ्ङिल्ले़ पाःत्तुॽ, ‘आङ्गाॽ इस्राइलिहाॽरे़ खुनिॽ हाङ् चोःक्ने़॥ आङ्गाॽ सावलरे़ कुहुक्लाम्बा से़ःप्ने़॥ 8 खे़ने़ॽ के़न्दाङ्बाल्ले़ कुहिम् नु खुने़ॽ कुमेःत्हाॽ के़मेःत् पोङ्से़ पिने़॥ इस्राइल नु यहुदा सुवाङ्हाॽ पिने़॥ हे़क्क्याङ् खे़ल्ले़ के़न्योरे़न्छाङ् आङ्गाॽ वेॽ यरिक् पिने़बारो॥ 9 कर खे़ने़ॽ यहवे दाङ्बे़ल्ले़ कुनिमो थे़माःन् ताप्फे़ःम्बा वये़ हाबा खे़न् के़जोगुआङ् थेआङ् यहवे दाङ्बे़ल्ले़ कुबाःन्जाक्किन् योयोक्पा के़जोगुबाबे? खे़ने़ॽ हित्ति उरियान् ताभेःल्ले़ के़से़रु, हे़क्क्याङ् खे़ल्ले़ कुमेःत्तिन् के़मेःत् पोङ्से़ के़देॽरु॥ खे़ने़ॽ खे़न् मनान् अम्मोनिहाॽरे़ खुन्छिॽ ताभेःल्ले़ सिमा के़बाङ्घु॥ 10 खे़ने़ॽ योयोक्पा के़जोगाङ्बाल्ले़ नु हित्ति उरियाःल्ले़ कुमेःत्तिन् खे़ने़ॽ के़मेःत् चोःक्से़ के़देॽरुबाल्ले़, खे़ने़ॽ के़हिम्सयङ्ले़ थङ्लक् चोःक्मा पोङ्लो॥’ 11 “यहवे दाङ्बाल्ले़ अक्खे पाःत्तु—‘आङ्गाॽ खे़ने़ॽ आबाङे के़हिम्सयङ्लाम्बा खे़ने़ॽओ मे़क्मे़न् तारुङ्ॽ॥ आङ्गाॽ खे़ने़ॽ के़मेःत्हाॽ खे़ने़ॽ के़दगि खे़ने़ॽ के़बेसाङ्बा मनान् पिरुङ्, हे़क्क्याङ् खे़न् ले़न्दिक्सा खे़न् के़मेःत्हाॽनु इम्॥ 12 थेआङ्भे़ल्ले़ खे़ने़ॽ थे के़जोगु खे़ङ्ग सिबिॽआङ् के़जोगु, कर आङ्गाॽ कङ्ग के़रे़क् इस्राइलिहाॽरे़ मे़निसुर ले़न्दिक् खाओःत्तिल्ले़ चोगुङ्ॽ॥’” 13 हे़क्केःल्ले़ दाउदे़ल्ले़ नाताने़न् मे़त्तु, “आङ्गाॽ यहवे दाङ्बाल्ले़ कुदक्ले़ङ्वाओ लायो चोगुङ्॥” नाताने़ल्ले़ दाउदे़न् मे़त्तु, “यहवे दाङ्बाल्ले़ खे़ने़ॽ के़लायोन् खे़त्तुआङ् वाॽ, खे़ने़ॽ के़न्छिने़न्॥ 14 कर कन् हे़क्तङ्बा याःम्बक् के़जोगुआङ् यहवे दाङ्बे़न् कुनामे़न्छाॽ के़मे़त्तुबाल्ले़ चोगुल्ले़, खे़ने़ॽलाम्बा सागे़वाःन्छिङ्बा के़स्सान् सिःॽ॥” 15 हे़क्क्याङ् नाताने़न् कुहिम्मो पेरो॥ हे़क्क्याङ् उरियाःल्ले़ कुमेःत्तिल्ले़ दाउदलाम्बा सावाःन्दुबा कुस्सान् यहवे दाङ्बे़ल्ले़ तुगे़र याःन्दु, हे़क्क्याङ् खे़न् साॽरिक् तुगे़॥ दाउदरे़ कुस्सान् मासिङ् 16 दाउदरे़ खे़न् अङे़ःक्वाःल्ले़ कुलागि यहवे दाङ्बे़न्नु तुवा चोगु॥ खुने़ॽ तःक्ने़त् युङे़, हे़क्क्याङ् हिम्सिगाङ् पेआङ् खाम्बाङ्ङो से़न्दिक् इप्से़आङ् ने़स्से़॥ 17 हे़क्क्याङ् खुने़ॽ कुहिम्मो के़वाॽबा साॽरिक् नासाॽरुसिबा काप्पोदुम्साहाॽ कुबेसाङ् मे़ये़म्सिङ्ङाङ् खाम्बाङ्ङोलाम् फोङ्मा मे़गोःत्तु, कर खुने़ॽ पोःक्मा मे़दे़न्दे़न्, हे़क्क्याङ् खे़ङ्हाॽनु चामाआङ् मे़दे़न्दे़न्॥ 18 खे़न् अङे़ःक्वान् तुक्मा हेःक्ते़बा ये़त्नाम् के़रे़ल्ले़ स्ये़॥ दाउदरे़ कुसे़वारोबाहाॽरे़ अङे़ःक्वान् स्ये़ मे़प्मा मे़गिसे़ थेआङ्भे़ल्ले़ खे़ङ्हाॽरे़ मे़बाःत्तु, “अङे़ःक्वान् कुहिङ्वे़त् वये़ल्ले़ आनिगे खुने़ॽ मे़त्तुम्बे़, हे़क्केःल्ले़ खुने़ॽ मे़घे़प्सुन्॥ आल्ल आक्खेलॽरिक् अङे़ःक्वान् स्ये़ मे़प्मा सुक्तुम्बे़बे? हे़क्के मे़प्मे़ल्ले़ खुने़ॽ खाःन्छिङ्बि!” 19 कर दाउदरे़ खुने़ॽ कुसे़वारोबाहाॽ सोरिक् खुस्खुस् मे़लॽरे़बा निसु, हे़क्केःल्ले़ अङे़ःक्वान् स्ये़रे़छ के़लॽबा निङ्वाॽ खोसुआङ् मे़त्तुसि, “अङे़ःक्वान् स्ये़बि?” हे़क्केःल्ले़ खे़ङ्हाॽरे़ मे़मे़त्तु, “ओरो, अङे़ःक्वाःङ्ग स्ये़॥” 20 हे़क्क्याङ् दाउदे़न् खाम्बाङ्ङोलाम् पोगे़, हे़क्क्याङ् कुना वाहप्तुआङ् निःङ्गेॽ हुःत्छिङ्, तेत् ले़क्सिङ्॥ हे़क्क्याङ् यहवे दाङ्बे़ल्ले़ कुसाःङ्गाहिम्मो पेआङ् साम्बोन् हबत् फन्छिङ् हे़क्क्याङ् से़वा चोगे़॥ खे़न् एगाङ् खुने़ॽ हिम्मो पे, कुजा फे़प्मा इङ्जाङ् पिरुसि, हे़क्क्याङ् कुजा मे़भे़त्तुआङ् खुने़ॽ च॥ 21 खे़ब्याङ् कुसे़वारोबाहाॽरे़ खुने़ॽ मे़मे़त्तु, “कन् थेबे? अङे़ःक्वान् कुहिङ्वे़त् वये़र थारिक् खे़ल्ले़ कुलागि आदाङ्बा तःक्ने़त् के़युङे़, हे़क्क्याङ् के़हाबे़ के़भिःक्ते़॥ कर आल्ल खे़न् स्ये़, हे़क्क्याङ् आदाङ्बाग के़बोगे़आङ् कुजा के़ज॥” 22 खुने़ॽ मे़त्तुसि, “अङे़ःक्वान् कुहिङ्वे़त् वये़र थारिक् यहवे दाङ्बे़ल्ले़ आङ्गाॽ लुङ्माॽ तुक्का हे़क्क्याङ् अङे़ःक्वान् हिङ्ङिआ फाॽआङ् आङ्गाॽ तःक्ने़त् युङाङ्, हे़क्क्याङ् हाबाङ्॥ 23 कर आल्ल खे़न् स्ये़, हे़क्केःल्ले़ थेआङ् तःक्ने़त् युङ्ङाबे? याम्मो खे़न् नुःक्मा ताःप्मा सुक्तुङ्बि? आङ्गाॽ खुने़ॽओ पेःक्मा सुक्का, कर खे़न् आङ्गाॽओ नुःङ्मा तामा मे़सुक्ने़न्लो॥” सोलोमने़न् सावाःन्छिङ् 24 खे़ब्याङ् दाउदरे़ कुमेत् बेथसेबान् हाङ्हाङ्वा पिरु॥ खुने़ॽ खे़ल्ले़ॽओ पे, हे़क्क्याङ् खे़न्नु इप्से़, हे़क्क्याङ् खे़ल्ले़ लत्छा सा कत्तु, हन्नाङ् खे़ल्ले़ कुमिङ् सोलोमन युक्खु॥ यहवे दाङ्बाले़ खे़न् लुङ्माॽ तुक्तु, 25 हे़क्क्याङ् यहवे दाङ्बाल्ले़ खे़न् लुङ्मा तुक्तुबाल्ले़ चोगुल्ले़ खे़ल्ले़ कुमिङ् यददिया युक्खुर फाॽआङ् माङ्निङ्वाॽपान् के़बाःप्पा नातानलाम् खुने़ॽ दाउदे़न् इङ्घङ् हाक्तुरो॥ दाउदरे़ रब्बा ये़क्यक्किन् हुक्काप् चोगु ( १ साप्मु २०:१-३ ) 26 खे़न् एगाङ् योआबरे़ अम्मोनिहाॽरे़ खुन्छिॽ ये़क्यक् रब्बाःल्ले़ कुदक्ले़ङ्वाओ थङ् चोगुआङ् हाङ्यक्किन् हुक्काप् चोगु॥ 27 हे़क्क्याङ् योआबरे़ दाउदे़न् अक्तङ्बा इङ्घङ् हाक्तु, “आङ्गाॽ रब्बाःल्ले़ कुदक्ले़ङ्वाओ थङ् चोगुङ्ङाङ् ये़क्यक्कोबा च्वाःत् के़बुम्बादे़न्हाॽ हुक्काप् चोगुङ्॥ 28 आल्ल आदाङ्बारे़ थक्सुबा सुप्से़से़ हे़क्क्याङ् ये़क्यक्किन् कबे़ॽआङ् खे़न् हुक्काप् चोगे़ॽ, मेःन्ने़भग्र आङ्गाॽ खे़न् ये़क्यक्किन् हुक्काप् चोगुङ्ॽ, हे़क्क्याङ् खे़न् ये़क्यक्किन् आङ्गाॽ आमिङ्ङो पोङ्ॽ॥” 29 खे़ल्ले़चोगुल्ले़ दाउदरे़ के़रे़क् थक्सुबाहाॽ सुप्सुसि, हे़क्क्याङ् रब्बा ये़क्यक्को पे, हे़क्क्याङ् खे़ल्ले़ कुदक्ले़ङ्वाओ थङ् चोगुआङ् हुक्काप् मे़त्छिङ्॥ 30 हे़क्क्याङ् खुने़ॽ अम्मोनिहाॽरे़ खुनिॽ हाङ्ङिल्ले़ कुदिचःन् फुन्दु, खे़न् इमे़ल्लुङ्बा लुङ् के़बप्पा चोगे़, हे़क्क्याङ् खे़न् सुम्बोङ्ङाङ् ङासि किलो यारिक् लिःप्ते़, हे़क्क्याङ् खे़न् दाउदरे़ कुधे़गेःक्पो मे़घुःक्तु॥ खुने़ॽ ये़क्यक्लाम्बा मे़नाप्तुसिबा साॽरिक् यरिक् चिगक्वाहाॽ तेॽरु॥ 31 खुने़ॽ खे़प्मो के़युङ्बाहाॽ तेॽरुसिआङ् आरा नु फे़न्जेॽरे़ वेॽ वेॽ परिक्पा सामा नु तःन्दिॽहाॽ चोःक्मा याःम्बक् चोःक्मा पाङ्घुसि, हे़क्क्याङ् खाम्ले़क्आङ् चोःक्पाङ्घुसि॥ दाउदरे़ आम्मोनिहाॽरे़ खुन्छिॽ के़रे़क् ये़क्यक्हाॽओ हाबा अक्तङ्बा याःम्बक् चोःक्मा पाङ्घुसि॥ खे़न् एगाङ् दाउद नु खुने़ॽ कत्तुसिबा के़रे़क् थक्सुबाहाॽ यरुसले़म मे़नुःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.