२ सामुए़ल 11 - लिम्बुदाउद नु बेथसेबा 1 फुङ्वाःम्मा ये़म्मो हाङ्हाॽ थङ् चोःक्से़ मे़लःन्दे़ल्ले़ दाउदरे़ योआब नु खुने़ॽ वेॽ कुसुहाङ्युक्पाहाॽ नु के़रे़क् इस्राइलबा थक्सुबाहाॽ पाङ्घुसि॥ हे़क्क्याङ् खे़ङ्हाॽरे़ अम्मोनिहाॽ मे़नाःन्दुसि, हे़क्क्याङ् रब्बा ये़क्यक्किन् मे़गबु॥ कर दाउदे़ङ्ग यरुसले़ःम्मोए याःक्ते़॥ 2 थिक्यान् युःन्छिक् दाउदे़न् कुयुङ्मादे़न्नोलाम् पोगे़आङ् हाङ्हिम्मोबा फे़बे़ के़लॽबा खाम्बुओ लासे़आङ् लाङ्घेगे़र वये़ल्ले़ खुने़ॽ लत्छा मे़न्छुमाधिक् वारुःम्सिङ्ल यागे़बा निसु, खे़न् मे़न्छुमान् साॽरिक् नुमा चोगे़॥ 3 खे़न् मे़न्छुमान् हाःत्ति फाॽआङ् सेःन्दोसे़ मना पाङ्घुसि॥ हे़क्क्याङ् थिक्ले़ पाःत्तु, “खे़ङ्ग एलिएमरे़ कुस्सा मे़न्छुमा, हित्ति उरियारे़ कुमेत् बेथसेबान् के़लॽबा निङ्वाॽ खोसु॥” 4 दाउदरे़ खे़न् मे़न्छुमान् कुलासे़ कुसे़वारोबाहाॽ पाङ्घुसि, हे़क्क्याङ् खे़न् त्ये़, हे़क्क्याङ् दाउदे़न् खे़न्नु इप्से़ (खे़न् कुसिम् वाहप्मालाम् सुत्थो पोःक्खे़आङ् वये़॥) हे़क्क्याङ् खे़न् कुहिम्मो पे॥ 5 हे़क्क्याङ् खे़न् मे़न्छुमान् मे़न्छुक्मा पोःक्खे़, हे़क्क्याङ् खे़ल्ले़ “मे़न्छुक्मा पोःक्खाङ्” फाॽआङ् दाउदे़न् इङ्घङ् हाक्तु॥ 6 खे़ल्ले़चोगुल्ले़ दाउदरे़ योआबे़न् मे़त्तु, “हित्ति उरियान् आङ्गाॽओ पाङ्घे़ॽ॥” हे़क्केःल्ले़ योआबरे़ खे़न् दाउदरे़ॽओ पाङ्घु॥ 7 हे़क्क्याङ् उरियान् खुने़ॽओ के़रे़॥ हे़क्क्याङ् दाउदरे़ योआबे़न् नु थक्सुबाहाॽ आक्खे मे़लॽर मे़याक् फाॽआङ् खुने़ॽ सेःन्दोसु॥ हे़क्क्याङ् आक्खेलॽरिक् थङ् पोङ्ल पत् फाॽआङ्ङाङ् सेःन्दोसु॥ 8 खे़न् एगाङ् दाउदरे़ उरियान् मे़त्तु, “खे़ने़ॽ यो के़हिम्मो पेगे़ॽआङ् सप्मा ने़स्से़ॽ॥” खे़न् हाङ्हिम्लाम्बा लःन्दे़आङ् हाङ्ङिल्ले़ खे़ल्ले़ कुएगाङ् कुएगाङ् चे़सुङ् हाङुदेसु॥ 9 कर हित्ति उरियान् कुहिम्मो मे़बेने़न्, हाङ्ङिल्ले़ कुसे़वारोबाहाॽनु हाङ्हिम् लाम्धेःप्पोए इप्से़॥ 10 “उरियाःङ्ग खुने़ॽ कुहिम्मो मे़बेने़न्” फाॽआङ् दाउदरे़ खे़प्सुआङ् मे़त्तु, “खे़ने़ॽग माःङ्घालाम् लाङ्के़घेगे़आङ् के़द्ये़बा मेःम्बि? खे़ने़ॽ थेआङ् के़हिम्मो के़म्बेने़न्?” 11 उरियाःल्ले़ मे़त्तु, “निङ्वाॽफुमाङ्ङिल्ले़ कुमाङ्हुप् सन्दोक्किन्, इस्राइल नु यहुदाबा थक्सुबाहाॽ, हे़क्क्याङ् आङ्गाॽ आन्दाङ्बा योआब नु आदाङ्बारे़ के़सुहाङ्युक्पाहाॽ ते़म्बेॽओ साःङ्गाहिम् मे़लेःत्तुआङ् मे़युङ्॥ आङ्गाॽ आक्खेलॽरिक् चाङ् थुङुङ्ङाङ् आमेःत्ते़न्नु इम्से़ हिम्मो पेःक्काबे? आदाङ्बा के़हिङ्ल थारिक् आङ्गाॽ हे़क्के चोःक्मा मे़सुक्कान्॥” 12 हे़क्केःल्ले़ दाउदरे़ उरियान् मे़त्तु, “हे़क्केग्र आइन् कप्मोए युङे़ॽ हे़क्क्याङ् ताःन्दिक् खे़ने़ॽ पाङ्ने़॥” खे़ल्ले़चोगुल्ले़ उरियान् खे़न् ये़न्नो नु कुदाःन्दिक्मा थारिक् यरुसले़ःम्मोए युङे़॥ 13 दाउदरे़ खे़न् चाजासे़ उःत्तु, हे़क्क्याङ् खुने़ॽ मसु॥ कर युःन्छिक् खे़न् पाःक्खा लःन्दे़आङ् कुहिम्मो मे़बेने़न् कर हाङ्हिम्मोए हाङ्ङिल्ले़ कुसे़वारोबाहाॽनु से़न्दिक् इप्से़॥ 14 कुदाःन्दिक्मा दाउदरे़ लत्छा सक्इङ्घङ् साप्तुआङ् उरियाःल्ले़ कुहुक्कोलाम् योआबे़न् हाक्तु॥ 15 सक्इङ्घङ्ङो खुने़ॽ अक्खेलॽरिक् साप्तु, “यरिक् थङ् के़बोङ्बा ते़न्नो, निङ्मिहाॽरे़ खुन्छिॽ तगि उरियान् पाङ्घे़आङ् खिनिॽ एगाङ् वये़म्मे़ॽ, हे़क्क्याङ् खे़न् थङ्ङो सिर॥” 16 योआबरे़ ये़क्यक्किन् कबुआङ् ने़स्से़ल्ले़ खुने़ॽ उरियान् थङ् चोःक्मा के़धुम्बा निङ्मि के़वाॽबा ते़न्नो पाङ्घु थेआङ्भे़ल्ले़ खुने़ॽ थङ् चोःक्मा के़धुम्बा निङ्मिहाॽ खे़प्मो मे़वाॽ के़लॽबान् निसुआङ् वये़॥ 17 हे़क्क्याङ् ये़क्यक्पा मनाहाॽ चघप् मे़लःन्दे़आङ् योआबे़न्नु थङ् चोःक्मा मे़हेःक्ते़, हे़क्क्याङ् दाउदरे़ कुभा कुधक्सुबाहाॽ मे़स्ये़॥ हित्ति उरियाःन्नाङ् स्ये़॥ 18 हे़क्क्याङ् योआबे़ल्ले़ दाउदे़न् थङ्ङो के़बोङ्बा के़रे़क् इङ्घङ्ङिन् तेॽसे़ मनाधिक् पाङ्घु॥ 19 हे़क्क्याङ् खे़न् इङ्घङ् के़देॽबा मनान् अक्तङ्बा इङ्जाङ् पिरु, “खे़ने़ॽ थङ्ङो के़बोङ्बा के़रे़क् पाःन्हाॽ हाङ्ङिन् चे़क्ते़सुरे़ॽ, 20 हे़क्क्याङ् हाङ्ङिन् कुसिक् पोःक्काङ् अक्खे पाःत्तुने़भग्र, ‘थङ् पोःक्खे़ल्ले़ खिनिॽ थेआङ् ये़क्यक्किल्ले़ कुबेसाङ् के़बेगिबा? लुङ्धाक्लाम्बा तोङ् मे़आबु फाॽआङ् खिनिॽ ले़मा के़बोङ्बा वये़मे़न्॥ 21 यरुबबेसेतरे़ कुस्सा अबिमेलेक्के़न् हाःत्ले़ से़रु? खे़न् लत्छा मे़न्छुमाःल्ले़ लुङ्सुम्मे़न् लुङ्धाक्लाम् मक्थासुआङ् से़रुआङ् वये़ मेःम्बि? हे़क्क्याङ् खुने़ॽ तेबेसओ स्ये़आङ् वये़ मेःम्बि? खिनिॽ थेआङ् लुङ्धाक्किल्ले़ कुबेसाङ् के़बेगिबा?’ पाःत्तुने़भग्र खे़ने़ॽ अक्खे मे़त्ते़ॽ, ‘आदाङ्बारे़ के़से़वारोबा हित्ति उरियाःन्नाङ् स्ये़॥’” 22 खे़न् इङ्घङ् के़देॽबा मनान् थासिङ्, हे़क्क्याङ् दाउदे़न् वये़बा ते़न्नो त्ये़, हे़क्क्याङ् योआबरे़ इङ्जाङ् पिरुबा कुइसिक् इङ्घङ् चे़क्तु॥ 23 खे़ल्ले़ दाउदे़न् मे़त्तु, “निङ्मिहाॽ आनिगे तक्ले़ङ्वाओ ते़म्बेॽओ मे़जुप्से़, हे़क्क्याङ् आनिगे थङ्ङो नाःम्मा मे़हे़ःक्तिगे़, कर आनिगे खे़ङ्हाॽ ये़क्यक्किल्ले़ लाम्धेःप्पो थारिक् फत्तुम्सिम्बे़र के़त्तुम्सिम्बे॥ 24 हे़क्क्याङ् लुङ्धाक्लाम्बा तोङ् के़आप्पाहाॽरे़ के़से़वारोबाहाॽ तोःङ्ङिल्ले़ मे़आबुसि, हे़क्क्याङ् हाङ्ङिल्ले़ के़मनाहाॽ मे़स्ये़॥ हे़क्क्याङ् के़से़वारोबा हित्ति उरियाःन्नाङ् स्ये़॥” 25 दाउदरे़ खे़न् मनान् मे़त्तु, “योआबे़न् अक्खे मे़त्ते़ॽ, ‘खे़ने़ॽ मे़गिसे़न्ने़ॽ, ताभेःल्ले़ आक्खेलॽरिक् लत्छा मनान् से़रुॽ, हाबाहे़क्के लॽरिक् वेॽइन्नाङ् से़रुॽ॥ ये़क्यक्किन् फत्ताम्मे़ॽ, हे़क्क्याङ् खे़न् खाप्पुध्यःङ् चोगाम्मे़ॽ॥’ योआबे़न् हाङ्हाङ् लॽर फाॽआङ् कन् पाःन्निन् चे़क्ते़ॽ॥” 26 उरियाःल्ले़ कुमेःत्तिल्ले़ कुये़म्बाःन् स्ये़ के़लॽबा खे़प्सु, हे़क्केःल्ले़ खे़ल्ले़ कुलागि ने़त् युङे़॥ 27 हे़क्क्याङ् ने़त् युङ्मा सुरुआङ् दाउदरे़ मनाहाॽ पाङ्घुसि, हे़क्क्याङ् खे़ङ्हाॽरे़ कुहिम्मो मे़दारु॥ खे़न् दाउदरे़ कुमेत् पोःक्खे़, हे़क्क्याङ् लत्छा ये़म्बित्छा साधिक् कत्तु॥ कर दाउदरे़ अक्तङ्बा याःम्बक् चोगुआङ् यहवे दाङ्बान् सित्छिङ्ल याःन्दुआङ् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.