२ सामुए़ल 10 - लिम्बुदाउदरे़ अम्मोनिहाॽ नाःन्दुसि ( १ साप्मु १९:१-१९ ) 1 कन् एगाङ् अम्मोनिहाॽरे़ खुन्छिॽ हाङ्ङिन् स्ये़, हे़क्क्याङ् खे़ल्ले़ कुस्सा हानुने़ल्ले़ हाङ्चोःक्मा हेःक्तु॥ 2 दाउदरे़ पाःत्तु, “नाहासरे़ आङ्गाॽ लुङ्माॽ तुक्ताङ्बा कुइसिक् आङ्गाॽ खुने़ॽ कुस्सा हानुने़न् लुङ्माॽ तुक्माए पोङ्ॽ॥” खे़ल्ले़चोगुल्ले़ दाउदरे़ हानुनरे़ कुम्बा स्ये़ःल्ले़ कुमनाहाॽ हाङ्हाङ् मे़त्छे़ पाङ्घुसि॥ दाउदरे़ कुमनाहाॽ अम्मोनिहाॽरे़ खुन्छिॽ लाजेॽओ मे़लासे़, 3 हे़क्केःल्ले़ अम्मोनि कुसे़वारोबाहाॽरे़ खुन्छिॽ दाङ्बा हानुने़न् मे़मे़त्तु, “दाउदरे़ हाङ्हाङ् मे़त्छे़ कुमनाहाॽ पाङ्घुसिआङ् खे़ने़ॽ के़म्बा मिङ्सो इङ्धाङ् पिरुबाबि? कन् मनाहाॽग खे़ने़ॽ के़निङ्वाॽ के़साॽबासिरो, कन्हाॽग खे़ने़ॽ के़ये़क्यक्किन् नाःम्मा फाॽआङ् कुसाॽसे़ खे़ल्ले़ पाङ्घुसिआङ् वाॽ॥” 4 खे़ल्ले़चोगुल्ले़ हानुने़ल्ले़ दाउदरे़ कुसे़वारोबाहाॽ ते़म्सुसिआङ् खुन्छिॽ थिक् ले़प्माङ्बा मुधोॽइन् खक्तु पिरुसि, हे़क्क्याङ् मिगक्मा थारिक् कुभ्रे़ःङ् कुभ्रे़ःङ् खुन्छिॽ तेत्हाॽ खक्तु पिरुसि॥ हे़क्क्याङ् खुने़ॽ खे़प्मोलाम् पाङ्घुदेसुसि॥ 5 कन् पाःन्निन् दाउदे़न् मे़मे़त्तु, हे़क्क्याङ् मनाहाॽ खुन्छिॽ तुम्से़ पाङ्घुसि, थेआङ्भे़ल्ले़ खे़ङ्हाॽ साॽरिक् मे़नुःन्दे़आङ् मे़वये़॥ खे़ङ्हाॽरे़ खुन्छिॽ मुधोॽइन् याम्मो मे़ल्लिङ्ङे थारिक् यरिहोओए मे़युङ्ल के़लॽबा दाउदरे़ इङ्जाङ् चोगु॥ 6 दाउदे़न्नु मे़जोगुबा याःम्बक्के़न् साॽरिक् याम्गे़सिङ्बा ताप्फे़ःम्बा पोःक्खे़ के़लॽबा अम्मोनिहाॽरे़ कुसिङ् मे़निःत्तु, हे़क्क्याङ् खे़ङ्हाॽरे़ बेथरहोब नु सोबाबा निबोङ् हे़न्छिङ् थक्सुबाहाॽ खुन्छिॽ फाॽसे़ याःल्लिक् मे़दारुसि॥ खे़ङ्हाॽरे़ माकाबा हाङ्लाम् हे़न्छिङ्धिक् हे़क्क्याङ् तोबलाम्बा हे़न्छिङ् थिबोङ्ङाङ् ने़त्छि मनाहाॽ थङ् चोःक्मा के़भाॽबा याःल्लेक् मे़दारुसि॥ 7 दाउदरे़ कन् पाःन्निन् खे़प्सुआङ् योआबे़न् नु के़रे़क् थक्लिहाङ् मनाहाॽ पाङ्घुदेसुसि॥ 8 हे़क्क्याङ् अम्मोनिहाॽ मे़द्ये़आङ् ये़क्यक् लाम्धेःत्तो थङ्ले़ लागि यारिप् मे़बोःक्खे़, हे़क्क्याङ् सोबा नु रहोबबा अरामि हे़क्क्याङ् तोब नु माकाबा मनाहाॽ ते़म्बेॽओ थङ्ले़ लागि यारिप् मे़बोःक्खे़॥ 9 योआबरे़ कुदगि नु कुएगाङ् थङ्ले़ लागि यारिप् मे़बोःक्खे़बा निसु॥ खे़ल्ले़चोगुल्ले़ खुने़ॽ इस्राइलबा थङ् चोःक्मा के़धुम्बा थक्सुबाहाॽ अरामिहाॽरे़ खुन्छिॽ तगि युक्खुसि॥ 10 के़नम्बा थक्सुबाहाॽ खुने़ॽ आबाङे कुन्साॽ अबिसैरे़ कुयुक्को तारुसि, खुने़ॽ अम्मोनिहाॽरे़ खुन्छिॽ तगि थङ्ले़ लागि यारिप् चोगुसि॥ 11 योआबरे़ खे़न् मे़त्तु, “अरामिहाॽरे़ आङ्गाॽ मे़नाःन्ना मे़भे़त्ताबा हे़क्के लॽने़भग्र खे़ने़ॽ आङ्गाॽ फाॽराङ्ङे़ॽ॥ कर अम्मोनिहाॽरे़ खे़ने़ॽ के़म्नाःन् के़म्भे़त्ने़भग्र आङ्गाॽ खे़ने़ॽ फाॽसे़ फे़न्ना॥ 12 हाङ्हाङ् लॽरे़, आनिॽ मनाहाॽ नु आनिॽ निङ्वाॽफुमाङ्ङिल्ले़ कुये़क्यक्हाॽरे़ लागि हाङ्हाङ्ङाङ् थङ् चोःक्सु॥ निङ्वाॽफुमाङ्ङिल्ले़ कुनिमो थेःन् नुबा चोक् हाबा खे़न् खुने़ॽ चोगुॽ॥” 13 योआबे़न् नु खुने़ॽ कुधक्सुबाहाॽ अरामिहाॽनु थङ् थक्से़ तगि मे़बोरे़ हे़क्क्याङ् खुने़ॽ कुदगि अरामिहाॽ खे़त्छिङ्मा मे़हेःक्ते़॥ 14 अम्मोनिहाॽरे़ अरामिहाॽ मे़घे़त्छिङ्बा मे़निसुसिआङ् खे़ङ्हाॽआङ् अबिसैरे़ कुदगि मे़घे़त्छिङ्ङाङ् ये़क्यक् सिगाङ् मे़लासे़॥ खे़ब्याङ् योआबरे़ अम्मोनिहाॽनु थङ् चोःक्मा ले़रुआङ् यरुसले़म त्ये़॥ 15 अरामिहाॽरे़ इस्राइलिहाॽनु थङ्ङो हारिमे़द्ये़बा मे़निसुआङ् याम्मो खुन्छिॽ थक्सुबाहाॽ सुम्मा मे़हेःक्तुसि॥ 16 हददेजेरे़ल्ले़ युफ्रेतिस यङ्घङ्ङिल्ले़ नाहाङ् ले़प्माङ्नु वेॽ अरामिहाॽ उःत्छे़ मनाहाॽ पाङ्घुदेसुसि, हे़क्क्याङ् खे़ङ्हाॽ हददेजेररे़ कुधक्सुबाहाॽरे़ खुन्छि थक्मोबा सोबाकरे़ कुलाम्लोओ हेलाम ले़प्माङ् तगि मे़बोरे़॥ 17 कन् पाःन्निन्नाङ् दाउदरे़ खे़प्सु, हे़क्क्याङ् खिमो खुने़ॽ इस्राइलबा के़रे़क् थक्सुबाहाॽ सुप्सुसिआङ् यर्दन नाहाङ्दाङ् मे़बे, हे़क्क्याङ् हेलाम ले़प्माङ् मे़धासिङ्॥ पा खे़प्मोए अरामिहाॽ दाउदरे़ कुदगि थङ् चोःक्मा यारिप् मे़बोःक्खे़, हे़क्क्याङ् थङ् मे़जोगे़॥ 18 कर खे़ङ्हाॽ इस्राइलिहाॽरे़ खुन्छिॽ तगिलाम् मे़घे़त्छिङ्॥ खे़प्मो दाउद नु कुधक्सुबाहाॽरे़ किप् नुसि अन्लाधा के़लोङ्बाहाॽ नु लिबोङ् हे़न्छिङ् थक्सुबाहाॽ मे़से़रुसि॥ खुने़ॽ सोबाक्के़न्नाङ् थङ्ङो खाःन्दुआङ् स्ये़॥ 19 हददेजेररे़ कुयुक्को के़वाॽबा के़रे़क् हाङ्हाॽरे़ आनिॽ इस्राइललाम्बा हारिआद्ये़ के़लॽबा मे़निसु, हे़क्क्याङ् खे़ङ्हाॽरे़ थङ् चोगुम् मेःन् फाॽआङ् ले़प्मि मे़नाःक्तु, हे़क्क्याङ् खे़ङ्हाॽ इस्राइलरे़ कुयुक्को मे़द्ये़॥ खे़न् एगाङ् अरामिहाॽरे़ अम्मोनिहाॽ आप्फाल्ले़आङ् फाॽमासि निङ्वाॽ मे़न्जोगुन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.