२ सामुए़ल 1 - लिम्बुदाउदरे़ सावले़न् मासिङ्बा निङ्वाॽ खोसु 1 सावले़न् स्ये़आङ् एगाङ् दाउदरे़ अमाले़किहाॽ थङ्ङो नाःन्दुसिआङ् नुःक्खे़, हे़क्क्याङ् खुने़ॽ निये़न् थारिक् सिक्लगओए युङे़ याःक्ते़॥ 2 हे़क्क्याङ् सुम्ये़न् के़रे़ल्ले़ याःन्दिक् कुदेःत् के़दे़ःङ्बा, कुधे़गेःक्पो खाम्भुत्रा के़बप्पा मनाधिक् सावलरे़ कुदुरायक्लाम् लिगक् लःन्दे़द्ये़॥ खे़न् दाउदरे़ कुबेसाङ् के़रे़ हे़क्क्याङ् कुदगि साम्बोन् हबत् फन्छिङ्॥ 3 दाउदरे़ खे़न् सेःन्दोसु, “खे़ने़ॽ आत्तान्लाम्बा के़द्ये़बा?” खे़ल्ले़ मे़त्तु, “आङ्गाॽ इस्राइलबा तुरायक्लाम्बा ताङाङ्ङाङ् खे़त्छिङाआङ् त्याङ्बा॥” 4 हे़क्क्याङ् दाउदरे़ खे़न् याम्मो सेःन्दोसु, “इङ्घङ् थे़मा वाॽ आङ्गाॽ मे़त्ताङ्ङे़ॽ॥” खे़ल्ले़ पाःत्तु, “आनिॽ थक्सुबाहाॽ थङ् चोःक्मादे़न्लाम् मे़नाःत्तुसि, हे़क्क्याङ् थङ्ङो यरिक् मे़स्ये़॥ सावले़न् नु खुने़ॽ कुस्सा जोनाथाने़न्नाङ् स्ये़सि॥” 5 हे़क्क्याङ् दाउदरे़ खे़न् इङ्घङ् के़दाःप्पा थाङ्बे़न्निन् सेःन्दोसु, “सावले़न् नु जोनाथाने़न् मे़से़रुसि फाॽआङ् खे़ने़ॽ आक्खेलॽरिक् के़निसु?” 6 खे़ल्ले़ पाःत्तु, “आङ्गाॽ गिल्बो कोःक्माओ वयाङ्, हे़क्क्याङ् सावले़न् आबाङे कुलाःक्किल्ले़ तक्सिङ्ङाङ् अःक्खुम् पत्छे़बा निसुङ्॥ खम्ब्याङ् निङ्मिहाॽरे़ खुन्छिॽ अन्लाधाहाॽ नु अन्गे़लोङ्बाहाॽ खुने़ॽ कुएगाङ् मे़वये़॥” 7 हे़क्क्याङ् खुने़ॽ एगाङ् हिसिङ्ङिल्ले़ आङ्गाॽ निसाङ्ङाङ् उःत्ताङ्॥ आङ्गाॽ मे़त्तुङ्, “आदाङ्बे, आङ्गाॽ कप्मो वाॽआरो॥” 8 “खुने़ॽ मे़त्ताङ्, ‘खे़ने़ॽ हाःत्ने़बे?’ आङ्गाॽ ‘अमाले़किआ’ मे़त्तुङ्॥ 9 “खे़ब्याङ् खुने़ॽ मे़त्ताङ्, ‘आङ्गाॽ आबेसाङ् फे़रे़ॽआङ् से़राङ्ङे़ॽना॥ आङ्गाॽ कुहिङ्वे़त् वाॽआ, हे़क्केसाङ् सिमालिङ्धोओ के़राङ् चुराङ्ङाङ् वाॽआ॥’ 10 “खे़ल्ले़चोगुल्ले़ आङ्गाॽ कुबेसाङ् पेगाङ्, हे़क्क्याङ् खुने़ॽ साॽरिक् काःन्दे़बाल्ले़ चोगुल्ले़ से़रुङ्॥ खुने़ॽ मे़हिङ्ने़न् फाॽआङ् आङ्गाॽ निसुङ्॥ आङ्गाॽ खुने़ॽ कुधे़गेःक्पोलाम् तिचःन् नु कुहुक्कोलाम् हुक्पाःङ्गिःन् लःत्तुङ्, हे़क्क्याङ् आदाङ्बारे़ॽओ खा कॽयो तारुङ्ङाङ् वाॽ॥” 11 कन् खे़प्सुआङ् दाउदरे़ कुदेःत्ते़न् ते़रे़क् थे़ःक्खु, हे़क्क्याङ् खुने़ॽनु के़वाॽबा के़रे़क् मनाहाॽरे़आङ् हाबाहे़क्के मे़जोगु॥ 12 हे़क्क्याङ् सावले़न्, खुने़ॽ कुस्सा जोनाथाने़न्, खे़म्ब्याङ् यहवे दाङ्बे़ल्ले़ कुधक्सुबाहाॽ नु इस्राइलबा सुवाङ्हाॽ ताभेलाम् मे़स्ये़बाल्ले़ चोगुल्ले़ खे़ङ्हाॽ खुन्छिॽ सङ्बेॽमे़न् मे़हिप्तुर मे़हाबे़, हे़क्क्याङ् युःन्छिक् थारिक् तःक्ने़त् मे़युङे़॥ 13 हे़क्क्याङ् इङ्घङ् के़दाःप्पा खे़न् थाङ्बे़न्निन् दाउदरे़ मे़त्तु, “खे़ने़ॽ आत्तालाम् के़द्ये़बा?” खे़ल्ले़ मे़त्तु, “आङ्गाॽ अमाले़कि, खे़ने़ॽ के़लाजेॽओ के़युङ्बा वेॽ लाजेॽबा मनाआ॥” 14 दाउदरे़ खे़न् मे़त्तु, “यहवे दाङ्बे़ल्ले़ सेःन्दुबा कुमनान् से़प्मारे़ लागि हुक्केःप्मा खे़ने़ॽ के़ङ्गिसे़म्बि?” 15 हे़क्केःल्ले़ दाउदरे़ कुमनाहाॽओ लत्छा थाङ्बे़न् मनाधिक् उःत्तुआङ् मे़त्तु, “कन् मनान् से़रे़ॽ॥” खे़ल्ले़चोगुल्ले़ खे़न् मनाःल्ले़ खे़न् हिप्तुआङ् से़रु॥ 16 दाउदरे़ खे़न् अक्खे मे़त्तुआङ् वये़, “खे़ने़ॽ के़माक्खिन् आबाङे के़धेगेक् सम्धाङ् चुक्ल॥ थेआङ्भे़ल्ले़ खे़ने़ॽ ‘आङ्गाॽ यहवे दाङ्बाल्ले़ सेगुबा कुमनान् से़रुङ्’ लॽरिक् आबाङे के़म्ब्राःल्ले़ के़बाःत्तुआङ् आप्तिक् के़घोसुरो॥” दाउदरे़ सावले़न् नु जोनाथाने़न् हाःप्तुसिबा 17 खे़न् एगाङ् सावले़न् नु खुने़ॽ कुस्सा जोनाथानरे़ खुन्छिॽ लागि दाउदे़न् अक्खेलॽरिक् मे़रिङ् थक्ते़, 18 हे़क्क्याङ् खुने़ॽ यहुदाबा मनाहाॽ कन् “लि” मे़प्मनाबा साम्लोन् हुॽराम्सिम्मे़ॽ फाॽआङ् इङ्जाङ् पिरुसि॥ कन् साम्लोन् यासार साप्पन्नो साप्ते़आङ् पत्लो— 19 “इस्राइलबा कोःक्मासे, आनिॽ खे़म्सिङ्मा आनिॽ लाम्लोबाहाॽ मे़से़रुसिआङ् मे़ने़रो॥ खे़न् पधुम् के़धुम्बाहाॽ आक्खेलॽरिक् मे़जोःन्दे़बे! 20 “कन् पाःन्निन् गातओ मे़जे़क्ते़म्सिम्मिन्ने़ॽओ, अस्कलोनबा माराम्हाॽओ कन् पाःन्निन् मे़इङ्साम्मिन्ने़ॽओ, के़इङ्सुम्ने़भग्र पलिस्तिहाॽरे़ खुन्छिॽ मे़न्छ्या साहाॽ मे़सःत्लो, मेःन्ने़भग्र हर्दो मे़न्हे़क्केबाहाॽरे़ खुन्छिॽ मे़न्छ्या साहाॽ मे़एःत्लो॥ 21 “गिल्बोबा कोःक्मासे, खिनिॽ सम्धाङ् हिःक्वा इग्र वहित् मे़धाने़न्लरो, खिनिॽओ कुजाए मे़धोःक्ने़ल्लरो॥ थेआङ्भे़ल्ले़ पधुम् के़धुम्बाल्ले़ कुधेःक्सिङ्मा कुघोन् कुनामे़न्छाॽ पोःक्खे़आङ् खाम्बाङ्ङो ने़गन्लो, सावलरे़ कुधेःक्सिङ्मा कुघोन् निःङ्गेॽ मेःन्ने मे़ल्ले़क्मनाबा पोःक्खे़रो॥ 22 निङ्मिहाॽरे़ खुनिॽ सङ्बेॽमे़न् मे़न्दिःङ्ङे, के़सिबाहाॽरे़ खुनिॽ माक्खिॽ मे़न्ने़ःक्के जोनाथानरे़ कुदोःङ् नु कुलिन् आभे़ल्ले़आङ् एगाङ् मे़नुःक्खे़न्लो सावलरे़ कुदाभेन् माक्खिॽ मे़न्छे़ए कुसुःप्पो मे़लासे़न्लो॥ 23 “सावल नु जोनाथाने़न् कुहिङ्वे़त् वये़सिल्ले़ नुबा नु लुङ्माॽ आदुक्तुक्पा वये़सिरो॥ खे़ङ्हाॽ हिङ्मा नु सिमाओआङ् मे़से़न्दे़सिन्लो॥ खे़ङ्हाॽ कक्कफिःक्मानुःल्ले़आङ् के़जाप्पा वये़सि, खिरिङ्बाहाॽनुःल्ले़आङ् के़धुम्बा वये़सिरो॥ 24 “इस्राइलरे़ कुस्सा मे़न्छ्यासे, सावलरे़ कुलागि हाबाम्मे़ॽओ॥ खुने़ॽए कुहे़ःत्ला नु पनुनुबा चाङ् के़जाक्तिरो, खिनिॽ चाङ्हाॽग साम्म्याङ् फुङ्हाॽरे़ थोॽरुरो॥ 25 “के़धुम्बाहाॽ आक्खेलॽरिक् थङ्ङो मे़स्ये़बे! खे़ङ्हाॽग ते़न्धङ्ङो मे़से़रुसिरो, जोनाथाने़ङ्ग खिनिॽ कोःक्माओ स्ये़आङ् ने़रो॥ 26 “जोनाथाने, आङ्गाॽ आन्साॽए, खे़ने़ॽ के़लागि आङ्गाॽ हाःप्पारो॥ खे़ने़ॽ आङ्गाॽ आलागि के़नुॽबा नु पनुनुबा के़वये़रो॥ आङ्गाॽ आलागि लुङ्माॽ के़दुक्ताङ्बे़न् मे़न्छुमारे़ लुङ्माॽ आम्हिःप्पे़न् के़नाःम्बा नु निङ्वाॽ के़माबा वये़रो॥ 27 “पधुम् के़धुम्बाहाॽ आक्खेलॽरिक् मे़स्ये़बे! थङ् चोःक्मा फे़जुम् फे़याहाॽ आक्खेलॽरिक् मे़मे़गे़बे॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.