२ हाङ् 3 - लिम्बुइस्राइल नु मोआबे़न् थङ् थक्ते़सि 1 यहुदाबा हाङ् यहोसापातरे़ कुहाङ्युक् ये़म्मोबा थिबोङ्ङाङ् ये़त्छिगेक्पा तङ्बेओ आहाबरे़ कुस्सा योरामे़न् सामरियाओ इस्राइलबा हाङ् पोःक्खे़, हे़क्क्याङ् खुने़ॽ थिबोङ्ङाङ् ने़त्छि तङ्बे हाङ्युक् चोगु॥ 2 खे़ल्ले़ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने चोगु, कर खुने़ॽ कुम्बा नु कुम्मारे़ चोगे़सुबा कुइसिःक्केग मेःन्॥ खुने़ॽ कुम्बारे़ चोगुबा बाल माङ्ङिल्ले़न् सेसे लुङ्ङिन् खुने़ॽ हाॽयाक् आःक्खुदेसु॥ 3 हे़क्केसाङ् नाबातरे़ कुस्सा यारोबामरे़ इस्राइले़न् चोःक्मा पाङ्घुबा लायोहाॽ खुने़ॽ चोगुआङ् पत्छे़, हे़क्क्याङ् खुने़ॽ खे़न् लायोहाॽलाम् मे़नुःक्खे़न्॥ 4 मोआबबा हाङ् मेसाःल्ले़ मे़ल्लुक्हाॽ हिङ्घुसिआङ् वये़, हे़क्क्याङ् खुने़ॽ लाङे़न्छिङ् थिक् मे़ल्लुक्साःत्हाॽ नु लाङे़न्छिङ् थिक् थुःम्बाहाॽरे़ खुन्छिॽ मुरिक्किन् इस्राइलबा हाङ्ङिन् पिमा के़बोङ्बा वये़॥ 5 कर आहाबे़न् स्ये़आङ् एगाङ् मोआबबा हाङ्ङिन् इस्राइलबा हाङ्ङिल्ले़ कुदक्ले़ङ्वाओ पिफ्युङ्बा पोःक्खे़॥ 6 कल्ले़चोगुल्ले़ खे़न् ये़म्मो योराम हाङ्ङिन् सामरियालाम् ये़आङ् के़रे़क् इस्राइलिहाॽ फुक्खुसि॥ 7 खुने़ॽ यहुदाबा यहोसापात हाङ्ङिन्नाङ् कन् इङ्घङ्ङिन् हाक्तु, “मोआबबा हाङ्ङिन् आङ्गाॽ आदक्ले़ङ्वाओ पिफ्युङ्बा पोःक्खे़आङ् वाॽ॥ मोआबरे़ कुदक्ले़ङ्वाओ थङ् चोःक्मारे़ लागि थे खे़ने़ॽ आङ्गाॽनु के़बेःक्पि?” यहोसापातरे़ नुगप् पिरु, “आङ्गाॽ खे़ने़ॽनु पेःक्का॥ आङ्गाॽ खे़ने़ॽए हे़क्तङ्बाआ, आङ्गाॽ आमनाहाॽ खे़ने़ॽ के़मना हे़क्तङ्बासि हे़क्क्याङ् आङ्गाॽ आअन्हाॽ खे़ने़ॽ के़अन्हाॽ हे़क्तङ्बासिरो॥” 8 खे़ब्याङ् यहोसापातरे़ सेःन्दोसु, “आनिॽ आत्ति पिसाङ्लाम् फप्मासिबे?” योरामरे़ नुगप् पिरु, “एदोमबा मुरे़क् खारे़क् थेआङ् के़होप्पा ये़ःङ्घादे़न्नोलाम्॥” 9 कल्ले़चोगुल्ले़ इस्राइलबा हाङ्ङिन् यहुदाबा हाङ्ङिन्नु हे़क्क्याङ् एदोमबा हाङ्ङिन्नु सोरिक् पे॥ खे़ङ्हाॽ नुसि ये़न् थे़म्बा ताक्मे़गन्दे़र लाङ्मे़घेगे़आङ् एगाङ् थक्सुबाहाॽरे़ खुन्छिॽ आप्फेक् लागि नु कक् के़गुबा थक्साहाॽरे़ लागि च्वाःत्तिन् मे़गे़॥ 10 खम्भ्याङ् इस्राइलबा हाङ्ङिल्ले़ पाःत्तु, “थे यहवे दाङ्बे़ल्ले़ आनिॽ सुम्भुए हाङ्हाॽ मोआबरे़ कुहुक्को थामारे़ लागिरक् आभे़त्ते़बाबि?” 11 कर यहोसापातरे़ सेःन्लाप्तुसि, “यहवे दाङ्बे़न् आनिॽ सेःन्दोमा सुक्मारे़ लागि थे कप्मो खुने़ॽ कुभा लत्छा कुमाङ्निङ्वाॽपान् के़बाःप्पा होःप्पि?” इस्राइलबा हाङ्ङिल्ले़ कुसुहाङ्युक्पाहाॽओबा लत्छा थिक्पारे़ पाःत्तु, “साफातरे़ कुस्सा एलिसान् कप्मो वाॽ॥ खुने़ॽ एलियाःल्ले़ कुहुक्को च्वाःत् के़गेःप्पा कुभाॽबाङ् वये़॥” 12 यहोसापातरे़ पाःत्तु, “यहवे दाङ्बे़ल्ले़ कुबाःजाःक्के़न् खे़न्नु वाॽ॥” कल्ले़चोगुल्ले़ इस्राइलबा हाङ्ङिन् नु यहोसापाते़न् हे़क्क्याङ् एदोमबा हाङ्ङिन् एलिसाओ मे़बे॥ 13 एलिसाःल्ले़ इस्राइलबा हाङ्ङिन् मे़त्तु, “आनिॽ लुम्मो थे सक्सक्काङ्बे? आदाङ्बारे़ के़म्बारे़ कुमाङ्निङ्वाॽपान् के़बाःप्पाहाॽ नु आदाङ्बारे़ के़म्मारे़ कुमाङ्निङ्वाॽपान् के़बाःप्पाहाॽओ पेगे़म्मे़ॽबा॥” इस्राइलबा हाङ् योरामरे़ खुने़ॽ नुगप् पिरु, “मेःन्, यहवे दाङ्बे़ल्ले़ आनिगे सुम्भुए हाङ्हाॽ मोआबिहाॽरे़ खुन्छिॽ हुक्को याप्मि थामारे़ लागि खुने़ॽ उःत्तिगे़बारो॥” 14 एलिसाःल्ले़ मे़त्तुसि, “आङ्गाॽ माङ्से़वा मे़त्तुङ्बा, से़क्खाए मुक्साम्दाङ्बा यहवे दाङ्बे़न् कुहिङ्वे़त् वाॽबा कुइसिक् माङ्हे़क्कासिङ्ङाआङ् पाःत्तुङ्ॽ, आङ्गाॽ यहुदाबा हाङ् यहोसापाते़न् मिङ्सो इङ्धाङ् मे़बिआन्बा हे़क्केःल्ले़ आङ्गाॽ खे़ने़ॽ मिक्सुक्पा थिक्ले़आङ् ओमे़मे़त्ने़म्बा वये़ इग्र निनि खे़म्घे़म्माङ् मे़लाप्ने़म्बा वये़॥ 15 कर आल्ल अन्मे के़मुङ्बा थिक् आङ्गाॽ आलागि तारे़ॽ॥” आल्ल अन्मे के़मुङ्बे़ल्ले़ अन्मेन् मुक्खुर पत्छे़ल्ले़ यहवे दाङ्बे़ल्ले़ कुमुक्साम्मिन् एलिसाओ थ्ये़, 16 हे़क्क्याङ् खुने़ॽ पाःत्तु, “यहवे दाङ्बे़ल्ले़ अक्खे पाःत्तुॽ—कन् च्वाःत् के़होप्पा वहःङ्ङिल्ले़ कुयाओ पाक्लुम् पाक्लुम् लॽरिक् फाःन्दे़म्मे़ॽ॥ 17 थेआङ्भे़ल्ले़ यहवे दाङ्बे़ल्ले़ अक्खे पाःत्तुॽ—खिनिॽ सुरित् के़जङ्ङाङ् के़न्निसुम्मिन्ॽ वहित् वगेःक्माआङ् के़न्निसुम्मिन्ॽ, हे़क्केसाङ् कन् ने़ने़बादे़न्निन् च्वाःत्तिल्ले़ वे़ल्ले़क् तिम्ॽ, हे़क्क्याङ् खिनिॽ नु खिनिॽ पिप्मा पित्हाॽरे़ हे़क्क्याङ् वेॽ थक्साहाॽरे़ च्वाःत् के़धुङुम्ॽ॥ 18 यहवे दाङ्बे़ल्ले़ कुलागि कङ्ग कुजोःक्के़नुॽबा पाःन्लो॥ खुने़ॽ मोआबिहाॽ खिनिॽ हुक्को थासुसिॽ॥ 19 यक् के़ने़बा के़रे़क् ये़क्यक्हाॽ नु के़रे़क् यम्बा पाङ्जुम्हाॽ खिनिॽ के़नाःम्दुम्सिम्ॽ॥ के़रे़क् नुबा सिङ्बुङ्हाॽ खिनिॽ के़दाङुम्माङ् के़सोःन्दुम्ॽ, हे़क्क्याङ् के़रे़क् च्वाःत् वदुन्दाक्वाहाॽ के़साक्तुम्ॽ, हे़क्क्याङ् नुबा इक्ताप्हाॽ लुङ्हाॽरे़ के़धिम्सुम्माङ् के़मे़क्खुम्ॽ॥” 20 कुदाःन्दिक्मा हप्मे़न् तानाम्बा सिदुङ्जभा तोःम्मा ये़म्मो हक्चघत् ए़दोम ले़प्माङ्लाम् च्वाःत् कुङ्मा हेःक्ते़! हे़क्क्याङ् खाम्बेःक्किन् च्वाःत्तिल्ले़ तिम्से़॥ 21 हाबा कन् लुम्मो हाङ्हाॽ खे़ङ्हाॽरे़ खुन्छिॽ तक्ले़ङ्वाओ थङ् चोःक्से़ मे़भे़रे़आङ् मे़वाॽ फाॽआङ् के़रे़क् मोआबिहाॽरे़ मे़घे़प्सु॥ कल्ले़चोगुल्ले़ खजुम्घया फे़जुम्भे़या याङ्मा के़सुक्पा के़रे़क् थाङ्बे़न् नु खदाक्मि मनाहाॽ मे़उःत्तुसि, हे़क्क्याङ् खे़ङ्हाॽ थङ् चोःक्मारे़ लागि इःन्दोओ मे़युक्खुसि॥ 22 आल्ल खे़ङ्हाॽ कुदाःन्दिक्मा तानाम् आन्देन् मोबोगे़ल्ले़ च्वाःत्तो नाम् फिल्लिङ् फिल्लिङ् लॽरे़आङ् ने़स्से़॥ मोआबिहाॽरे़ खुन्छिॽ तगि खे़न् च्वाःत्तिन् माक्खिॽ कुइसिक् मराःक्यारे़बा मे़निसु॥ 23 खे़ङ्हाॽरे़ मे़बाःत्तु, “कङ्ग माक्खिॽनिबा! खे़न् हाङ्हाॽ खे़माॽ मे़जोगे़आङ् खुन्छिॽ लुम्मो मे़से़त्छिङ्बिला॥ आल्ल मोआबिसे, खे़ङ्हाॽ नाप्मासिरे़ लागि पेगि!” 24 कर आल्ल मोआबिहाॽ इस्राइलिहाॽरे़ खुन्छिॽ थक्सुबा ने़त्ना साःङ्गाहिम्मो मे़द्ये़ःल्ले़ इस्राइलिहाॽ मे़बोगे़आङ् मोआबिहाॽ मे़ङ्घे़त्छिङ्ङिल्ल थारिक् खे़ङ्हाॽनु थङ् मे़जोगे़॥ हे़क्क्याङ् इस्राइलिहाॽरे़ खे़ङ्हाॽ मे़नाःत्तु मे़देॽरुसिर मे़भत्तुसिआङ् मे़स्ये़रुसि॥ 25 खे़ङ्हाॽरे़ ये़क्यक्हाॽ खाप्पुथ्यःङ् मे़जोगु, हम्भ्याङ् के़रे़क् मनाहाॽरे़ के़रे़क् नुःब्नुबा इक्ताप्हाॽओ लत्छा लत्छा लुङ् लाप्मे़भुसु मे़याक्तुआङ् लाजेन् खक्पे़त् लुङ्ङे लुङ्ङिल्ले़ मे़धिम्सु॥ खे़ङ्हाॽरे़ च्वाःत् वबुन्दाक्वाहाॽ के़रे़क् मे़हुॽरु, हे़क्क्याङ् नुबा सिङ्बुङ्हाॽ खक्पे़त् मे़आःत्तुआङ् मे़सोःन्दु॥ खे़ङ्हाॽरे़ किर-हरेसेते़न्लक् खे़प्मोबा लुङ्हाॽनु सोरिक् हाबा खे़प्मोए मे़ले़रुमे़ध, कर अर्दोःल्ले़ काप्तुसिबा मनाहाॽरे़ खे़न्नाङ् कब्रिङ् मे़गबुआङ् मे़भत्तु॥ 26 आल्ल मोआबबा हाङ्ङिल्ले़ खुने़ॽ थङ्ङो हारि के़दाबा पाःन्निन् निङ्वाॽ खोसु, खे़ब्याङ् खजुम्घया फे़जुम्भे़यारे़ काप्तुसिबा ७०० मनाहाॽ एदोमबा हाङ्ङिन् ले़प्माङ् फिःन्छिङ्मा पेःक्मारे़ लागि तेॽरुसि, कर खे़ङ्हाॽरे़ कुलिङ्दो मे़ङ्गे़त्तुन्॥ 27 खे़ब्याङ् खुने़ॽ कुएगाङ् हाङ् के़बोङ्बा, खुने़ॽ कुस्सा तुम्बे़न् ये़क्यक्कोबा लुङ्धाक्को तेॽरुआङ् वयागे़न् सिदुङ्जभा इसिःक् तोःन्दु॥ हे़क्क्याङ् इस्राइलिहाॽओ साॽरिक् यम्बा सिक्पोःक्मान् थ्ये़, खे़ब्याङ् खे़ङ्हाॽ मे़नुःक्खे़आङ् आप्फेक् खुन्छिॽ लाजेॽओ मे़बेरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.