२ हाङ् 1 - लिम्बुएलियान् नु हाङ् अहज्याह 1 आहाबे़न् मासिङ्ङाङ् एगाङ् मोआबे़न् इस्राइलरे़ कुदक्ले़ङ्वाओ पिफ्युङ्बा पोःक्खे़॥ 2 आल्ल अहज्याहन् सामरियाओ थाःङ्समा याक्फाङ्ङोबा हङ्हङ् के़लॽबा पेधाःप्पोलाम् मु मक्थ्ये़, हे़क्क्याङ् खुने़ॽ साॽरिक् यम्बा काःन्दे़॥ कल्ले़चोगुल्ले़ खुने़ॽ इङ्साबाहाॽ अक्खे मे़त्तुसिआङ् पाङ्घुदेसुसि, “पेगे़म्मे़ॽआङ् एक्रोनबा माङ् बाल-जिबबे़न् सुजा नाःक्ते़म्मे़ॽ, आङ्गाॽ कन् काःन्दाङ्बोलाम् वेःप्मा सुक्काबि मे़सुक्कान्बि॥” 3 कर यहवे दाङ्बे़ल्ले़ कुमाङ्लाइङ्बे़ल्ले़ तिस्बि एलियान् मे़त्तु, “खे़ने़ॽ पेगे़ॽआङ् सामरियाबा हाङ्ङिल्ले़ कुइङ्साबाहाॽ तुमे़से़ॽ हे़क्क्याङ् खे़ङ्हाॽ सेःन्दोसे़से़ॽ, ‘थे इस्राइलओ निङ्वाॽफुमाङ् होःप्पाङ् एक्रोनबा माङ् बाल-जिबबओ सुजा नाःक्से़ के़बेगिर के़बत्छिबि?’ 4 कल्ले़चोगुल्ले़ यहवे दाङ्बे़ल्ले़ अक्खे पाःत्तुॽ—‘खे़ने़ॽ के़ने़बा इप्नाओलाम् के़म्बोःक्ने़न्ॽ॥ खे़ने़ॽ से़क्खाए के़सिरो॥’” खे़ब्याङ् एलियान् पेघे़रे़रो॥ 5 आल्ल खे़न् इङ्साबाहाॽ हाङ्ङे़ओ मे़नुःक्खे़ मे़द्ये़, खे़ब्याङ् खुने़ॽ खे़ङ्हाॽ सेःन्दोसुसि, “खिनिॽ थेआङ् के़नुःक्खि के़द्ये़इबाबे?” 6 खे़ङ्हाॽरे़ खुने़ॽ नुगप् मे़बिरु, “आनिगे तुम्से़ मनाधिक् त्ये़आङ् मे़त्तिगे़, ‘खिनिॽ के़बाङ्बा हाङ्ङे़ओ पेगे़म्मे़ॽ, हे़क्क्याङ् खुने़ॽ अक्खे मे़त्ते़म्मे़ॽ, यहवे दाङ्बे़ल्ले़ अक्खे पाःत्तुॽ—थे इस्राइलओ निङ्वाॽफुमाङ् होप्पाल्ले़ चोगुल्ले़ एक्रोनबा माङ् बाल-जिबबे़न् सुजा नाःक्से़ खे़ने़ॽ मनाहाॽ के़बाङ्घुसिर के़बप्पि? कल्ले़चोगुल्ले़ खे़ने़ॽ के़ने़बा के़इप्नाओलाम् के़म्बोःक्ने़न्ॽ॥ खे़ने़ॽ से़क्खाए के़सिरो!’” 7 हाङ्ङिल्ले़ खे़ङ्हाॽ सेःन्दोसुसि, “खिनिॽनु के़दुम्बाआङ् अक्खे के़बाःप्पा मनान् आक्तङ्बा परिक्पा चोगे़बे?” 8 खे़ङ्हाॽरे़ खुने़ॽ नुगप् मे़बिरु, “खुने़ॽ सामुरिक् चाङ् के़जाङ्बा नु कुगेङ्ङो सिहोॽबा फॽइ के़युम्बा मना वये़॥” हाङ्ङिल्ले़ पाःत्तु, “खुने़ॽग तिस्बि एलियान्लो॥” 9 खे़ब्याङ् खुने़ॽ थक्पेबाधिक् खे़ल्ले़ ङाबोङ् कुमना सुम्हाॽनु सोरिक् एलियाओ पाङ्घुदेसु॥ कोःक्माल्ले़ कुसम्धाङ् के़युङ्बार के़वाॽबा एलियाओ खे़न् थक्पेबान् थोःक्सिङ्ङाङ् थो पे, हे़क्क्याङ् खुने़ॽ एलियान् मे़त्तु, “निङ्वाॽफुमाङ्ङिल्ले़ कुमनाए, हाङ्ङिल्ले़ पाःत्तु, ‘खे़ने़ॽ यो थासिङ् ये़ॽओ!’” 10 एलियाःल्ले़ खे़न् थक्पेबान् नुगप् पिरु, “आङ्गाॽ निङ्वाॽफुमाङ्ङिल्ले़ कुमनाआने़भग्र, साङ्ग्राम्पेदाङ्ङोलाम् मि थाआङ् खे़ने़ॽ नु ङाबोङ् के़मनाहाॽ खाप्पुथ्यःङ् के़जोगिर!” खे़ब्याङ् साङ्ग्राम्पेदाङ्ङोलाम् मि थ्ये़आङ् खे़न् थक्पेबान् नु खुने़ॽ कुमनाहाॽ खाप्पुथ्यःङ् चोगुसि॥ 11 खे़न् एगाङ् हाङ्ङिल्ले़ वेॽ थक्पेबा थिक् खे़ल्ले़ ङाबोङ् कुमना सुम्हाॽनु सोरिक् एलियाओ पाङ्घुदेसु॥ खे़न् थक्पे़बे़ल्ले़ एलियान् मे़त्तु, “निङ्वाॽफुमाङ्ङिल्ले़ कुमनाए, हाङ्ङिल्ले़ पाःत्तु, ‘खे़ने़ॽ यो खिमो थासिङ् ये़ॽओ!’” 12 एलियाःल्ले़ नुगप् पिरुसि, “आङ्गाॽ निङ्वाॽफुमाङ्ङिल्ले़ कुमनाआने़भग्र, साङ्ग्राम्पेदाङ्ङोलाम् निङ्वाॽफुमाङ्ङिल्ले़ मि थासुआङ् खे़ने़ॽ नु खे़ने़ॽ ङाबोङ् के़मनाहाॽ खाप्पुथ्यःङ् के़जोगिर!” खे़ब्याङ् साङ्ग्राम्पेदाङ्ङोलाम् मि थ्ये़आङ् खे़न् थक्पेबान् नु खुने़ॽ कुमनाहाॽ खाप्पुथ्यःङ् चोगुसि॥ 13 खे़ब्याङ् हाङ्ङिल्ले़ सुम्सिगेक्पा थक्पेबान् खुने़ॽ ङाबोङ् कुमनाहाॽनु सोरिक् पाङ्घुदेसु॥ कन् सुम्सिगेक्पा थक्पेबान् एलियाओ थाःङ् थोःक्सिङ्ङाङ् पे, हे़क्क्याङ् खुने़ॽ कुदगि थुङ्बोॽहजॽ युङ्सिङ्ङाङ् खुने़ॽ पेलि फाक्तु, “निङ्वाॽफुमाङ्ङिल्ले़ कुमनाए, आङ्गाॽ नु आदाङ्बारे़ कन् के़से़वारोबाहाॽ लुङ्माॽ आदुक्ते़ॽओ! 14 ओमे़त्ते़ॽओ, साङ्ग्राम्पेदाङ्लाम् मि थ्ये़आङ् खे़न् तगिबा ने़प्फु थक्पेबाहाॽ नु खुन्छिॽ मनाहाॽ मिःल्ले़ खाप्पुथ्यःङ् चोगुसि॥ कर आल्ल आङ्गाॽ लुङ्माॽ तुक्ताङ्ङे़ॽओ!” 15 यहवे दाङ्बे़ल्ले़ कुमाङ्लाइङ्बे़ल्ले़ एलियान् मे़त्तु, “खे़न्नु सोरिक् खे़ने़ॽ मु थासिङ् पेगे़ॽ॥ खे़ने़ॽ खे़न्नु मे़गिसे़न्ने़ॽ॥” कल्ले़चोगुल्ले़ एलियान् पोगे़आङ् खे़न्नु सोरिक् हाङ्ङे़ओ मु थासिङ् ये़॥ 16 एलियाःल्ले़ हाङ्ङिन् मे़त्तु, “यहवे दाङ्बे़ल्ले़ अक्खे पाःत्तुॽ, ‘थे सुजा नाःक्मारे़ लागि इस्राइलओ निङ्वाॽफुमाङ् होःप्पाङ् एक्रोनबा माङ् बाल-जिबबे़न् सुजा नाःक्मारे़ लागि खे़ने़ॽ इङ्साबाहाॽ के़बाङ्घुसिबि? खे़ने़ॽ अक्खे के़जोगुबाल्ले़ चोगुल्ले़ खे़ने़ॽ के़ने़बा के़इप्नाओलाम् आभे़ल्ले़आङ् के़म्बोःक्ने़न्॥ खे़ने़ॽ से़क्खाए के़सिरो॥’” 17 खे़ब्याङ् एलियाःल्ले़ पाःत्तुबा यहवे दाङ्बे़ल्ले़ कुइङ्घङ् कुइसिक् अहज्याहन् स्ये़॥ खे़ल्ले़ कुस्सा मे़होप्ते़बाल्ले़ चोगुल्ले़ यहुदाबा हाङ् यहोसापातरे़ कुस्सा यहोरामरे़ निसिगेक्पा कुहाङ्युक् तङ्बेओ योरामे़न् खे़ल्ले़ कुएगाङ् हाङ् पोःक्खे़॥ 18 अहज्याहरे़ कुहाङ्युक् ये़म्मोबा वेॽ के़रे़क् हिन्दोक्हाॽ नु खुने़ॽ चोगुबा याःम्बक्हाॽ इस्राइलबा खे़न् हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़म्बि? |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.