१ सामुए़ल 9 - लिम्बुसामुए़रे़ सावलले़न् तुमुॽ 1 बुन्यामिन थाःक्कोबा लत्छा मिङ्सो इङ्धाङ्साबा मनाधिक् वये़, खे़ल्ले़ कुमिङ् किस वये़॥ खुने़ॽ अबिए़लरे़ कुस्सा, जरोररे़ कुम्मे़न्छाॽ, बकोरतरे़ कुजक्मे़न्छाॽ, हे़क्क्याङ् अपिहरे़ कुबे़न्मे़न्छाॽ वये़॥ 2 किसरे़ सावल मे़प्मनाबा कुस्सा थाङ्बे़न्धिक् वये़, खुने़ॽ इस्राइलओबा के़रे़क्नुःल्ले़ नुबा नु यम्बा केःम्बा मना वये़॥ वेॽ मनाहाॽ खुने़ॽ कुभक्ताङ्ङो थारिक्लक् मे़बत्छे़॥ 3 थिक्ये़न् सावलरे़ कुम्बा किसरे़ कुभा कुअदङ्हाॽ मे़मये़॥ खे़ल्ले़चोगुल्ले़ खुने़ॽ कुस्सा सावले़न् मे़त्तु, “सेवारोबाधिक् तेॽरे़आङ् अदङ् कोःत्छे़ पेगे़ॽ॥” 4 हे़क्क्याङ् खुने़ॽ कुसे़वारोबाधिक् तेॽरुआङ् इफ्राइम लाजेॽबा कोःक्मा फाङ्जङ्हाॽ काःक्तुआङ् सलिसा थुम् पोःक्खे़र पे, कर खे़प्मो अदङ्हाॽ मे़घोसुन्छिन्॥ खुन्छिॽ सालिम् कुघिरिबा थुम्मो पोःक्खे़सिर पेसि, खे़प्मोआङ् अदङ्हाॽ मे़होःप्ते़॥ हे़क्क्याङ् खुन्छिॽ बिन्यामिन्ले़ कुदे़ःङ्गप् के़रे़क् कोःत्ते़छुसिसाङ् खे़ङ्हाॽरे़ अदङ्हाॽ आत्तोआङ् खोमा मे़सुक्ते़सुन्॥ 5 हे़क्क्याङ् खे़ङ्हाॽ सुप थुम्मो के़रे़छि, हन्नाङ् सावलरे़ कुसे़वारोबे़न् मे़त्तु, “फे़रे़ॽ, आल्ल हिम्मो नुःङ्सि पित्छि॥ मेःन्ने़फग्र आम्बारे़ कुअदङ्हाॽ निङ्वाॽ इःप्मा ले़रुसिॽ हे़क्क्याङ् आन्छिॽ लागि कुनिङ्वाॽ तुक्खे चाबिला॥” 6 कर कुसे़वारोबे़ल्ले़ मे़त्तु, “खा, आनिङ्वाॽ सुम्लॽरे़, कन् पाङ्जुम्मो निङ्वाॽफुमाङ्ङिल्ले़ लत्छा कुमिङ् के़इङ्बा कुमनाधिक् वाॽ॥ खुने़ॽग कप्मोबा के़रे़क् मनाहाॽरे़ मिङ्सो इङ्धाङ् मे़बिरुॽ, थेआङ्भे़ल्ले़ खुने़ॽ पाःत्तुबा के़रे़क् पाःन्हाॽ के़त्॥ आन्छिॽ पित्छिआङ् खे़न्निन् कोःत्छु॥ आन्छिॽ आत्तिन् लाम् पोङ्माआङ् अदङ् कोःत्छे़ पेःक्माबोङ् के़लॽबा पाःन्निन् आमे़त्छिॽ॥” 7 कर सावलरे़ मे़त्तु, “आन्छिॽ आबित्छिल्ले़ खुने़ॽ थे पिमा आसुक्सुबे? आन्छिॽ थेआङ् आङ्गत्छुन्ॽ॥ आन्छिॽ चामा कुजाःन्ने के़रे़क् मारे़॥ निङ्वाॽफुमाङ्ङिल्ले़ कुमनान् पिमारे़ लागि आन्छिॽ सुङ् थेआङ् आङ्गत्छुन्ॽ॥ आन्छिॽनु थे वाॽआङ्बे?” 8 कुसे़वारोबे़ल्ले़ याम्मो मे़त्तु, “ओमे़त्ते़ॽ, आङ्गाॽ लत्छा युप्पायाङ् कत्तुङ्ॽ॥ आन्छिॽ आत्तान् पेःक्मा पोङ् खे़न् आमे़त्छिर फाॽआङ् आङ्गाॽ कन् युप्पान् खुने़ॽ पिरुङ्ॽ॥” 9 (खे़न् ये़म्मोबा मनाहाॽरे़ निङ्वाॽफुमाङ्ङिन्नु सुजा नाःक्मा निङ्वाॽ मे़जोगुल्ले़ खे़ङ्हाॽरे़ अक्खे पाःप्मा थिम् वये़, “आनिॽ पेगिआङ् सुफो के़निबे़न् सेःन्दोसुम्॥” थेआङ्भे़ल्ले़ आइन् ताःन्दिक्पा माङ्निङ्वाॽपान् के़बाःप्पे़न् खे़न् ये़म्मो सुफो के़निबा मे़मे़त्तु॥) 10 सावले़न् ते़न्दे़आङ् पाःत्तु, “नुबा पोःक्खे़, आन्छिॽ हाबाहे़क्के चोःक्सु॥” खे़ब्याङ् निङ्वाॽफुमाङ्ङिल्ले़ कुमना के़वाॽबा पाङ्जुम् ले़प्साङ् खुन्छिॽ थाने़सि॥ 11 खे़ङ्हाॽ पाङ्जुम् के़बेःक्पा कोःक्माओबा थाम्माङ् लाम्मो पेसिर पत्छे़सिल्ले़ खे़ङ्हाॽरे़ च्वाःत् फाःत्छे़ के़भे़म्मार के़बप्मा मे़न्छ्याहाॽ तुमे़सुसि॥ हे़क्क्याङ् खुन्छिॽ खे़ङ्हाॽ से़ःन्लाप्ते़सु, “सुफो के़निबा मनान् हिम्मो वाॽबि?” 12 खे़ङ्हाॽरे़ मे़बाःत्तु, “वाॽरो, खुने़ॽग खारक् खे़न्छिॽ तगि पेःक्ल पत्॥ हारा पेसे़छे़ॽ, खुने़ॽग आनिगे पाङ्जुम्मो आइन्लक् के़रे़ त्ये़आङ् वाॽ, थेआङ्भे़ल्ले़ मनाहाॽरे़ आइन् कोःक्माओ वयागे़न् सिदुङ्जभा चोःक्मादे़न्नो सिदुङ्जभा तोःम्मा के़बोङ्बा वाॽ॥ 13 कोःक्माओबा सिदुङ्जभा चोःक्मादे़न्नो खुने़ॽ चाजासे़ पेःक्मानुःल्ले़ तगिए पाङ्जुम्मो खे़न्छिॽ के़गे़त्छिर के़बत्छिल्ले़सा खुने़ॽ के़दुम्सुॽ॥ खुने़ॽ मे़ङ्गे़त्ते थारिक् मनाहाॽरे़ कुजा मे़न्जने़न्, थेआङ्भे़ल्ले़ खे़ॽयो के़जुम्बा मनाहाॽरे़ चामानुःल्ले़ तगि खुने़ॽ सिदुङ्जभाओ मुॽइसाम् थामा पोङ्॥ हे़क्क्याङ् खे़न्छिॽ खुने़ॽ आल्लोसा के़दुम्सुॽ॥” 14 खुन्छिॽ पाङ्जुम् ले़प्माङ् थाने़छि, हे़क्क्याङ् खे़ङ्हाॽ पाङ्जुम्मो के़रे़सिर पत्छे़सिल्ले़सा सामुए़ले़न् खुन्छिॽ तगि कोःक्माओ थो पेःक्मारे़ लागि फे़रे़र पत्छे़॥ 15 आल्ल सावले़न् खे़न् पाङ्जुम्मो तामानुःल्ले़ थिक्ये़न् तगि यहवे दाङ्बाल्ले़ सामुए़ले़न् अक्खे मे़त्तुआङ् वये़— 16 “ताःन्दिक्पा हाबा कन् ये़म्मो बेन्यामिन थुम्लाम्बा मनाधिक् खे़ने़ॽओ पाङ्घुङ्॥ खे़न्निन् इस्राइलबा आङ्गाॽ आमनाहाॽरे़ खुनिॽ हाङ् पोङ्मारे़ लागि युक्तिङ् चोगे़ॽ॥ खे़ल्ले़ पलिस्तिहाॽरे़ खुनिॽ हुक्लाम्बा आमनाहाॽ से़ःप्तुसिॽ॥ आङ्गाॽ आमनाहाॽरे़ खुन्छिॽ तुक्खेन् निसुङ्ङाङ् वाॽआ, थेआङ्भे़ल्ले़ खे़ङ्हाॽरे़ खुन्छिॽ पेलिगे़न् तुवान् आङ्गाॽ आदगि के़रे़आङ् वाॽ॥” 17 हे़क्क्याङ् सामुए़लरे़ सावले़न् निसुआङ् खिमो यहवे दाङ्बाल्ले़ सामुए़ले़न् मे़त्तु, “आङ्गाॽ मे़त्ने़बा मनान् हाबा कन्लो॥ आम्भा कन् मनाःल्ले़ आमनाहाॽ सम्दाङ् युक् चोगुरो॥” 18 हे़क्क्याङ् यम्बा लाम्धेःत्तो सामुए़लरे़ कुबेसाङ् पेआङ् सावलरे़ मे़त्तु, “आदाङ्बे, सुफो के़निबा मनाःल्ले़ कुहिम् आतिन्बे? ओसेःन्आधाक्ते़ॽना॥” 19 सामुए़लरे़ सावले़न् मे़त्तु, “आङ्गाॽए सुफो के़निबा मनाआरो॥ आङ्गाॽ आदगि आदगि कोःक्माओबा सिदुङ्जभा तोःम्मादे़न्नो थो पेगे़ॽओ, थेआङ्भे़ल्ले़ आइन् खे़न्छिॽ आङ्गाॽनुए तःक् के़जासुर पोङ्लो॥ हे़क्क्याङ् ताःन्दिक् तानाम्लक् के़निङ्वाॽओ के़याक्पा पाःन्निन् आङ्गाॽ मे़त्ने़आङ् खे़ने़ॽ पाङ्ने़रो॥ 20 सुम्ये़न् तगि के़माबा के़अदङ्हाॽरे़ पाःन्नो के़निङ्वाॽ मे़लोरेन्ने़ॽ, थेआङ्भे़ल्ले़ खे़ङ्हाॽ खोमे़दे़त्ते़ मे़जुरे़आङ् मे़वाॽ॥ हे़क्क्याङ् के़रे़क् इस्राइलिहाॽरे़ मे़नाःक्तुबा हाङ्ङिल्ले़ लागिग खे़ङ्हाॽरे़ खे़ने़ॽ नु के़म्बारे़ के़हिम्सयङ् ले़प्माङ् लाम् ओमे़मे़त्तुर मे़वाॽरो॥” 21 सावलरे़ मे़त्तु, “आङ्गाॽग इस्राइलबा के़रे़क्नुःल्ले़ चुःक्सा बेन्यामिन थाःक्कोबाआरो॥ बेन्यामिन सुवाङ्ङिङ्ग मिङ्सो इङ्धाङ् मेःन्नेबा चोक्लो॥ खे़ने़ॽ थेआङ् अक्तङ्बा पान् आङ्गाॽनु के़बाःत्तुबाबे?” 22 खे़ब्याङ् सामुए़लरे़ सावले़न् नु कुसे़वारोबान् चाजामादे़न्नोबा लत्छा यम्बा लक्सिङ्ङो तेॽरुसि, हे़क्क्याङ् मे़उःत्तुसिबा सुम्बोङ् तरे़बाहाॽनु सोरिक् मिङ्सो इङ्धाङ्बा युक्नाओ खुने़ॽ युक्खुसि॥ 23 खे़ब्याङ् सामुए़लरे़ तःक् के़धोःक्पे़न् मे़त्तु, “से़न्दे़ युक्खे़ॽ मे़त्ने़बा सामुल्लाःन् कत्ना फे़त्ते़ॽ॥” 24 तःक् के़धोःक्पे़ल्ले़ से़न्दुआङ् के़युङ्बा कुलाङ्भे़ल्ले़क्मानुबा सामुल्लाःन् फे़त्तुआङ् सावलरे़ कुदगि ने़स्सु॥ हे़क्केःल्ले़ सामुए़लरे़ मे़त्तु, “आङ्गाॽ खे़ने़ॽ पिने़ फाॽआङ् से़न्दुङ् युक्खुङ्बा सामुल्लाःन् हाबा कन् के़ने़बे़ल्लो॥ आल्ल च्ये़ॽ, थेआङ्भे़ल्ले़ आङ्गाॽ उःत्तुङ्सिङ्बा तरे़बाहाॽनु खे़ने़ॽ के़जर फाॽआङ् सामुल्लाःन् से़न्दुङ् युक्खुङ्ङाङ् वये़॥” हे़क्क्याङ् खे़न् ये़न्नो सावलरे़ सामुए़ले़न्नु सोरिक् कुजा चरो॥ 25 खे़न् एगाङ् खे़ङ्हाॽ कोःक्माओबा सिदुङ्जभा चोःक्मादे़न्नोलाम् यो पाङ्जुम्मो मे़ये़, हे़क्क्याङ् सामुए़लरे़ कुहिम् कौसिओ सामुए़लले़न् सावले़न्नु ताॽजे़क्खे़सि॥ 26 तानाम् चिघाॽवघाॽ खाओःत्ते़ल्ले़ सामुए़लरे़ सावले़न् कौसिओ उःत्तुआङ् मे़त्तु, “पोगे़ॽ, आल्ल आङ्गाॽ पाङ्ने़देने़रो॥” हे़क्क्याङ् सावले़न् पोगे़आङ् ने़प्माङ् लाःक्कात् लःन्दे़बेसि॥ सामुए़लरे़ सावले़न् युक्साबा चोगुबा 27 खे़ङ्हाॽ यो पाङ्जुम् मे़बेर मे़बत्छे़ल्ले़ सामुए़लरे़ सावले़न् मे़त्तु, “के़से़वारोबे़न् आन्छिॽनुःल्ले़ तगि पेगे़ॽ मे़त्ते़ॽ॥” हे़क्क्याङ् खे़न् तगि थासिङ् पे॥ खे़ब्याङ् सामुए़लरे़ सावले़न् मे़त्तु, “खे़ने़ॽ कप्मोए सप्फा ये़बे़ॽ, निङ्वाॽफुमाङ्ङिल्ले़ आङ्गाॽ मे़त्ताङ्बा पाःन्निन् खे़ने़ॽ मे़त्ने़रो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.