Biblia Todo Logo
Bib sou entènèt

- Piblisite -

१ सामुए़ल 8 - लिम्‍बु


इस्राइलिहाॽरे़ हाङ् मे़नाःक्‍तु

1 सामुए़ले़न् काप्‍पोबा तुम्‍से़आङ् खुने़ॽ कुस्‍साहाॽ इस्राइलओ खासे़न् के़लोःम्‍बा पोङ्‌मारे़ लागि युक्‍तिङ् चोगुसि॥

2 खुने़ॽ कुस्‍सा तुम्‍बाल्‍ले़ कुमिङ् योएल वये़ हे़क्‍क्‍याङ् कुस्‍सा सरुम्‍बाल्‍ले़ कुमिङ् अबिया वये़॥ खे़न् ने़प्‍फुरे़ बेर्सेबाओ खासे़न् लोःम्‍मा याःम्‍बक् चोगे़सु॥

3 कर खे़न् ने़प्‍फु कुस्‍साहाॽ कुम्‍बा हे़क्‍के नुबा मना होःप्‍ते़सि, थेआङ्‌भे़ल्‍ले़ खे़ङ्‌हाॽ याङ्‌ङो साॽरिक् खिःम्‍ब्राःक्‍पा वये़सि॥ हे़क्‍क्‍याङ् खे़ङ्‌हाॽरे़ याङ् चे़सुआङ् मे़न्‌वाॽमनाबा खासे़न् लोःम्‍मा याःम्‍बक् चोगे़सु॥

4 खे़ल्‍ले़चोगुल्‍ले़ इस्राइलबा के़रे़क् लाम्‍लोबाहाॽ मे़जुप्‍से़आङ् रामाबा सामुए़लरेॽओ मे़द्‌ये़॥

5 हे़क्‍क्‍याङ् खे़ङ्‌हाॽरे़ खुने़ॽ मे़मे़त्तु, “आल्‍ल खे़ने़ॽ काप्‍पोबा के़दुम्‍से़, हे़क्‍क्‍याङ् के़स्‍साहाॽ खे़ने़ॽ लाङ्‌के़घेःक्‍पा लाम्‍मो लाङ्‌मे़घेःक्‍सिन्॥ आल्‍ल वेॽ लाजेॽबा सुवाङ्‌हाॽ हे़क्‍के आनिगे लाम्‍गे़लोबा हाङ्‌धिक् युक्‍तिङ् चोगे़ आबिरे़ॽओ॥”

6 कर खे़ङ्‌हाॽरे़ “आनिगे लाम्‍गे़लोबा हाङ्‌धिक् याप्‍मि आबिरे़ॽओ” मे़मे़त्तुल्‍ले़ खे़न् पाःन्‍निन् सामुए़लरे़ कुसिराॽ मे़धाङे़न्, खे़ल्‍ले़चोगुल्‍ले़ खुने़ॽ यहवे दाङ्‌बान् पेलि फाक्‍तु॥

7 हे़क्‍क्‍याङ् यहवे दाङ्‌बाल्‍ले़ सामुए़ले़न् मे़त्तु, “मनाहाॽरे़ के़म्‍मे़प्‍पा के़रे़क् पाःन्‍हाॽ खे़प्‍से़ॽ॥ कङ्‌ग खे़ङ्‌हाॽरे़ खे़ने़ॽ के़म्‍नाॽरे़बा मेःन्॥ कर खे़ङ्‌हाॽरे़ आङ्‌गाॽए खुनिॽ हाङ् पोङ्‌मा मे़नाॽराङ्‌बारो॥

8 आङ्‌गाॽ मिस्रलाम् खे़ङ्‌हाॽ लाम्‍लोसुङ् लःत्तुङ्‌सिङ्‌ङाङ्‌धो आल्‍लो थारिक् खे़ङ्‌हाॽरे़ हाबाहे़क्‍के मे़मे़त्तार मे़वाॽ, आल्‍ल खे़ङ्‌हाॽरे़ खे़ने़ॽआङ् हे़क्‍केए के़म्‍मे़त्‍ल मे़वाॽ॥ खे़ङ्‌हाॽरे़ आङ्‌गाॽ मे़नाॽराङ्‌ङाङ् वेॽ माङ्‌हाॽ से़वा मे़मे़त्तुसिर मे़वाॽ॥

9 आल्‍ल खे़ङ्‌हाॽरे़ थे मे़बाःत्तुर मे़वाॽ खे़प्‍से़ॽ, कर खे़ङ्‌हाॽ लाम्‍गे़लोबा हाङ्‌ङिल्‍ले़ आक्‍तङ्‌बा परिक्‍ले़ युक् चोगुसिॽ खे़न् नुरिक्‍काङ् कुसिङ् निःत्ते़म्‍मे़ॽ फाॽआङ् साम्‍दिङ् पिरे़से़ॽओ॥”

10 यहवे दाङ्‌बे़ल्‍ले़ पाःत्तुबा के़रे़क् पाःन्‍हाॽ सामुए़लरे़ हाङ् के़नाःक्‍पा मनाहाॽ मे़त्तुसि॥

11 खुने़ॽ मे़त्तुसि, “खे़निॽ सम्‍धाङ् हाङ् के़जोःक्‍पा हाङ्‌ङिन् अक्‍तङ्‌बा चोक्—खुने़ॽ खे़निॽ साहाॽ तेॽरुसिआङ् कुअन्‍लाधाहाॽ हे़क्‍क्‍याङ् कुअन् के़लोङ्‌बाहाॽनु याःम्‍बक् चोःक्‍मा पाङ्‌घुसिॽ, खे़ब्‍याङ् खे़ङ्‌हाॽ कुअन्‍लाधाहाॽ तगिदगि लोःक्‍मा पाङ्‌घुसिॽ॥

12 कुभाग हे़न्‍छिङ् हे़न्‍छिङ् नु ङाबोङ् ङाबोङ् मनालुप्‍पो सुहाङ्‌मिबा पोङ्‌से़ युक्‍तिङ् चोगुसिॽ॥ हे़क्‍क्‍याङ् वेॽहाॽ चाहिःन् कुब्‍याङ्‌सि के़धोःङ्‌बा नु कुजा के़सुम्‍बा चोगुसिॽ॥ आल्‍साङ् याम्‍मो वेॽहाॽ थङ् चोःक्‍मा फे़जुम् फे़या नु कुअन्‍लाधाहाॽओ चाहाब् के़जोःक्‍पा खजुम् खयाहाॽ चोःक्‍मा पाङ्‌घुसिॽ॥

13 खे़ल्‍ले़ खे़निॽ मे़न्‍छुमा साहाॽ तेॽरुसिआङ् तःक् के़धोःक्‍मा, खरे़ःङ् के़ले़ःङ्‌मा नु फुङ्‌नाम् चोःक्‍मा याःम्‍बक्‍को फत्‍छुसिॽ॥

14 खे़ल्‍ले़ खे़निॽ के़रे़क्‍नुःल्‍ले़ नुबा प्‍याङ्‌सिहाॽ, चे़ल्‍ले़क्‍सेॽ इक्‍हाॽ नु पे़ःङ्‌वालिःत्‍छेॽ इक्‍हाॽ तेॽरुआङ् कुसे़वारोबाहाॽ पिरुसिॽ॥

15 खुने़ॽ आबाङे कुसुहाङ्‌युक्‍पाहाॽ नु कुसे़वारोबाहाॽ पिमासिरे़ लागि खे़ल्‍ले़ खे़निॽ कुजाहाॽ नु चे़ल्‍ले़क्‍सेल्‍ले़ थिबोङ्‌लक् तेॽरु के़बिरिॽ॥

16 हे़क्‍क्‍याङ् खुने़ॽ खे़निॽ योक् के़गत्तुम्‍सिम्‍बा थाङ्‌बे़न् मे़न्‍छ्‌याहाॽ नु खे़निॽ वरिक्‍लिक्‍पा पित् साःङ्‌वाहाॽ खे़ब्‍याङ् अदङ्‌हाॽ तेॽरुसिआङ् खुने़ॽ कुयाःम्‍बक्‍को फत्‍छुसिॽ॥

17 खे़निॽ के़गत्तुम्‍सिम्‍बा मे़ल्‍लुक् मे़ःन्‍दालाम् खुने़ॽ थिबोङ्‌लक् तेॽरु के़बिरिॽ, हे़क्‍क्‍याङ् खे़निॽ आप्‍फेक्‍काङ् खुने़ॽ कुयोक् के़बोःक्‍खिॽ॥

18 खे़न् ये़म्‍मिन् ताःल्‍ले़ खे़निॽ के़सेगुम्‍बा हाङ्‌ङिन्‍लाम् चोःक्‌युम्‍भो खोमारे़ लागि के़अःक्‍तिॽ के़हाबिॽ, कर खे़न् ये़न्‍नो यहवे दाङ्‌बाल्‍ले़ खे़निॽ पेलिगे़न् तुवान् मे़घे़प्‍सुन्‌ॽ॥”

19 कर खे़न् मनाहाॽरे़ सामुए़लरे़ पाःत्तुबा पाःन्‍निन् मे़ङ्‌घे़प्‍सुन्॥ खे़ङ्‌हाॽरे़ मे़बाःत्तु, “मेःन्, आनिगे हाङ्‌ङे चाहाब् चोगिगे़॥

20 खे़ब्‍याङ् आनिगे सम्‍धाङ् युक् के़जोःक्‍पा नु थङ्‌ङो के़देॽबा हाङ् खोसुम्‍बे़ल्‍ले़ आनिगे वेॽ लाजेॽबा सुवाङ्‌हाॽ हे़क्‍तङ्‌बा पोःक्‍खिगे़रो॥”

21 खे़न् मनाहाॽरे़ मे़बाःत्तुबा के़रे़क् पाःन्‍हाॽ सामुए़लरे़ खे़प्‍सुआङ् कन् पाःन्‍निन् यहवे दाङ्‌बाल्‍ले़ कुदगि याम्‍मो नुःक्‍तुर पाःत्तु॥

22 हे़क्‍क्‍याङ् यहवे दाङ्‌बाल्‍ले़ सामुए़ले़न् मे़त्तु, “खे़ङ्‌हाॽरे़ मे़बाःत्तुबा पाःन्‍निन् खे़प्‍से़ॽ, हे़क्‍क्‍याङ् हाङ्‌धिक् सेगे़ पिरे़से़ॽ॥” हे़क्‍क्‍याङ् सामुए़लरे़ के़रे़क् इस्राइलबा मनाहाॽ मे़त्तुसि, “के़रे़क् मनाहाॽ आबाङे खे़निॽ पाङ्‌जुम्‍मो नुःक्‍खे़म् पेगे़म्‍मे़ॽओ॥”

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite