१ सामुए़ल 7 - लिम्बु1 खे़ल्ले़चोगुल्ले़ किर्यत-यारिमबा मनाहाॽ मे़ये़आङ् यहवे दाङ्बाल्ले़ कुमाङ्हुप् सन्दोक्किन् मे़देॽरु॥ खे़ङ्हाॽरे़ मे़देॽरुआङ् किर्यत-यारिमबा कोःक्माओ अबिनादाबरे़ कुहिम्मो मे़युक्खु, हे़क्क्याङ् कुस्सा एलाजारे़न् यहवे दाङ्बाल्ले़ कुमाङ्हुप् सन्दोक्किन् कम्ब्राङ् मे़प्मा याःम्बक्ओ मे़दोन्दुरो॥ सामुए़लरे़ इस्राइलओ युक् चोगुबा 2 कम्भलॽरिक् सन्दोक्किन् किर्यत-यारिम्मो यरिक् ये़म्, तङ्बेॽ निबोङ् थारिक् युङे़॥ हे़क्क्याङ् खे़न् ये़म्मो के़रे़क् इस्राइलिहाॽ मे़रिङ् मे़धक्ते़आङ् यहवे दाङ्बे़न् मे़गोःत्तु॥ 3 हे़क्क्याङ् सामुए़लरे़ के़रे़क् इस्राइलि सुवाङ्हाॽ अक्खे मे़त्तुसि, “खे़निॽ के़हिन्दिआङ् काक् निङ्वान् के़हिसुम् हे़क्क्याङ् यहवे दाङ्बाओ के़नुःक्खिबाने़फग्र थिम्मे़न्दङ् सुवाङ्हाॽरे़ खुनिॽ माङ्हाॽ नु अस्तोरेत नावाइत्लाहाॽ खे़निॽलाम् खे़त्ताम् तेसाम्से़ॽ॥ खे़निॽ आबाङे के़रे़क् निङ्वाॽरे़ यहवे दाङ्बाओ तोःन्नासिम्मे़ॽ हे़क्क्याङ् खुने़ॽरक् माङ्से़वा मे़त्ताम्मे़ॽ, हे़क्के के़जोगुम्ने़फग्र खुने़ॽ पलिस्तिहाॽरे़ खुनिॽ हुक्लाम्बा के़से़ःप्ति॥” 4 कम्भलॽरिक् इस्राइलिहाॽरे़ खुनिॽ बाल नु अस्तोरेत माङ्हाॽ मे़घे़त्तु मे़देसुसि, खे़ब्याङ् यहवे दाङ्बाओरक् माङ्से़वा मे़जोगे़॥ 5 हे़क्क्याङ् सामुए़लरे़ मे़त्तुसि, “के़रे़क् इस्राइलिहाॽ मिस्पाओ सुप्से़म्से़ॽ, हे़क्क्याङ् खे़निॽ लागि यहवे दाङ्बान् पेलि फाक्तुङ्ॽ॥” 6 हे़क्केलॽरिक् खे़ङ्हाॽ मिस्पाओ मे़जुप्से़, खे़ङ्हाॽरे़ च्वाःत्तिन् मे़बागुआङ् यहवे दाङ्बाल्ले़ कुदगि मे़हुक्खु॥ खे़न् ये़न्नो खे़ङ्हाॽ ले़न्दिक् नाम्धाधा तःक्ने़त्तो मे़युङे़ हे़क्क्याङ् खे़प्मो “आनिगे यहवे दाङ्बाल्ले़ कुदक्ले़ङ्वाओ लायो चोगुम्बे़” लॽरिक् खे़ङ्हाॽ पाःप्मा मे़दे़न्दे़॥ हे़क्क्याङ् सामुए़ले़न् मिस्पाओ इस्राइलबा लाम्लोबा पोःक्खे़॥ 7 आल्ल इस्राइलबा के़रे़क् मनाहाॽ मिस्पाओ मे़जुप्से़आङ् मे़वाॽ के़लॽबा पाःन्निन् पलिस्तिहाॽरे़ मे़घे़प्सु, हे़क्केःल्ले़ खे़ङ्हाॽरे़ खुनिॽ युक्साबाहाॽ इस्राइलिहाॽनु थङ् चोःक्से़ मे़लःन्दे़॥ पलिस्तिहाॽ तगि थङ् चोःक्से़ मे़भे़न्ल मे़बत् के़लॽबा पाःन्निन् मे़घे़प्सुआङ् इस्राइलिहाॽ साॽरिक् मे़गिसे़॥ 8 खे़ङ्हाॽरे़ सामुए़ले़न् मे़मे़त्तु, “पलिस्तिहाॽरे़ खुनिॽ हुक्लाम्बा से़ःप्सिङ्मारे़ लागि यहवे दाङ्बा आनिॽ निङ्वाॽफुमाङ्ङिन् आनिगे लागि चक्मे़न्लॽए पेलि फाक्ते़ आबिरे़ॽओ॥” 9 खे़ब्याङ् सामुए़लरे़ नुगे़धुङ्बार के़वाॽबा लत्छा मे़ल्लुक्सात् तारुआङ् यहवे दाङ्बाओ कुभुम्बा मिधिङ्मनादेमनाबा वयागे़न् सिदुङ्जभा तोःन्दु॥ हे़क्क्याङ् इस्राइलिहाॽरे़ खुनिॽ लागि यहवे दाङ्बान् पेलि फाक्तु॥ हे़क्क्याङ् यहवे दाङ्बाल्ले़ खुने़ॽ नोगप् पिरुरो॥ 10 सामुए़लरे़ मिधिङ्मनादेमनाबा वयागे़न् सिदुङ्जभा तोःन्दुर यागे़ल्ले़, पलिस्तिहाॽ इस्राइलिहाॽनु थङ् चोःक्से़ मे़गे़रे़ मे़भे़रे़॥ कर खे़ल्ले़ याःन्दिक् यहवे दाङ्बान् साङ्ग्राम्पेदाङ्लाम् यम्बा इक्लाओ खाम्बेःक्मे़न् लोःक्खुर पलिस्तिहाॽरे़ खुनिॽ तक्ले़ङ्वाओ अःक्ते़ हे़क्केःल्ले़ पलिस्तिहाॽ थे चोःक्मा, थे नाॽमा लॽरिक् मे़नाक्ते़ल्ले़ इस्राइलिहाॽरे़ खे़ङ्हाॽ मे़नाःन्दुसि॥ 11 मिस्पालाम् इस्राइलिहाॽरे़ पलिस्तिहाॽ मे़नाःत्तुसिर बेथ-कर कुसिःक्तो थारिक् लाम् कुले़ःम् मे़ज्ये़प्तु मे़स्ये़रुसि॥ 12 खे़ब्याङ् आम्भा खे़प्मो सामुए़लरे़ यम्बा लुङ्धिक् तेॽरुआङ् मिस्पा नु सेनरे़ कुलुम्मो लेःत्तु॥ खुने़ॽ खे़ल्ले़ कुमिङ् ए़बेन-एजर (“कुभाॽ के़बिबा लुङ्”) वाःत्तु, हे़क्क्याङ् खुने़ॽ पाःत्तु, “यहवे दाङ्बाल्ले़ कॽयो थारिक् आनिॽ आभाॽरे़रो॥” 13 हे़क्केलॽरिक् पलिस्तिहाॽ हारिमे़द्ये़आङ् मे़वये़, हे़क्क्याङ् यरिक् ये़न् थारिक् इस्राइलिहाॽरे़ खुनिॽ युक्पुङ्दे़न्नो खे़ङ्हाॽ याम्मो मे़ल्लासे़न्॥ सामुए़लरे़ कुहिङ्हिङ् थारिक्के यहवे दाङ्बे़न् पलिस्तिहाॽरे़ खुनिॽ तक्ले़ङ्वाओ वये़॥ 14 पलिस्तिहाॽरे़ हुक्काप् मे़जोगु मे़देॽरुबा एक्रोनाङ् कत्ना नु गाथ कुबेसाङ्बा इस्राइलि ये़क्यक् पाङ्जुम्हाॽ इस्राइलिहाॽरे़ याम्मो मे़नुःक्तु॥ हे़क्क्याङ् इस्राइलिहाॽरे़ खुनिॽ पेसाङ्बा युक्पुङ्दे़न्हाॽ खे़ङ्हाॽरे़ खुनिॽ युक्कोलाम् मे़नुःक्तु॥ हे़क्क्याङ् खे़न् ये़म्मो इस्राइल नु एमोरि लुम्मोआङ् पाःन्दङ् पोःक्खे़॥ 15 हे़क्केलॽरिक् सामुए़लरे़ कुहिङ्हिङ् थारिक्के इस्राइलओ खासे़न् चोगु॥ 16 तङ्बेॽ थक्मा खुने़ॽ तगि बेथेल हे़क्क्याङ् गिलगाल नु मिस्पा पाङ्जुम्हात्ति पेआङ् खुने़ॽ मनाहाॽ खासे़न् चोगु पिरुसि॥ 17 कर खुने़ॽ रामाबा कुहिम्मोए नुःक्खे़॥ हे़क्क्याङ् खे़प्मोआङ् हाबा हे़क्केलॽरिक्के इस्राइलिहाॽ खासे़न् चोगु पिरुसि॥ खुने़ॽ खे़प्मो यहवे दाङ्बाल्ले़ कुलागि लत्छा ले़त्ति तोःम्मादे़न् चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.