१ सामुए़ल 6 - लिम्बुपलिस्तिहाॽरे़ माङ्हुप् सन्दोक्किन् मे़नुःक्तुबा 1 यहवे दाङ्बाल्ले़ कुमाङ्हुप् कुसन्दोःक्किन् पलिस्तिहाॽरे़ खुनिॽ ते़ङ्गप्पो युङे़बा नुसि ला थारिक् के़रे़आङ् वये़॥ 2 हे़क्क्याङ् पलिस्तिहाॽरे़ निङ्वाॽफुसाम्बाहाॽ नु खागे़इक्पाहाॽ मे़उःत्तुसिआङ् खे़ङ्हाॽ से़ःन्मे़लाप्तुसि, “यहवे दाङ्बाल्ले़ कुसन्दोःक्किन् आल्ल आनिगे थे चोगुम्बे़बाबे? खे़न् तगि युङे़बा कुयुक्नादे़न्नो आनिगे आक्खेआङ् नुःक्मादेमाबे? आमे़त्ते़ॽओ॥” 3 खे़ङ्हाॽरे़ मे़मे़त्तुसि, “इस्राइलबा निङ्वाॽफुमाङ्ङिल्ले़ कुसन्दोःक्किन् खे़निॽ के़नुःक्तुम् के़देसुम्बाने़ फग्र खे़न्निन् हाबा मे़नुःक्ताम्मिन्ने़ॽ॥ कर आप्तिक्लाम् ले़प्मि खोमा सिदुङ्जभानु नुःक्ताम्मे़ॽ॥ हे़क्क्याङ् खिनिॽ के़वेःत्तिआङ् थेआङ्नि खुने़ॽ तुक्खे चाःत्तिगे़बे के़लॽबा पाःन्निन् कुसिङ् के़निःत्तुम्लो॥” 4 पलिस्तिहाॽरे़ सेःन्मे़दोसुसि, “आप्तिक्लाम् ले़प्मि खोमा आक्तङ्बा सिदुङ्जभा हाङ्मादेमाबे?” खे़ङ्हाॽरे़ अक्तङ्बा नोगप् मे़बिरुसि, “ङासि साम्म्याङ् लःप्ला नु ङासि साम्म्याङ् सुबाहाॽ पलिस्ति युक्साबाहाॽरे़ खुनिॽ खानिःत् कुइसिक् हाङे़म्देसे़म्मे़ॽ॥ थेआङ्भे़ल्ले़ आम्भा खे़न् तुक्माल्ले़ खे़निॽ नु खे़निॽ युक्साबाहाॽ के़याङ्घिआङ् के़वयि॥ 5 खिनिॽ थक्को के़लःम्बा फक्वाले़ःङ्वा याङ्घेःक् हे़क्तङ्बा ङासि साम्म्याङ् इःत्हाॽ नु पलिस्ति लाजेन् थ्यःङ् के़जोःक्पा सुबा चइःत्हाॽ चोगे़म्से़ॽ, हे़क्क्याङ् इस्राइलबा निङ्वाॽफुमाङ्ङिन् मिङ्सो इङ्धाङ् पिराम्मे़ॽ॥ हे़क्के के़जोगुम्ने़फग्र खुने़ॽ खे़निॽ, खे़निॽ माङ्हाॽ नु खे़निॽ लाजेन् खुम्दिङ् पिमा ले़रु॥ 6 खे़निॽ थेआङ् मिस्रबा हाङ् फारोन् नु खे़न् लाजेॽओबा मनाहाॽ हे़क्के खे़निॽ निङ्वान् चिःप्पाबे? निङ्वाॽफुमाङ्ङिल्ले़ खे़ङ्हाॽ साॽरिक् के़साक्पा तुक्खे चाःत्तुसिआङ्लक् खे़ङ्हाॽरे़ इस्राइलिहाॽ लःम्मा पेःक्मा मे़भाःक्तुसिबा मेःम्बि?” 7 “आल्ल, आप्फाल्ले़आङ् मे़ङ्घे़ःप्पे के़वाॽमा नु खारक् के़धाप्मा पिप्मा ने़त्छि हे़क्क्याङ् कुसङ् पित्लाधा थिक् यारिप् चोगाम्मे़ॽ॥ हे़क्क्याङ् खे़न् पिप्माहाॽ पित्लाधाओ खे़ःप्ताम्सिम्मे़ॽ कर पित्साःत्हाॽग से़न्दाम्सिम्मे़ॽआङ् पित्थाःङ्ङो तेॽराम्सिम्मे़ॽ॥ 8 खे़ब्याङ् यहवे दाङ्बाल्ले़ कुसन्दोःक्किन् तेॽरे़म्मे़ॽआङ् पित्लाधा सम्धाङ् युक्खाम्मे़ॽ, हे़क्क्याङ् थक्को के़लःम्बा फक्वाले़ःङ्वा याङ्घेःक् हे़क्तङ्बा ङासि साम्म्याङ् इःत्हाॽ नु साम्म्याङ् सुबाहाॽ ले़प्मि खोमा सिदुङ्जभा कुइसिक् खे़ल्ले़ कुबेसाङ्बा सन्दोक्को युक्खाम्मे़ॽ॥ हे़क्क्याङ् खे़न् पिप्माहाॽ आत्तान् पेःक्मा खुन्छिॽ सिराॽथाङ् खे़प्मोए पित्छिररो॥ 9 कर खे़ङ्हाॽ हाबा ओमे़त्ते़म् फत्छे़म्सिम्मे़ॽ॥ खे़ङ्हाॽरे़ आनिॽ लाजेॽबा इःन्दोन् काःक्सुआङ् बेथ-सेमेस ले़प्माङ् पित्छिने़फग्र आनिॽओ ये़त्तुक्खे के़दाःप्पे़न् यहवे दाङ्बान्नेरछ फाॽआङ् कुसिङ् आनिःत्तुम्॥ हे़क्क्याङ् खे़ङ्हाॽ खे़न् ले़प्माङ् मे़बित्छिन्ने़फग्र खे़न् ये़त्तुक्खेःन् यहवे दाङ्बालाम् त्ये़बा मे़ःन्लछ, कर आबाङे पोःक्खे़बारछ फाॽआङ् आनिॽ कुसिङ् आनिःत्तुम्लो॥” 10 खे़ल्ले़चोगुल्ले़ खे़ङ्हाॽरे़ हाबा हे़क्केए मे़जोगु॥ खे़ङ्हाॽरे़ पिप्मा ने़त्छि मे़दारुसिआङ् पित्लाधाओ मे़घे़ःप्तुसि हे़क्क्याङ् पित्सात्हाॽग पित्थाःङ्ङो मे़देॽरुसि॥ 11 खे़ब्याङ् खे़ङ्हाॽरे़ साम्म्याङ् सुबा नु खुनिॽ थक्को के़लःम्बा फक्वाले़ःङ्वा याङ्घेःक् हे़क्तङ्बा ङासि साम्म्याङ् इःत्हाॽ हे़क्क्याङ् यहवे दाङ्बाल्ले़ कुसन्दोःक्किन् पित्लाधा सम्धाङ् मे़युक्खु॥ 12 हे़क्क्याङ् खे़न् पिप्माहाॽ बेथ-सेमेसबा लाम्मेलाम् माःङ्ङाङ् माःङ् अःक्ते़छिर माःक्खे़छिर लाम्मिन् मे़न्ले़त्ते तोःन्दोन् थाने़सि॥ खे़म्ब्याङ् पलिस्ति युक्साबाहाॽरे़ बेथ-सेमेसबा इःन्दो थारिक् मे़दिम्दु मे़देॽरुसिरो॥ 13 आल्ल खे़न् ये़म्मो बेथ-सेमेसबा मनाहाॽरे़ खुनिॽ सिहाॽ सेःङ्घा ने़ने़बादे़न्नो मे़हे़गुर मे़यागे़, हे़क्क्याङ् खे़ङ्हाॽ अक्खे थो ओमे़मये़ल्ले़ माङ्हुप् सन्दोक्किन् मे़निसुआङ् पसःत् मे़सःत्ते़॥ 14 हे़क्क्याङ् खे़न् पित्लाधान् बेथ-सेमेसबा यहोसुरे़ कुब्याङ्सिओ के़रे़आङ् यम्बा लुङ्धिक्ले़ कुबेसाङ् ये़म्सिङ्॥ हे़क्केःल्ले़ खे़ङ्हाॽरे़ पित्लाधा सिङ्ङिन् मे़घे़रु हे़क्क्याङ् पिप्माहाॽ मे़से़रुसिआङ् यहवे दाङ्बाओ मिधिङ्मनादेमनाबा वयागे़न् सिदुङ्जभा मे़दोन्दु॥ 15 खे़ब्याङ् ले़बिहाॽरे़ यहवे दाङ्बाल्ले़ कुसन्दोःक्किन् हे़क्क्याङ् थक्को के़लःम्बा फक्वाले़ःङ्वा याङ्घेःक् हे़क्तङ्बा ङासि साम्म्याङ् इःत्हाॽ नु साम्म्याङ् सुबा के़याक्पा चुक्पा सन्दोक्किन् मे़लःत्तुआङ् यम्बा लुङ् सम्धाङ् मे़युक्खु॥ हे़क्क्याङ् बेथ-सेमेसबा मनाहाॽरे़ हाबा खे़न् ये़न्नो यहवे दाङ्बाओ मिधिङ्मनादेमनाबा वयागे़न् सिदुङ्जभाहाॽ नु वेॽ सिदुङ्जभाहाॽ मे़दोन्दु॥ 16 पलिस्तिबा खे़न् ङासि युक्साबाहाॽरे़ खे़न् के़रे़क् मे़निसु, हे़क्क्याङ् आम्भा खे़न् ये़न्नोए खे़ङ्हाॽ एक्रोन मे़नुःक्खे़ मे़बे॥ 17 पलिस्तिहाॽरे़ यहवे दाङ्बाओ मे़हाङुबा थक्को के़लःम्बा फक्वाले़ःङ्वा याङ्घेःक् हे़क्तङ्बा ङासि साम्म्याङ् इःत्हाॽ अस्दोद, गाजा, अस्कलोन, गात नु एक्क्रोन कन् के़रे़क्ले़ लागि आप्तिक्लाम् ले़प्मि खोमा लत्छा लत्छा सिदुङ्जभा वये़॥ 18 हे़क्क्याङ् साम्म्याङ् सुबाहाॽग लुङ्धाक्ले़ कब्रिङ् कबुबा ङासि पलिस्ति ये़क्यक् नु खे़ल्ले़ कुघिरिबा पाङ्भेॽहाॽरे़ लागि वये़, खे़प्मोग ङासि युक्साबाहाॽरे़ युक् मे़जोगुआङ् वये़॥ बेथ-सेमेसबा यम्बा लुङ् सम्धाङ् खे़ङ्हाॽरे़ यहवे दाङ्बाल्ले़ कुसन्दोःक्किन् मे़युक्खु, खे़न् बेथ-सेमेसबा यहोसुरे़ कुब्याङ्सिओ तोःन्दिरे़ लागि आल्लो थारिक्साङ् ने़रो॥ 19 कर यहवे दाङ्बाल्ले़ बेथ-सेमेसबा नुबोङ् मनाहाॽ से़रुसि, थेआङ्भे़ल्ले़ खे़ङ्हाॽरे़ यहवे दाङ्बाल्ले़ कुसन्दोःक्किन् सिगाङ् ओमे़मे़त्तुआङ् वये़॥ यहवे दाङ्बाल्ले़ कम्भदाङ्बा यम्बा मे़क्मासिमा तारुबाल्ले़ चोगुल्ले़ खे़प्मोबा मनाहाॽ साॽरिक् मे़रिङ् मे़धक्ते़॥ माङ्हुप् सन्दोक्किन् किर्यत-यारिम मे़गे़त्तु 20 हे़क्क्याङ् बेथ-सेमेसबा मनाहाॽरे़ मे़बाःत्तु, “यहवे दाङ्बा, कन् सेसे निङ्वाॽफुमाङ्ङिल्ले़ कुदगि हात् ये़प्मा सुक्पाबे? कप्मोलाम् कन् माङ्हुप् सन्दोक्किन् आनिॽ आत्ति मे़देॽरुर याःम्मासिबे?” 21 खे़ल्ले़चोगुल्ले़ खे़ङ्हाॽरे़ किर्यत-यारिम के़युङ्बा मनाहाॽ इङ्घङ् मे़हाक्तुसिआङ् मे़मे़त्तुसि, “पलिस्तिहाॽरे़ यहवे दाङ्बाल्ले़ कुमाङ्हुप् सन्दोक्किन् मे़नुःक्तु मे़भे़न्छुआङ् वाॽ॥ यो ये़ॽआम्मे़ॽआङ् खे़न् खे़निॽओ थो तेॽराम्मे़ॽओ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.