Biblia Todo Logo
Bib sou entènèt

- Piblisite -

१ सामुए़ल 5 - लिम्‍बु


माङ्‌हुप् सन्‍दोक्‍किन् पलिस्‍तिहाॽरे़ मे़गत्तु

1 पलिस्‍तिहाॽरे़ निङ्‌वाॽफुमाङ्‌ङिल्‍ले़ कुसन्‍दोःक्‍किन् हुक्‍काप् मे़मे़त्‍छिङ्‌ङाङ् ए़बेन्-एजरलाम्‍बा खे़ङ्‌हाॽरे़ अस्‍दोद पाङ्‌जुम्‍मो मे़देॽरु॥

2 हे़क्‍क्‍याङ् खे़ङ्‌हाॽरे़ सन्‍दोक्‍किन् मे़बक्‍खु मे़देॽरुआङ् दागोन माङ् के़युङ्‌बा माङ्‌हिम्‍मो मे़दारु, हे़क्‍क्‍याङ् दागोने़ल्‍ले़ए कुबेसाङ् मे़युक्‍खु॥

3 कुदाःन्‍दिक्‍समा तानाम् अस्‍दोदबा मनाहाॽ मे़बोगे़आङ् ओमे़मे़त्तुल्‍ले़ यहवे दाङ्‌बाल्‍ले़ कुसन्‍दोःक्‍किल्‍ले़ कुदगि दागोने़न् चोःन्‍दे़आङ् साम्‍बोन् हबत्‍छा फन्‍छिङ्‌ङाङ् पत्‍छे़बा मे़निसु॥ हे़क्‍क्‍याङ् खे़ङ्‌हाॽरे़ खे़न् दागोने़न् मे़बक्‍खुआङ् याम्‍मो कुयुङ्‌मादे़न्‍नोए मे़युक्‍खु॥

4 कर कुदाःन्‍दिक्‍मा तानाम् खे़ङ्‌हाॽ मे़बोगे़आङ् ओमे़मे़त्तुल्‍ले़ यहवे दाङ्‌बाल्‍ले़ कुसन्‍दोक् तगिबा कुलाङ्‌जक्‍पो साम्‍बोन् हबत् चोःन्‍दे़आङ् ने़स्‍से़बा मे़निसु, हे़क्‍क्‍याङ् खे़न् दागोने़ल्‍ले़ कुधे़गेःक्‍किन् नु कुहुक्‍हाॽ फुत्‍चिक् वजिक् पुन्‍दे़ स्‍याक् वयाक् पुॽरे़आङ् लाम्‍धेःप्‍पाल्‍ले़ कुयाओ ने़स्‍से़गरे़, दागोने़ल्‍ले़ कुधक्‍किन्‍लक् हाबा युङे़ज्‍ये़॥

5 खे़ल्‍ले़चोगुल्‍ले़ खे़न् ये़म्‍माङ्‌धो आल्‍लो थारिक्‍साङ् दागोने़ल्‍ले़ कुयक्‌याबाहाॽ नु वेॽ पलिस्‍तिहाॽ अस्‍दोदबा दागोन माङ्‌हिम् सिगाङ् मे़लाःत्तिल्‍ले़ खे़न् दागोने़न् मे़ने़स्‍सुबा ते़न्‍निन् मे़न्‍दोॽए मे़लात्॥

6 हे़क्‍क्‍याङ् यहवे दाङ्‌बाल्‍ले़ अस्‍दोद पाङ्‌जुम्‍मो नु खे़ल्‍ले़ कुबेसाङ्‌बा पाङ्‌भेॽबा मनाहाॽ सम्‍धाङ् किप्‍मा के़घुबा फक्‌वाले़ःङ्‌वा के़लःम्‍बा याङ्‌घेःक् चोगुआङ् खे़ङ्‌हाॽरे़ खुनिॽ सम्‍धाङ् माङ्‌दुक्‍मा तारु॥

7 खे़न् मनाहाॽरे़ थे पोःक्‍खे़ के़लॽबा निङ्‌वाॽ मे़घोसुआङ् खे़ङ्‌हाॽरे़ मे़बाःत्तु “इस्राइलबा निङ्‌वाॽफुमाङ्‌ङिल्‍ले़ कुसन्‍दोःक्‍किन् आनिॽ कप्‍मो सप्‍फाधिक्‍काङ् युङ्‌मा मे़नुॽने़न्! थेआङ्‌भे़ल्‍ले़ खुने़ॽग आनिॽ तक्‍ले़ङ्‌वाओ वाॽ! दागोन माङ्‌ङिन्‍नु सोरिक् आनिॽ के़रे़क् आमे़क्‍लो॥”

8 खे़ल्‍ले़चोगुल्‍ले़ खे़ङ्‌हाॽरे़ पलिस्‍तिहाॽरे़ खुनिॽ के़रे़क् युक्‍साबाहाॽ मे़उःत्तुसि॥ हे़क्‍क्‍याङ् खे़ङ्‌हाॽ मे़मे़त्तुसि, “कन् इस्राइलबा निङ्‌वाॽफुमाङ्‌ङिल्‍ले़ कुसन्‍दोःक्‍किन् आनिगे थे चोगुम्‍बे़बाबे?” हे़क्‍क्‍याङ् युक्‍साबाहाॽरे़ मे़मे़त्तुसि, “इस्राइलबा निङ्‌वाॽफुमाङ्‌ङिल्‍ले़ कुसन्‍दोःक्‍किन् गातबा पाङ्‌जुम्‍मो मे़समे़धर॥” हे़क्‍केलॽरिक् खे़ङ्‌हाॽरे़ इस्राइलबा निङ्‌वाॽफुमाङ्‌ङिल्‍ले़ कुसन्‍दोःक्‍किन् मे़जत्तु मे़देॽरु॥

9 कर सन्‍दोक्‍किन् गातओ के़रे़नुमे़ःन्‍ने खे़प्‍मोबा चुक्‍पा यम्‍बा के़रे़क् मनाहाॽ यहवे दाङ्‌बाल्‍ले़ किप्‍मा के़घुबा फक्‌वाले़ःङ्‌वा मे़लःन्‍दे़र याःन्‍दुसिआङ् तुक्‍खे चाःप्‍मा हेःक्‍तुसि॥ हे़क्‍क्‍याङ् खे़न् पाङ्‌जुम्‍मो साॽरिक् किमा यङ्‌मा पोःक्‍खे़॥

10 खे़ल्‍ले़चोगुल्‍ले़ खे़प्‍मोलाम् खे़ङ्‌हाॽरे़ निङ्‌वाॽफुमाङ्‌ङिल्‍ले़ कुसन्‍दोःक्‍किन् एक्रोन पाङ्‌जुम्‍मो मे़समे़ध॥ कर निङ्‌वाॽफुमाङ्‌ङिल्‍ले़ कुसन्‍दोःक्‍किन् खे़ॽयो मे़गे़त्तुबा मे़निसुनेमे़ःन्‍ने एक्रोनबा मनाहाॽ मे़अःक्‍ते़र मे़बाःत्तु, “खे़ङ्‌हाॽरे़ग इस्राइलबा निङ्‌वाॽफुमाङ्‌ङिल्‍ले़ कुसन्‍दोःक्‍किन् आनिॽ नु आनिॽ हिम्‍सयङ्‌हाॽ से़त्‍छे़ कप्‍मो मे़भे़त्तुआङ् वाॽरो॥”

11 खे़ल्‍ले़चोगुल्‍ले़ एक्रोनबा मनाहाॽरे़ पलिस्‍ति युक्‍साबाहाॽ मे़उःत्तुसिआङ् मे़मे़त्तुसि, हे़क्‍क्‍याङ् खे़ङ्‌हाॽ मे़मे़त्तुसि, “इस्राइलबा निङ्‌वाॽफुमाङ्‌ङिल्‍ले़ कुसन्‍दोःक्‍किन् याङ्‌ना आबाङे कुयुक्‍नाओ नुःक्‍ते़म्‍देसे़म्‍मे़ॽओ॥ मेःन्‍ने़फग्र कल्‍ले़ आनिगे के़रे़क् स्‍ये़रिगे़रो॥” सिमे़न् नु तुक्‍मा लाःक्‍मान् पाङ्‌जुम्‍मो के़रे़क् पोगे़आङ् ने़स्‍से़, थेआङ्‌भे़ल्‍ले़ निङ्‌वाॽफुमाङ्‌ङिल्‍ले़ कुहुक्‍किन् खे़न् पाङ्‌जुम्‍मिल्‍ले़ कुदक्‍ले़ङ्‌वाओ पोगे़आङ् वये़रो॥

12 मे़न्‍छिए के़वाॽबाहाॽ किप्‍मा के़घुबा फक्‌वाले़ःङ्‌वा लःम्‍माल्‍ले़ तुक्‍खे चाःत्तुसि॥ हे़क्‍क्‍याङ् खे़प्‍मोबा हाःप्‍मा फिःक्‍मे़न् साङ्‌ग्राम्‍पेदाङ् थारिक् के़रे़रो॥

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite