१ सामुए़ल 4 - लिम्बुपलिस्तिहाॽरे़ सन्दोक्किन् हुक्काप् मे़मे़त्छिङ्बा 1 हे़क्क्याङ् सामुए़लरे़ कुबाःन्जाक्किन् इस्राइल लाजेॽ के़रे़क् पिसाङ् से़रे़॥ आल्ल खे़न् ये़म्मो इस्राइलिहाॽ पलिस्तिहाॽनु थङ् चोःक्से़ तगि मे़बोरे़॥ इस्राइलिहाॽरे़ ए़बेन-एजर मे़प्मनाबादे़न्नो साःङ्गाहिम् मे़घिङ्घुआङ् मे़युङ्सिङ् हे़क्क्याङ् पलिस्तिहाॽरे़ अपेक मे़प्मनाबादे़न्नो तुरायक् मे़घिङ्घुआङ् मे़युङ्सिङ्॥ 2 पलिस्तिहाॽरे़ इस्राइलिहाॽ चिभत् मे़भत्तुसि, हे़क्क्याङ् इस्राइलिहाॽ मे़नाःन्दुसि, हे़क्क्याङ् खे़ङ्हाॽरे़ इस्राइलिहाॽरे़ खुनिॽ मनाहाॽ हे़न्छिङ् लिसि यारिक् थङ्ङो हदॽ मे़से़रुसि॥ 3 हे़क्क्याङ् इस्राइलबा थक्सुबाहाॽ यक्को मे़नुःक्खे़ मे़द्ये़आङ् इस्राइलबा साम्योसिक्साम्बाहाॽरे़ मे़बाःत्तु, “आइन् आनिॽ थेआङ् यहवे दाङ्बे़ल्ले़ पलिस्तिहाॽलाम् हारिआद्ये़र आयाःन्दे़बाबे? आनिॽ यहवे दाङ्बे़ल्ले़ कुसन्दोःक्किन् सिलोओलाम् थाक्तुम्, खे़न् आनिॽलुम्मोए वाॽर हे़क्क्याङ् आनिॽ निङ्मिहाॽरे़ खुन्छिॽ हुक्कोलाम् आसे़ःप्ल॥” 4 खे़ल्ले़चोगुल्ले़ खे़ङ्हाॽरे़ सिलोओ मनाहाॽ मे़बाङ्घुसि, हे़क्क्याङ् करुब मे़प्मनाबा माङ्लाइङ्बाहाॽरे़ खुन्छिॽ लुम्मो के़युङ्बा मुक्साम्दाङ्बा यहवे दाङ्बाल्ले़ कुमाङ्हुप् सन्दोक्किन् खे़ङ्हाॽरे़ मे़धाक्तु॥ खे़ॽयो एलिरे़ कुस्सा ने़प्फु, होप्निन् नु पिनहासे़न् माङ्हुप् सन्दोक्किल्ले़ कुबेसाङ् वये़सि॥ 5 यहवे दाङ्बाल्ले़ कुमाङ्हुप् सन्दोक्किन् तुरायक्को मे़दारु, हे़क्केःल्ले़ के़रे़क् इस्राइलिहाॽ खाम्बेःक्मे़न्ने यक्खे़र यम्बा इक्लाओ मे़अःक्ते़॥ 6 पलिस्तिहाॽरे़ खे़न् इक्लान् मे़घे़प्सुआङ् सेःन्मे़दोसिङ्, “हिब्रुहाॽरे़ खुन्छिॽ तुरायक्को खे़न् यम्बा इक्लान् थेबे?” यहवे दाङ्बे़ल्ले़ कुसन्दोःक्किन् यक्को के़रे़आङ् युङ् के़लॽबा पलिस्तिहाॽरे़ निङ्वाॽ मे़घोसु॥ 7 हे़क्केःल्ले़ खे़ङ्हाॽ मे़गिसे़र मे़बाःत्तु, “माङ्ङिन् तुरायक्को त्ये़रत्छ॥ चिःत्ताङ्लक् स्ये़रो! आनिॽग आमे़क्पा पोःक्खे़रो, अक्तङ्बाग तगि आप्फाल्ले़आङ् मे़म्बोङ्ङे वये़॥ 8 कन् मुक्साम्दाङ्बा माङ्हाॽरे़ खुनिॽ मुक्साम्लाम् आनिॽ हाःत्ले़ ताङ्से़ःप्मा आसुक्पाबे? हाबा कन् माङ्हाॽरे़ए मुरे़क् खारे़क्पा ये़ःङ्घादे़न्नो मिस्रिहाॽ परिक् परिक्पा तुक्मा लाःक्मालाम् मे़मे़क्खुसिआङ् वये़॥ 9 पलिस्तिसे, हाङ्हाङ् लॽरे़म्मे़ॽ, ये़म्बित्छा हे़क्के याःम्बक् चोगे़म्मे़ॽ, मेःन्ने़भाग्र खे़ङ्हाॽ खिनिॽ योःक्पा मे़वये़बा कुइसिक् खे़न् हिब्रुहाॽरे़ खुन्छिॽ योक् के़बोक्खिरो॥ के़धुम्बा ये़म्बित्छा हे़क्के थङ् चोगे़म्मे़ॽ॥” 10 खे़ल्ले़चोगुल्ले़ पलिस्तिहाॽरे़ थङ् मे़जोगु, हे़क्क्याङ् इस्राइलिहाॽ हारिमे़द्ये़आङ् खुन्छिॽ तुरायक् ले़प्माङ् मे़घे़त्छिङ् मे़बे॥ कम्भलॽरिक् इस्राइलिहाॽ साॽरिक् कुजाभे़रे़र हारिमे़द्ये़, हे़क्क्याङ् सुम्बोङ् हे़न्छिङ् यारिक् खाम्बाङ्ङो के़धक्पा खुन्छिॽ थक्सुबाहाॽ मे़स्ये़॥ 11 निङ्वाॽफुमाङ्ङिल्ले़ कुमाङ्हुप् कुसन्दोःक्किन् हुक्काप् मे़मे़त्छिङ्, हे़क्क्याङ् एलिरे़ कुस्सा, होःप्निःन् नु पिनहासे़न् ने़प्माङ् मे़स्ये़रुसिरो॥ एलिरे़ कुसिमे़न् 12 हाबा खे़न् ये़न्नो बेन्यामिन थाःक्कोबा मनाधिक् थङ्लाम्बा सिलोओ खे़त्छिङ्ङाङ् त्ये़, खे़ल्ले़ कुदेःत्हाॽ ते़रे़क् ते़रे़क् ते़ःक्खे़आङ् कुधे़गेःक्पो खाम्हिःक्सोरि पत्छे़॥ 13 खे़न् के़रे़द्ये़ःल्ले़ एलिन् लाम्मिल्ले़ कुबेसाङ् कुयुङ्मादे़न्नो युङ्सिङ्ङाङ् ओमनु युङे़, थेआङ्भे़ल्ले़ निङ्वाॽफुमाङ्ङिल्ले़ कुसन्दोःक्किल्ले़ चोगुल्ले़ खुने़ॽ साॽरिक् किसे़आङ् वये़॥ खे़न् मनाःल्ले़ इङ्घङ्ङिन् तारुआङ् ये़क्यक् सिगाङ् लासे़, हे़क्क्याङ् पोःक्खे़बा के़रे़क् पाःन्हाॽ मनाहाॽ चे़क्तुसि हे़क्केःल्ले़ ये़क्यक्कोबा के़रे़क् मनाहाॽ मे़हाबे़ मे़भिःक्ते़॥ 14 एलिरे़ खे़न् हाःम्लाक्वा पोगे़बान् खे़प्सुआङ् पाःत्तु, “कन् हयङ् किल्लिङ्ङिन् थेबे?” खे़न् मनान् हाराहारा एलिरे़ॽओ पे॥ 15 खे़न् ये़म्मो एलिन् फाङ्बोङ्ङाङ् ये़त्छि तङ्बेॽ के़रे़आङ् वये़, मिक् निमाआङ् मे़न्छुक्मनाबा पोःक्खे़आङ् वये़॥ 16 हे़क्क्याङ् खे़न् मनाःल्ले़ एलिन् मे़त्तु, “आङ्गाॽ थङ्लाम्बा खारक् के़राङ् त्याङ्बारो॥ आइन्छा आङ्गाॽ थङ्लाम्बा खे़त्छिङ्ङाङ्ङाङ् त्याङ्बारो॥” एलिरे़ सेःन्दोसु, “आस्साए, थे पोःक्खे़बे?” 17 खे़न् इङ्घङ् के़दाःप्पा मनाःल्ले़ मे़त्तु, “इस्राइलिहाॽ पलिस्तिहाॽलाम् पुबेलाप्सा मे़घे़त्छिङ् मे़बे॥ इस्राइलि थक्सुबाहाॽ यरिक् मे़मे़गे़॥ आदाङ्बारे़ के़स्सा, होप्निन् नु पिनहासे़न् ने़प्फाङ् मे़स्ये़रुसि, हे़क्क्याङ् निङ्वाॽफुमाङ्ङिल्ले़ कुसन्दोःक्किन्नाङ् याप्मि मे़नाप्ते़ मे़देॽरे़॥” 18 निङ्वाॽफुमाङ्ङिल्ले़ कुसन्दोःक्किल्ले़ कुयाःम्बेॽओ खे़प्सुनामे़ःन्ने लाम्धेःप्पाल्ले़ कुबेसाङ्बा कुयुङ्मादे़न्नोलाम् एलिन् एगाङ् ले़प्माङ् चिल्ले़क् ले़क्खे़ध्ये़, हे़क्क्याङ् कुनिःङ्मे़न् चे़गे़आङ् स्ये़, थेआङ्भे़ल्ले़ खुने़ॽ काप्पोबा नु कुधक् के़लिःप्पा मना वये़॥ खुने़ॽ तङ्बेॽ लिबोङ् थारिक् इस्राइलबा खासे़न्दाङ्बा याःम्बक् चोगुआङ् वये़॥ पिनहासरे़ कुमेःत्तिन् स्ये़बा 19 एलिःल्ले़ कुम्बाङ्लि, पिनहासरे़ कुमेःत्तिन् मे़न्छुक्मा वये़, हे़क्क्याङ् अङे़ःक्वा कप्मा ये़म् त्ये़जुरे़आङ् वये़॥ खे़ल्ले़ निङ्वाॽफुमाङ्ङिल्ले़ कुसन्दोःक्किन् मनाहाॽ हुक्काप् मे़मे़त्छिङ् के़लॽबा नु कुन्नोःप्पान् हे़क्क्याङ् कुये़म्बाःन् स्ये़बा निङ्वाॽ खोसु, हाबा खे़न् ये़म्मो सागप्मा तुङ्ङिल्ले़ तरुआङ् खे़ल्ले़ सागत्तु॥ 20 खे़न् सागप्मा तुङ्ङिल्ले़ खा सिमा इःत्ते़ल्ले़ कुगम्ब्राङ् के़मे़प्माहाॽरे़ खुने़ॽ मे़मे़त्तु, “हाङ्हाङ् लॽरे़, खे़ने़ॽ ये़म्बित्छाॽसाधिक् के़गत्तुआङ् वाॽ॥” कर खे़ङ्हाॽरे़ मे़मे़त्तुबा पाःन्निन् मे़नुःक्तुन्, खे़ल्ले़ कुनिङ्वाॽओए मे़युक्खुन्॥ 21 हे़क्क्याङ् खे़ल्ले़ कुस्साःल्ले़ कुमिङ् इकाबोद युक्खु, हे़क्क्याङ् पाःत्तु, “इस्राइललाम्बा मिमिदिङ्ङिन् मये़,” थेआङ्भे़ल्ले़ निङ्वाॽफुमाङ्ङिल्ले़ कुसन्दोःक्किन् वेॽ मनारे़ खुनिॽ हुक्को थ्ये़आङ् वये़, हे़क्क्याङ् कुन्नोःप्पे़न् नु कुये़म्बाःन् स्ये़सिआङ् होःप्ते़छि॥ 22 खुने़ॽ लॽरे़ “इस्राइललाम्बा मिमिदिङ् मये़, थेआङ्भे़ल्ले़ निङ्वाॽफुमाङ्ङिल्ले़ कुसन्दोःक्किन् याप्मि मे़नाप्ते़ मे़देॽरे़आङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.