१ सामुए़ल 30 - लिम्बुअमाले़किहाॽनु ते़न्धङ् पोःक्खे़बा 1 सुम्यान् एगाङ् दाउदे़न् नु कुमनाहाॽ सिक्लग मे़गे़रे़॥ हाबा खे़न् ये़म्मो अमाले़किहाॽरे़ यहुदालाम् यो ले़प्साङ्बा नेगेब नु सिक्लगबा मनाहाॽ मे़नाप्तुसिआङ् वये़॥ सिक्लगओ खे़ङ्हाॽ थङ् मे़जोगे़आङ् खे़प्मो मि मे़याक्तुआङ् वये़॥ 2 खे़ङ्हाॽरे़ मे़न्छुमाहाॽ नु खे़प्मो के़वाॽबा चुक्सा-यम्बा के़रे़क् मे़न्छे़त्छिङ्ङे मे़देॽरुसिआङ् वये़॥ खे़ङ्हाॽरे़ कन्हाॽ तगि तगि लाम्मे़लोसु मे़देॽरुसिर मे़बत्छे़॥ 3 खे़ब्याङ् दाउदे़न् नु कुमनाहाॽ सिक्लग मे़गे़रे़ल्ले़, खे़न् अमाले़किहाॽरे़ ये़क्यक्किन् मि मे़याक्तुआङ् खुन्छिॽ मेःत्हाॽ, ये़म्बित्छा, मे़न्छुमा साहाॽ के़रे़क् मे़देॽरुसिआङ् मे़बे के़लॽबा पाःन्निन् निङ्वाॽ मे़घोसु॥ 4 खे़ल्ले़चोगुल्ले़ दाउदे़न् हे़क्क्याङ् खुने़ॽनु के़वाॽबा मनाहाॽ हाःप्मा मे़हेःक्ते़, हे़क्क्याङ् हाःप्माए मे़न्छुक्के थारिक् मे़हाबे़॥ 5 दाउदरे़ ने़प्माङ् कुमेत् यिजरेलबा अहिनोम नु कार्मेलबा नाबालरे़ कुमेमेदुमा अबिगेले़न्नाङ् मे़दे़म्सु मे़देॽरुसिआङ् मे़वये़॥ 6 दाउदे़न् के़साक्पो थ्ये़, थेआङ्भे़ल्ले़ के़रे़क् मनाहाॽरे़ खुन्छिॽ साहाॽ मे़दे़म्सु मे़देॽरुसिबाल्ले़ चोगुल्ले़ खे़ङ्हाॽरे़ खुन्छिॽ निङ्वाॽ तुगे़आङ् दाउदे़न् लुङ्ङिल्ले़ ले़प्पासिगे़ मे़प्मा मे़हेःक्तु॥ हे़क्केःल्ले़ दाउदरे़ यहवे दाङ्बा कुनिङ्वाॽफुमाङ्लाम् मुक्साम् खोसु॥ 7 खे़ब्याङ् दाउदरे़ अहिमे़ले़क्के़ल्ले़ कुस्सा निङ्वाॽफुसाम्बा अबियाथारे़न् मे़त्तु, “आङ्गाॽओ एपोदे़न् तारे़ॽ॥” हे़क्क्याङ् अबियाथारे़ल्ले़ खे़न् तारु॥ 8 हे़क्क्याङ् दाउदरे़ यहवे दाङ्बे़न् सेःन्दोसु, “आङ्गाॽ कन् चिगक्वा कुजा के़नाप्पा मनालुप्हाॽ नाःत्तुङ्सिङ्बि? आङ्गाॽ खे़ङ्हाॽ सिॽमा सुक्तुङ्बि?” यहवे दाङ्बे़ल्ले़ मे़त्तु, “खे़ङ्हाॽ नाःत्ते़से़ॽ॥ खे़ङ्हाॽ के़सिॽरुसि हे़क्क्याङ् के़रे़क् के़से़ःप्तुसिॽ॥” 9 खे़ल्ले़चोगुल्ले़ दाउद नु किप् तुक्सि कुमनाहाॽ मे़धासिङ्, हे़क्क्याङ् बसोरबा वहःङ् थारिक् मे़गे़रे़॥ 10 वहःङ् नाःङ्माआङ् पेःक्मा मे़न्छुक्मनाबा साॽरिक् के़नाबा किप् ने़त्छि मनाहाॽ एगाङ् मे़युङे़ मे़लारे़॥ कर दाउदे़न् नु किप् लिसिरे़ खे़ङ्हाॽ मे़नाःत्तुसिर मे़बे॥ 11 ते़म्बेॽओ खे़ङ्हाॽरे़ लत्छा मिस्रबा मनाधिक् मे़दुमु, हे़क्क्याङ् दाउदरे़ॽओ मे़दारु॥ खे़ङ्हाॽरे़ खे़न् चामा नु थुङ्मा मे़बिरु, 12 कुभा खे़ङ्मनाबा पःत्छेसेॽ नु खे़ङ्मनाबा हुक्पक् ने़त्छि चे़ल्ले़क्सेॽ मे़बिरु॥ खे़न् चसुरुआङ् खे़ल्ले़ कुसक्मा लासे़, थेआङ्भे़ल्ले़ खे़ल्ले़ सुम्ये़न् नु सुम्से़न् थारिक् थेआङ् मे़न्जाए मे़न्धुङ्ङे वये़॥ 13 दाउदे़ल्ले़ खे़न् सेःन्दोसु, “खे़ने़ॽ हाःत्ले़ कुमनाने़बे? खे़ने़ॽ आत्तोलाम् के़द्ये़बा?” खे़ल्ले़ मे़त्तु, “आङ्गाॽ लत्छा मिस्रिआरो, लत्छा अमाले़किःल्ले़ कुसे़वारोबाआ॥ कर सुम्ये़न् तगि तुगाङ्बाल्ले़ चोगुल्ले़ आङ्गाॽ आन्दाङ्बाल्ले़ ले़राङ् थ्याङ्ङाङ् पे॥ 14 आनिगे यहुदालाम् यो ले़प्माङ्बा करेतिहाॽरे़ खुनिॽ लाजेॽ नेगेवओ, हे़क्क्याङ् कालेबरे़ कुदे़ःङ्गप् नेगेबओ नाप्मनासिआङ् वये़ हे़क्क्याङ् सिक्लगओ मि याक्मनाआङ् खाप्पुथ्यःङ् चोःक्मना॥” 15 दाउदे़ल्ले़ मे़त्तु, “खे़ने़ॽ खे़न् के़नाप्पा मनालुप्हाॽओ पेःक्मा लाम् ओसेःन्धाक्मा के़सुक्काॽबि?” खे़ल्ले़ मे़त्तु, “यहवे दाङ्बे़ल्ले़ कुदगि माङ्हे़क्सिङ्ङे़ॽआङ् मे़त्ताङ्ङे़ॽ, ‘आङ्गाॽ खे़ने़ॽ मे़से़त्ने़न् इग्र के़न्दाङ्बाल्ले़ कुहुक्को हुक्मे़सुप्ने़न्’, हे़क्क्याङ् आङ्गाॽ लाम् ओःन्धाक्ने़आङ् खे़ङ्हाॽरो के़त्ने़॥” 16 हे़क्क्याङ् खे़ल्ले़ लाम् ओःन्धाक्तुर यो तेॽरु॥ खे़प्मो अमाले़किहाॽ के़रे़क् पिसाङ् मे़से़रे़आङ् मे़जर, मे़धुङुर हे़क्क्याङ् पलिस्ति नु यहुदा लाजेॽहाॽलाम् मे़नाप्तुसिबा चिगक्वाहाॽ लुम्सिङ्बा ते़न्नो सोसोःत्लराःङ् चोःक्नु मे़यागे़॥ 17 हे़क्क्याङ् दाउदे़न् खे़ङ्हाॽनु युःन्छिक्काङ्धो कुदाःन्दिक्मा युःन्छिक् थारिक् थक्ते़॥ हे़क्क्याङ् किप् लिसि थाङ्बे़न्हाॽरक् उमेहाॽओ मे़लासे़आङ् मे़घे़त्छिङ्, वेॽ मना लत्छाआङ् कुहिङ्वे़त् मे़न्याःक्ते़न्॥ 18 अमाले़किहाॽरे़ मे़देॽरुसिबा के़रे़क् मनाहाॽ, हे़क्क्याङ् खुने़ॽ कुमेत् ने़प्माङ् दाउदरे़ नुःक्तु तारुसि॥ 19 चुक्पा यम्बा, ये़म्बित्छा मे़न्छुमाॽ साहाॽ, मे़नाप्तु मे़देॽरुसिबा हाःत्ताङ् हे़क्क्याङ् थेयाङ् मे़याःक्ते़न्॥ दाउदरे़ के़रे़क् नुःक्तु तारुसि॥ 20 खुने़ॽ मे़ल्लुक् मे़ःन्दा, कुम्बाबा पित् पिप्मा के़रे़क् हुक्काप् मे़त्छिङ्, हे़क्क्याङ् कुमनाहाॽरे़ वेॽ लुप्हाॽरे़ खुन्छिॽ तगि तगि खे़ङ्हाॽ मे़नाःत्तु मे़देॽरुसिर मे़बाःत्तु, “कन्हाॽ दाउदरे़ नाप्तुसिबारो॥” 21 खे़ब्याङ् दाउदे़न् बसोर वहःङ्ङो के़नाःम्सिङ्बाआङ् के़युङ्बा खे़न् किप् ने़त्छि मनाहाॽओ पे॥ हे़क्केःल्ले़ खे़ङ्हाॽ दाउदे़न् हे़क्क्याङ् खुने़ॽनु के़वाॽबा मनाहाॽ तुम्से़ मे़लःन्दे़॥ हे़क्क्याङ् दाउदे़न् मनाहाॽरे़ खुन्छिॽ पेसाङ् के़रे़ल्ले़ खे़ङ्हाॽ “से़वारो” मे़त्तुसि॥ 22 कर दाउदे़न्नु के़वाॽबा ताप्फे़ःम्बा नु कुॽइके़भे़म्बा मनाहाॽरे़ दाउदरे़ कुबाःन्निन् कुलुम्मो मे़घक्तुआङ् मे़बाःत्तु, “कन् मनाहाॽ आनिॽनु मे़म्बेने़न्॥ आनिॽ आनुःक्तुम् आदारुम्बा आनाप्तुम्सिम्बा चिगक्वालाम् खुन्छिॽ लागि थेआङ् लक् आन्याक्तुम्मिन्, खुन्छिॽ मेःत्हाॽ नु साहाॽरक् मे़देॽरुसिर॥” 23 दाउदरे़ पाःत्तु, “निङ्वाॽफुमाङ्ङिल्ले़ आनिॽ आसे़ःप्ते़, कन् के़रे़क् आनिॽ आबिरे़, हे़क्क्याङ् निङ्मिहाॽ आनिॽ हुक्को थासुसि आबिरे़॥ आल्ल खुने़ॽ आबिरे़बा चिगक्वाहाॽ हे़क्के आन्जोगुम्मिन्॥ 24 खे़निॽ के़बाःत्तुम्बा हे़क्केग हात् ते़म्बाबे? चिगक्वा कोसे़ के़युङ्बाहाॽरे़ थङ्ङो के़बेःक्पाहाॽनु कुदङ्बा लक् मे़घोसुॽ॥ के़रे़क्ले़ कुदङ्बा लक् मे़घोसुॽ॥” 25 खे़न् ये़म्माङ्धो दाउदरे़ पिरुसिबा थिम्हाॽ इस्राइलओ आल्लो थारिक्काङ् वाॽ॥ 26 दाउदे़न् सिक्लगओ त्ये़, हे़क्क्याङ् मे़नाप्तुसिबा कुभा चिगक्वाहाॽ खुने़ॽ कुन्जुम्हाॽ, यहुदाबा साम्योसिक्साम्बाहाॽ अक्खे मे़त्तुसिआङ् हाक्तुदेसुसि, “यहवे दाङ्बे़ल्ले़ कुनिङ्मिहाॽलाम्बा नाप्मनासिबा चिगक्वालाम्बा कन् खिनिॽ सुङ्लो॥” 27 खुने़ॽ बेथेलओ, रामोत-नेगेवओ, यत्तिरओ, 28 अरोएरओ, सिपमोतओ, एस्तमोओ, 29 राकालओ, यरहमेलिहाॽ नु कनानिहाॽरे़ खुन्छिॽ ये़क्यक्हाॽओ, 30 होरमाओ, बोर आसानओ, अत्ताक्को, 31 हे़ब्रोन्नो, हे़क्क्याङ् दाउदे़न् नु कुमनाहाॽ आत्ता आत्ता लाम्दिक् मे़जोगे़आङ् मे़वये़ खे़न् के़रे़क् ते़न्हाॽओबा मनाहाॽ खे़न् सुङ्हाॽ हाक्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.