१ सामुए़ल 3 - लिम्बुयहवे दाङ्बान् सामुए़लरो ओसेःन्धाक्सिङ्बा 1 आल्ल एलिःल्ले़ कुयुक्को सामुए़लरे़ यहवे दाङ्बाल्ले़ कुदगि माङ्से़वा चोगुर वये़॥ खे़न् ये़म्मो यहवे दाङ्बाल्ले़ कुबाःन्जाःक्किन् चाॽरिक् खे़म्मे़दे़त्ते़न्, हे़क्क्याङ् खुने़ॽ ताॽदिगे़न् सुफोहाॽआङ् मनाहाॽ यरिक् ओसेःन्मे़धाक्तुसिन्॥ 2 थिक्ले़ङ् से़न्दिक् एलिन् आबाङे कुयुक्नाओ ने़सिङ्ङाङ् ने़स्से़॥ खुने़ॽ काप्पोबा तुम्से़आङ् कुमिक्हाॽ थःम्धःम्बा पोःक्खे़ पेआङ् वये़, हे़क्क्याङ् नुरिक् खानिमा मे़सुक्तुन्नाङ् वये़॥ 3 हे़क्क्याङ् सामुए़ले़न् निङ्वाॽफुमाङ्ङिल्ले़ कुसन्दोक् के़युङ्बा यहवे दाङ्बाल्ले़ कुहिम्मो इप्से़आङ् ने़स्से़॥ खे़ॽयो निङ्वाॽफुमाङ्ङिल्ले़ कुसेमिन् मे़न्छे़त्ते युङे़॥ 4 हे़क्क्याङ् यहवे दाङ्बाल्ले़ सामुए़ले़न् “सामुए़लए, सामुए़लए” मे़त्तुर उःत्तु॥ हे़क्क्याङ् सामुए़लरे़ “है, आङ्गाॽ कप्मो वाॽआरो” मे़त्तु॥ 5 हे़क्क्याङ् खुने़ॽ पोगे़आङ् लोःक्ते़र पेआङ् एलिन् मे़त्तु, “खे़ने़ॽ के़उःत्ताङ्बाबि? आङ्गाॽ कप्मोए वाॽआरो॥” कर एलिःल्ले़ नोगप् पिरु, “आँहाॽ, आङ्गाॽग खे़ने़ॽ मे़उःत्ने़ल्लो॥ पेगे़ॽआङ् इप्से़ॽ॥” खे़ब्याङ् सामुए़ले़न् नुःक्खे़ पेआङ् इप्से़॥ 6 यहवे दाङ्बाल्ले़ याम्मो सामुए़ले़न् “सामुए़लए” मे़त्तुर उःत्तु॥ हे़क्क्याङ् सामुए़ले़न् मुत्थ्रिक् पोगे़बेआङ् एलिन् मे़त्तु, “खे़ने़ॽ के़उःत्ताङ्बाबि? आङ्गाॽ कप्मोए वाॽआरो॥” कर एलिःल्ले़ मे़त्तु, “आस्साए, आङ्गाॽ उःत्ने़बा मेःन्लो॥ पेगे़ॽआङ् इप्से़ॽओ॥” 7 आल्ल सामुए़लरे़ यहवे दाङ्बे़न् कुसिङ् मे़न्निःत्ते वये़॥ यहवे दाङ्बे़ल्ले़ कुबाःन्जाक्किन् कम्भ थारिक् सामुए़लरो ओसेःन्धाङ् मे़म्बोङ्ङे वये़॥ 8 यहवे दाङ्बाल्ले़ सामुए़ले़न् सुम्ले़ङ् उःत्तु, सामुए़ले़न् पोगे़आङ् एलिरे़ॽओ पे हे़क्क्याङ् मे़त्तु, “खे़ने़ॽ के़उःत्ताङ्बाबि? आङ्गाॽ कप्मोए वाॽआरो॥” हे़क्केःल्ले़ यहवे दाङ्बे़ल्ले़नि कन् हिन्जाॽइन् उःत्तुबारे़छ फाआङ् एलिरे़ कुसिङ्निःत्तु॥ 9 खे़ल्ले़चोगुल्ले़ एलिरे़ सामुए़ले़न् मे़त्तु, “पेगे़ॽआङ् ने़स्से़ॽ, हे़क्क्याङ् खुने़ॽ याम्मो के़उःत्ने़भग्र अक्के मे़त्ते़ॽ, ‘यहवे दाङ्बाए, पारे़ॽओ थेआङ्भे़ल्ले़ आङ्गाॽ के़से़वारोबाल्ले़ खे़प्सुङ्ल पत्तारो॥’” खे़ल्ले़चोगुल्ले़ सामुए़ले़न् कुयुक्नाओ नुःक्खे़ पेआङ् ने़सिङ्ङाङ् ने़स्से़॥ 10 खे़ब्याङ् यहवे दाङ्बे़न् खे़प्मो त्ये़आङ् ये़म्सिङ्, हे़क्क्याङ् आन्देन् उःत्तुबा हे़क्केए “सामुए़लए! सामुए़लए!” लॽरिक् उःत्तु॥ हे़क्क्याङ् सामुए़लरे़ मे़त्तु, “पारे़ॽओ, थेआङ्भे़ल्ले़ आङ्गाॽ के़से़वारोबाल्ले़ खे़प्सुङ्ल पत्तारो॥” 11 हे़क्क्याङ् यहवे दाङ्बाल्ले़ सामुए़ले़न् मे़त्तु, “ओमे़त्ते़ॽ, आङ्गाॽ इस्राइलओ कुभा याःम्बक्हाॽ चोगुङ्ल पत्तारो, हे़क्क्याङ् खे़न् के़घे़म्बा के़रे़क्ले़ खुनिॽ ने़घोॽ फिङ्लो॥ 12 खे़न् ये़म्मिन् ताःल्ले़ एलिन् नु कुहिम्सयङ्ङोबा मनाहाॽरे़ खुनिॽ तक्ले़ङ्वाओ आङ्गाॽ पाःत्तुङ्बा के़रे़क् पाःन्हाॽ कुहेःक्सिङ्माआङ्धो कुनुप्मा थारिक् के़त्तुङ्लो॥ 13 आङ्गाॽ खे़ल्ले़ कुहिम्सयङ्हाॽ सदादिङ् खुम्दिङ् पिरुङ्सिङ् फाॽआङ् खे़न् मे़त्तुङ्ङाङ् वये़, थेआङ्भे़ल्ले़ खुने़ॽ कुस्साहाॽरे़ चोगुसिबा सिक्के़ले़ःङ्बा लायो लासोःत्हाॽ खुने़ॽ कुसिङ् निःत्तुआङ् वये़॥ हे़क्केसाङ् कुस्साहाॽ लायो चोःक्मा याःम्बक्लाम् मे़धेःक्तुसिन्॥ 14 खे़ल्ले़चोगुल्ले़ एलिन् नु खुने़ॽ कुस्साहाॽरे़ चोगे़छुबा लायोहाॽरे़ तक्ले़ङ्वाओ आङ्गाॽ माङ्हे़क्सिङ्ङाआङ् वाॽआ, ‘एलिरे़ कुहिम्सयङ् नु कुस्साहाॽरे़ खुन्छिॽ लायोहाॽ सिदुङ्जभा इग्र ले़त्तिःल्ले़ आभे़ल्ले़आङ् ले़प्मि मे़बोङ्ने़न्॥’” 15 सामुए़ले़न् तानाम् खाओःत्ते़ थारिक्के हाबा इप्से़आङ् ने़स्से़॥ हे़क्क्याङ् पोगे़आङ् यहवे दाङ्बाल्ले़ कुहिम्मोबा लाम्धेःप्पाहाॽ हन्दु॥ खुने़ॽ निसुबा सुफोन् एलिन् मे़प्मा किसे़॥ 16 कर एलिःल्ले़ सामुए़ले़न् “आस्सा सामुए़लए” मे़त्तुआङ् उःत्तु॥ सामुए़लरे़ मे़त्तु, “है, आङ्गाॽ कप्मोए वाॽआरो॥” 17 हे़क्क्याङ् एलिःल्ले़ सेःन्दोसु, “यहवे दाङ्बाल्ले़ खे़ने़ॽ थे के़मे़त्ते़? के़रे़क् पाःन्हाॽ मे़म्माॽए मे़त्ताङ्ङे़ॽ॥ खुने़ॽ के़मे़त्ते़बा के़रे़क् पाःन्हाॽओ लत्छारक् के़माॽरुसाङ् निङ्वाॽफुमाङ्ङिल्ले़ खे़ने़ॽ साॽरिक् के़साक्पा के़जाःत्लरो॥” 18 खे़ल्ले़चोगुल्ले़ सामुए़लरे़ निसुबा के़रे़क् सुफोहाॽ लत्छाआङ् मे़म्माॽए एलिन् मे़त्तु॥ हे़क्क्याङ् एलिःल्ले़ पाःत्तु, “खुने़ॽग यहवे दाङ्बान्लो, खुने़ॽ ओमे़त्तुल्ले़ नुबा के़धाःप्पा पाःन्हाॽ कुनिङ्वाॽ हे़क्केए चोगुररो॥” 19 हे़क्क्याङ् सामुए़ले़न् पोरे़र थाङ्बे़न् के़रे़र पे, यहवे दाङ्बान् खुने़ॽनु वये़, खे़ब्याङ् सामुए़लरे़ पाःत्तुबा के़रे़क् पाःन्हाॽ से़क्खा के़रे़रो॥ 20 हे़क्क्याङ् दान लाजेॽआङ् कत्ना बेर्सेबा थारिक्पा के़रे़क् इस्राइलिहाॽरे़ सामुए़ले़न् यहवे दाङ्बाल्ले़ कुमाङ्निङ्वाॽपान् के़बाःप्पारछ फाॽआङ् कुसिङ् मे़निःत्तु॥ 21 यहवे दाङ्बे़न् सिलोओ ओसेःन्दाङ् चोःक्सिङ्ल वये़, हे़क्क्याङ् खे़प्मो खुने़ॽ कुबाःन्जाःक्लाम् सामुए़लरे़ओआङ् आबाङे ओसेःन्दाङ् चोःक्सिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.