१ सामुए़ल 29 - लिम्बुआकिसरे़ दाउदे़न् सिक्लग पाङ्घुबा 1 आल्ल पलिस्तिहाॽरे़ खुन्छिॽ के़रे़क् थक्सुबाहाॽ थङ् चोःक्से़ अपेकओ मे़सुप्सुसि, हे़क्क्याङ् इस्राइलिहाॽरे़ यिजरेलबा वबुन्दाक् कुबेसाङ् तुरायक् मे़लेःत्तु॥ 2 पलिस्ति युक्साबाहाॽरे़ किप्थिक् किप्थिक् नु हे़न्छिङ् हे़न्छिङ्ङो खुन्छिॽ थक्सुबाहाॽ तगि मे़भोसुसिर मे़बत्छे़, हे़क्क्याङ् दाउदे़न् नु खुने़ॽ कुमनाहाॽ आकिसे़न्नु एगाङ्समा तिःक्लाओ मे़वये़॥ 3 पलिस्तिहाॽरे़ खुन्छिॽ थक्मोबाहाॽरे़ सेःन्मे़दोसुसि, “कन् हिब्रुहाॽ कप्मो थेःन् चोःक्नु मे़वाॽबे?” आकिसे़ल्ले़ मे़त्तुसि, “कन् इस्राइलबा हाङ् सावलरे़ कुसे़वारोबा दाउदे़न्लो, कन् आङ्गाॽनु वाॽबा तङ्बेधिक्नुःल्ले़ यरिक् पोःक्खे़आङ् वाॽ॥ आङ्गाॽनु वये़आङ्धो आङ्गाॽ कन् मनाओ ताप्फे़ःम्बा आप्तिक् थेआङ् मे़ङ्घोए वाॽआरो॥” 4 कर पलिस्तिहाॽरे़ खुन्छिॽ थक्मोबाहाॽरे़ खुन्छि साॽरिक् सिक्पोगे़, हे़क्क्याङ् आकिसे़न् मे़मे़त्तु, “खे़न् मनान् खे़ने़ॽ के़बिरुबा ते़न्नो पाङ्घे़देसे़ॽ॥ खे़न् आनिॽनु थङ् चोःक्से़ मे़बेःक्ने़ल्ल, मेःन्ने फग्र खे़ल्ले़ थङ्ङो आनिॽ इङ्आले़क्॥ आनिॽ मनाहाॽ से़रुसिआङ् खे़ङ्हाॽरे़ खुन्छिॽ थे़गेक्पाहाॽ कुन्दाङ्बे़न् पिरुॽ हे़क्क्याङ् खुने़ॽनु तङ्मा कन् मनाःल्ले़ कुलागि कन्नुःल्ले़ नुबा सुये़म् वेॽ थे पोङ्मा सुक्पे? 5 कङ्ग हाबा खे़न् दाउदे़न् मेःम्बि? खुने़ॽ कुयाःम्बेओ मे़न्छुमाहाॽरे़ अक्खेलॽरिक् साम्मे़लोरे़र मे़लाःक्खे़आङ् मे़वये़, ‘सावलरे़ हे़न्छिङ् हे़न्छिङ् से़रुसि, हे़क्क्याङ् दाउदरे़ग लाङे़न् लाङे़न् से़रुसि॥’” 6 हे़क्क्याङ् आकिसरे़ दाउदे़न् उःत्तुआङ् मे़त्तु, “यहवे दाङ्बे़न् कुहिङ्वे़त् वाॽबा कुइसिक् पाःत्तुङ्ॽ, खे़ने़ॽ साॽरिक् के़नुॽबा के़जोक्, हे़क्क्याङ् आङ्गाॽनु के़वाॽआङ् कन् थङ्ङो के़धक्पा पाःन्नो आङ्गाॽ ते़न्ना॥ खे़ने़ॽ आङ्गाॽओ के़द्येआङ्धो खे़ने़ॽओ ताप्फे़ःम्बा थेआङ् मे़ङ्घोए वाॽआ, कर खे़ने़ॽ थङ् थक्से़ पेःक्मा पाःन्नो वेॽ युक्साबाहाॽ खे़ने़ॽनु मे़न्दे़न्ने़न्॥ 7 खे़ल्ले़चोगुल्ले़ नुरिक्काङ् हिम्मो पेगे़ॽओ, हे़क्क्याङ् पलिस्तिहाॽ युक्साबाहाॽरे़ खुनिॽ सिराॽमे़न्धाङ्मनाबा पान् थेआङ् मे़जोगे़न्ने़ॽ॥” 8 दाउदे़ल्ले़ आकिसे़न् मे़त्तु, “आङ्गाॽ थे चोगुङ्ङाङ् वाॽआबे? आङ्गाॽ के़से़वा चोःक्से़ लासाङ्ङाङ्धो आल्ल थारिक् आङ्गाॽ के़से़वारोबाल्लो थे़मा ताप्फे़ःम्बा पान् के़घोसुआङ् वाॽ, हे़क्क्याङ् आङ्गाॽ आन्दाङ्बा हाङ्ङिल्ले़ के़निङ्मिहाॽरे़ खुनिॽ तक्ले़ङ्वाओ थेआङ् थङ् चोःक्मा मे़घोआम्बाबे?” 9 हे़क्केःल्ले़ आकिसरे़ दाउदे़न् मे़त्तु, “आङ्गाॽ आनिमाओ खे़ने़ॽ निङ्वाॽफुमाङ्ङिल्ले़ कुमाङ्लाइङ्बा कुइसिक् कुदोःप्मा के़जोक्, कर पलिस्ति युक्साबाहाॽरे़ खे़ने़ॽ खुन्छिॽनु सोरिक् थङ् चोःक्से़ पेःक्मा के़न्छुक्ने़न् मे़बाःत्तुआङ् वाॽ॥ 10 खे़ल्ले़चोगुल्ले़ ताःन्दिक् तानाम् खाओःत्नु मेःन्ने पोगे़ॽ हे़क्क्याङ् खे़ने़ॽनु के़दाबा के़न्दाङ्बे़ल्ले़ कुमनाहाॽ तेॽरे़से़ॽआङ् पेगे़ॽओ॥” 11 हे़क्केःल्ले़ दाउदे़न् नु कुमनाहाॽ पलिस्तिहाॽरे़ खुन्छिॽ लाजेॽ नुःङ्मा पेःक्मा फाॽआङ् तानाम् मे़बोगे़॥ पलिस्तिहाॽग यिजरेल ले़प्माङ् मे़धासिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.