१ सामुए़ल 28 - लिम्बु1 खे़न् ये़म्मो पलिस्तिहाॽरे़ इस्राइलिहाॽनु थङ् चोःक्से़ खुन्छिॽ थक्सुबाहाॽ मे़भुक्खुसि॥ आकिसरे़ दाउदे़न् मे़त्तु, “खे़ने़ॽ नु के़मनाहाॽ आङ्गाॽनु थङ्ङो पेःक्माबोङ् के़लॽबान् के़निसुबिला॥” 2 दाउदरे़ आकिसे़न् मे़त्तु, “साॽरिक् नुबारो, के़से़वारोबाल्ले़ आक्खे चोगु खे़ङ्ग के़निसुएरो॥” हे़क्केःल्ले़ आकिसरे़ दाउदे़न् मे़त्तु, “आङ्गाॽ के़हिङ्हिङ् थारिक्के आङ्गाॽ आगम्ब्राङ् चोःक्ने़रो॥” सावलरे़ कित्चाक् के़जोःक्मा मे़न्छुमान् सुजा नाःक्तु 3 आल्ल सामुए़ले़न् स्ये़आङ् होःप्ते़, हे़क्क्याङ् के़रे़क् इस्राइलिहाॽरे़ खुने़ॽ कुलागि मे़रिङ् मे़धक्ते़आङ् खे़न् खुने़ॽ आबाङे कुये़क्यक् रामाओ मे़लुप्तु॥ सावलरे़ साम्माङ्च्याङ् मुरा के़मे़प्पा नु कित्चाक् के़जोःक्पाहाॽ के़रे़क् लाजेॽलाम्बा लःत्तुदेसुसिआङ् वये़॥ 4 पलिस्तिहाॽ मे़भुङ्सिङ्ङाङ् सुनेम्मो मे़द्ये़, हे़क्क्याङ् खे़प्मो तुरायक् मे़लेःत्तु॥ सावलरे़आङ् के़रे़क् इस्राइलिहाॽ फुक्खुसिआङ् गिल्बो मे़प्मनादे़न्नो तुरायक् मे़लेःत्तु॥ 5 सावलरे़ पलिस्ति थक्सुबाहाॽ निसुसिआङ् साॽरिक् किसे़, हे़क्क्याङ् खुने़ॽ कुलुङ्मान् यक्खे़॥ 6 हे़क्केःल्ले़ सावलरे़ यहवे दाङ्बान् सेःन्दोसु, कर यहवे दाङ्बाल्ले़ से़प्माङ्लाम्माङ् नोगप् मे़बिरुन्, उरिम लाम्माङ् नोगप् मे़बिरुन्, माङ्निङ्वाॽपान् के़बाःप्पालाम्माङ् नोगप् मे़बिरुन्॥ 7 हे़क्केःल्ले़ सावलरे़ कुसे़वारोबाहाॽ मे़त्तुसि, “साम्माङ्च्याङ् के़याङ्मा लत्छा मे़न्छुमाधिक् आङ्गाॽ आलागि कोःत्ताम्मे़ॽ, खे़ब्याङ् आङ्गाॽ पेःक्काॽआङ् खुने़ॽ सेःन्दोसुङ्॥” हे़क्क्याङ् कुसे़वारोबाहाॽरे़ मे़मे़त्तु, “ए़न्दोरओ लत्छा मे़न्छुमाॽ वाॽ॥” 8 खे़ल्ले़चोगुल्ले़ सावले़न् वेॽ तेत् चाक्सिङ् हे़क्क्याङ् कुसिङ् निःप्मे़न्दे़प्मनाबा ले़ङ्सिङ्ङाङ् ने़प्फु कुमनाहाॽनु से़न्दिक् खे़न् मे़न्छुमाओ पे॥ हे़क्क्याङ् खे़न् मे़त्तु, “आत्तिन् मिङ् लोःक्तुङ्, साम्माङ् च्याङ्हाॽ सेःन्दोसे़से़ॽआङ् हाबा खे़न् मनाःल्ले़ कुसाम्मिन् आङ्गाॽ आलागि उःत्ताङ् पिराङ्ङे़ॽ॥” 9 कर खे़न् मे़न्छुमाःल्ले़ मे़त्तु, “सावलरे़ थे चोगुआङ् वाॽ खे़ङ्ग खे़ने़ॽ के़निसुएरो॥ साम्माङ्च्याङ् के़याङ्बा नु कित्चाक् के़जोःक्पाहाॽ खुने़ॽ लाजेॽलाम्बा लःत्तुदेसुसिआङ् वाॽ॥ हाबा कन् याःम्बक्किन् चोगुङ्ने़फग्र आङ्गाॽ सिआ, हे़क्केःल्ले़ थेआङ् खे़न् याःम्बक्किन् चोःक्मा के़बाङ्ङाबाबे?” 10 सावलरे़ माङ्हे़क्सिङ्ङाङ् खे़न्निन् मे़त्तु, “यहवे दाङ्बे़न् कुहिङ्वे़त् वाॽबा कुइसिक् आङ्गाॽ मे़त्ने़, कन् याःम्बक्किन् के़जोगुल्ले़ खे़ने़ॽ के़सम्दाङ् अक्तङ्बा मे़क्मासिमा याःम्बक् मे़दाने़न्लो॥” 11 हे़क्केःल्ले़ खे़न् मे़न्छुमाःल्ले़ मे़त्तु, “खे़ने़ॽ के़लागि हात् उःत्तुङ्बाबे?” सावलरे़ मे़त्तु, “सामुए़ले़न् उःत्ते़ॽ॥” 12 खे़न् मे़न्छुमाॽइल्ले़ सामुए़ले़न् लःन्दे़ त्ये़बा निसुल्ले़ साॽरिक् यङ्मा स्ये़, हे़क्क्याङ् अःक्ते़र सावले़न् मे़त्तु, “खे़ने़ॽ थेआङ् इङ्ले़क् के़मे़त्ताङ्बाबे? खे़ने़ॽग सावले़न्ने़निरे़छ॥” 13 हाङ्ङिल्ले़ खे़न् मे़त्तु, “मे़गिसे़न्ने़ॽ॥ खे़ने़ॽ थेःन् के़निसुर के़बत्?” खे़न् मे़न्छुमाॽइल्ले़ मे़त्तु, “खाम्बाङ् सिगाङ्लाम् के़लःम्बार के़बप्पा लत्छा साम्धिक् निसुङ्ल पत्ता॥” 14 खुने़ॽ खे़न् मे़न्छुमाॽइन् मे़त्तु, “खे़न् आक्तङ्बा चोक्?” खे़ल्ले़ मे़त्तु, “खाम्देःत् के़हे़म्बा लत्छा काप्पोबा मनाधिक् थो लःन्धाङ्ल पत्॥” हे़क्केःल्ले़ खे़न् सामुए़ले़न्ने फाॽआङ् सावलरे़ निङ्वाॽ खोसु॥ हे़क्क्याङ् खुने़ॽ साम्बोन् फन्छिङ्ङाङ् से़वा मे़त्तु॥ 15 हे़क्क्याङ् सामुए़लरे़ सावले़न् मे़त्तु, “आङ्गाॽ थो के़लःत्ताङ्ङाङ् थेआङ् तुक्खे के़जाःत्ताबाबे?” सावलरे़ मे़त्तु, “आङ्गाॽ साॽरिक् के़साक्पो थ्याङ्ङाङ् वाॽआ॥ पलिस्तिहाॽरे़ थङ्ङो आङ्गाॽ मे़एःप्ताङ्ङाङ् वाॽ, हे़क्क्याङ् निङ्वाॽफुमाङ्ङिल्ले़ आङ्गाॽ ले़राङ्ङाङ् वाॽ॥ खुने़ॽ माङ्निङ्वाॽपान् के़बाःप्पालाम् हे़क्क्याङ् से़प्माङ्लाम्माङ् नोगप् मे़बिराङ्ङिन्॥ आङ्गाॽ थे चोगुङ्बाबे फाॽआङ् सेःन्दोसे़ खे़ने़ॽ उःत्ने़बा॥” 16 सामुए़लरे़ मे़त्तु, “यहवे दाङ्बे़ल्ले़ खे़ने़ॽ के़ले़रे़आङ् वाॽ हे़क्क्याङ् खुने़ॽ के़दक्ले़ङ्वाओ पोःक्खे़आङ् वाॽने़फग्र थेआङ् आङ्गाॽ सेःन्गे़दोआबाबे? 17 यहवे दाङ्बे़ल्ले़ आङ्गाॽ लाम्बा तगिसा के़मे़त्ते़आङ् वाॽ॥ खुने़ॽ के़हुक्लाम्बा के़हाङ्जुम्मिन् के़नाप्ते़आङ् दाउदे़न् पिरुआङ् वाॽ॥ 18 खे़ने़ॽ यहवे दाङ्बे़ल्ले़ कुबाःन्निन् के़ङ्घे़प्सुन्, हे़क्क्याङ् खे़ने़ॽ अमाले़किहाॽ के़रे़क् के़न्छे़रुसिन्॥ खे़ल्ले़चोगुल्ले़ खुने़ॽ के़सम्दाङ् अक्तङ्बा याःम्बक् चोगुबारो॥ 19 खे़ने़ॽ नु इस्राइलबा के़मनाहाॽ यहवे दाङ्बे़ल्ले़ पलिस्तिहाॽरे़ खुन्छिॽ हुक्को थासुसि॥ ताःन्दि खे़ने़ॽ नु खे़ने़ॽ के़स्साहाॽ आङ्गाॽनु मे़वाॽ॥ ओरो, से़क्खाए यहवे दाङ्बे़ल्ले़ इस्राइलि थक्सुबाहाॽ पलिस्तिहाॽरे़ खुन्छिॽ हुक्को थासुसिॽ॥” 20 सामुए़लरे़ कुबाःन्हाॽरे़ चोगुल्ले़ किसे़आङ् सावले़न् खाम्बाङ्मो चोःन्दे़आङ् सल्लिक् सन्छिङ्॥ से़न्दिक् नाम्दाःत्तात् नु ले़न्दिक् नाम्धाधा थेआङ् मे़जने़म्बाल्ले़ चोगुल्ले़ खुने़ॽ कुसक्मा थेआङ् मे़न्याक्मनाबा पोःक्खे़॥ 21 खे़ब्याङ् मे़न्छुमाॽइन् सावलरे़ॽओ पे, हे़क्क्याङ् खुने़ॽ साॽरिक् किसे़बा निसुआङ् मे़त्तु, “खे़ने़ॽ के़मे़त्ताङ्बा पाःन्निन् आङ्गाॽ खे़प्सुङ्, हे़क्क्याङ् आङ्गाॽ आहिङ्मन्निन् खे़ने़ॽ के़लागि के़साक्पाओ थासुङ्॥ 22 आल्ल आबाःन्निन् खे़प्से़ॽओ॥ आङ्गाॽ के़लागि कुभा चा तारुङ्ॽ, च्ये़ॽआङ् लाङ्घेःक्मारे़ लागि के़धुम्बा पोःक्खे़ॽओ॥” 23 कर सावले़न् चामा मे़दे़न्दे़न्॥ खे़न् मे़न्छुमाॽइल्ले़ पाःत्तुबा पाःन्नो कुसे़वारोबाहाॽरे़ मे़भाॽरुल्ले़ खुने़ॽ ते़न्दे़, हे़क्क्याङ् खाम्बाङ्ङोलाम् पोगे़आङ् ने़त्नादे़न्नो युङ्सिङ्॥ 24 खे़न् मे़न्छुमाॽइल्ले़ कुहिम्मो मे़हिङ्घुबा पित्सात् थिक् वये़॥ खे़न् से़रुआङ् थोःक्तु॥ खे़ल्ले़ कुभा फेॽरुम् तारुआङ् सॽरु, हे़क्क्याङ् के़भक्पा सिदाॽ मे़न्याक्केबा खरे़ःङ् ले़ःक्सु॥ 25 खे़न् खरे़ःङ्ङिन् सावल नु खुने़ॽ कुमनाहाॽरे़ खुन्छिॽ तगि युक्खु पिरुसि॥ खे़ङ्हाॽरे़ खे़न् चामा थुङ्माहाॽ मे़ज मे़धुङुआङ् आम्भा खे़न् से़न्दिक् खे़ङ्हाॽ मे़धासिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.