१ सामुए़ल 27 - लिम्बुपलिस्तिहाॽरे़ खुन्छिॽलुम्मो दाउदे़न् वये़बा 1 दाउदरे़ कुनिङ्वाॽओ अक्खेलॽरिक् निङ्वाॽ इःत्तु, “आल्ल थिक्याःङ्ग सावलरे़ कुहुक्लाम्बा सिमाए पोङ्॥ पलिस्तिहाॽरे़ खुन्छिॽ लाजेॽओ खे़त्छिङ्मा पेःक्माए आङ्गाॽ आलागि नुबा पोङ्॥ खे़ब्याङ् इस्राइल लाजेॽ के़रे़क् सावलरे़ आङ्गाॽ कोःप्मा ले़त्ता, हे़क्क्याङ् आङ्गाॽ खुने़ॽ कुहुक्को थामालाम् हिङ्ङारो॥” 2 खे़ल्ले़चोगुल्ले़ दाउदे़न् नु खुने़ॽ किप् तुक्सि कुमनाहाॽ इःन्दोन् मे़गाःक्तुआङ् गात लाजेॽबा माओकरे़ कुस्सा हाङ् आकिसरे़ॽओ मे़बे॥ 3 हे़क्क्याङ् दाउद नु खुने़ॽ कुमनाहाॽ खुन्छिॽ हिम्सयङ्हाॽनु सोरिक् दाउदरे़ कुमेत् यिजरेलि अहिनोम नु नाबालरे़ कुमेमेदुमा कुमेत् अबिगेले़न् तेॽरुसिआङ् आकिसे़न्नु गातओ युङ्मा मे़हेःक्ते़॥ 4 दाउदे़न् गातओ खे़त्छिङ् पेआङ् वाॽ के़लॽबा सावले़न् मे़मे़त्तु, हे़क्केःल्ले़ खुने़ॽ दाउदे़न् कोःप्मा ले़रु॥ 5 दाउदरे़ आकिसे़न् मे़त्तु, “खे़ने़ॽ लुङ्माॽ के़दुक्काॽने़फग्र खे़ने़ॽ के़लाजेॽबा लत्छा चुक्सा ये़क्यक्को युङ्मादे़न् पिराङ्ङे़ॽ॥ आङ्गाॽ थेआङ् हाङ्ङिन्नु कन् हाङ् युङ्बा ये़क्यक्को युङ्ङाबाबे?” 6 खे़ल्ले़चोगुल्ले़ आकिसरे़ खे़न् ये़न्नो खुने़ॽ सिक्लग ये़क्यक्किन् पिरु, खे़न् आल्लसाङ् यहुदाबा हाङ्हाॽरे़न् पोःक्खे़आङ् ने़रो॥ 7 दाउदे़न् पलिस्तिहाॽरे़ खुन्छिॽ लाजेॽओ तङ्बेधिक्काङ् लिसि लाधारिक् युङे़॥ 8 दाउदे़न् नु कुमनाहाॽरे़ गस्सुरिहाॽ, गिज्रिहाॽ हे़क्क्याङ् अमाले़किहाॽ मे़भत्तुसिआङ् खुनिॽ चिगक्वाहाॽ मे़नाप्तुसि॥ खे़ङ्हाॽ उन्छोःन्नाङ्धोए सुर नु मिस्रलाजेॽ थारिक्के मे़युङ्सिङ्ङाङ् मे़युङे़॥ 9 अक्खेलॽरिक् दाउदे़ल्ले़ लाजेॽहाॽओ थङ् चोःक्से़ पेःल्ले़ ये़म्बिछाॽ इग्र मे़न्छुमाॽ आत्तिन्नाङ् कुहिङ्वे़त् मे़ले़रुसिन्॥ खुने़ॽ मे़ल्लुक् मे़ःन्दाक् नु पित्, अदङ् नु उमेहाॽ हे़क्क्याङ् तेःप्फुङ्हाॽ तेॽरुसिआङ् आकिसरे़ॽओ नुःक्खे़आङ् पे॥ 10 आकिसरे़ खुने़ॽ सेःन्दोसु, “आइन् खे़ने़ॽ आत्तान् ले़प्माङ् चिगक्वा नाप्से़ के़बे?” दाउदरे़ मे़त्तु, “यहुदाबा नेगेब लाजेॽओ” इ “यरहमेलिहाॽरे़ इग्र केनिहाॽरे़ खुन्छिॽ नेगेव लाजेॽओ॥” 11 दाउदरे़ आत्तिन्नाङ् ये़म्बित्छा इग्र मे़न्छुमान् गातओ कुहिङ्वे़त् मे़दारुन्, थेआङ्भे़ल्ले़ खुने़ॽ अक्तङ्बा इःत्तु खे़ङ्हाॽरे़, दाउदरे़ अक्तङ्बा याःम्बक् चोगुआङ् वाॽ के़लॽबा इङ्घङ् गातओ ताःप्मा मे़सुक्तुॽ॥ दाउदे़न् पलिस्तिहाॽरे़ खुन्छिॽ लाजेॽओ युङे़र थारिक् अक्तङ्बाए याःम्बक् चोगुर वये़॥ 12 “इस्राइलि कुसुवाङ्हाॽओ ताप्फे़ःम्बा मिङ् थगुबाल्ले़ चोगुल्ले़ दाउदे़न् कुहिङ्हिङ् थारिक् आङ्गाॽ आसे़वारोबा पोङ्ङाङ् युङ्” के़लॽबा इःत्तुआङ् आकिसरे़ दाउदे़न् नसान् चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.