१ सामुए़ल 26 - लिम्बुदाउदरे़ याम्मोआङ् सावले़न् ले़रुबा 1 जिपिहाॽ गिबाओ के़वाॽबा सावलरे़ॽओ मे़बेआङ् यसिमोन ले़प्माङ् के़हिसिङ्बा हकिलाबा कोःक्मा फाङ्जङ्ङो दाउदे़न् चिङ्सिङ्ङाङ् युङ् लॽरिक् मे़जे़क्तु॥ 2 खे़ल्ले़चोगुल्ले़ दाउदरे़ कुगोःत्छे़ सावलरे़ हे़न्छिङ् सुम्सि सेःक्मनाबा मनाहाॽ तेॽरुसिआङ् हाराहारा जिप मे़प्नाबा मुरे़क् खारे़क्पा ये़ःङ्घादे़न् ले़प्माङ् यो थ्ये़॥ 3 यसिमोन ले़प्माङ् के़हिसिङ्बा हकिला कोःक्माल्ले़ कुबेसाङ्बा लाम्मो खुने़ॽ तुरायक् लेःत्तु॥ कर दाउदे़ङ्ग मुरे़क् खारे़क्पा ये़ःङ्घादे़न्नोए युङे़॥ सावले़न् खुने़ॽ कुनाःत्छे़ ये़आङ् वाॽ के़लॽबा खे़प्सुनामे़ःन्ने, 4 दाउदरे़ मना के़सुक्पाहाॽ पाङ्घुसि, हे़क्क्याङ् सावले़न् से़क्खाए ये़आङ् वाॽ के़लॽबा निङ्वाॽ मे़घोसु॥ 5 हे़क्क्याङ् दाउदे़न् पोगे़आङ् हारावरा सावलरे़ तुरायक् लेःत्तुआङ् इप्से़आङ् ने़स्से़बा ते़न्नो पे, हे़क्क्याङ् सावल नु खुने़ॽ कुधक्तुम्बा नेररे़ कुस्सा अबनेरे़न् इप्से़सिआङ् ने़स्से़सिबा ते़न्निन् निसु॥ सावले़न् खुने़ॽ कुधक्सुबाहाॽरे़ खुन्छिॽलुम्मो इप्से़आङ् ने़स्से़॥ 6 हे़क्क्याङ् दाउदरे़ हित्ति अहिमेलेक्के़न् नु योआबरे़ कुन्साॽ सरुयाहरे़ कुस्सा अबिसैन् ले़प्माङ् हिसिङ्ङाङ् पाःत्तु, “सावल ने़बा तुरायक्को आङ्गाॽनु हात् पेःक्पे?” अबिसैरे़ मे़त्तु, “खे़ने़ॽनु आङ्गाॽ पेःक्का॥” 7 दाउदे़न् नु अबिसैन् से़न्दिक् तुरायक्को लासे़सि, हे़क्क्याङ् सावलरे़ ताक्खोःङ् ले़प्माङ् कुलाःक्किन् खाम्मो लेःत्तुआङ् मनालुम्मो इप्से़आङ् ने़स्से़बा निसु॥ अबनेरे़न् नु कुधक्सुबाहाॽ सावलरे़ कुघिरि मे़इप्से़आङ् मे़ने़स्से़॥ 8 हे़क्क्याङ् अबिसैःल्ले़ दाउदे़न् मे़त्तु, “निङ्वाॽफुमाङ्ङिल्ले़ के़निङ्मिन् आइन् के़हुक्को हुक्के़सुप्ते़आङ् वाॽरे़छ॥ लाःक्किल्ले़ थिक्ले़ङ्माल्ले़ खाम्बाङ्ङो खर्दिःङ् तिःक्खुर थुप्मा इङ्जाङ् पिराङ्ङे़ॽ॥ आङ्गाॽ निले़ङ् थुप्माए मे़बोङ्ने़न्॥” 9 कर दाउदे़ल्ले़ खे़न् मे़त्तु, “हाङ्ङिन् मे़से़रे़न्ने़ॽ॥ यहवे दाङ्बे़ल्ले़ सेगुबा कुमना सम्धाङ् हुक् के़याक्पा आत्तिन् आप्तिक् मेःन्नेबा पोङ्बे?” 10 दाउदरे़ याम्मोआङ् पाःत्तु, “यहवे दाङ्बे़न् कुहिङ्वे़त् वाॽबा कुइसिक् आङ्गाॽ पाःत्तुङ्ॽ, खे़न्निन् यहवे दाङ्बे़ल्ले़ए से़रुॽ॥ इग्र कुधाःक् पुन्नाङ् सिःॽ मेःन्ने़फग्र थङ्ङो पेःक्काङ् सिःॽ॥ 11 कर आङ्गाॽ यहवे दाङ्बे़ल्ले़ सेगुबा मनाःल्ले़ कुदक्ले़ङ्वाओ हुक्फोःङ्मा यहवे दाङ्बाल्ले़ए मे़बिआल्ल॥ आल्ल खुने़ॽ कुदाक्खोःङ्ङिल्ले़ कुबेसाङ् के़ने़बा लाःक्किन् नु कुज्वाःत् याङ्मा फङ्नाःन् तेॽसुआङ् पित्छि॥” 12 खे़ब्याङ् दाउदरे़ सावलरे़ कुदाक्खोःङ्ङिल्ले़ कुबेसाङ् के़ने़बा लाःक्किन् नु च्वाःत् याङ्मा फङ्नाःन् तेॽरु, हे़क्क्याङ् खे़प्मोनु पेसि॥ तुरायक्को के़रे़क् थक्सुबाहाॽ मे़इप्से़आङ् मे़ने़स्से़॥ आत्तिल्ले़आङ् खे़ङ्हाॽ मे़न्निसुसिन्, आत्तिल्ले़आङ् निङ्वाॽ मे़ङ्घोसुन्, आत्तिन्नाङ् मे़म्बोगे़न्॥ यहवे दाङ्बाल्ले़ पाङ्घुबा मिक् युमाओ खे़ङ्हाॽ मुरुक् खारुक् मे़इप्से़आङ् मे़ने़स्से़॥ 13 खम्ब्याङ् दाउदे़न् वेॽ ले़प्माङ् पेआङ् माःङ्घाबा कोःक्माल्ले़ कुजङ्ङो ये़म्सिङ्॥ खुन्छिॽलुम्मोबा फे़रे़ःन् माङ्भा माःङ्घा ने़स्से़॥ 14 दाउदरे़ थक्सुबाहाॽ नु नेररे़ कुस्सा अबनेरे़न् यम्बा इक्लाओ अक्खे मे़त्तुसि, “अबनेरे, के़घे़प्सुबि?” अबनेररे़ मे़त्तु, “हाङ्ङिन् के़भे़ःक्पा खे़ने़ॽ हाःत्ने़बे?” 15 दाउदरे़ अबनेरे़न् मे़त्तु, “खे़ने़ॽग ये़म्बित्छा मनाने़ मेःम्बि? इस्राइलओ खे़ने़ॽ हे़क्तङ्बा कुभा वेॽआङ् मे़वाॽबि? खे़ने़ॽ थेआङ् के़हाङ्ङिन् नुरिक् कम्ब्राङ् के़म्मे़त्तुम्बाबे? खे़ने़ॽ के़न्दाङ्बा हाङ्ङिन् से़त्छे़ लत्छा मना त्ये़आङ् वये़॥ 16 खे़ने़ॽ कन् नुबा के़न्जोगुन्॥ यहवे दाङ्बे़न् कुहिङ्वे़त् वाॽबा कुइसिक् पाःत्तुङ्ॽ, खे़ने़ॽग से़प्माए के़बोङ्बा के़जोःक्लो, थेआङ्भे़ल्ले़ यहवे दाङ्बे़ल्ले़ सेगुबा कुमना, खे़निॽ दाङ्बान् कम्ब्राङ् के़म्मे़त्तुम्मिन्॥ ओमे़त्ते़म्मे़ॽ! खुने़ॽ कुदाक्खोःङ्ङो के़ने़बा कुलाःक्किन् नु कुज्वाःत् याङ्मा फङ्नाःन् आत्तान् वाॽ?” 17 सावलरे़ दाउदरे़ कुइक्लान् कुसिङ् निःत्तुआङ् पाःत्तु, “खे़ने़ॽएबि? आस्सा दाउदे?” दाउदे़ल्ले़ मे़त्तु, “आङ्गाॽएरो, आदाङ्बा हाङ्ङे॥” 18 हे़क्क्याङ् मे़त्तु, “आन्दाङ्बे, थेआङ् कम्भ्यारिक् साॽरिक् के़से़वारोबान् के़नाःत्तुबाबे? आङ्गाॽ थे चोगुङ्ङाङ् वाॽबे? आङ्गाॽ आहुक्लाम् थे़मा ताप्फे़ःम्बा याःम्बक् पोःक्खे़आङ् वाॽबे? 19 आदाङ्बा हाङ्ङे, आङ्गाॽ थे पाःत्तुङ् नुरिक् खे़प्से़ॽओ॥ यहवे दाङ्बे़ल्ले़ए खे़ने़ॽ आङ्गाॽ आदक्ले़ङ्वाओ के़भोःक्खे़बाने़फग्र कन् सिदुङ्जभान् खुने़ॽ ताःक्तुर॥ कर मनाहाॽरे़ मे़जोगुबाने़भग्र यहवे दाङ्बाल्ले़ कुदगि खे़ङ्हाॽ सम्धाङ् माङ्दे साक्मुरा थाररो॥ थेआङ्भे़ल्ले़ खे़ङ्हाॽरे़ वेॽ माङ्हाॽ से़वा मे़त्तुसिर फाॽआङ् खे़ङ्हाॽरे़ यहवे दाङ्बाल्ले़ कुलक्लाम् आङ्गाॽ मे़लःत्ताङ्ङाङ् वाॽआरो॥ 20 खे़ल्ले़चोगुल्ले़ आदाङ्बा हाङ्ङे, यहवे दाङ्बालाम् माःङ्घा पोङ्ङाआङ् वेॽ मनाहाॽरे़ खुन्छिॽ लाजेॽओ सिमा मे़भाःक्ताङ्ङिन्ने़ॽ॥ कोःक्माओबा सिङ्लाहाॽओ खे़रे़कवा पुःन् नाःप्मनाबा कुइसिक् आङ्गाॽ सिप्तक्पा हे़क्तङ्बा मनान् फुःत्छे़ थेआङ् इस्राइलबा हाङ्ङिन् के़लःन्दे़आङ् के़वाॽबाबे?” 21 खे़ब्याङ् सावलरे़ मे़त्तु, “आङ्गाॽ लायो चोगुङ्॥ दाउद आस्साए नुःक्खे़आङ् त्ये़ॽ॥ आइन्बा ये़न्नो खे़ने़ॽ आङ्गाॽ साःङ्गुगे़न् आसक्मान् साॽरिक् इमे़ल्लुङ्बा निङ्वाॽ के़इःत्तु, आल्ल आङ्गाॽ आप्फाल्ले़आङ् खे़ने़ॽ से़प्मा निङ्वाॽ मे़जोक्कान्॥ आङ्गाॽग से़क्खासाङ् अदङ् पोःक्खाङ्, आङ्गाॽ चाॽरिक् यम्बा याःम्बक् फेःन्दुङ्॥” 22 दाउदरे़ मे़त्तु, “हाङ्ङिल्ले़ कुलाःक्किन् कप्मो ने़ःॽ॥ आदाङ्बारे़ लत्छा के़मनाधिक् कुलासे़ पाङ्घे़ॽ॥ 23 यहवे दाङ्बे़ल्ले़ के़रे़क् मनाहाॽरे़ खुन्छिॽ साम्यो नु नसाःन्साबा याःम्बक्किल्ले़ कुलागि थुम्घो पिरुसिॽ॥ यहवे दाङ्बे़ल्ले़ आइन् आङ्गाॽ आहुक्को आन्दाङ्बे़न् हुक्सुप्ताङ्ङाङ् वये़, कर आङ्गाॽ यहवे दाङ्बे़ल्ले़ सेगुबा कुमनाःल्ले़ कुसम्धाङ् आङ्गाॽ आहुक् फोङ्मा मे़दे़न्दाङ्ङिन्॥ 24 ओमे़त्ते़ॽ! आइन् के़सक्मान् इमे़ल्लुङ्बा निङ्वाॽ इःत्तुङ्, हे़क्केलॽरिक्के यहवे दाङ्बे़ल्ले़ कुदगि आङ्गाॽ आसक्मान् इमे़ल्लुङ्बा पोङ्ल, हे़क्क्याङ् खुने़ॽए के़रे़क् परिक्पा तुक्खे लाक्खेहाॽओ से़ःप्पाररो॥” 25 हे़क्क्याङ् सावलरे़ दाउदे़न् मे़त्तु, “आस्सा दाउदे, खे़ने़ॽए मुॽइसाबा के़बोङ्लरो॥ खे़ने़ॽ यम्बयम्बा याःम्बक् के़जोगुॽ, खे़म्ब्याङ् खे़ने़ॽ थङ् के़नाःम्बा के़बोङ्॥” हे़क्क्याङ् दाउद आबाङे कुलाम् नाःत्तुआङ् थासिङ्, खे़ब्याङ् सावले़न् कुहाङ्हिम्मो नुःक्खे़॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.