१ सामुए़ल 25 - लिम्बुसामुए़ले़न् मासिङ् 1 सामुए़ले़न् मासिङ्॥ हे़क्क्याङ् के़रे़क् इस्राइलिहाॽ मे़जुप्से़आङ् खुने़ॽ कुलागि मे़रिङ् मे़धक्ते़॥ हे़क्क्याङ् खे़ङ्हाॽरे़ आबाङे रामाबा कुहिम्मो मे़देॽरुआङ् मे़लुप्तु॥ हन्नाङ् दाउदे़न् पारानबा मुरे़क् खारे़क्पा ये़ःङ्घादे़न् यो थ्ये़॥ दाउदे़न् नु अबिगेल 2 माओन पाङ्जुम्मो लत्छा मना वये़, कर्मेल पाङ्जुम्मो खुने़ॽ यरिक् याङ्साकुन्धे कत्तु॥ खे़न् माङ्भा के़गप्पा मना वये़, हे़न्छिङ् सुम्सि मे़ल्लुक् नु हे़न्छिङ्धिक् मे़ःन्दाक् कत्तुसि॥ खे़न् ये़म्मो खुने़ॽ कारमेलओ कुमे़ल्लुक् मुरिक् नःङ्नु यागे़॥ 3 खुने़ॽ कुमिङ्ग नाबाल वये़, हे़क्क्याङ् कुमेःत्तिल्ले़ कुमिङ् अबिगेल वये़॥ अबिगेले़न् साॽरिक् नुमा नु चाःप्मा वये़, कर खे़न् मनान् साॽरिक् कुसिक् के़बोःक्पा नु मना ताप्फे़ःल्लिक् के़मे़प्मा वये़, खुने़ॽग कालेबरे़ कुहिम्सयङ्बा मना वये़॥ 4 हे़क्क्याङ् दाउदे़न् मुरे़क् खारे़क्पा ये़ःङ्घादे़न्नो वये़ल्ले़ नाबाले़न् कुमे़ल्लुक् मुरिक् नःङ्नु याक् के़लॽबा पान् दाउदरे़ खे़प्सु॥ 5 खे़ल्ले़चोगुल्ले़ दाउदरे़ थिबोङ् थाङ्बे़न् कुमनाहाॽ अक्खे मे़त्तुसिआङ् पाङ्घुसि, “कार्मेल पाङ्जुम् पेगे़म्मे़ॽआङ् नाबाले़न् आङ्गाॽ आसे़वामु मे़त्ताम्मे़ॽ॥ 6 हे़क्क्याङ् खुने़ॽ अक्खे मे़त्ताम्मे़ॽ, ‘खे़ने़ॽ नु के़हिम्सयङ्हाॽ हे़क्क्याङ् के़हिम्मो के़वाॽबा के़रे़क् के़नुरि के़दासिर॥ 7 खे़ने़ॽ के़मे़ल्लुक् मुरिक् नःङ्नु के़याक् के़लॽबान् खुने़ॽ खे़प्सु॥ खे़ने़ॽ के़मे़ल्लुक् के़गम्बाहाॽ आनिगे़नु मे़वये़ल्ले़ आनिगे खे़ङ्हाॽ थेआङ् तुक्खे मे़जाःत्तुम्सिम्बे़न्॥ खे़ङ्हाॽ कारमेलओ मे़वये़ल्ले़ खुन्छिॽ थेआङ् मे़म्माए वये़॥ 8 खे़ने़ॽ के़मनाहाॽ से़ःन्लाप्ते़से़ॽ, हे़क्क्याङ् खे़ङ्हाॽरे़ खे़ने़ॽ पाःन्हाॽ के़म्मे़त्॥ खे़ल्ले़चोगुल्ले़ आङ्गाॽ थाङ्बे़न् आमनाहाॽ लाङ् ताःक्ते़से़ॽओ, थेआङ्भे़ल्ले़ आनिॽ तङ्नाम् तोमा ये़म्मो आदे़आङ् आवाॽ॥ खे़ने़ॽ थे के़गत्तु हाबा खे़न्ने खे़ने़ॽ के़से़वारोबाहाॽ नु के़स्सा दाउदे़न् पिरे़ॽओ॥’” 9 दाउदरे़ थाङ्बे़न् कुमनाहाॽ मे़गे़रे़ मे़दे़, हे़क्क्याङ् कन् के़रे़क् पाःन्हाॽ दाउदरे़ कुमिङ्ङो नाबाले़न् मे़मे़त्तु॥ खे़ब्याङ् खे़ङ्हाॽरे़ खुने़ॽ मे़हाङ्घु॥ 10 हे़क्क्याङ् नाबालरे़ दाउदरे़ कुसे़वारोबाहाॽ मे़त्तुसि, “दाउदे़न् हाःत्? कन् यिसैरे़ कुस्सा मे़प्मनाबे़न् हाःत्? कन् ये़म्मो यरिक् से़वारोबाहाॽ खुन्छिॽ दाङ्बालाम् मे़घे़त्छिङ् मे़बेआङ् मे़वाॽ॥ 11 आङ्गाॽ आजामा आधुङ्मा नु आङ्गाॽ आमे़ल्लुक् मुरिक् के़नःङ्बाहाॽरे़ खुन्छिॽ चामा सान् आङ्गाॽ कुसिङ्ङे मे़निःत्तासिङिन्बा मनाहाॽ थेआङ् पिरुङ्सिङ्बाबे?” 12 खे़ल्ले़चोगुल्ले़ दाउदरे़ कुमनाहाॽ मे़नुःक्खे़ मे़बे, हे़क्क्याङ् खे़न् के़रे़क् पाःन्निन् दाउदे़न् मे़जे़क्तु॥ 13 दाउदरे़ कुमनाहाॽ मे़त्तुसि, “के़रे़क्ले़ आबाङे खिनिॽ ताभेन् हेॽआसिम्मे़ॽ॥” खे़ङ्हाॽ के़रे़क्ले़ आबाङे खुन्छिॽ ताभेन् मे़हेॽसिङ्, हे़क्क्याङ् दाउदरे़आङ् आबाङे कुदाभेन् हेॽसिङ्॥ हे़क्क्याङ् हप्मे़न् किप् लिसि कुमनाहाॽ दाउदरे़ कुएगाङ् कुएगाङ् मे़धासिङ्॥ खे़ब्याङ् किप् ने़त्छि कुमनाहाॽ चिगक्वा कोसे़ मे़याःक्ते़॥ 14 कर लत्छा थाङ्बे़न् से़वारोबाधिक्ले़ नाबालरे़ कुमेत् अबिगेले़न् मे़त्तु, “दाउदरे़ मुरे़क् खारे़क्पा ये़ःङ्घादे़न्लाम् आनिॽ दाङ्बे़न् नःम्नःम्बा से़वा तोःन्छे़ कुइङ्घङ् के़साबाहाॽ पाङ्घुसिआङ् वये़, कर खुने़ॽग खे़न् मनाहाॽ ताप्फे़ःम्बा पान् मे़त्तुसि॥ 15 कर खे़न् मनाहाॽरे़ग आनिगे साॽरिक् नुरिक् मे़मे़त्तिगे़आङ् वये़, हे़क्क्याङ् आनिगे आप्फाल्ले़आङ् तुक्खे मे़न्जाःत्तिगे़न्, हे़क्क्याङ् आनिगे खे़ङ्हाॽनु चाराम्दे़न्हाॽओ वयिगे़ल्ले़ थेआङ् मे़मासुम्बे़न्॥ 16 आनिगे मे़ल्लुक् चाराम्से़ पेःक्मनाःल्ले़ खे़ङ्हाॽग आनिगे के़रे़क् पिसाङ् लुङ्धाक् हे़क्के कम्ब्राङ् के़जोःक्पा मे़बोःक्खे़आङ् मे़वये़॥ 17 आल्ल खे़ने़ॽ थे चोःक्माबोङ् नुरिक्काङ् इःत्ते़ॽओ, थेआङ्भे़ल्ले़ आनिॽ दाङ्बे़न् नु कुहिम्सयङ्हाॽरे़ लागि तुक्खे लाक्खे तार पत्॥ खुने़ॽग साॽरिक् ताक्के़भे़ॽबा चोक्, खुने़ॽनु हाःत्ताङ् पाःप्मा मे़न्छुक्ने़न्॥” 18 कन् पाःन्निन् खे़प्सुआङ् अबिगेलरे़ हारावरा किप् ने़त्छि कुले़प् खरे़ःङ्, से़होबा सुक्वा ने़त्छि चे़ल्ले़क्सेॽ थि, हे़क्क्याङ् मे़से़रुसिआङ् मे़घक्तु मे़धोःक्तुआङ् यारिप् मे़जोगुबा ङासि मे़ल्लुक्सा, फुलक् ये़त्छि साम्बेःत्, नाम्मे़भे़त्तुआङ् मे़घे़क्सुबा किप्थिक् चे़ल्ले़क्सेॽ कुबजा, हे़क्क्याङ् नाम्मे़भे़त्तुआङ् मे़घे़क्सुबा किप् ने़त्छि कुगाक्मा पःत्छेसेॽ अदङ्हाॽ कुःत्तुसि॥ 19 हे़क्क्याङ् से़वारोबाहाॽ खुने़ॽ मे़त्तुसि, “आङ्गाॽ आदगि थासिङ्ङाम्मे़ॽ, आङ्गाॽ एगाङ् एगाङ् फे़न्ना॥” कर कुये़म्बा नाबाले़न् खे़ल्ले़ कुयाःम्बेओ थेआङ् मे़मे़त्तुन्॥ 20 अबिगेलरे़ अदङ्ङिन् युक्तु हे़क्क्याङ् कोःक्माओबा इलाम्मो पेर पत्छे़ल्ले़ दाउदे़न् नु कुमनाहाॽ खुने़ॽ ले़प्माङ् यो मे़ध्ये़र मे़बत्छे़बा निसुसि॥ 21 दाउदरे़ खारक् पाःत्तुआङ् वये़, “मुरे़क् खारे़क्पा ये़ःङ्घादे़न्नो थेआङ् मे़म्माए साॽरिक् नुरिक् आनिगे कल्ले़ कुयाङ्सा कुन्धेहाॽ से़ःप्मनाबे़ङ्ग हने़रक् पोःक्खे़रे़छ॥ खे़ल्ले़ग नुबाल्ले़ कुले़क्वा आङ्गाॽनु ताप्फे़ःम्बा चोगु॥ 22 ताःन्दिक् तानाम् थारिक्ले़ खे़न्नु के़वाॽबा ये़म्बित्छाहाॽओ लत्छारक् कुमना कुहिङ्वे़त् याःक्ते़ने़भग्र निङ्वाॽफुमाङ्ङिल्ले़ आङ्गाॽआङ् से़त्ताॽर॥” 23 अबिगेलरे़ दाउदे़न् निसुल्ले़ खुने़ॽ हाराहारा कुअदङ् सम्धाङ्लाम् थासिङ्, हे़क्क्याङ् दाउदरे़ कुदगाङ् साम्बोन् हबत् फन्छिङ्ङाङ् 24 खे़ल्ले़ कुलाङ्ङो से़वा मे़त्तुर पाःत्तु, “आन्दाङ्बे, आङ्गाॽओए आप्तिक् थार॥ आदाङ्बारे़ के़से़वारोमे़न् पाःप्मा इङ्जाङ् पिराङ्ङे़ॽओ॥ आदाङ्बारे़ आङ्गाॽ आबाःन्निन् खे़प्से़ॽओ॥ 25 आदाङ्बारे़ खे़न् नाबालरे़ कुबाःन्नो निङ्वाॽ मे़बिरे़न्ने़ॽओ॥ खे़ल्ले़ कुमिङ् नाबालरो॥ खे़न् हाबा हे़क्तङ्बा चोक्॥ खे़ल्ले़ कुमिङ्ङे ‘सधःक्पा अदङ्लो’ खे़ल्ले़ कुये़प्ले़क्किन्नाङ् अदङ् हे़क्तङ्बाए चोक्॥ आदाङ्बारे़ के़बाङ्घुसिबा मनाहाॽ आङ्गाॽ मे़निसुङ्सिङ्ङिन् आदाङ्बे॥ 26 “आल्ल माक्खिॽसिवा से़मा नु कुले़क्वा हुङ्मा याःम्बक् चोःक्मालाम् यहवे दाङ्बाल्ले़ आदाङ्बा के़साक्लरो॥ से़क्खाए यहवे दाङ्बे़न् कुहिङ्वे़त् वाॽबा कुइसिक् हे़क्क्याङ् आदाङ्बारे़ के़हिङ्मन्नो माङ्हे़क्सिङाआङ् पाःत्तुङ्ॽ, आदाङ्बारे़ के़निङ्मिहाॽ नु आदाङ्बान् मे़ङ्मा के़गोःप्पा के़रे़क्ले़ नाबालरे़ तुमुबा हे़क्तङ्बाए पोङ्ल॥ 27 आल्ल आङ्गाॽ के़से़वारोमाल्ले़ तारुङ्बा सुङ्ङिन् कप्मो वाॽ॥ आदाङ्बानु के़वाॽबा थाङ्बे़न्हाॽ पिरे़से़ॽओ॥ 28 “आन्दाङ्बे, खे़ने़ॽ के़से़वारोमाल्ले़ फेःन्दुबा पाःन्निन् ले़प्मि पिरे़ॽओ॥ आदाङ्बारे़ के़धाःक्हाॽ यहवे दाङ्बे़ल्ले़ सदादिङ् के़वाॽबा चोगुसिर, थेआङ्भे़ल्ले़ आदाङ्बारे़ग यहवे दाङ्बाल्ले़ कुधङ्हाॽओ थङ् के़जोःक्ल के़बत्लो॥ आदाङ्बा के़वाॽर थारिक् खे़ने़ॽओ ताप्फे़ःम्बा थेआङ् खोमे़दे़त्ने़न्लरो॥ 29 कुभा मनाधिक्ले़ आदाङ्बा के़नाःत्ताङ् से़प्मा के़गोःत्ने़फग्र यहवे दाङ्बा के़निङ्वाॽफुमाङ्ङिल्ले़ कुगम्ब्राङ्ङो के़युङ्॥ कर के़निङ्मिहाॽरे़ खुन्छिॽ हिङ्मन्निन् खुने़ॽ अर्दोओ याक्माआङ् लाप्फेःम्नाबा लुङ् कुइसिक् लाप्फुसुरो॥ 30 यहवे दाङ्बे़ल्ले़ आन्दाङ्बे़न् के़बिरे़बा के़रे़क् माङ्हुप्पिन् के़त्तुआङ् इस्राइलबा युक्साबा के़जोःक्किल्ले़ 31 आदाङ्बारे़ माक्खिॽसिवा के़से़सुबा नु कुले़क्वा के़हुङ्बाल्ले़ चोगुल्ले़ आदाङ्बारे़ लागि निङ्वाॽलोमा इग्र के़लिःप्पा कक् के़बोङ्बा थेआङ् होप्लो॥ खे़न् ये़म्मो यहवे दाङ्बे़ल्ले़ आदाङ्बे़न् के़नुॽ के़दार चोगुरो, हे़क्केःल्ले़ आदाङ्बारे़ के़से़वारोमान् निङ्वाॽ इःत्ताङ्ङे़ॽओ॥” 32 खे़ब्याङ् दाउदरे़ अबिगेले़न् मे़त्तु, “यहवे दाङ्बा इस्राइलबा निङ्वाॽफुमाङ्ङिल्ले़ कुमिमिदिङ् पोङ्ल, खुने़ॽए आङ्गाॽ आदुम्से़ आइन् खे़ने़ॽ के़बाङ्घे़॥ 33 खे़ने़ॽ नुबा के़सिक्कुम् निङ्वाॽरे़ लागि निङ्वाॽफुमाङ्ङिल्ले़ खे़ने़ॽ मुॽइसाम् के़बिर, थेआङ्भे़ल्ले़ आइन् आङ्गाॽ मनासे़प्मा नु कुले़क्वा हुङ्मा पाःन्लाम् खे़ने़ॽ के़से़ःप्ताङ्॥ 34 खे़ने़ॽ के़हिम्सयङ्बा ये़म्बित्छाहाॽ से़प्मालाम् के़से़ःप्पा इस्राइलबा से़क्खाए यहवे दाङ्बा निङ्वाॽफुमाङ्ङिन् कुहिङ्वे़त् वाॽबा कुइसिक् माङ्हे़क्कासिङ्ङाआङ् पाःत्तुङ्ॽ, खे़ने़ॽ आङ्गाॽ आदुम्से़ हारा के़न्द्ये़ने़म्बा हे़क्केले़ग नाबालरे़ कुहिम्सयङ्बा ये़म्बित्छासाहाॽ लत्छाआङ् तानाम् थारिक् मे़न्हिङे़म्बारो॥” 35 खे़ब्याङ् अबिगेलरे़ तेॽरुबा सुङ्ङिन् खुने़ॽ ताःक्तु, हे़क्क्याङ् मे़त्तु, “नुरिक्काङ् के़हिम्मो नुःक्खे़ॽओ॥ आङ्गाॽ खे़ने़ॽ के़बाःन्निन् खे़प्सुङ्ङाङ् खे़ने़ॽ के़इःत्तुबा हे़क्केए आङ्गाॽ चोगुङ्॥” 36 अबिगेले़न् हिम्मो नुःक्खे़आङ् त्ये़ःल्ले़ नाबालरे़ हिम्मो हाङ्ङिल्ले़ कुलागि यारिप् चोःक्मनाबा हे़क्केए यम्बा साभःङ्जा मे़जर मे़यागे़बा निसु॥ नाबाले़न् थिःल्ले़ मयुआङ् साॽरिक् कुनिङ्वाॽ त्ये़आङ् वये़॥ खे़न् साॽरिक् मयुआङ् वये़बाल्ले़ चोगुल्ले़ खे़ल्ले़ कुमेत् अबिगेलरे़ खुने़ॽ तानाम् थारिक् थेआङ् मे़जे़क्तुन्॥ 37 तानाम्सा थिःल्ले़ ले़रुआङ् खे़न् के़रे़क् पाःन्हाॽ चे़क्तु, हे़क्क्याङ् खे़ल्ले़ कुने़र्वे़त्तिल्ले़ याःम्बक् चोःक्माए ले़रु, खे़म्ब्याङ् खे़न् लुङ् कुइसिक् पोःक्खे़आङ् लङ्ले़ःङ्वा पोःक्खे़॥ 38 थिबोङ् ये़न् एगाङ् यहवे दाङ्बे़ल्ले़ खे़न् थगु हे़क्क्याङ् खे़न् स्ये़॥ 39 दाउदरे़ नाबाले़न् स्ये़ के़लॽबा खे़प्सु, खे़ल्ले़ पाःत्तु, “खे़ल्ले़ चोगुबा ताप्फे़ःम्बा याःम्बक्किल्ले़ कुलागि खासे़न् के़जोःक्पा नु खुने़ॽ कुसे़वारोबान् ताप्फे़ःम्बा याःम्बक् चोःक्मालाम् के़से़ःप्पा यहवे दाङ्बे़ल्ले़ कुनारा पोररो॥ नाबालरे़ चोगुबा फे़न्याःम्बक्किन् आबाङे कुधे़गेःक्पो थासु पिरुआङ् वाॽ॥” खे़ब्याङ् दाउदरे़ अबिगेले़न् खुने़ॽ कुमेत् पोङ्मा सुक्पि मे़सुक्ने़म्बि फाॽआङ् इङ्घङ् हाङुदेसु॥ 40 दाउदरे़ कुसे़वारोबाहाॽ कर्मेल मे़बेआङ् अबिगेले़न् मे़मे़त्तु, “दाउदरे़ कुमेत् पोङ्मारे़ लागि खे़ने़ॽ के़लासे़ याप्मि पाङ्घे़आङ् वाॽ॥” 41 खे़न् मुत्चप् पोगे़, हे़क्क्याङ् खाम्बाङ्ङो अःक्खुम् फन्छिङ्ल से़वा मे़त्तुसिआङ् पाःत्तु, “आङ्गाॽग आन्दाङ्बाल्ले़ कुइङ्जाङ्हाॽ इःप्मा नाःप्मा यारिप् वाॽआ, आङ्गाॽग खुने़ॽ कुसे़वारोबाहाॽरे़ खुन्छिॽ लाङ् वागे़हप्मा कुसे़वारोमारो॥” 42 हे़क्क्याङ् अबिगेले़न् हाराहारा यारिप् पोःक्खे़, खुने़ॽ ङासि कुन्देःङ्माहाॽनु अदङ् मे़युक्तुआङ् इङ्घङ् के़दाःप्पा दाउदरे़ कुमनाहाॽनु मे़बे, हे़क्क्याङ् दाउदरे़ कुमेत् पाःक्खे़रो॥ 43 दाउदरे़ यिजरेलबा अहिनोम्मे़न्नाङ् मेःक्खिम् मे़त्तुआङ् वये़॥ खे़ङ्हाॽ ने़प्माङ् खुने़ॽ कुमेत् पोःक्खे़सि॥ 44 आम्भा कन् ये़म्मो सावलरे़ खुने़ॽ कुस्सा मे़न्छुमा दाउदरे़ कुमेत् मिकले़न् गल्लिमबा लेसरे़ कुस्सा पल्तिएले़न् कुमेत् पोङ्से़ पिरुदेसुआङ् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.