१ सामुए़ल 24 - लिम्बुदाउदरे़ सावले़न् मे़से़रुन् 1 सावलरे़ पलिस्तिहाॽ नाःत्तुसिआङ् नुःक्खे़, हे़क्केःल्ले़ दाउदे़न् एन-गदिबा मुरे़क् खारे़क् ये़ःङ्घादे़न्नो वाॽ के़लॽबा खुने़ॽ खे़प्सु॥ 2 हे़क्केःल्ले़ के़रे़क् इस्राइलिहाॽलाम्बा हे़न्छिङ् सुम्सि मना सेगुसिआङ् तेॽरुसि, हे़क्क्याङ् दाउद नु खे़ल्ले़ कुमनाहाॽरे़ खुनिॽ कोःत्छे़ स्याःक्पा याक्केःक्किल्ले़ कुबेसाङ् थासिङ्॥ 3 हे़क्क्याङ् खुने़ॽ लाम्बेसाङ् के़ने़बा मे़ल्लुक्खरओ त्ये़॥ खे़ल्ले़ कुबेसाङ् लत्छा लुङ्फुक्कुधिक् ने़स्से़॥ सावले़न् खे़न् लुङ्फुक्कोओ लासे़आङ् पाहारा युङ्सिङ्॥ दाउदे़न् नु कुमनाहाॽ खे़न् लुङ्फुक्कुओ मे़जिङ्सिङ्ङाङ् मे़युङे़॥ 4 हे़क्क्याङ् दाउदरे़ कुमनाहाॽरे़ खुने़ॽ मे़मे़त्तु, “आल्लो खे़ने़ॽ सुये़म् के़घोसुआङ् वाॽ! आइन् यहवे दाङ्बे़ल्ले़ खे़ने़ॽ अक्खे के़मे़त्ते़, ‘आङ्गाॽ खे़ने़ॽ के़निङ्मिन् के़हुक्को थासुङ् पिने़, हे़क्क्याङ् खे़न्नु खे़ने़ॽ थे चोःक्मा निङ्वाॽ के़जोगुॽ हाबा हे़क्केए चोगे़ॽ॥’” दाउदे़न् अङेःक्काङ् पेआङ् सावलरे़ कुजाङ्देःत्तिल्ले़ कुसुक्पे़न् खक्तु पिरु॥ 5 कर सावलरे़ कुजाङ्देःत्तिल्ले़ कुसुक्पे़न् खक्तु पिरुबाल्ले़ चोगुल्ले़ दाउदरे़ कुनिङ्वाॽ ताॽजे़क्खे़॥ 6 दाउदरे़ कुमनाहाॽ मे़त्तुसि, “आङ्गाॽ आन्दाङ्बे़न्, हे़क्के मे़प्मा यहवे दाङ्बे़ल्ले़ मे़बाङ्ङान्, खुने़ॽग यहवे दाङ्बाल्ले़ए हाङ् पोङ्से़ सेगुबारो! आङ्गाॽ खुने़ॽ हुक् याक्मा मे़नुॽने़न्, थेआङ्भे़ल्ले़ खुने़ॽ यहवे दाङ्बे़ल्ले़ सेगुबा हाङ्लो!” 7 खे़ल्ले़चोगुल्ले़ दाउदरे़ कुमनाहाॽ फे़ःक्तुसि, हे़क्क्याङ् सावले़न् फप्माआङ् से़प्मा मे़बाङ्घुसिन्॥ सावले़न् पोगे़आङ् खे़न् लुङ्भुक्कुन् ले़रु हे़क्क्याङ् आबाङे कुलाम्मो थासिङ्॥ 8 हे़क्क्याङ् दाउदे़न्नाङ् लुङ्भुक्कुसिगाङ्लाम् लाःक्कात् लःन्दे़, हे़क्क्याङ् सावले़न् मे़त्तु, “आदाङ्बा हाङ्ङे!” सावलरे़ हिसिङ्ङाङ् ओमे़त्तु, हे़क्केःल्ले़ दाउदे़न् खाम्बाङ्ङो हबत् फन्छिङ्ङाङ् से़वा मे़त्तुर 9 दाउदरे़ मे़त्तु, “आङ्गाॽ खे़ने़ॽ से़प्मा निङ्वाॽ चोगुर वाॽ लॽरिक् वेॽ मनारे़ के़म्मे़प्पा पाःन्निन् थेआङ् के़घे़प्सुबाबे? 10 आल्लो खा लुङ्भुक्कुओ यहवे दाङ्बे़ल्ले़ खे़ने़ॽ आहुक्को के़धासे़आङ् वये़बा पाःन्निन् खे़ने़ॽ आबाङे के़निसुरो॥ कुभा आमनाहाॽरे़ से़रे़ॽ मे़मे़त्ताङ् कर खे़ने़ॽ ले़त्ने़देने़, हे़क्क्याङ् आङ्गाॽ मे़त्तुङ्सिङ्, ‘आङ्गाॽ आन्दाङ्बाल्ले़ कुसम्दाङ् हुक्फोःङ्मा मे़सुक्कान्, थेआङ्भे़ल्ले़ खुने़ॽग यहवे दाङ्बे़ल्ले़ सेगुबा मनारो॥’ 11 आम्बौ, आङ्गाॽ आहुक्को कत्तुङ्बा के़देःप्फे़राःन् ओमे़त्ते़ॽओ! आङ्गाॽ से़प्मा सुक्ने़मे़न् कर के़देःप्फे़राःन्लक् खक्तुङ्॥ कन्लाम्बाए आङ्गाॽ खे़ने़ॽ के़दक्ले़ङ्वाओ ताप्फे़ःम्बा निङ्वाॽ मे़इःत्तान् इग्र से़प्मा मे़गोःत्ने़म्बा पाःन्निन् निङ्वाॽ के़घोसुरो॥ आङ्गाॽ थेआङ् ताप्फे़ःम्बा मे़मे़त्ने़न्छाङ् खे़ने़ॽग आङ्गाॽ से़प्मा निङ्वाॽ के़जोगुआङ् के़नाःत्तार के़वाॽ॥ 12 आन्छिॽ लुम्मो यहवे दाङ्बे़ल्ले़ए खासे़न् चोगुररो, आङ्गाॽ तुक्खे के़जाःत्ताङ्बाओ यहवे दाङ्बे़ल्ले़ खे़ने़ॽ के़सम्दाङ् खासे़न् चोगुर, कर आङ्गाॽ आहुक्किन् खे़ने़ॽ के़सम्धाङ् आप्फाल्ले़आङ् मे़भोःङ्ङान्लो॥ 13 उन्छोःन्बा खे़दाॽ अक्तङ्बा वाॽ, ‘ताप्फे़ःम्बा याःम्बक् ताप्फे़ःम्बा मनाःल्ले़रक् चोगुॽ॥’ कल्ले़चोगुल्ले़ आङ्गाॽ आहुक्किन् खे़ने़ॽ के़दक्ले़ङ्वाओ मे़भोःङ्ङान्लो॥ 14 इस्राइलबा हाङ्ङिन् हाःत्ले़ कुदक्ले़ङ्वाओ लःन्दे़आङ् वाॽबे? आङ्गाॽ आदाङ्बारे़ हात् के़नाःत्तुर के़वाॽबे? लत्छा कुसिवे़त् कोःत्चोॽ इग्र लत्छा सिमे़न्दक् हे़क्तङ्बा थेनाधेबा आङ्गाॽ कुसिङ्बा मनान् मेःम्बि? 15 यहवे दाङ्बे़न्ने खासे़न् के़लोःम्बारो, खुने़ॽए आन्छिॽ लुम्मो खासे़न् चोगुर, हे़क्क्याङ् खुने़ॽ खासे़न् लोःन्दुर॥ खुने़ॽए थेःक्कार खे़ब्याङ् के़हुक्लाम् ताङ्से़ःप्पार॥” 16 दाउदरे़ कन् पाःन्हाॽ सावले़न्नु पाःत्तु सुरुआङ् खिदो, सावलरे़ पाःत्तु, “कन् के़बाःप्पे़न् खे़ने़ॽएबि, आस्सा दाउदे?” हे़क्क्याङ् सावले़न् हाःप्मा हेःक्ते़॥ 17 खुने़ॽ दाउदे़न् मे़त्तु, “आङ्गाॽनुःल्ले़ खे़ने़ॽ यरिक् साम्योबा के़जोक्, आङ्गाॽ ताप्फे़ःल्लिक् मे़त्ने़, कर खे़ने़ॽ आङ्गाॽ नुरिक् के़मे़त्ताङ्॥ 18 आइन् आङ्गाॽनु नुबा याःम्बक् के़जोगुबा पाःन्निल्ले़ कुयाःम्बेओ ओसेःन्दाङ् के़जोगु, यहवे दाङ्बे़ल्ले़ आङ्गाॽ के़हुक्को थासाङ्, कर खे़ने़ॽ के़न्छे़राङ्ङिन्॥ 19 आत्तिन् मनाःल्ले़ कुनिङ्मिन् ते़म्सुआङ् थेआङ् मे़म्मे़त्ते पेःक्मा पाङ्घु? कल्ले़चोगुल्ले़ आइन् आङ्गाॽनु नुबा याःम्बक् के़जोगुबाओ यहवे दाङ्बे़ल्ले़ खे़ने़ॽ हाङ्वा माङ्वा के़बिररो॥ 20 आल्ल खे़ने़ॽए इस्राइलबा हाङ् के़बोङ् के़लॽबे़न् आङ्गाॽ निसुङ्लो॥ हे़क्क्याङ् इस्राइल लाजेःल्ले़ खे़ने़ॽ के़हाङ्युक् चोःक्मा ये़म्मोए नुॽमादामा याःम्बक् चोगुरो॥ 21 खे़ल्ले़चोगुल्ले़ आङ्गाॽ आस्सा आम्मे़न्छाॽहाॽ मे़से़रुङ्सिङिन्, हे़क्क्याङ् आङ्गाॽ आमिङ्ङिन् आम्बारे़ कुहिम्सयङ्लाम्बा मे़दुःक्कान् फाॽआङ् खे़ने़ॽ यहवे दाङ्बाल्ले़ कुमिङ्ङो माङ्हे़क्सिङ्ङे़ॽ॥” 22 हे़क्क्याङ् दाउदे़न् सावले़न्नु माङ्हे़क्सिङ्॥ हे़क्क्याङ् सावले़न् कुहिम्मो नुःक्खे़, कर दाउदे़न् नु खुने़ॽ कुमनाहाॽ यक् ले़प्माङ् मे़धासिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.