१ सामुए़ल 23 - लिम्बुदाउदरे़ किलाह ये़क्यक्के़न् से़ःप्तुबा 1 “पलिस्तिहाॽ किलाह ये़क्यक्को के़युङ्बा मनाहाॽनु थङ् मे़जोगे़, हे़क्क्याङ् किलाहबा मनाहाॽरे़ खारक् याॽखालाओ मे़भुक्खुआङ् के़युङ्बा चाहाॽ खे़ङ्हाॽरे़ मे़नाप्तु मे़देॽरुसि” के़लॽबा पाःन्निन् दाउदरे़ खे़प्सु॥ 2 खे़ल्ले़चोगुल्ले़ दाउदरे़ यहवे दाङ्बे़न् सेःन्दोसु, “आङ्गाॽ पेःक्काआङ् पलिस्तिहाॽनु थङ् चोःक्काबिॽ” हे़क्क्याङ् यहवे दाङ्बे़ल्ले़ नोगप् पिरु, “ओःक्, पेगे़ॽआङ् थक्ते़ॽ, हे़क्क्याङ् किलाह ये़क्यक्किन् से़ःप्ते़ॽ॥” 3 कर दाउदरे़ कुमनाहाॽरे़ खुने़ॽ मे़मे़त्तु, “यहुदाओए आनिॽ आगिआङ् आवाॽ, किलाहओ आनिॽ आबेःक्काङ् पलिस्ति थक्सुबाहाॽनु थङ् आजोःक्किल्ले़ कन्नुःल्ले़ के़साक्पा आदुमुम्!” 4 खे़ल्ले़चोगुल्ले़ दाउदरे़ याम्मोआङ् यहवे दाङ्बे़न् सुजा नाःक्तु, हे़क्क्याङ् यहवे दाङ्बे़ल्ले़ खुने़ॽ मे़त्तु, “किलाह ये़क्यक्को थङ् चोःक्से़ पेगे़ॽ, थेआङ्भे़ल्ले़ पलिस्तिहाॽ खे़ने़ॽ के़हुक्को थासुङ्सिङ् पिने़॥” 5 हे़क्केःल्ले़ दाउदे़न् नु कुमनाहाॽ किलाह ये़क्यक्को मे़बे, हे़क्क्याङ् पलिस्तिहाॽनु थङ् मे़धक्ते़॥ खे़ङ्हाॽरे़ पलिस्तिहाॽ यरिक् मे़से़रुसि, हे़क्क्याङ् खुन्छिॽ पित्हाॽ मे़देॽरु मे़बिरुसि, हे़क्केलॽरिक् दाउदरे़ किलाह ये़क्यक्के़न् नु खे़प्मोबा मनाहाॽ से़ःप्तुसिरो॥ 6 अहिमेलेकरे़ कुस्सा अबियाथारे़न् दाउद वये़बा किलाह ये़क्यक्को खे़त्छिङ् त्ये़ःल्ले़ एपोदनु त्ये़आङ् वये़॥ 7 दाउदे़न् किलाह ये़क्यक्को त्ये़आङ् वाॽ के़लॽबा पान् कुभा मनारे़ सावले़न् मे़मे़त्तु, हे़क्क्याङ् सावलरे़ पाःत्तु, “निङ्वाॽफुमाङ्ङिल्ले़ खे़न् दाउदे़न् आङ्गाॽ आहुक्को पिराङ्ङाङ् वाॽ, थेआङ्भे़ल्ले़ खिरि फाङ्मनाबा ये़क्यक् सिगाङ् खे़न् आबाङे लासे़आङ् साक्सिङ्ङाङ् याक्॥” 8 हे़क्क्याङ् सावलरे़ के़रे़क् कुधक्सुबाहाॽ किलाह ये़क्यक्को पेःक्माआङ् दाउदे़न् नु कुमनाहाॽ किर्गप् कप्मासि फाॽआङ् पाङ्घुसि॥ 9 सावलरे़ चोगुबा चे़म्भन्निल्ले़ कुयाःम्बेओ दाउदरे़ निङ्वाॽ खोसु॥ हे़क्क्याङ् अबियाथार निङ्वाॽफुसाम्बान् एपोद तेःत्तिन् फे़प्मा पाङ्घु॥ 10 खे़ब्याङ् दाउदे़ल्ले़ अक्खेलॽरिक् पेलिगे़न् तुवा चोगु, “इस्राइलबा निङ्वाॽफुमाङ् यहवे दाङ्बाए, आङ्गाॽ चोगुङ्ङिल्ले़ सावले़न् किलाह ये़क्यक्को ताआङ् खे़न् मे़ङ्मा निङ्वाॽ चोगुआङ् वाॽमु के़लॽबा खे़प्सुङ्ङाङ् वाॽ॥ 11 किलाह ये़क्यक्पा मनाहाॽरे़ आङ्गाॽ खुने़ॽ कुहुक्को हुक्मे़सुप्पाबि? आङ्गाॽ के़से़वारोबाल्ले़ खे़प्सुङ्बा कुइसिक् सावले़न् किलाह ये़क्यक्को ताबि? इस्राइलबा निङ्वाॽफुमाङ् यहवे दाङ्बाए, आङ्गाॽ के़से़वारोबे़न् मे़त्ताङ्ङे़ॽओ॥” हे़क्क्याङ् यहवे दाङ्बे़ल्ले़ मे़त्तु, “से़क्खासाङ् सावले़न् तारो॥” 12 हे़क्क्याङ् दाउदरे़ याम्मो सेःन्दोसु, “किलाहबा मनाहाॽरे़ आङ्गाॽ नु आमनाहाॽ सावलरे़ कुहुक्को हुक्मे़सुप्तिगे़बि?” हे़क्क्याङ् यहवे दाङ्बे़ल्ले़ मे़त्तु, “खे़ङ्हाॽरे़ हाबा हे़क्केए मे़जोगुॽ॥” 13 खे़ल्ले़चोगुल्ले़ दाउदे़न् हे़क्क्याङ् किप् तुक्सि यारिक् खुने़ॽ कुमनाहाॽनु खे़प्मोलाम् खे़त्छिङ् हे़क्क्याङ् वेॽ ते़न् ले़प्माङ् मे़बेआङ् मे़जत्छिङ्ल मे़बे॥ दाउदे़न् किलाह ये़क्यक्लाम् खे़त्छिङ् के़लॽबा पाःन्निन् कुभारे़ सावले़न् मे़मे़त्तु हे़क्केःल्ले़ग खुने़ॽ खे़प्मो मे़बेने़न्॥ दाउदे़न् नु कुमनाहाॽ कोःक्माओ मे़जिङ्सिङ् 14 हे़क्क्याङ् दाउदे़न् मुरे़क् खारे़क् थेआङ् के़होप्पा यक्हाॽओ नु जिप मे़प्मनाबा मुरे़क् खारे़क्पा ये़ःङ्घादे़न्नोबा कोःक्माहाॽओ चिङ्सिङ्ल वाॽमा हेःक्ते़, हे़क्क्याङ् सावलरे़ थिक्याःन्धक् कोःप्मा हङ्मा हेःक्तु॥ कर निङ्वाॽफुमाङ्ङिल्ले़ दाउदे़न् खुने़ॽ कुहुक्को मे़बिरुन्॥ 15 दाउदे़न् जिप मुरे़क् खारे़क् थेआङ् के़होप्पा ये़ःङ्घादे़न्नोबा होरेस ते़न्नो वये़ल्ले़, सावले़न् कुसे़त्छे़ लःन्दे़आङ् वाॽ के़लॽबान् खुने़ॽ खे़प्सु॥ 16 खे़ब्याङ् सावलरे़ कुस्सा जोनाथाने़न् होरेस मे़प्नाबा ते़न्नो दाउदरे़ कुदुम्से़ पे हे़क्क्याङ् निङ्वाॽफुमाङ्ङो हाङ्हाङ् लॽमारे़ लागि साःङ्गु सक्मा लाॽसिङ्मा फाॽरु॥ 17 हे़क्क्याङ् खुने़ॽ मे़त्तु, “मे़गिसे़न्ने़ॽ, आङ्गाॽ आम्बा सावलरे़ सुमाआङ् के़ङ्घोने़न्॥ खे़ने़ॽ इस्राइलबा हाङ् के़बोङ्, हे़क्क्याङ् आङ्गाॽ खे़ने़ॽ के़भोसाङ्बा पोङ्ङा॥ आङ्गाॽ आम्बा सावलरे़आङ् कन् पाःन्निन् निङ्वाॽ खोसुआङ् वाॽ॥” 18 खे़न् ने़प्माङ्ले़ यहवे दाङ्बाल्ले़ कुदगि माङ्हुक् चोगे़सु॥ हे़क्क्याङ् जोनाथाने़न् कुहिम्मो नुःक्खे़, कर दाउदे़न् होरेसओए याःक्ते़॥ 19 सावले़न् गिबा मे़प्मनाबा ते़न्नो वये़ल्ले़ जिपबा मनाहाॽरे़ खुने़ॽओ इङ्घङ् मे़दारु, “दाउदे़ङ्ग ये़सिमोनलाम् लाङ्गे़त् यो ले़प्साङ्बा हकिला कोःक्माबा होरेसबा यक्हाॽओ चिङ्सिङ्ल वाॽ॥ 20 आल्ल आदाङ्बा हाङ्ङे, आप्फाल्ले़ युमा के़सिराॽधाङ् ये़ॽओ, हे़क्क्याङ् खे़न् के़हुक्को हुक्सुप्मा याःम्बक्किन् आनिगे़न्लो॥” 21 हे़क्क्याङ् सावलरे़ मे़त्तुसि, “यहवे दाङ्बाल्ले़ खिनिॽ मुॽइसाम् के़बिरिर, थेआङ्भे़ल्ले़ आङ्गाॽ खिनिॽ याप्मि लुङ्माॽ के़दुक्ति॥ 22 आल्ल पेगे़म्मे़ॽआङ् यारिप् पोःक्खाम्मे़ॽ, हे़क्क्याङ् खे़न् आत्तान् वाॽ खे़ब्याङ् हाःत्ले़ खुने़ॽ निसु कुसिङ् निःत्ते़म्मे़ॽ॥ खे़न् साॽरिक् चाःप्पा चोःक्मु के़लॽबा खे़प्सुङ्ङाङ् वाॽ॥ 23 खुने़ॽ आत्तान् चिङ्सिङ्, के़रे़क् कुजिङ्सिङ्मा ते़न्निन् मिक्चो मे़त्ते़म्मे़ॽ, हे़क्क्याङ् आङ्गाॽओ इङ्घङ् ताराम्मे़ॽ॥ हे़क्क्याङ् आङ्गाॽआङ् खिनिॽनु पेःक्का॥ खे़न् कन् लाजेॽओ वाॽने़फग्र यहुदाबा के़रे़क् हिम्सयङ्लुम्मोनुसाङ् कोःत्तुङ् लःत्तुङ्ॽ॥” 24 खे़ङ्हाॽ हाराहारा सावले़न्नुःल्ले़आङ् तगि जिप ले़प्माङ् मे़धासिङ्॥ खे़म्भे़म्ले़ दाउदे़न् नु कुमनाहाॽ ये़सिमोनलाम् यो लाङ्गे़न् ले़प्साङ्बा अराबाबा माओन मुरे़क् खारे़क्पा ये़ःङ्घादे़न्नो मे़वये़॥ 25 हे़क्क्याङ् सावले़न् नु कुमनाहाॽरे़ कोःप्मा मे़हेःक्तु॥ दाउदे़ल्ले़ कन् पाःन्निन् खे़प्सुआङ् खुने़ॽ याक्केःक् ले़प्माङ् थासिङ्, हे़क्क्याङ् ये़सिमोनलाम् लाङ्गे़न् ले़प्साङ्बा माओन मुरे़क् खारे़क्पा ये़ःङ्घादे़न्नो वाॽमा हेःक्ते़॥ सावलरे़ खे़प्मो वाॽ के़लॽबा निङ्वाॽ खोसुआङ् दाउदरे़ कुगोःत्छे़ माओन्बा मुरे़क् खारे़क् ये़ःङ्घादे़न् ले़प्साङ् थासिङ्॥ 26 सावले़न् कोःक्माल्ले़ नाहाङ् ले़प्माङ् हे़क्क्याङ् दाउदे़न् कोःक्माल्ले़ कत्नाहाङ् ले़प्माङ् पोःक्खे़सि॥ दाउद नु कुमनाहाॽ खे़त्छिङ्मा फाॽआङ् लाम्गोःत्नु मे़बत्छे़॥ सावले़न् नु कुमनाहाॽ खुन्छिॽ ते़म्से़ निःत्ताङ् निःत्ताङ् मे़गे़रे़॥ 27 खे़ब्याङ् लत्छा इङ्घङ्साबाधिक् सावलरे़ॽओ त्ये़आङ् मे़त्तु, “हारा फे़रे़ॽ, थेआङ्भे़ल्ले़ पलिस्तिहाॽरे़ आनिॽ लाजेॽओ ते़न्धङ् मे़जोगुर मे़याक्॥” 28 खे़ल्ले़चोगुल्ले़ सावलरे़ दाउदे़न् नाःप्मा नाॽरुआङ् पलिस्तिहाॽनु थङ् चोःक्से़ नुःक्खे़॥ हे़क्केःल्ले़ खे़न् ते़न्निन् “सेलाहामालेकोथ” मे़मे़त्तु॥ 29 खे़ब्याङ् खे़प्मोनु दाउदे़न् पे, हे़क्क्याङ् एन-गदिबा यक्हाॽओ वाॽमा हेःक्ते़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.