१ सामुए़ल 22 - लिम्बुनिङ्वाॽफुसाम्बाहाॽ मे़से़रुसिबा 1 दाउदरे़ गात पाङ्जुम्मिन् ले़रुआङ् अदुल्लामबा फुक्कुओ पेआङ् चिङ्सिङ्॥ खे़ल्ले़ कुम्भुॽसि नु खे़ल्ले़ के़रे़क् कुहिम्सयङ्हाॽरे़ कन् पाःन्निन् मे़घे़प्सुआङ् खे़ङ्हाॽ खुने़ॽ कुदुम्से़ मे़बे॥ 2 तुक्खेओ के़धाबा, सिङ्नात्तो के़धाबा नु लुङ्हान् हे़क्क्याङ् कुनिङ्वाॽ मे़न्दामनाबा मनाहाॽ हप्मे़न् किप् लिसि यारिक् खुने़ॽओ मे़जुप्से़, हे़क्क्याङ् खुने़ॽ खे़ङ्हाॽरे़ खुन्छिॽ लाम्लोबा पोःक्खे़॥ 3 खे़प्मोलाम् दाउदे़न् मोआबबा मिस्पाओ पे हे़क्क्याङ् खे़म्मोबा हाङ्ङिन् मे़त्तु, “निङ्वाॽफुमाङ्ङिल्ले़ आङ्गाॽ आलागि थे चोगु खे़न् निःन्धो मे़म्बोङ्ङे थारिक् आङ्गाॽ आम्बा नु आम्मा खे़ने़ॽओ युङ्सिररो॥” 4 खे़ब्याङ् दाउदरे़ कुम्बा नु कुम्मा मोआबबा हाङ्हिम्मो युक्खुधसि, हे़क्क्याङ् दाउदे़न् कुयक्को युङे़ थारिक् खे़ङ्हाॽ हाङ्हिम्मोए युङे़सि॥ 5 कर माङ्निङ्वाॽपान् के़बाःप्पा गादरे़ दाउदे़न् मे़त्तु, “खे़ने़ॽ यक्को मे़युङे़न्ने़ॽ॥ हारा यहुदा लाजेॽ पेगे़ॽ॥” खे़ल्ले़चोगुल्ले़ दाउदे़न् हारेतबा ताम्भुङ्ङो पे॥ 6 आल्ल सावलरे़ दाउद नु खुने़ॽ कुमनाहाॽ निमे़धाबे़ के़लॽबा पाःन्निन् खे़प्सु॥ सावले़न् गिबाबा कोःक्माल्ले़ कुजङ्ङोबा हुम्बे़प्पा सिङ्बुङ्ङिल्ले़ कुसिःक्तो कुहुक्को लाःक्किन् याङ्सिङ्ङाङ् युङे़॥ खे़ल्ले़ के़रे़क् सुहाङ्युक्पाहाॽ कुघिरि मे़ये़बे़॥ 7 सावलरे़ खे़न् कुमनाहाॽ मे़त्तुसि, “बिन्यामिनिसे, आबाःन्निन् नुरिक्काङ् खे़प्साम्मे़ॽ॥ यिसैरे़ कुस्साःल्ले़ खे़निॽ के़रे़क् प्याङ्सिहाॽ नु चे़ल्ले़क्सेॽ इक्थिक् के़बिरिबि? इ हे़न्छिङ् नु किप् थक्सुबाहाॽरे़ खुनिॽ थक्मोबा चोगिगे़ फाॽआङ् निङ्साङ् के़जोगुम्बि? 8 खे़ल्ले़चोगुल्ले़ए खे़निॽ के़रे़क्ले़ आङ्गाॽ आदक्ले़ङ्वाओ चे़म्भन् के़जोगुम्बा मेःम्बि? आङ्गाॽ आस्साःल्ले़ यिसैरे़ कुस्सा दाउदे़न्नु तङे़बाआङ् खे़निॽ के़रे़क्ले़ याप्मि के़म्मे़त्तिन्! खे़निॽलुम्मो आतिल्ले़आङ् आङ्गाॽ आयाःम्बेओ थेआङ् निङ्वाॽ के़न्इःत्तुम्मिन्॥ आङ्गाॽ आस्साःल्ले़ए आङ्गाॽ आसे़वारोबे़न् आङ्गाॽ आदक्ले़ङ्वाओ फोःक्खुआङ् आङ्गाॽ से़प्मा फाॽआङ् हुसु खे़न्नाङ् याप्मि के़म्मे़त्तिन्॥” 9 कर सावलरे़ कुसुहाङ्युक्पाहाॽनु के़ये़प्पा एदोमि दोएगले़ खुने़ॽ मे़त्तु, “आङ्गाॽ यिसैरे़ कुस्सान् अहितुबरे़ कुस्सा अहिमेलेक्के़न् वाॽबा नोब पाङ्भेॽओ फे़रे़र पत्छे़बा निसुङ्॥ 10 अहिमे़ले़क्किल्ले़ दाउदरे़ कुलागि यहवे दाङ्बान् सुजा नाःक्तु॥ हे़क्क्याङ् खे़ल्ले़ चामा कुजा नु पलिस्ति गोल्यतरे़ कुदाभेःन्नाङ् दाउदे़न् पिरु॥” 11 खे़म्ब्याङ् सावलरे़ नोबओ माङ्से़वा के़जोःक्पा निङ्वाॽफुसाम्बा अहिमेलेक्के़न् नु नोबओ निङ्वाॽफुसाम्बा याःम्बक् के़जोःक्पाहाॽरे़ खुनिॽ हिम्सयङ्हाॽ उःप्पाङ्घुसि॥ हे़क्क्याङ् खे़ङ्हाॽ के़रे़क् सावल हाङ्ङिल्ले़ कुदगि मे़जुप्से़॥ 12 सावलरे़ अहिमेलेक्के़न् मे़त्तु, “अहितुबरे़ कुस्साए, आङ्गाॽ आबाःन्निन् खे़प्से़ॽ॥” “ओगनु आदाङ्बे” लॽरिक् अहिमेलेकरे़ नोगप् पिरु॥ 13 सावलरे़ खे़न् मे़त्तु, “खे़ने़ॽ नु यिसैरे़ कुस्साःल्ले़ आङ्गाॽ आदक्ले़ङ्वाओ थेआङ् चे़म्भन् के़जोगुसि? खे़ने़ॽ खे़न् थेआङ् चामा कुजा नु ताभेन् के़बिरु, हे़क्क्याङ् खे़ल्ले़ कुलागि निङ्वाॽफुमाङ्ङिन् सुजा के़नाःक्तुबाबे? आल्लो खे़न् आङ्गाॽ आदक्ले़ङ्वाओ पोगे़आङ् वाॽ, हे़क्क्याङ् कन् ये़म्मो आङ्गाॽ से़प्मा फाॽआङ् खुने़ॽ सुक्कार युङ्॥” 14 अहिमे़ले़क्किल्ले़ नोगप् पिरु, “आदाङ्बारे़ के़रे़क् के़सेवोरोबाहाॽओ दाउद हे़क्तङ्बा नसान् चोःक्मा सुक्के़दे़प्पा सुम्बोधासाबा मना, हाङ्ङिल्ले़ए कुम्बाङ्लुमिॽ, आदाङ्बा कम्ब्राङ् के़मे़प्पाहाॽरे़ खुनिॽ थक्पेबा, आदाङ्बारे़ के़हिम्सयङ्ङो मिङ्सो इङ्धाङ् के़घोबा दाउद हे़क्तङ्बा मना वेॽ हात् वाॽबे? 15 अक्तङ्बा ये़म्मो खे़ल्ले़ कुलागि निङ्वाॽफुमाङ्ङिन्नु सुजा नाःक्तुङ्बान् थिक्सिगेक्पाबि? कल्ले़ कुयाःम्बेओ आदाङ्बारे़ आङ्गाॽ नु आहिम्सयङ्हाॽ फोत्या आङ्गुःत्ते़न्ने़ॽओ, थेआङ्भे़ल्ले़ आदाङ्बारे़ के़दक्ले़ङ्वाओ के़वाॽबा चे़म्भन्निल्ले़ कुयाःम्बेओ थेआङ् कुसिङ् मे़न्निःत्ते वाॽआरो॥” 16 कर हाङ्ङिल्ले़ मे़त्तुॽ, “अहिमे़ले़क्के! खे़ने़ॽ नु के़हिम्सयङ्हाॽ के़रे़क् सिमाए पोङ्लो॥” 17 खे़ब्याङ् हाङ्ङिल्ले़ कुबेसाङ् कुघिरि के़ये़प्पा कुगम्ब्राङ्हाॽ मे़त्तुसि, “पेगे़म्मे़ॽआङ् यहवे दाङ्बाल्ले़ कुनिङ्वाॽफुसाम्बाहाॽ से़रे़म्सिम्मे़ॽ, थेआङ्भे़ल्ले़ खे़ङ्हाॽआङ् दाउद ले़प्माङ् मे़वाॽ॥ खे़ङ्हाॽरे़ दाउदे़न् खे़त्छिङ्ङे़र पत्छे़बा मे़निसुसाङ् आङ्गाॽ मे़म्मे़त्ताङ्ङिन्॥” कर हाङ्ङिल्ले़ कुसे़वारोबाहाॽ यहवे दाङ्बाल्ले़ कुनिङ्वाॽफुसाम्बाहाॽ से़प्मासि मे़न्दे़न्दे़न्॥ 18 खे़ल्ले़चोगुल्ले़ सावलरे़ एदोमि दोएगे़न् मे़त्तु, “दोएगे, पेगे़ॽआङ् निङ्वाॽफुसाम्बाहाॽ से़रे़से़ॽ॥” खे़ब्याङ् एदोमि दोएगे़न् पेआङ् निङ्वाॽफुसाम्बाहाॽ से़रुसि, हे़क्क्याङ् खे़न् ये़न् खे़ल्ले़ ये़प्पोङ्ङाङ् ङासि नाइनासुःत् एपोद तेत् के़जाङ्बा मनाहाॽ से़रुसि॥ 19 हे़क्क्याङ् खे़ल्ले़ निङ्वाॽफुसाम्बाहाॽरे़ खुनिॽ ये़क्यक् नोबबा के़रे़क् कुसक्मा के़याक्पा थक्साहाॽ ताभेःल्ले़ च्ये़प्तु से़रुसि—ये़म्बित्छा, मे़न्छुमा, हिन्जाॽबित्छाॽ, नुगे़धुङ्बा अङे़ःक्वा, कुम्बाबा कुम्मामा पित्, अदङ् नु मे़ल्लुक् मे़ःन्दा के़रे़क् से़रुसि॥ 20 अहिमे़ले़क्के़ल्ले़ कुस्सा, अहितुबरे़ कुम्मे़न्छाॽ अबियाथारे़न् खे़त्छिङ्ङाङ् दाउदरे़ओ पे॥ 21 सावलरे़ आक्खेलॽरिक् यहवे दाङ्बे़ल्ले़ कुनिङ्वाॽफुसाम्बाहाॽ से़रुसि के़लॽबा पाःन्निन् खे़ल्ले़ दाउदे़न् चे़क्तु॥ 22 हम्भ्याङ् दाउदरे़ खे़न् मे़त्तु, “खे़न् ये़न्नो एदोमि दोएगे़न् खे़प्मोए वये़, हे़क्क्याङ् खे़ल्ले़ सावले़न् मे़त्तु के़लॽबा पाःन्निन् आङ्गाॽ निङ्वाॽ खोसुङ्ङाङ् वये़॥ खे़ने़ॽ के़म्बा नु कुहिम्सयङ् के़रे़क्ले़ खुनिॽ सिमे़न् आङ्गाॽ चोगुङ्ङिल्ले़ए पोःक्खे़बारो॥ 23 खे़ने़ॽ आङ्गाॽनुए कप्मो युङे़ॽ, मे़गिसे़न्ने़ॽ॥ खे़ने़ॽ से़प्मा के़गोःप्पे़ल्ले़ आङ्गाॽआङ् से़प्माए कोःत्ताङ्ङाङ् वाॽ॥ खे़ने़ॽ आङ्गाॽनुए के़युङ्ङिल्ले़ के़हिङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.